1 ତାନ୍‌ପେର୍କେ ଯୋଷେପ୍‌ ଆଞ୍ଜ୍‌ ଫାରୋଙ୍କ୍‌ କାବୁର୍‌ ଇସ୍‌ କେତ୍‌ତଣ୍ଡ୍‌, ନା ବାବାଲ୍‌ ନୁ ଦାଦାଲଡ଼୍‌ କିଣାନ୍‌ ଦେଶ୍‌କଞ୍ଚ୍‌ ତାମ୍‌ ମେକା ଗଡ୍‌କ୍‌ ମାନ୍ଦେ ସାରେ ତାସ୍‌ମିନ୍ଦେଡ଼୍‌; ଉଡ଼ା, ଅଡ଼୍‌ ଗୋଶନ୍‌ ପ୍ରଦେଶ୍‌ତାଗେ ମିନ୍ଦେଡ଼୍‌। 2 ମେଣ୍ଡେ ଯୋଷେପ୍‌ ତାମ୍‌ ଦାଦାଲଡ଼୍‌ ଲୋପେଙ୍କ୍‌ ଏଇୱୁଡ଼୍‌କ୍‌ ଅସ୍‌ ଫାରୋନ୍‌ ତଡ଼୍‌ କାଲ୍‌ପ୍‌ତଣ୍ଡ୍‌। 3 ଆସୁଟ୍‌ ଫାରୋ ଯୋଷେପ୍‌ତେ ଦାଦାଲଡ଼୍‌ ପାଚାରା ମାଡ଼୍‌ତଣ୍ଡ୍‌, ମିୟାଦ୍‌ ବାତେ ବେପାରିଡ଼୍‌ ? ଅଡ଼୍‌ ଫାରୋଙ୍କ୍‌ କେତ୍‌ତଡ଼୍‌, ନି ଦାସଡ଼୍‌ ଆନିଦାଦିଡାଗାକଞ୍ଚ୍‌ ପଶୁ ମେୟ୍‌ତାନଡ଼୍‌।

4 ଅଡ଼୍‌ ଫାରୋଙ୍କ୍‌ ମେଣ୍ଡେ କେତ୍‌ତଡ଼୍‌, ମାମେ ଇ ଦେଶ୍‌ତାଗେନେ ମାନ୍ଦାନଙ୍କ୍‌ ୱାସ୍‌ମିନ୍ଦେମ୍‌; ବାତେଙ୍କ୍‌ଇତ୍କେ ନି ଇ ଦାସଡ଼୍‌କିନ୍‌ ପଶୁ ମାନ୍ଦେତ୍‌ ସେଙ୍ଗେ ବାତେବା ସାଡ଼୍‌ଇଲା; କିଣାନ୍‌ ଦେଶ୍‌ତାଗେ ଗାଟି ମରୁଡ଼ି ଆସ୍‌ମିନ୍ଦେ; ଆଦିଙ୍କ୍‌ ଅନୁରୋଦ୍‌ ମାଡ଼ୁତମ୍‌, ନିମେ ଇ ଦାସଡ଼କ୍‌ ଗୋଶନ୍‌ ପ୍ରଦେଶ୍‌ତାଗେ ମାନ୍ଦାନଙ୍କ୍‌ ଇମ୍‌।

5 ଆସୁଟ୍‌ ଫାରୋ ଯୋଷେପ୍‌ତିଙ୍କ୍‌ ଆଦେଶ୍‌ ଇତ୍‌ତଣ୍ଡ୍‌, ନି ବାବାଲ୍‌ ନୁ ଦାଦାଲଡ଼୍‌ ନି ଗାରେ ୱାସ୍‌ ମିନ୍ଦେଡ଼୍‌; 6 ମିସର୍‌ ଦେଶ୍‌ ମି ମୁନେ ମିନ୍ଦେ; ଦେଶ୍‌ତେ ସାରେକେ ସାୟେତ୍‌ ପଡ଼୍‌ୟେତାଗେ ନି ବାବାଙ୍କ୍‌ ନୁ ଦାଦାଲଡ଼୍‌କ୍‌ ମାନ୍ଦାନଙ୍କ୍‌ ଇମ୍‌; ଗୋଶନ୍‌ ପ୍ରଦେଶ୍‌ତାଗେ ଅଡ଼୍‌ ମାନିଡ଼୍‌; ମେଣ୍ଡେ ଅଡ଼୍‌ ଲୋପେଙ୍କ୍‌ ବେନଡ଼୍‌କ୍‌ ବେନଡ଼୍‌କ୍‌ ପାର୍‌ତେ ନାରୁଡ଼୍‌ ଇଞ୍ଜ ପୁନ୍ଦୁତିନ୍‌, ଅଡ଼୍‌କିଂଙ୍କ୍‌ ମା ପଶୁ ମାନ୍ଦେତ୍‌ ବାଡ଼୍‌ୟି ପଡ଼୍‌ୟିତାଗେ ଏଞ୍ଚ୍‌ତଣ୍ଡ୍‌।

7 ତାନ୍‌ପେର୍କେ ଯୋଷେପ୍‌ ତାମ୍‌ ବାବାଙ୍କ୍‌ ଯାକୁବଙ୍କ୍‌ ତାସ୍‌ ଫାରୋନ୍‌ ମୁନେ ତାତ୍‌ତଣ୍ଡ୍‌; ଆସୁଟ୍‌ ଯାକୁବ ଫାରୋଙ୍କ୍‌ ଆଶିର୍ବାଦ୍‌ ମାଡ଼୍‌ତଣ୍ଡ୍‌। 8 ଆସୁଟ୍‌ ଫାରୋ ଯାକୁବଙ୍କ୍‌ ପାଚାରା ମାଡ଼୍‌ତଣ୍ଡ୍‌, ନିୟାଦ୍‌ ବାଦ୍‌କ୍‌ତେ ଦିନାମ୍‌ ବେସର୍‌ ?

9 ଯାକୁବ ଫାରୋଙ୍କ୍‌ କେତ୍‌ତଣ୍ଡ୍‌, ନାୟାଦ୍‌ ବାଦ୍‌କ୍‌ତେ କାଲାମ୍‌ତେ ଦିନ୍‌ ଶହେ ତିରିଷ୍‌ ବର୍ଷ; ନା ବାଦ୍‌କ୍‌ତେ ଦିନ୍‌ ସୁଦୁର୍‌ ନୁ ଆପଦ୍‌ ଜନକ; ମେଣ୍ଡେ ନା ଆନିଦାଦିଡ଼୍‌ ବାଦ୍‌କ୍‌ତେ କାଲାତେ ଗେଲ୍‌ସ୍‌ତେ ଦିନାମ୍‌ତେ ଲେକାମ୍ ଆୟ। 10 ତାନ୍‌ପେର୍କେ ଯାକୁବ ଫାରୋଙ୍କ୍‌ ଆଶିର୍ବାଦ୍‌ ମାଡ଼ି ଅନ୍‌ ମୁନେଙ୍କ୍‌କଞ୍ଚ୍‌ ଆତ୍‌ତଣ୍ଡ୍‌। 11 ଆସୁଟ୍‌ ଯୋଷେପ୍‌ ଫାରୋନ୍‌ ଆଦେଶ୍‌ତେ ଲେକାମ୍‌ ମିସର୍‌ ଦେଶତ୍‌ ସାରେ ହେଞ୍ଚ୍‌ତେକଞ୍ଚ୍‌ ଇତ୍କେ, ରାମିଷେଷ୍‌ ପ୍ରଦେଶ୍‌ତାଗ୍‌ ଅଦିକାର ଇସ୍‌ ତାମ୍‌ ବାବାଙ୍କ୍‌ ନୁ ଦାଦାଲଡ୍‌କ୍‌ ମାନ୍ଦାନଙ୍କ୍‌ ଇତ୍‌ତଣ୍ଡ୍‌। 12 ମେଣ୍ଡେ ଯୋଷେପ୍‌ ତାମ୍‌ବାବାଙ୍କ୍‌ ନୁ ଦାଦାଲଡ୍‌କ୍‌ ନୁ ସାରେ ବାବାଲଡ୍‌ ପରିବାର୍‌ତିଙ୍କ୍‌ ସାରେତଡ୍‌ ପରିବାର୍‌ତେ ଲେକାମ୍‌ ତିନ୍ଦାନ୍‌ ଜିନିଷ ଇସ୍‌ ପଡ୍‌ପ୍‌ତଣ୍ଡ୍‌।

13 ଆ ସମୟ୍‌ତେ ଗାଟି ମର୍‌ଡି ଆତ୍‌ତାଙ୍କ୍‌ ସାରେ ଦେଶ୍‌ତା କାଦିତ୍ ସାମାନ୍‌ ଅବାବ ଆତ୍‌ତା ; ଆସୁଟ୍‌ ମିସର୍‌ ଦେଶ୍‌ତେ ନୁ କିଣାନ୍‌ ଦେଶ୍‌ତେ ନାରୁଡ୍‌, ମର୍‌ଡି ସେଙ୍ଗେ ଦୁର୍ବଳ ଆଦାଙ୍କ୍‌ ପସ୍ପତଡ୍‌। 14 ମେଣ୍ଡେ ମିସର୍ ଦେଶ୍‌ତାଗେ ନୁ କିଣାନ୍‌ ଦେଶ୍‌ତାଗେ ବେସର୍‌ ରୂପା ମାତ୍‌ତା, ନାରୁଡ୍‌ ଆୱ୍‌ ଇସ୍‌ କାଦି ଆସ୍‌ତାଙ୍କ୍‌ ଯୋଷେପ୍‌ ଆୱ୍‌ସାରେ ରୂପା ଗୁଡ୍‌ପି ଫାରୋନ୍‌ ଲୋନ୍‌ ତାତ୍‌ତଣ୍ଡ୍‌। 15 ଆସୁଙ୍କ୍‌ ମିସର୍‌ ଦେଶ୍‌ତାଗେ ନୁ କିଣାନ୍‌ ଦେଶ୍‌ତାଗେ ରୂପି ଅବାବ୍‌ ଆତ୍‌ତାଙ୍କ୍‌, ମିସ୍ରିୟ ନାରୁଡ୍‌ ସାରେ ଯୋଷେପ୍‌ତେ ଗାରେ ୱାସ୍‌ କେତ୍‌ତଡ୍‌ ମାକିଙ୍କ୍‌ କାଦି ଜିନିଷ୍‌ ଇମ୍‌; ମାୟାୱ୍‌ ରୂପି ତେର ମିନ୍ଦେ ଇଞ୍ଜ ବାତେଙ୍କ୍‌ ମାମ୍‌ମେ ନି ମୁନେ ଡଲିତମ୍‌ ?

16 ଆସୁଟ୍‌ ଯୋଷେପ୍‌ କେତ୍‌ତଣ୍ଡ୍‌, ମିୟାଦ୍‌ ପଶୁ ଇମ୍‌; ବେସୁଙ୍କ୍‌ ରୁପି ତେରିତା, ଆସୁଟ୍‌ ପଶୁ ବାଦୁଲ୍‌ତେ ମାମେ ମିକିଙ୍କ୍‌ କାଦି ଇଦ୍‌ତମ୍‌। 17 ଆସୁଟ୍‌ ଅଡ୍‌ ଯୋଷେପ୍‌ତେ ଗାରେ ନିଜର ନିଜର୍‌ ତାତ୍‌ତଡ୍‌; ଆସୁଟ୍‌ ଯୋଷେପ୍‌ ଗୁରାକ୍‌ ନୁ ମେଣ୍ଢା ନୁ ଗଡ୍‌ମାନ୍ଦେ ନୁ ଗଦ ଇ ସାରେ ବଦ୍‌ଲାମାଡି ଅଡ଼କିଙ୍କ୍‌ କାଦି ଇଦାନଙ୍କ୍‌ ପପ୍ପପ୍‌ତଡ୍‌; ଇଦ୍‌ ଲେକାମ୍‌ ଯୋଷେପ୍‌ ପଶୁ ବାଦୁଲ୍‌ତେ ଅଡ଼କିଙ୍କ୍‌ କାଦି ଇସ୍‌ ଆ ବର୍ଷ ଚାଲାମାଡି ଅତ୍‌ତଣ୍ଡ୍‌।

18 ମେଣ୍ଡେ ଆ ବର୍ଷ ପୁରା ଆତ୍‌ତାଙ୍କ୍‌, ଦ୍ୱିତିୟ ୱାଡ଼୍‌ସେତେ ଅଡ୍‌ ଯୋଷେପ୍‌ତେ ଗାରେ ୱାସ୍‌ କେତ୍‌ତଡ୍‌, ମାୟାୱ୍‌ ରୁପି ସାରେ ତେରିମିନ୍ଦେ; ଆଦ୍‌ ପ୍ରବୁନାଗାକଞ୍ଜ୍‌ ମିଞ୍ଚ୍‌ପୱାଡ୍; ମେଣ୍ଡେ ମାନ୍‌ ସାରେ ଜିୱାକ୍‌କିନ୍‌ଦନ ଆନ୍ତେ ପ୍ରବୁନାଦ୍‌ ଆସ୍‌ମିନ୍ଦେ; ଇଞ୍ଜେ ପ୍ରବୁନ୍‌ ମୁନେ ମାନ୍‌ ମେନ୍ଦୁଲ୍‌ ନୁ ବୁମ୍‌ତିଙ୍କ୍‌ ୱିଡ୍‌ସି ମେଣ୍ଡେ ବାତେ ଇଲେ। 19 ଆଦିନ୍‌ମାଇଦିଙ୍କ୍‌ ମାମେ ନୁ ମାଆ ବୁମ୍‌ ରେଣ୍ଡ୍‌ ବାତେଙ୍କ୍‌ ମିଇ ମୁନେ ଡ଼ଲିତମ୍‌ ? ନିମେ କାଦି ଇସ୍‌ ମାକିଙ୍କ୍‌ ନୁ ମାଆ ବୁମ୍‌ ଆସି ଅୟିମ୍‌, ଆସୁଟ୍‌ ମାମେ ନୁ ମାଆ ବୁମ୍‌ ଫାରୋନ୍ ଦାସଆଦ୍‌ତମ୍‌; ଇଦିନାଗଙ୍କ୍‌ ମାକିଙ୍କ୍‌ ୱିଜେ ଇମ୍‌ ଆସୁଟ୍‌ ଗେଲ୍‌ସିତମ୍‌; ଇଲୁକ୍‌ ମାମ୍‌ ଡଲିତମ୍‌, ମେଣ୍ଡେ ବୁମ୍‌ ଆନ୍ତେ ନଷ୍ଟ ଆଦ୍‌ତେ।

20 ଇଦ୍‌ ଲେକାମ୍‌ ମରୁଡି ଅଡ଼୍‌ପର ଗାଟି ଅସହ୍ୟ ଆତ୍‌ତାଙ୍କ୍‌, ମିସ୍ରୀୟଡ଼୍‌ ସାରେ ନିଜର୍‌ ବୁମ୍‍ ୱାମ୍‌ତଡ଼୍‌; ଆସୁଟ୍‌ ଯୋଷେପ୍‌ ଫାରୋନ୍‌ ମାଇଦିଙ୍କ୍‌ ମିସର୍‌ ଦେଶ୍‌ତେ ସାରେ ବୁମ୍‍ ଆସ୍‌ତଣ୍ଡ୍‌; ଆଦିଙ୍କ୍‌ ସାରେ ବୁମ୍‍ ଫାରୋନାଦ୍‌ ଆତ୍‌ତା। 21 ଆସୁଟ୍‌ ଯୋଷେପ୍‌ ମିସର୍‌ତେ ଅଣ୍ଡୟ୍‌ ସୀମାକଞ୍ଚ୍‌ ୱେରେସୀମା ହେୱ୍‌ନା ନଗର୍‌ ନଗର୍‌ତାଗେ ପ୍ରଜାଲଡ଼୍‌କ୍‌ ମାନ୍ଦାନଙ୍କ୍‌ ଇତ୍‌ତଣ୍ଡ୍‌। 22 ଅଣ୍ଡ୍‌ କେବଳ ଯାଜକିଡ଼୍‌ ବୁମ୍‍ ଆସଣ୍ଡ୍‌; ଇତ୍କେ ଯାଜକିଡ଼୍‌ ଫାରୋନାଗାଙ୍କ୍‌ କୁଲ୍‌ ପାହେମ୍‌ ଆତ୍‌ତଡ଼୍‌; ଆଦିଙ୍କ୍‌ ଫାରୋନ୍‌ ଇତ୍‌ତେ କୁଲ୍‌ ତଡ଼୍‌ ଅଡ଼ାଦ୍‌ ନିର୍ବାହ ଆତ୍‌ତାଙ୍କ୍‌ ଅଡ଼୍‌ ନିଜର୍‌ ନିଜର୍‌ ବୁମ୍‍ ୱାମଡ଼୍‌। 23 ତାନ୍‌ପେର୍କେ ଯୋଷେପ୍‌ ପ୍ରଜାଲଡ଼୍‌କ୍‌ କେତ୍‌ତଣ୍ଡ୍‌, ଉଡ଼ାଟ୍‌, ମାମେ ଫାରୋନ୍‌ ମାଇଦିଙ୍କ୍‌ ମିକିଙ୍କ୍‌ ନୁ ମି ବୁମ୍‌ଦିଙ୍କ୍‌ ସାରେ ଆସ୍‌ତମ୍‌; ଇଞ୍ଜ୍‌ ଇ ୱିଜ୍‌ ଅସ୍‌ ବୁମ୍‌ଦାଗ୍‌ ୱିତ୍‌ତାଟ୍‌। 24 ଆଗାଙ୍କ୍‌ ବାତା ଆଦିତା, ଆୱିନ୍‌ ଏଇଙ୍ଗ୍‌ବାଗ୍‌ ଫାରୋଙ୍କ୍‌ ଇଦ୍‌ତିଡ଼୍‌, ମେଣ୍ଡେ ୱେର୍‌ ନାଲୁବାଗ୍‌ତେ ବୁମ୍‌ଦେ ୱିଜେତ୍‌ ମାଇଦିଙ୍କ୍‌ ନୁ ନିଜର୍‌ ନିଜର୍‌ ନାରୁଡ଼୍‌ ନୁ ପିଲାନ୍‌ ମାଇଦିଙ୍କ୍‌ ନେଃତିତିଡ଼୍‌।

25 ଆସୁଟ୍‌ ଅଡ୍‌ କେତ୍‌ତଡ୍‌, ନିମେ ମା ଜିୱୁନ୍‌ତିଙ୍କ୍‌ ଗେଲ୍‌ସ୍ପ୍‌ତିନ୍‌; ନିୟାଦ୍‌ ଦୟା ଆତ୍‌ତାଙ୍କ୍‌, ମାମେ ଫାରୋନ୍‌ ଦାସ୍‌ ଆଦ୍‌ତମ୍‌। 26 ଏଇଙ୍ଗ୍ ବାଗ୍‌ ଫାରୋ ପାହେମ୍‌ ଆଦ୍‌ତଣ୍ଡ୍‌, ମିସର୍‌ତେ ସାରେ ବୁମ୍‍ ବିଷୟତେ ଯୋଷେପ୍‌ତେ ତିଆର୍‌ ମାଡ଼୍‌ତେ ଅଣ୍ଡୟ ନିୟମ୍‌ ନେଣ୍ଡ୍‌ ଆଇନା ଚାଲେମ୍‌ ଆସମିନ୍ଦେ; କେବଳ ଯାଜକିଡ୍ ବୁମ୍‌ ଫାରୋନାୱ୍‌ ଆୟ।

27 ଆ ସମୟତେ ଇସ୍ରାଲିୟଡ଼୍‌ ମିସର୍‌ତେ ଗୋଶନ୍‌ ପ୍ରଦେଶତାଗ୍‌ ମାତ୍‌ତଡ୍‌, ମେଣ୍ଡେ ଆଗେ ଅଡ୍‌ ଅଦିକାର୍‌ ପାହେମ୍‌ ଆସ୍‌ ନାର୍ଗେ ପିଲୁଡ୍‌ ଆତ୍‌ତଡ଼୍‌ । 28 ଯାକୁବ ମିସର୍ ଦେଶ୍‌ତାଗେ ସତ୍‌ର ବର୍ଷ ହେୱୁନା ମାତ୍‌ତଣ୍ଡ୍‌, ଅନାଦ୍‌ ଗେଲ୍ସେତେ ଦିନାମ୍‌ ଶହେ ସତଚାଳିଶ୍‌ ବର୍ଷ ମାତ୍‌ତେ। 29 ଯାକୁବତେ ଡଲାନ୍‌ ଦିନାମ୍‌ ଗାରେ ହେୱ୍‌ତାଙ୍କ୍‌ ଅଣ୍ଡ୍‌ ତାନ୍‌ ମାର୍‌ ଯୋଷେପ୍‌ତିଙ୍କ୍‌ କାର୍ଙ୍ଗି କେତ୍‌ତଣ୍ଡ୍‌, ନାନ୍‌ ବେସୁଙ୍କ୍‌ ନି ମୁନେ ଦୟା ପାହେମ୍‌ ଆତ୍‌ତାନ୍‌, ଆଦିଙ୍କ୍‌ ଅନୁରୋଦ ମାଡୁତାନ୍‌, ନିମେ ନା କୁରୃକ୍‌ ତାଗେ କାୟ୍‌ଇମ୍‌; ମେଣ୍ଡେ ନା ପର ନିଜାମ୍‌ତେ ବ୍ୟବହାର୍‌ ମାଡ଼ି ଇ ମିସର୍‌ ଦେଶ୍‌ତାଗେ ନାକିଙ୍କ୍‌ ସମାଦି ଇମାଟ୍‌। 30 ମାତ୍ର ନାନ୍‌ ନା ଆନିଦାଦିଡ଼୍‌ ତଡ଼୍‌ ଉଞ୍ଜ୍‌କେ, ନିମେ ନାକିଙ୍କ୍‌ ଇ ମିସର୍‌ ଦେଶ୍‌କଞ୍ଚ୍ ଅସ୍‌ ଅଡ଼୍‌ ସମାଦି ପଡ଼ିୟ୍‌ତାଗେ ସମାଦି ଇମ୍‌। ଆସୁଟ୍‌ ଯୋଷେପ୍‌ କେତ୍‌ତଣ୍ଡ୍‌, ନିୟାଦ୍‌ ଆଦେଶ୍‌ ଲେକାମ୍‌ ମାଡ଼ିତାନ୍‌।

31 ଆସୁଟ୍‌ ଯାକୁବ ଯୋଷେପ୍‌ତିଙ୍କ୍‌ ପ୍ରମାଣ ମାଡ଼ାଙ୍କ୍‌ କେତ୍‌ତାଙ୍କ୍‌ ଅଣ୍ଡ୍‌ ତାନ୍‌ ଗାରେ ପ୍ରମାଣ ମାଡ଼୍‌ତଣ୍ଡ୍‌। ଆସୁଟ୍‌ ଯାକୁବ ପାଟାନ୍‌ ତାଲେତ୍‌ ପାକ୍‌ ମଡ଼୍‌କ୍‌ତଣ୍ଡ୍‌।