ଆରାମ୍ ବଇ 34

ଦୀଣାଙ୍କ୍‍ ଆର୍‌ଲା ମାଡ଼୍‌ତାଦ୍‌

1 ତାନ୍‌ପେର୍‌କେ ଲେୟାନାଗାକଞ୍ଚ୍‍ ଜନ୍ମ ଆତ୍‍ତେ ଦୀଣା ପେଦେର୍‍ତେ ଯାକୁବନ୍‍ ମାୟାଡ଼୍‍ ଆ ଦେଶ୍‍ତେ ପିକିନ୍‍ତଡ଼୍‍ କାଇଲାନଙ୍କ୍‌ ଆତ୍‌ତେ । 2 ଆସୁଟ୍‍ ହିବ୍ଦୀୟ ହମୋର ପେଦେର୍‍ତେ ଦେଶ୍‍ତେ ଅଦିପତିନ୍‍ ମାର୍‍ ଶିକିମ୍‌ ତାଂକିଙ୍କ୍‍ ଉଡ଼୍‍ତଣ୍ଡ୍‍; ମେଣ୍ଡେ ତାଂକିଙ୍କ୍‍ ଅସ୍‍ ତାନ୍‍ ତଡ଼୍‍ ଉଞ୍ଜି ତାଂକିଙ୍କ୍‍ କରାପ୍‍ ମାଡ଼୍‍ତଣ୍ଡ୍‍। 3 ମେଣ୍ଡେ ଯାକୁବନ୍‍ ଆ ପିକିର୍‍ ଦୀଣାନାଗାକଞ୍ଚ୍‌ ଅନ୍‍ ମନ୍‍ ପସନ୍ଦ୍ ଆତ୍‌ତାଙ୍କ୍‌ ଅଣ୍ଡ୍‍ ଆ ପିକ୍‍ତିଙ୍କ୍‍ ପ୍ରେମ ମାଡ଼ି ତାଂକିଙ୍କ୍‍ ମିଙ୍କ୍‌ତା ମିଙ୍କ୍‌ତା ଗଟି କେତ୍‍ତଣ୍ଡ୍‍। 4 ତାନ୍‌ପେର୍‌କେ ଶିକିମ୍‌ ତାନ୍‍ ବାବାଙ୍କ୍‍ ହମୋରତିଙ୍କ୍‍ କେତ୍‍ତଣ୍ଡ୍‍, ନିମେ ଇ ପିକ୍‍ତଡ଼୍‍ ନାକିଙ୍କ୍‍ ପେଣ୍ଡୁଲ୍‍ ମାଡ଼ିମ୍‍।

5 ତାନ୍‍ ପେର୍କେ ଯାକୁବ୍‍ ତାନ୍‍ ପିକ୍‍ତିଙ୍କ୍‍ ଦୀଣାଙ୍କ୍‍ ଶିଖିମ୍ କରାପ୍‍ ମାଡ଼ିମାନ୍ଦାନାଦ୍‍ ଗଟ୍‍ କେଞ୍ଜ୍‍ତଣ୍ଡ୍‍; ଆ ସମୟ୍‍ତେ ଅନ୍‍ ମାର୍‍କ୍‍ ୱାୟାନା ପଶୁମାନ୍ଦ୍‍ତଡ଼୍‍ ମାତ୍‍ତାଙ୍କ୍‍ ଯାକୁବ ଅଡ଼୍‍ ୱାନା ଯାକ କଟ ଆସ୍‍ ମାତ୍‍ତଣ୍ଡ୍‍। 6 ତାନ୍‍ପେର୍କେ ଶିକିମ୍‌ତେ ବାବାଲ୍‍ ହମୋର ଯାକୁବନ୍‍ ତଡ଼୍‍ ତିର୍‍ୟାନଙ୍କ୍‍ ଆତ୍‌ତଣ୍ଡ୍‌ । 7 ମେଣ୍ଡେ ଯାକୁବନ୍‍ ମାର୍‍କ୍‍ ଆ କବର୍‍ କେଞ୍ଜି ୱାୟାନାଗାଙ୍କ୍‍ ୱାସ୍‍ମାତ୍‍ତଡ଼୍‍; ମେଣ୍ଡେ ଶିଖିମ୍ ଯାକୁବନ୍‍ ମାୟାଡ଼୍ ତଡ଼୍‍ ଉଞ୍ଜି ଇସ୍ରାଏଲ୍‌ ବିରୁଦ୍ଦ୍‍ତେ ବେନ୍‍ ମାଡ଼୍‌ଇଲ୍‌ୱେ ପିନ୍ଦ୍‍ୱେ ପାଡ଼ିୟ୍‌ ମାଡ଼ି ମାତ୍‍ତଣ୍ଡ୍‍, ତାନ୍‍ ସେଙ୍ଗେ ଅଡ଼୍‍ ମନ୍‍ତେ ଲୋପେ ନୁ ଗାଟି କପାମ୍‍ତେ ମାତ୍‍ତଡ଼୍‍। 8 ଆସୁଟ୍‍ ହମୋର୍‍ ଅଡ଼୍‍ତଡ଼୍‍ ତିର୍‍ୟାତିର୍‍ୟି ଆସ୍‍ କେତ୍‍ତଣ୍ଡ୍‍, ମିଇ ପିକ୍‍ତିଙ୍କ୍‍ ନା ମାର୍‍ ଶିକିମ୍‌ ପସନ୍ଦ୍‌ ମାଡ଼ି ମିନ୍ଦେଣ୍ଡ୍‌; ନାନ୍‍ ଅନୁରଦ୍‍ ମାଡ଼ୁତାନ୍‍, ନା ମାରିନ୍‍ ତଡ଼୍‍ ତାଂକିଙ୍କ୍‍ ପେଣ୍ଡୁଲ୍‍ ମାଡ଼ିମୁଟ୍‍। 9 ମେଣ୍ଡେ ମା ତଡ଼୍‍ ପେଣ୍ଡୁଲ୍‍ ସମ୍ପର୍କ ନେହ୍‍ମୁଟ୍‍, ମି ପିକି ମାକିଙ୍କ୍‍ ଇମୁଟ୍‍, ମା ପିକି ମିଡ଼୍‍ ଅୟ୍‌ମୁଟ୍‍। 10 ଆଲାଇତ୍କେ, ମିଡ଼୍‍ ମା ତଡ଼୍‍ ମାନ୍ତ୍‍ତିଡ଼୍‍; ଦେଶ୍‍ସାରେ ମି ମୁନେ ପଡ଼େମ୍‍ ଆସ୍‍ ମିନ୍ଦେ, ଆଲାଇତ୍କେ ବାସ ମାଡ଼ାଟ୍‌ ନୁ ବେପାର୍‌ ମାଡ଼ାଟ୍‍ ନୁ ଅଦିକାର୍‍ ମାଡ଼ାଟ୍‍।

11 ମେଣ୍ଡେ ଶିକିମ୍‌ ଦୀଣାନ୍‍ ବାବାଙ୍କ୍‍ ନୁ ଦାଦାଲଡ଼୍‍କ୍‍ କେତ୍‍ତଣ୍ଡ୍, ନା ପର ମିୟାଦ୍‍ ଅନୁଗ୍ରହ କଣ୍ଡେ ଆୟି, ଆସୁଟ୍‍ ବାତେ କେତିତିଡ଼୍‍, ଆଦ୍‍ ନାନ୍‍ ଇଦ୍‍ତାନ୍‍। 12 କାର୍‌ର୍ସା ନୁ ଦାନ ବେସର୍‍ ନାର୍ଗେ ତାଲ୍‍କିତିଡ଼୍‍, ମି ଗଟ୍‍ ଅନୁସାରେ ଆୱ୍‍ ଇଦ୍‍ତାନ୍‍; ମାତ୍ରମ୍‌ ବେଲାଇତ୍କେ ବା ନା ତଡ଼୍‍ ଇ ପିକ୍‍ତିଙ୍କ୍‍ ପେଣ୍ଡୁଲ୍‍ ମାଡ଼ିମୁଟ୍‍। 13 ଆଲାଇତ୍କେ ଶିକିମ୍‌ ଯାକୁବନ୍‍ ମାର୍‍କିଡ଼୍‍ ଏଲାଡ଼୍‍ ଦୀଣାଙ୍କ୍‍ କାରାପ୍‍ ମାଡ଼୍‍ତାଙ୍କ୍‍ ଅଡ଼୍‍ ଶିଖିମ୍‍ ନୁ ତାନ୍‍ ବାବାଲ୍‍ ହମୋର୍‍ ତଡ଼୍‍ ଛାଲାକ୍‍ତେ ତିର୍‍ୟା ତିରିୟି ଆସ୍‍ କେତ୍‍ତଡ଼୍‍, 14 ମାମେ ଅସୁନ୍ନତ ନାରୁମ୍‌ ମା ଏଲାଡ଼୍‍ତିଙ୍କ୍‍ ଇଦାନଙ୍କ୍‍ କାମ୍‍ ମାଡ଼୍‍ ପାର୍‍ୱମ୍‍, ଆଲା ମାଡ଼୍‍କେ ମାୟାଦ୍‍ କେତି ଆଦ୍‌ତେ । 15 ଆଲାଇତ୍କେ ଅଣ୍ଡୟ୍‍ ପାଡ଼୍‍ୟି ମାଡ଼ାଟ୍, ମା ଲେକାମ୍‍ ମିଡ଼୍‍ ସାରେତଡ଼ି ନାରୁଡ଼ି ସୁନ୍ନତ ଆଦ୍‌ତିଡ଼୍‌, ଆଲାଇତ୍କେ ମାମେ ମି ଗଟ୍‍ତେ କେଞ୍ଜିତମ୍‍। 16 ମାମେ ମିକିଙ୍କ୍‍ ପିକି ଇଦ୍‍ତମ୍‍ ନୁ ମି ପିକିଙ୍କ୍‌ ପେଣ୍ଡୁଲ୍‌ ମାଡ଼ିତମ୍‍, ମେଣ୍ଡେ ମି ତଡ଼୍‍ ମାଞ୍ଜ୍‍ ଅଣ୍ଡୟ୍‍ ନାରୁଡ଼୍‍ ଆଦ୍‌ତମ୍‌ । 17 ମାତ୍ରମ୍‌ ମିଡ଼୍‍ ବେସୁଙ୍କ୍‍ ସୁନ୍ନତ ବିଷୟ୍‍ତେ ମା ଗଟି କେଞ୍ଜ୍‍ୱିଡ଼୍‍, ଆଲାଇତ୍କେ ମାମେ ଆ ପିକ୍‍ତିଙ୍କ୍‍ ପୟ୍‍ସ୍‍ ଅଦ୍‍ତମ୍‍।

18 ଆସୁଟ୍‍ ତାମ୍ ଆଦ୍‍ଗଟ୍‍ତେ ହମୋର୍‍ ନୁ ତାନ୍‍ ମାର୍‍ ଶିକିମ୍‌ ସନ୍ତୁଷ୍ଟ ଆତ୍‍ତଡ଼୍‍। 19 ମେଣ୍ଡେ ଆ ଲେୟଣ୍ଡ୍‍ ଗାଟି ସିଟ୍‍ପାଟ୍‍ ପାଡ଼ିୟ୍‌ ମାଡ଼୍‍ତଣ୍ଡ୍‍; ଇତ୍କେ ଅଣ୍ଡ୍‍ ଯାକୁବନ୍‍ ମାୟାଡ଼୍‌ତଡ଼୍‌ ମାତ୍‌ତଣ୍ଡ୍‍। ଆ ଶିଖିମ୍‍ ତାନ୍‍ ବାବାନ୍‍ ପରିବାର୍‍ ସାରେତଡ଼୍‍ଆଗାଙ୍କ୍‍ ଗାଟି ସାଉକାରି ମାତ୍‍ତଣ୍ଡ୍।

20 ତାନ୍‌ପେର୍‌କେ ହମୋର ନୁ ତାନ୍‍ ମାର୍‍ ଶିକିମ୍‌ ତାନ୍‍ ନଗର୍‌ତେ ଗାରେ କଞ୍ଚ୍‍ ୱାସ୍‍ ନାର୍‍ଦେ ନାରୁଡ଼୍‍ ତ ଗଟି ତିରିୟାତିରିୟି ଆସ୍‌ କେତ୍‍ତଡ଼୍‍। 21 ଇ ନାରୁଡ଼୍‍ ମା ତଡ଼୍‍ ବିରୁଦ୍ଦିଡ଼୍‌ ଆୟଡ଼୍‍; ଆଦିନ୍‌ ମାଇଦିଙ୍କ୍‍ ଇଡ଼୍‍କିଙ୍କ୍‍ ଇ ଦେଶ୍‍ତାଗ୍‍ ମାନ୍ଦାନଙ୍କ୍‍ ନୁ ବେପାର୍‌ ମାଡ଼ାଙ୍କ୍‍ ଇମୁଟ୍‍, ଇତ୍କେ ଉଡ଼ାଟ୍‍, ଇ ଦେଶ୍‍ ଅଡ଼୍‍ ସେଙ୍ଗେ ନାର୍ଗେ ଆଦ୍‌ତେ; ମେଣ୍ଡେ ମାନ୍‍ନା ଅଡ଼୍‍ ପିକିଙ୍କ୍‍ ଗ୍ରହଣ ମାଡ଼ିକା ନୁ ମାନ୍‍ ପିକିଙ୍କ୍‍ ଅଡ଼୍‍କିଙ୍କ୍‍ ଇନା। 22 ମାତ୍ରମ୍‌ ଅଡ଼୍‌ୱାଦ୍‍ ଇଦ୍‍ ଅଣ୍ଡୟ୍‍ ସାହାସ୍‌ ମିନ୍ଦେ, କି ମା ଲୋପେ ସାରେ ନାରୁଡ଼୍‍ ବେସୁଙ୍କ୍‍ ଅଡ଼୍‍ ଲେକାମ୍‍ ସୁନ୍ନତ ଆଦ୍‌ତିଡ଼୍‌, ଆଲାଇତ୍କେ ଅଡ଼୍‍ ମାନ୍‍ ତଡ଼୍‍ ମାଞ୍ଜ୍‍ ଅଣ୍ଡୟ୍‍ ନାରୁଡ଼୍‍ ଆଦାଙ୍କ୍‌ ଇଚ୍ଛା ଆଦ୍‍ତଡ଼୍‌। 23 ଅଡ଼୍‍ ଦନ୍‍, ସମ୍ପତ୍ତି ନୁ ଜିୱାକ୍‌ ବା ମାନାୱ୍‍ ଆୟ ? ଇତ୍କେ ମାନା ଅଡ଼୍‍ ଗଟ୍‍ ଉଙ୍କାର୍‌ ୱେଟିକାଡ଼୍‌ ? ଆଦ୍‍ ମାଡ଼୍‍କେ, ଅଡ଼୍‍ ମାନ୍‍ତଡ଼୍‍ ମାନ୍ତତଡ଼୍‍। 24 ଆସୁଟ୍‍ ହମୋର୍‍ ନୁ ତାନ୍‍ ମାର୍‍ ଶିକିମ୍‌ତେ ଇ ଗଟ୍‍ତେ ତାନ୍‍ ନାର୍‍ଦେ ଆର୍‍ ଇସ୍‍ ବାୟ୍‌ଦେଉଡାନ୍‌ ନାରୁଡ଼୍‌ ସାରେ ନାରୁଡ଼୍‍ ରାଜି ଆତ୍‍ତଡ଼୍‍; ଆସୁଟ୍‍ ତାନ୍‍ ନଗର୍‌ତେ ଆର୍‍ ଇସ୍‍ ବାୟ୍‌ଦେଉଡାନ୍‌ ସାରେ ନାରୁଡ଼୍‍ ସୁନ୍ନତ ଆଦ୍‍ତଡ଼୍‌ ।

25 ମେଣ୍ଡେ ମୁଣ୍ଡ୍‍ଦିନାନେ ଅଡ଼୍ ରଗ୍‌ ଆତ୍‌ତାଙ୍କ୍‌, ଦୀଣାନ୍‍ ଦାଦାଲ୍‍ ଶିମିୟନ୍‍ ନୁ ଲେବି, ଯାକୁବନ୍‍ ଇ ଇର୍‍ୱୁଡ଼୍‍ ପେକଡ଼୍‍ ତାନ୍‍ ସାକୁ ପୟ୍‍ସ୍‍ ୱେର୍‍ୱକଟ ନଗରତିଙ୍କ୍‍ ଆକ୍ରମନ୍‌ ମାଡ଼ି ସାରେ ନାରୁଡ଼୍‍କିଙ୍କ୍‍ ଆୱ୍‍କ୍‍ତଡ଼୍‍। 26 ମେଣ୍ଡେ ହମୋରତିଙ୍କ୍‍ ନୁ ତାନ୍‍ ମାର୍‍ ଶିକିମ୍‌ତିଙ୍କ୍‍ ସାକୁ ଦେବ୍‍ତେ ଆୱ୍‍କି ଶିଖିମ୍‌ତେ ଲୋନ୍‍କଞ୍ଚ୍‍ ଦୀଣାଙ୍କ୍‍ ଅତ୍‍ତଡ଼୍‍। 27 ଯାକୁବନ୍‍ ପିଲା ଆୱୁକ୍‍ତେ ନାରୁଡ଼୍‍ ଗାରେ ୱାସ୍‍ ନାର୍‍ଦିଙ୍କ୍‍ ଲୁଟ୍‍ ମାଡ଼୍‍ତଡ଼୍‍, ବାତେଙ୍କ୍‍ଇତ୍କେ ଅଡ଼୍‍ ହେଲାଡ଼୍‍ତିଙ୍କ୍‍ ଆ ନଗରତେ ନାରୁଡ଼୍‍ ନଷ୍ଟ ମାଡ଼ି ମାତ୍‍ତଡ଼୍‍। 28 ମେଣ୍ଡେ ଅଡ଼୍‍ ମେଣ୍ଢା ନୁ ଗଡ୍‌କ୍‍ ନୁ ଗଦସାରେ, ମେଣ୍ଡେ ନଗର୍‌ତେ ନୁ ୱାୟେତ୍‌ ସାରେ ଜିନିଷ୍‍ ଅତ୍‍ତଡ଼୍‍। 29 ମେଣ୍ଡେ ଅଡ଼୍‍ ପିଲାକିଙ୍କ୍‍ ନୁ ମୁତେକିଙ୍କ୍‍ ବନ୍ଦି ମାଡ଼ି ସାରେ ଦନ୍‍ ନୁ ଲୋତ୍‍ତେ ସାରେ ତାୱିଙ୍କ୍‍ ଲୁଟ୍‍ ମାଡ଼୍‍ତଡ଼୍।

30 ଆସୁଟ୍‍ ଯାକୁବ୍‍ ଶିମିୟନ୍‍ ନୁ ଲେବିଙ୍କ୍‍ କେତ୍‍ତଣ୍ଡ୍‍, ମିଡ଼୍‍ ଇ ଦେଶ୍‍ତେ, କିଣାନୀୟ ନୁ ପରିଷୀୟ ନାରୁଡ଼୍ ଗାରେ ନାକିଙ୍କ୍‍ ପିନ୍ଦ୍‍ୱାଦ୍‍ ଗାବ୍‍ ଲେକାମ୍‍ ମାଡ଼ି ଦାନ୍ଦେ ମାଡ଼୍‍ତିଡ଼୍‍; ନା ନାରୁଡ଼୍‍ ସୁକୁକେ, ଆଦିନ୍‌ ମାଇଦିଙ୍କ୍‍ ଅଡ଼୍‍ ନା ବିରୁଦ୍‍ତେ ଅଣ୍ଡୟ୍‍ ଆସ୍‍ ନାକିଙ୍କ୍‍ ଆୱ୍‍କିତଡ଼୍‍; ଆସୁଟ୍‍ ସାରେ ପରିବାର୍‍ ନଷ୍ଟ ଆତ୍‌ତମ୍‌ । 31 ମାତ୍ରମ୍‌ ଅଡ଼୍‍ ଉତ୍ତର୍‍ ଇତ୍‍ତଡ଼୍‍, ଦାଃରିଲ୍‌ ଲେକାମ୍‍ ମା ଏଲାଡ଼୍‍ତେ ତଡ଼୍‍ ବ୍ୟବହାର୍‍ ମାଡ଼ାନାଦ୍‍ ବାତ୍‍ତେ ଅନାଦ୍‍ ଅଦିକାର୍‌ ?