1 ଆସୁଟ୍‌ ଯୋଷେପ୍‌ ତାନ୍‌ ଗାରେ ନିସ୍‌ ମାନ୍ଦାନ୍‌ ନାରୁଡ଼୍‌ ମୁନେ ନିଜ୍‌ତିଙ୍କ୍‌ ସାମ୍‌ଲା ମାନ୍ଦ୍‌ ପାର୍‌ୱେକଟ ଗାଟି ଲେଙ୍ଗ୍‌ତେ କେତ୍‌ତଣ୍ଡ୍‌, ନା ମୁନେଙ୍କ୍‌କଞ୍ଚ୍‌ ସାରେ ନାରୁଡ଼୍‌କ୍‌ ବାୟ୍‌ଦେ ପେସ୍ପା। ଆସୁଟ୍‌ ବେନ ଅନ୍‌ ମୁନେ ଇଲ୍‌ୱାଙ୍କ୍‌, ଯୋଷେପ୍‌ ଦାଦାଲଡ଼୍‌ ମୁନେ ତାନ୍‌ ପରିଚୟ ଇଦାଙ୍କ୍‌ ପସ୍ପ୍‌ତଣ୍ଡ୍‌। 2 ଅଣ୍ଡ୍‌ ଗାଟି ଲେଙ୍ଗ୍‌ତେ ଇଦ୍‌ପୁଟୁଙ୍କ୍‌ କେୟ୍‌ତଣ୍ଡ୍‌ ଯେ, ମିସ୍ରୀୟଡ଼୍‌ ନୁ ଫାରୋନ୍‌ ଲୋତ୍‌ତେ ନାରୁଡ଼୍‌ ଆଦ୍‌ କେଞ୍ଜ୍‌ ପାର୍‌ତଡ଼୍‌। 3 ଯୋଷେପ୍‌ ତାମ୍‌ ଦାଦାଲଡ଼୍‌କ୍‌ କେତ୍‌ତଣ୍ଡ୍‌, ନାନ୍‌ ଯୋଷେପ୍‌; ନା' ବାବାଲ୍‌ ବାତେ ନେଣ୍ଡ୍‌ଆୟ୍‌ନା ଗେଲ୍‌ସି ମିନ୍ଦେଣ୍ଡ୍‌ ? ଆସୁଟ୍‌ ତାମ୍‌ ଦାଦାଲଡ଼୍‌ ଅନ୍‌ ମୁନେ ୱେର୍‌ତଡ଼୍‌ ବା ଉତ୍ତର୍‌ ଇଦ୍‌ ପାର୍‌ୱଡ଼୍‌। 4 ନିଜେ ଯୋଷେପ୍‌ ତାମ୍‌ ଦାଦାଲଡ଼୍‌କ୍‌ କେତ୍‌ତଣ୍ଡ୍‌, ଅନୁରୋଦ ମାଡ଼ୁତାନ୍‌, ନା ଗାରେ ୱାଡ଼ାଟ୍‌; ଆସୁଟ୍‌ ଅଡ଼୍‌ ଗାରେ ଆତ୍‌ତାଙ୍କ୍‌, ଅଣ୍ଡ୍‌ କେତ୍‌ତଣ୍ଡ୍‌, ନାନ୍‌ ମି ତାମୁନ୍‌ ଯୋଷେପ୍‌ , ବେନଙ୍କ୍‌ ମିଡ଼୍‌ ମିସର୍‌ ଆଦାନ୍‌ ନାରୁଡ଼୍‌କ୍‌ ୱାମିସ୍‌ ମାତ୍‌ତିଡ଼୍‌। 5 ମାତ୍ର ମିଡ଼୍‌ ନାକିଙ୍କ୍‌ ଇଗେ ୱାଦାନ୍‌ ମାଇଦିଙ୍କ୍‌ ୱାମ୍‌ତିଡ଼୍‌ ଇଞ୍ଜ ଦୁଃକ ନୁ ନିଜର୍‌ ନିଜର୍‌ ପର କପାମ୍‌ ଆୟିମାଟ୍‌; କାରଣ ପରମେଶ୍ୱର୍‌ ଜିୱୁନ୍‌ ଗେଲ୍‌ସ୍ପାନ୍‌ ମାଇଦିଙ୍କ୍‌ ମି ମୁନେ ମୁନେ ନାକିଙ୍କ୍‌ ରହ୍‌ଃତଣ୍ଡ୍‌। 6 ଉଡ଼ାଟ୍‌, କେବଳ ରେଣ୍ଡ୍‌ ବର୍ଷ ଆତ୍‌ତେ ଦେଶ୍‌ତାଗେ ମରୁଡି ଆସ୍‌ ମିନ୍ଦେ ମାତ୍ର , ମେଣ୍ଡେ ଏଇଙ୍ଗ୍‌ ବର୍ଷ ବାକି ମିନ୍ଦେ, ଆଦ୍‌ ଲୋପେ ଚାଷ୍‌ କି କାଦି କୟ୍‌ଦାନାଦ୍‌ ଆୟ। 7 ଆଦିନ୍‌ ମାଇଦିଙ୍କ୍‌ ପରମେଶ୍ୱର ପୃତିବିତାଗେ ମିକିଙ୍କ୍‌ ମୁନେଙ୍କ୍‌ ଲେକାମ୍‌ ଗେଲ୍‌ସ୍ପାଙ୍କ୍‌ ମି ମୁନେ ନାକିଙ୍କ୍‌ ରହ୍‌ଃସ୍‌ ମିନ୍ଦେଣ୍ଡ୍‌। 8 ଆଦିଙ୍କ୍‌ ମିଡ଼୍‌ ଯେ ନାକିଙ୍କ୍‌ ଇ ପଡ଼ିୟ୍‌ତାଗେ ରୟ୍‌ସ୍‌ ମିନ୍ଦେଡ଼ି, ଆଦ୍‌ ଆୟ, ପରମେଶ୍ୱର୍‌ ରହ୍ଃସ୍‌ ମିନ୍ଦେଣ୍ଡ୍‌; ମେଣ୍ଡେ ଅଣ୍ଡ୍‌ ନାକିଙ୍କ୍‌ ଫାରୋନ୍‌ ବାବାଲ୍‌ ନୁ ତାନ୍‌ ଲୋତ୍‌ତେ ପ୍ରବୁ ନୁ ସାରେ ମିସର୍‌ ଦେଶ୍‌ତେ ମାଲିକ୍‌ ମାଡ଼ି ମିନ୍ଦେଣ୍ଡ୍‌।

9 ଆଦିଙ୍କ୍‌ ମିଡ଼୍‌ ସିଟ୍‌ପାଟ୍‌ ନା ବାବାନ୍‌ ଗାରେ ଆଞ୍ଜ୍‌ ଅଂକିଙ୍କ୍ କେଲ୍‌ମୁଟ୍‌, ନି ମାର୍‌ ଯୋଷେପ୍‌ ଇଦ୍‌ପୁଟୁଙ୍କ୍‌ କେତ୍‌ତଣ୍ଡ୍‌, ପରମେଶ୍ୱର୍‌ ନାକିଙ୍କ୍‌ ସାରେ ମିସର୍‌ ଦେଶ୍‌ତେ ପ୍ରବୁ ମାଡ଼ିମିନ୍ଦେଣ୍ଡ୍‌; ନିମେ ନା ଗାରେ ୱାଡ଼ା, ଗମାଡ଼୍‌ ମାଡ଼୍‌ମା। 10 ନିମେ ମାର୍‌ ନୁ ନାତି ନୁ ଗଡ୍‌କ୍‌ ମେକା ସାରେ ତାୱିନ୍‌ତଡ଼୍‌ ଗୋଶନ୍‌ ଦେଶ୍‌ତାଗ୍‌ ମାଞ୍ଜ୍‌ ନା ଗାରେ ଆଦ୍‌ତିଡ଼୍‌। 11 ଆ ପଡ଼୍‌ୟ୍‌ତାଗ୍‌, ନାନ୍‌ ମିକିଙ୍କ୍‌ ପଡ଼୍‌ପିତାନ୍‌; ବାତେଙ୍କ୍‌ଇତ୍କେ ମେଣ୍ଡେ ଏଇଙ୍ଗ୍‌ ବର୍ଷ ମରୁଡି ମାନ୍ତେ; ଇଲୁକ୍‌ ମି ନୁ ମି ପରିବାର୍‌ ସାରେତଡ଼୍‌ ଗରିବ୍‌ଦଶା ଗଟେମ୍‌ ଆତ୍‌ତେ।

12 ଉଡ଼ାଟ୍‌, ନା ମକମ୍‌ ମିକିଙ୍କ୍‌ ଇ ଗଟ୍‌ କେସମିନ୍ଦେ ଇଦ୍‌ ମି କଣ୍ଡା ନୁ ନା ସାଙ୍ଗ ବିନ୍ୟାମିନ୍‌ତେ କଣ୍ଡା ଉଡ଼ମିନ୍ଦେ। 13 ଆଦିଙ୍କ୍‌ ମିଡ଼୍‌ ଇ ମିସର୍‌ ଦେଶ୍‌ତା ନା ଶକ୍ତି ପାଡ଼ିୟ୍‌ ବାତା ବାତା ଉଡ଼ୁତିଡ଼୍‌, ଆୱ୍‌ ସାରେ ନା ବାବାଙ୍କ୍‌ ପୁଞ୍ଜ୍‌ପି ଅଂକିଙ୍କ୍‌ ସିଟ୍‌ପାଟ୍‌ ଇଗେ ତାତିତିଡ଼୍‌।

14 ତାନ୍‌ପେର୍କେ ଅଣ୍ଡ୍‌ ତାନ୍‌ ସାଙ୍ଗ ବିନ୍ୟାମିନ୍‌ତେ ବଣ୍ଡ୍‌କ୍‌ତିଙ୍କ୍‌ ପୟିସ୍‌ କେୟ୍‌ତଣ୍ଡ୍‌, ମେଣ୍ଡେ ବିନ୍ୟାମିନ୍‌ ତାନ୍‌ ବଣ୍ଡ୍‌କ୍‌ତିଙ୍କ୍‌ ପୟିସ୍‌ କେୟ୍‌ତଣ୍ଡ୍‌। 15 ମେଣ୍ଡେ ଯୋଷେପ୍‌ ୱେର୍‌ ଦାଦାଲଡ଼କ୍‌ ଚୁମା ଇତ୍‌ତଣ୍ଡ୍‌ ନୁ ଅଡ଼୍‌କିଂଙ୍କ୍‌ ପୟିସ୍‌ କେୟ୍‌ତଣ୍ଡ୍‌। ତାନ୍‌ପେର୍କେ ତାମ୍‌ ଦାଦାଲଡ଼୍‌ ଅନ୍‌ ତଡ଼୍‌ କେୟାଙ୍କ୍‌ ପସ୍ପ୍‌ତଡ଼୍‌।

16 ମେଣ୍ଡେ ଯୋଷେପ୍‌ତେ ଦାଦାଲଡ଼୍‌ ୱାସ୍‌ମିନ୍ଦେଡ଼୍‌, ମର୍‌ରା ଫାରୋନ୍‌ ଲୋନ୍‌ କେଞ୍ଜ୍‌ତାଙ୍କ୍‌, ଫାରୋ ନୁ ତାନ୍‌ ଦାସ ସାରେତଡ଼୍‌ ସନ୍ତୁଷ୍ଟ ଆତ୍‌ତଡ଼୍‌। 17 ମେଣ୍ଡେ ଫାରୋ ଯୋଷେପ୍‌ତିଙ୍କ୍‌ କେତ୍‌ତଣ୍ଡ୍‌, ନିମେ ନି ଦାଦାଲଡ଼୍‌କ୍‌ କେଲ୍‌ମ୍‌, ମିଡ଼୍‌ ଇ ପାଡ଼ିୟ୍‌ ମାଡ଼ାଟ୍‌; ନିଜର୍‌ ନିଜର୍‌ ପଶୁକିଙ୍କ୍‌ ପୟିସ୍‌ କିଣାନ୍‌ ଦେଶ୍‌ତା ଆନୁଟ୍‌, 18 ମେଣ୍ଡେ ବାବାଙ୍କ୍‌ ନୁ ନିଜର୍‌ ନିଜର୍‌ ସାରେ ପରିବାର୍‌ତିଙ୍କ୍‌ ପୟିସ୍‌ ମା ଗାରେ ୱାଡ଼ାଟ୍‌; ମାମେ ମିକିଙ୍କ୍‌ ମିସର୍‌ ଦେଶ୍‌ତେ ସାୟେତ୍‌ ଜିନିଷ୍ ଇଦ୍‌ତମ୍‌, ମେଣ୍ଡେ ମିଡ଼୍‌ ଦେଶ୍‌ତେ ସାରେକେ ସାୟେତ୍‌ ବିଷୟ୍‌ ତିନ୍‌ତିଡ଼୍‌। 19 ଇଞ୍ଜେ ମା ଆଦେଶ୍‌ତେ ଲେକାମ୍‌ ଇ ପାଡ଼ିୟ୍‌ ମାଡ଼ାଟ୍‌, ମିଡ଼୍‌ ନିଜର୍‌ ନିଜର୍‌ ପେକଡ଼୍‌କ୍‌ ନୁ ମୁତେକିନ୍‌ ମାଇଦିଙ୍କ୍‌ ମିସର୍‌ ଦେଶ୍‌କଞ୍ଚ୍‌ ଗାଡ଼ି ଅୟ୍‌ମୁଟ୍‌, ମେଣ୍ଡେ ମି ବାବାଙ୍କ୍‌ ପୟିସ୍‌ ତାଡ଼ାଟ୍‌। 20 ମେଣ୍ଡେ ମି ଜିନିଷ୍‌ ବିଷୟ୍‌ତେ ଏର୍କେ ମାଡ଼୍‌ମାଟ୍‌; ସାରେ ମିସର୍‌ ଦେଶ୍‌ତାୱ୍‌ ସାୟେତ୍‌ ଜିନିଷ୍ ମିୟାୱ୍‌ ଆଦ୍‌ତେ।

21 ଆସୁଟ୍‌ ଯାକୁବତେ ପିଲା ଆଦ୍‌ ପୁଟୁଙ୍କ୍‌ ମାଡ଼୍‌ତଡ଼୍‌; ମେଣ୍ଡେ ଯୋଷେପ୍‌ ଫାରୋନ୍‌ ଆଦେଶ୍‌ତେ ଲେକାମ୍‌ ଅଡ଼୍‌କିଂଙ୍କ୍‌ ଗାଡ଼ି ନୁ ଆଦାନ୍‌ ମାଇଦିଙ୍କ୍‌ କାଦି ଜିନିଷ୍ ଇତ୍‌ତଣ୍ଡ୍‌। 22 ମେଣ୍ଡେ ସାରେତଡ଼୍‌କିଙ୍କ୍‌ ଅଣ୍ଡୟ୍‌ ଅଣ୍ଡୟ୍‌ ଯୋଡ଼ା ଚକା ଇତ୍‌ତଣ୍ଡ୍‌, ମାତ୍ର ବିନ୍ୟାମିନ୍‌ତିଙ୍କ୍‌ ତିନିଶହ ରୁପାମୁଦ୍ରା ନୁ ଏଇଙ୍ଗ୍‌ ଯୋଡ଼ା ଚକାସିଲେ ଇତ୍‌ତଣ୍ଡ୍‌। 23 ମେଣ୍ଡେ ବାବାନ୍‌ ମାଇଦିଙ୍କ୍ ମିସର୍‌ ଦେଶ୍‌ତେ ସାୟେ ସାୟେ ଜିନିଷ୍‌ନେ କାଞ୍ଜ୍‌ପିସ୍‌ ନୁ ଦଶଟାନ୍‌ ଗଦ ନୁ ବାବାନ୍‌ ଆଦାନ୍‌ ମାଇଦିଙ୍କ୍‌ କାଦି ସେଙ୍ଗେ ୱାଞ୍ଜି ନୁ ରୁଟି ସାରେ ତିନ୍ଦାନ୍‌ ଜିନିଷ୍‌ ନଦା ଦଶ ଗଦକିଙ୍କ୍‌ ରହ୍‌ଃତଣ୍ଡ୍‌। 24 ଇଦ୍‌ ଲେକାମ୍‌ ଯୋଷେପ୍‌ ତାମ୍‌ ଦାଦାଲଡ଼କ୍‌ ରହ୍‌ଃତାଙ୍କ୍‌, ଅଡ଼୍‌ ଆତ୍‌ତଡ଼୍‌; ମେଣ୍ଡେ ଅଣ୍ଡ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ସାବଦାନ୍, ଆର୍‌ଦାଗ୍‌ ରାମ୍‌କ୍‌ ଆୟିମାଟ୍‌।

25 ତାନ୍‌ପେର୍କେ ଅଡ଼୍‌ ମିସର୍‌ ଦେଶ୍‌ତାଗାଙ୍କ୍‌ ଆଞ୍ଜ୍‌ କିଣାନ୍‌ ଦେଶ୍‌ତାଗେ ତାମ୍‌ ବାବାନ୍‌ ଯାକୁବନ୍‌ ଗାରେ ଏୱ୍‌ତଡ଼୍‌। 26 ମେଣ୍ଡେ ଅଡ଼୍‌ ଅଂକିଙ୍କ୍‌ କେତ୍‌ତଡ଼୍‌, ଯୋଷେପ୍‌ ନେଣ୍ଡ୍‌ ଆଇନା ଜିଉନ୍‌ ମିନ୍ଦେଣ୍ଡ୍‌, ମେଣ୍ଡେ ଅଣ୍ଡ୍‌ ସାରେ ମିସର୍‌ ଦେଶ୍‌ତେ ମାଲିକ୍‌ ଆସ୍‌ ମିନ୍ଦେଣ୍ଡ୍‌। ଆଦିଙ୍କ୍‌ ଯାକୁବନ୍‌ ହୃଦୟ୍‌ କାର୍‌ୱି ଆତ୍‌ତେ, ମାତ୍ର ଅଣ୍ଡ୍‌ ଅଡ଼୍‌କିଂଙ୍କ୍‌ ବିଶ୍ୱାସ୍‌ ମାଡ଼ଣ୍ଡ୍‌।

27 ମେଣ୍ଡେ ଯୋଷେପ୍‌ ବେସ୍କ୍‌ ଗଟି ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ଆୱ୍‌ ସାରେ ଗଟି ଅଡ଼୍‌ ଅଂକିଙ୍କ୍‌ କେତ୍‌ତଡ଼୍‌। ମାତ୍ର ଅଣ୍ଡ୍‌ ବେସୁଙ୍କ୍‌ ଅଂକିଙ୍କ୍‌ ଅଦାନ୍‌ ମାଇଦିଙ୍କ୍‌ ଯୋଷେପ୍‌ ରହ୍‌ଃସ୍‌ ମାନ୍ଦାନ୍‌ ଗାଡ଼ିସାରେ ଉଡ଼୍‌ତଣ୍ଡ୍‌, ଆସୁଟ୍‌ ତାମ୍‌ ବାବାଲ୍‌ ଯାକୁବନ୍‌ ଆତ୍ମା ମେଣ୍ଡନ୍‌ଦାମ୍‌ ଜିୱୁନ୍‌ ଆତ୍‌ତେ। 28 ଆସୁଟ୍‌ ଇସ୍ରାଏଲ୍‌ କେତ୍‌ତଣ୍ଡ୍‌, ନାର୍ଗେ, ନା ମାର୍‌ ଯୋଷେପ୍‌ ନେଣ୍ଡ୍‌ ଆଇନା ଗେଲ୍‌ସି ମିନ୍ଦେଣ୍ଡ୍‌; ନାନ୍‌ ଆଦ୍‌ତାନ୍‌, ଡଲାନ୍‌ ମୁନେଙ୍କ୍‌ ଅଂକିଙ୍କ୍‌ ଉଡ଼ିତାନ୍‌।