1 ମେଣ୍ଡେ ଯାକୁବ୍‍ ମାନ୍‌ ବାବାନ୍‍ ସାରେ ଅସ୍‍ମିନ୍ଦେଣ୍ଡ୍‍ ନୁ ମାନ୍‍ ବାବାନ୍‍ ଦନ୍‍ତାଗାଙ୍କ୍‍ ଅନାଦ୍‌ ଇ ସାରେ ସମ୍ଫତି ଆସ୍‍ମିନ୍ଦେ, ଲାବାନ୍‌ତେ ମାର୍‍କିଡ଼ାୱ୍‍ ଇ ସାରେ ଗଟି ଯାକୁବ କେଞ୍ଜ୍‍ତଣ୍ଡ୍‍। 2 ମେଣ୍ଡେ ଲାବାନ୍‌ ଅନ୍‍ ପର ମୁନେତ୍‍ ଲେକାମ୍‍ ଆୟ, ଇଦ୍‍ ଯାକୁବ୍‍ ଅନ୍‍ ମକତିଙ୍କ୍‍ ଉଡ଼ି ପୁତ୍‍ତଣ୍ଡ୍‍। 3 ଅନନ୍ତର ସଦାପ୍ରବୁ ଯାକୁବଙ୍କ୍‍ କେତ୍‍ତଣ୍ଡ୍‍, ନିମେ ନି ବାବାନ୍‍ ଦେଶ୍‍ତା କୁଟ୍‍ତେ ଗାରେ ମାଲ୍‍ସ୍‍ ଆନ୍‍, ମାମ୍‌ମେ ନି ତଡ଼୍‍ ଆଦ୍‌ତମ୍‌।

4 ଆଦିଙ୍କ୍‌ ଯାକୁବ୍‍ ୱାୟାନା ପଶୁମାନ୍ଦେ ଗାରେ ରାହେଲ୍‌ ନୁ ଲେୟାଙ୍କ୍‍ କାର୍ଙ୍ଗି କେତ୍‍ତଣ୍ଡ୍‍, 5 ନାନ୍‍ ଉଡ଼୍‍ତାନ୍‍, ମି ବାବାନ୍‍ ମକମ୍‍ ନା ପର ମୁନେତ୍‍ ଲେକାମ୍‍ ଇଲା; ଇତ୍କେ; ନା ଆନିଦାଦିଡ଼୍ ପରମେଶ୍ୱର ନା ତଡ଼୍‍ ମିନ୍ଦେଣ୍ଡ୍‍। 6 ନାନ୍‍ ନା ସାରେ ଶକ୍ତି ଇସ୍‍ ମି ବାବାନ୍‍ ଦାସପାଡ଼୍‍ୟି ମାଡ଼ିମିନ୍ଦେଣ୍ଡ, ଇଦ୍‍ ତ ମିଡ଼୍‍ ପୁତ୍‍ତିଡ଼୍‍। 7 ଇତ୍କେବା ମି ବାବାଲ୍‍ ନାକିଙ୍କ୍‍ ବୁସା ମାଡ଼ି ଦଶ୍‍ଦାମ୍‍ ନା ଦରମା ପରିବର୍ତ୍ତନ ମାଡ଼ିମିନ୍ଦେଣ୍ଡ୍‍; ଇତ୍କେ ପରମେଶ୍ୱର୍‍ ଅଂକିଙ୍କ୍‍ ନାକ୍‍ କ୍ଷତି ଆଦାନଙ୍କ୍‌ ଇୱଣ୍ଡ୍‍। 8 ବାତେଙ୍କ୍‍ଇତ୍କେ ଚିତ୍ରାକାବ୍‍ରା ଜିୱାକିଙ୍କ୍‍ ନି ଦରମା ଲେକାମ୍‍ ଆଦ୍‌ତା, ଅଣ୍ଡ୍‍ ନିଜେ ବେସୁଙ୍କ୍‍ ଇ ଗଟ୍‍ କେତ୍‍ତଣ୍ଡ୍‍, ଆସୁଟ୍‍ ସାରେ ପଶୁ ଚିତ୍ରାକାବ୍‍ରା ପିଲା ଜନ୍ମ ଆତ୍‌ତା; ମେଣ୍ଡେ ଚିତ୍ରାକାବ୍‍ରା ପଶୁକି ନି ଦରମା ଲେକାମ୍‍ ଆଦ୍‌ତା, ଅଣ୍ଡ୍‍ ବେସୁଙ୍କ୍‍ ଇଲା କେତ୍‍ତଣ୍ଡ୍‍, ଆସୁଟ୍‍ ସାରେ ପଶୁ ଚିତ୍ରାକାବ୍‍ରା ପିଲା ଆତ୍‌ତା। 9 ଇଦ୍‍ପୁଟୁଙ୍କ୍‍ ପରମେଶ୍ୱର୍‍ ମି ବାବାନ୍‍ ପଶୁସମ୍ଫତି ଅସ୍‍ ନାକିଙ୍କ୍‍ ଇତ୍‍ତଣ୍ଡ୍‍।

10 ଇତ୍କେ ପଶୁକିନ୍‍ ଡ଼ଙ୍କେତ୍‌ ଆତ୍‌ତେ ସମୟ୍‍ତେ ନାନ୍‍ ସ୍ୱପ୍ନତେ ମାଲ୍‍ସ୍‍ ଉଡ଼୍‍ତାନ୍‍, ଉଡ଼ା, ମାନ୍ଦେ, ସଙ୍ଗମ୍‍କାରି ସାରେ ମେକା ରେଖାଙ୍କିତ ନୁ ଚିତ୍ରାକାବ୍‍ରା ନୁ ଚିହ୍ନେ ମାନ୍ଦାନାୱ୍‍। 11 ଆସୁଟ୍‍ ପରମେଶ୍ୱର୍‍ତେ ଦୂତ ସ୍ୱପ୍ନତେ ନାକିଙ୍କ୍‍ ଯାକୁବ୍‍ ଇଞ୍ଜ କାର୍‍ଙ୍ଗ୍‍ତାଙ୍କ୍‍, ନାନ୍ କେତ୍‍ତାନ୍‍, ଉଡ଼ା, ନାନ୍‍ ଇଗେ। 12 ଆସୁଟ୍ ଅଣ୍ଡ୍ କେତ୍‍ତଣ୍ଡ୍‍, ଇଞ୍ଜେ ମାଲ୍‍ସ୍‍ ଉଡ଼୍, ମାନ୍ଦେ ସଙ୍ଗମ୍‍କାରି ସାରେ ମେକା ରେକାଙ୍କିତ, ଚିତ୍ରାକାବ୍‍ରା ନୁ ଚିହ୍ନେ ମାନ୍ଦାନାୱ୍‍; ବାତେଙ୍କ୍‍ ଇତ୍କେ ନି ପର ଲାବାନ୍‌ ବେଦ୍‍ପୁଟୁଙ୍କ୍‍ ବ୍ୟବହାର ମାଡ଼ିତଣ୍ଡ୍‍, ଆଦ୍‍ ମାମେ ଉଡ଼୍‍ତମ୍। 13 ବେଗେ ନିମେ ଅଣ୍ଡୟ୍‍ ସ୍ତମ୍ଭ ଅବିଷେକ ମାଡ଼ିମିନ୍ଦେନି ନୁ ମା ଗାରେ ମାନତ ମାଡ଼ିମିନ୍ଦେନି, ଆ ବୈତେଲ୍‌ତେ ପରମେଶ୍ୱର୍‌ ମାମ୍; ଇଞ୍ଜେ ତେଦି ଇ ଦେଶ୍‍ ୱିଡ଼୍‍ସି ନି ନାରୁଡ଼୍‍ ଦେଶ୍‍ତା ମାଲ୍‍ସ୍‍ ଆନ୍‍ !

14 ଆସୁଟ୍‍ ରାହେଲ୍‌ ନୁ ଲେୟାଲ୍‍ ଉତ୍ତର ଇତ୍‍ତେ, ବାବାନ୍‍ ଲୋନ୍‍ ମାୟାୱ୍‍ ବାତା ମେଣ୍ଡେ ବେସ୍‍କ୍‍ ତୁସାନାୱ୍‍ ନୁ ଅଦିକାର୍‍ ମିନ୍ଦେ ? 15 ମାମ୍‌ମେ ବାତେ ଅନ୍‍ ଗାରେ ୱେର୍‍ ଦେଶ୍‌ତେ ଲେକାମ୍‍ ଆୟିମାକି କି ? ବାତେଙ୍କ୍‍ ଇତ୍କେ ଅଣ୍ଡ୍‍ ମାକିଙ୍କ୍ ୱାମି ମା ମୂଲ୍ୟ ପୁରା ବଗ ମାଡ଼ିମିନ୍ଦେଣ୍ଡ୍‍। 16 ଇତ୍କେ ପରମେଶ୍ୱର୍‍ ମା ବାବାନାଗାଙ୍କ୍‍ ବେନ୍‍ ସାରେ ସମ୍ଫତି ଅସ୍‍ମିନ୍ଦେଣ୍ଡ୍‍, ଆୱ୍‍ ସାରେ ମାୟାୱ୍‍ ନୁ ମା ପିଲାନାୱ୍‍। ଆଦିଙ୍କ୍‌ ପରମେଶ୍ୱର ନିକିଙ୍କ୍‍ ବାତେ କେତ୍‍ତଣ୍ଡ୍‍, ନିମ୍‍ ଆଦ୍‍ ମାଡ଼ା।

17 ଆସୁଟ୍‍ ଯାକୁବ ତେଦି ତାନ୍‍ ପିଲାକିଙ୍କ୍‍ ନୁ ମୁତେକିଙ୍କ୍‍ ଉଟ୍‌କିନ୍‍ ପର କୁସ୍ପ୍‍ତଣ୍ଡ୍‍; 18 ମେଣ୍ଡେ ତାନ୍‍ ଗାଡ଼୍‍ସି ମାନ୍ଦାନ୍‍ ସାରେ ସମ୍ଫତି, ଇତ୍କେ, ପଦ୍ଦନ୍‌ ଅରାମ୍‍ତାଗାଙ୍କ୍‍ ବେନ ପଶୁ ନୁ ବେନ୍‍ ସମ୍ପତ୍ତି ଗାଡ଼୍‍ସି ମାତ୍‍ତଣ୍ଡ୍‍, ଆୱ୍‍ ପୟସ୍‍ କିଣାନ୍‍ ଦେଶ୍‍ତା ତାମ୍‍ ବାବାଲ୍‍ ଇସ୍‍ହାକ୍‍ତେ ଗାରେ ଆତ୍‌ତଣ୍ଡ୍‌ । 19 ଆ ସମୟ୍‍ତେ ଲାବାନ୍‌ ମେଣ୍ଡାନ୍‌କେଲ୍‍କ୍‍ କୟ୍‍ଦାଙ୍କ୍‍ ଆଞ୍ଜ୍‌ ମାତ୍‍ତଣ୍ଡ୍‍; ମେଣ୍ଡେ ରାହେଲ୍‌ ତାନ୍‍ ବାବାନ୍‍ ମୁର୍‍ତିତିଙ୍କ୍‍ ଡଙ୍ଗି ଅତ୍‍ତା। 20 ମେଣ୍ଡେ ଯାକୁବ୍‍ ତାନ୍‍ ମିରାନାଦ୍‍ ବାତେ କାବୁର୍‍ ଇୱକଟ ଅରାମୀୟ ଲାବାନ୍‌ତିଙ୍କ୍‍ ବୁସା ମାଡ଼୍‍ତଣ୍ଡ୍‍। 21 ଇଦ୍‌ଲେକାମ୍‌ ଅଣ୍ଡ୍‍ ତାନ୍‍ୱୁ ସାରେ ପୟ୍‍ସ୍‍ ମିର୍‍ତଣ୍ଡ୍‍, ମେଣ୍ଡେ ତେଦି ଫରାତ୍‍ ବେଡ଼େମ୍‍ ୱେୟିସ୍‍ ଗିଲିୟଦ୍‌ ମେଟେତ୍‍ ପାକେ ଉଡ଼ ଆତ୍‌ତଣ୍ଡ୍‌ ।

22 ଅନନ୍ତର୍‍ ମୁଣ୍ଡ୍‍ଦିନାତେ ଲାବାନ୍‌ତିଙ୍କ୍‍ ଯାକୁବ୍‍ ମିରାନ୍‍ କାବୁର୍‍ ଇତ୍‍ତଡ଼୍‍। 23 ଆସୁଟ୍‍ ଅଣ୍ଡ୍‍ ତାନ୍‍ କୁଟ୍‍ମାମ୍‍ତିଙ୍କ୍‍ ତଡ଼୍‌ ପୟସ୍‍ ଅନ୍‍ ପେର୍କେ ପେର୍କେ ସାତ୍‍ ଦିନାତେ ଆର୍‍ ମିରି ଆଞ୍ଜ୍‌ ଗିଲିୟଦ୍‍ ମେଟେତ୍‍ ଗାରେ ଅନ୍‍ ତଡ଼୍‍ ପୟ୍‍ତନ୍‍। 24 ମାତ୍ର ପରମେଶ୍ୱର୍‍ ନାର୍କା ସମୟ୍‍ତେ ସାପ୍ନା ତଡ଼୍‍ ଅରାମୀୟ ଲାବାନ୍‌ତେ ଗାରେ ହେୱୁସ୍‌ ଅଂକିଙ୍କ୍‍ କେତ୍‍ତଣ୍ଡ୍‍, ସାବ୍‍ଧାନ୍‍, ଯାକୁବଙ୍କ୍‍ ସାୟେ କି ପିନ୍ଦ ବାତେ କେଲ୍‍ମାଟ୍‍। 25 ଅନନ୍ତର୍‍ ଲାବାନ୍‌ ଯାକୁବନ୍‍ ତଡ଼୍‍ ପୟ୍‍ତେ ସମୟ୍‍ତେ ଯାକୁବନ୍‍ ତମ୍ୱୁ ମେଟେତ୍‌ପର ତିଆର୍‍ ଆସ୍‍ ମାତ୍‍ତେ; ଆସୁଟ୍‍ ଲାବାନ୍‍ କୁଟ୍‌ମାମ୍‌ତଡ଼୍‍ ଗିଲିୟଦ୍‍ ମେଟେତାଗ୍‍ ତମ୍ୱୁ ତିଆର୍‍ ମାଡ଼୍‍ତଣ୍ଡ୍‍। 26 ମେଣ୍ଡେ ଲାବାନ୍‌ ଯାକୁବଙ୍କ୍‍ କେତ୍‍ତଣ୍ଡ୍‍, ନିମେ ବାତେଙ୍କ୍‍ ଇଦ୍‍ ରକ୍‍ମ୍‍ ପାଡ଼ିୟ୍‌ ମାଡ଼୍‍ତି ? ନାକିଙ୍କ୍‍ ବୁସା ମାଡ଼୍‍ତି, ମେଣ୍ଡେ ନା ମାୟାସ୍‍କିଙ୍କ୍‍ ସାକୁ ତୟ୍‍ସ୍‍ ବନ୍ଦି ନାରୁଡ଼୍‍ ଲେକାମ୍‍ ପୟ୍‍ସ୍‍ ତାତ୍‍ତିନ୍‍। 27 ନିମେ ନାକିଙ୍କ୍‍ ବୁସା ମାଡ଼ି ବାତେଙ୍କ୍‍ ମିଞ୍ଜି ମିରିୱାତ୍‍ତିନ୍‍ ? ବାତେଙ୍କ୍‍ ନାକିଙ୍କ୍‍ ବୁସା ଇୱିନ୍‍ ? ଇସ୍‍ ମାନ୍ଦାନ୍ ଇତ୍କେ, ନାନ୍‍ ନିକିଙ୍କ୍‍ ସାରେଦେତେ ପାଟେପାରି, ମେଣ୍ଡେ ଡଲ ନୁ ଡ଼ୁମିର୍‌ ବାଜେତଡ଼୍‍ ରୟ୍‍ସିୱେନ୍‍। 28 ନିମେ ନା ମାର୍‍ ମାୟାସ୍‍କିଙ୍କ୍‍ ଚୁମା ମାଇଦିଙ୍କ୍‍ ବା ନାକିଙ୍କ୍‍ ସୁଯୋଗ୍‍ ଇୱିନ୍‍, ଇଦ୍‍ ଗାଟି ପୁନ୍‌ୱେତ୍‌ ପାଡ଼୍‍ୟି। 29 ନିକିଙ୍କ୍‍ ହିଂସା ମାଡ଼ାଙ୍କ୍‍ ନାୟାଦ୍‍ କାୟ୍‍ ସାରେ ପ୍ରମାଣ, ମାତ୍ର ନିନ୍‍ ନାର୍କା ମି ଆନିଦାଦିଡ଼୍‍ ପରମେଶ୍ୱର୍‍ ନାକିଙ୍କ୍‍ କେତ୍‍ତଣ୍ଡ୍‍, ସାବ୍‍ଧାନ୍‍, ଯାକୁବ୍‍ତିଙ୍କ୍‍ ସାୟେ କି ପିନ୍ଦ ବାତେ କେଲ୍‍ମା। 30 ମେଣ୍ଡେ ବାବାନ୍‍ ଲୋନ୍‍ ଆଲ୍‌ସି ଆତ୍‌ତାଙ୍କ୍‌ ବେସୁଟ୍‍ ନିୟାଦ୍‍ ଆଦାନାଦ୍‌ ଦର୍‍କାର୍‍ ଆତ୍‌ତେ, ଆଲାଇତ୍କେ ନା ଦେୟାକିଙ୍କ୍‍ ବାତେଙ୍କ୍‍ ଡଙ୍ଗ୍‍ତିଡ଼୍‍। 31 ଆସୁଟ୍‍ ଯାକୁବ୍‍ ଲାବାନ୍‌ତିଙ୍କ୍‍ ଉତ୍ତର୍‍ ଇତ୍‍ତଣ୍ଡ୍‍, ନାକିଙ୍କ୍‌ ୱେର୍‌ ଆତ୍‌ତେ, ଇତ୍କେ ବେଲାକି ନିମେ ନାୟାଗାକଞ୍ଚ୍‍ ନି ମାୟାସ୍‍କିଙ୍କ୍‍ ଶକ୍ତିତଡ଼୍‍ ଲାଗି ଅଦ୍‍ତିଡ଼୍‍ ଇଞ୍ଜ, ଇଦ୍‍ପୁଟୁଙ୍କ୍‍ ଆଲ୍‍ସାନ୍‍। 32 ଇତ୍କେ ନିମେ ବେନନ୍‍ ଗାରେଙ୍କ୍‍ ନିୟାୱ୍‍ ଦେୟାକିଙ୍କ୍‍ ପାହେମ୍‍ ଆତ୍‌ତିନ୍‌, ଆଦ୍‍ ଗେଲ୍‍ସ; ପରମେଶ୍ୱରତାଗ୍‍ ନିୟାଦ୍‍ ବାତା ମିନ୍ଦେ, ଆୱ୍‍ ମା କୁଟୁ‍ମାମ୍‍ ତାଗାଙ୍କ୍‍ ହେଞ୍ଚି ମେଣ୍ଡେ ଅୟ୍‍ମୁଟ୍‍, ବାତେଙ୍କ୍‍ ଇତ୍କେ ଯାକୁବ ରାହେଲ୍‌ ଆୱ୍‍ ଡଙ୍ଗି ମାନ୍ଦାନ୍‍ ବିଷୟ୍‍ ପୁନକଟ ମାତ୍‍ତଣ୍ଡ୍‍। 33 ଆସୁଟ୍‍ ଲାବାନ୍‌ ଯାକୁବନ୍‍ ଗୁଡ଼ୁସେ ନୁ ଲେୟାନ୍ ତମ୍ୱୁ ଲୋନ୍‍ ନୁ ରେଣ୍ଡ୍‍ ଦାସିକିନ୍‍ ଗୁଡ଼ୁସେ ଆଞ୍ଜ୍‌ ମେହ୍‍କ୍‍ତଣ୍ଡ୍‍; ମାତ୍ର ଦର୍‍ସ୍କଣ୍ଡ୍‍। ଆସୁଟ୍‍ ଅଣ୍ଡ୍‍ ଲେୟାନ୍‍ ଗୁଡ଼ୁସେତିଙ୍କ୍‍ ୱିଡ଼୍‍ସି ରାହେଲ୍‌ତେ ଗୁଡ଼ୁସେତାଗ୍‍ ନେଙ୍ଗ୍‍ତଣ୍ଡ୍‍। 34 ମାତ୍ର ରାହେଲ୍‌ ଆ ମୁର୍‍ତିତିଙ୍କ୍‍ ଅସ୍‍ ଉଟ୍‌କିନ୍‍ ହାଉଦାତେ ଲୋପେ ୱାଟି ତାନ୍‍ ପର କୁଦ୍‍ତେ। ଆସୁଟ୍‍ ଲାବାନ୍‌ ତାନ୍‍ ଗୁଡ଼ୁସେତାଗ୍‍ ସାରେ ପଡ଼୍‍ୟାନାଗ୍‍ ମେହ୍‍କ୍‍ତଣ୍ଡ୍‍ ମାତି ଆୱ୍‍ ଦରସ୍କଣ୍ଡ୍‍। 35 ଆସୁଟ୍‍ ରାହେଲ୍‍ ବାବାଙ୍କ୍‍ କେତ୍‍ତେ, ନାନ୍‍ ନି ମୁନ୍ନେ ତେଦେ ପାର୍‍ୱନ୍‍ ଇଞ୍ଜ ନା ପ୍ରବୁ କପାମ୍‍ ଆୟ୍‍ମାକି, ଇତ୍କେ ନାନ କୁଣ୍ଡା ଇଟ୍‌ୱେ ଆସ୍‍ମିନ୍ଦେ। ଇଦ୍‍ ଲେକାମ୍‌ ଅଣ୍ଡ୍‍ ମେହ୍‍କ୍‍ତଣ୍ଡ୍‍ ମାତି ମୁର୍‍ତିକିଙ୍କ୍‍ ଦର୍‍ସ୍କଣ୍ଡ୍‍। 36 ଆସୁଟ୍‍ ଯାକୁବ୍‍ କପାମ୍‍ ଆସ୍‍ ଲାବନ୍‍ତିଙ୍କ୍‍ ରାମ୍‌କ୍‌ ମାଡ଼୍‍ତଣ୍ଡ୍‍; ମେଣ୍ଡେ ଯାକୁବ ଲାବାନ୍‌ତିଙ୍କ୍‍ ଉତ୍ତର୍‍ ଇସ୍‍ କେତ୍‍ତଣ୍ଡ୍‍, ନାୟାଦ୍‍ ବାତେ ଦୋଷ ନୁ ବାତେ ପାପ୍‌ ଆତ୍‌ତେ ଯେ, ନିମେ ଦାନ୍ଦେ ପୟ୍‍ସ୍‍ ନା ପେର୍କେ ପେର୍କେ ମିରିୱାତ୍‍ତିନ୍‍ ? 37 ନିମେ ତ ନାୟାୱ୍‍ ସାରେ ଜିନିଷ୍‍ ମେହ୍‍କ୍‍ତିନ୍‍, ମେଣ୍ଡେ ନି ଲୋତ୍‍ତେ ବେନ୍‍ଆୟି ଦର୍‍ସ୍କ୍‌ତିନ୍‍ କି ? ଆଦ୍‍ ନା ନୁ ନି ଇ କୁଟ୍‌ମାମ୍‍ତେ ମୁନେ ୱାଟା, ଇଡ଼୍‍ ମାନ୍‍ ଇର୍‍ୱୁଡ଼୍‍ ବିଚାର୍‍ ମାଡ଼ିଡ଼୍‍। 38 ଇ କୁଡ଼ିଏ ବର୍ଷ ଆତ୍‌ତେ ନି ତଡ଼୍‍ ମାତ୍‍ତାନ୍‍। ନିୟାୱ୍‍ ମେଣ୍ଢାପେଟି ନୁ ମେକାପେଟି ଡ଼ଙ୍କେତ୍‌ ଆୟ, ଇତ୍କେବା ନାନ୍‍ ନି ମାନ୍ଦେତେ ମେଣ୍ଡାକିଙ୍କ୍‍ ତିନ୍‍ନ। 39 ଇତ୍କେବା ହିଂସକ ଜନ୍ତୁ ବେୱିଙ୍କ୍‍ କିର୍‌ୱ ମାଡ଼୍‍ତା, ଆୱିଙ୍କ୍‍ ବାତେ ନି ଗାରେ ତାଡ଼ନେ; ଆ ଦଷ୍‌ ନିଜେ ସହେମ୍‍ ଆତ୍‌ତାନ୍‌; ଦିନାତେ ଡଙ୍ଗି ଆୟି କି ନାର୍କା ଡଙ୍ଗି ଆୟି, ଆୱ୍‍ ନିମ୍‍ ନା କାୟ୍‍ଦେ କଞ୍ଚ୍‍ ଅତ୍‍ତିନ୍‍। 40 ପାୟାଲ୍‍ ହେଦ୍‍, ନାର୍କା ଚାଲ୍‍, ନାକିଙ୍କ୍‍ ପୟିତେ; ନା କଣ୍ଡାନାଗାଙ୍କ୍‍ ଉସ୍‍କାଡ଼୍‍ ମିର୍‍ତେ; ଇଦ୍‍ ଲେକାମ୍‌ ନାନ୍‍ ମାତ୍‍ତାନ୍‍; 41 ନାନ୍‍ କୁଡ଼ିଏ ବର୍ଷ ଜାକ ମି ଲୋନ୍‍ ମାତ୍‍ତାନ୍‍; ନି ରେଣ୍ଡ୍‍ ପିକିନ୍‍ ସେଙ୍ଗେ ଚଉଦ ବର୍ଷ ନୁ ପଶୁକିନ୍‍ ସେଙ୍ଗେ ଆରୁୱାଡ଼୍‌ସା ଦାସ ପାଡ଼୍‍ୟି ମାଡ଼୍‍ତାନ୍‍; ଆଦିନ୍‌ ଲୋପେ ନିମେ ଦଶ୍‍ଦାମ୍‍ ନାକ୍‍ ଦରମା ପରିବର୍ତ୍ତନ ମାଡ଼ିମିନ୍ଦେନି। 42 ନା ଆନିଦାଦିଡ଼୍‍ ପରମେଶ୍ୱର୍‍,ଅବ୍ରାହାମ୍‌ତେ ପରମେଶ୍ୱର୍‍ ନୁ ଇସ୍‍ହାକ୍‍ତେ ୱେର୍‍ଦାନ୍‍ ପଡ଼ିୟ୍‍ ବେସୁଙ୍କ୍‍ ନା ତଡ଼୍‍ ଆୟକଟ ମାନେନ୍‍, ଆଲାଇତ୍କେ ଇଞ୍ଜେ ନିମେ ନାକିଙ୍କ୍‍ ଆସାମ୍‍ କାୟ୍‍କିନେ ରୟ୍‍ସିୱେନି। ପରମେଶ୍ୱର ନା ଦୁଃକାମ୍‌ ନୁ କାୟ୍‍ଦେ କଷ୍ଟ ଉଡ଼ି ମିନ୍ଦେଣ୍ଡ୍‍; ଆଦିଙ୍କ୍‍ନିନ୍‍ ନାର୍କା ନିକିଙ୍କ୍‍ ରାମ୍‌କ୍‌ ମାଡ଼୍‍ତଣ୍ଡ୍‍।

43 ଆସୁଟ୍‍ ଲାବାନ୍‌ ଯାକୁବଙ୍କ୍‍ ଉତ୍ତର୍‍ ଇତ୍‍ତଣ୍ଡ୍‍, ଇ ପିକି ନା ପିକି ନୁ ଇ ପେକଡ଼୍‍ ନା ପେକଡ଼୍‍ ନୁ ଇ ପଶୁ ମାନ୍ଦେ, ନା ପଶୁମାନ୍ଦେ, ମେଣ୍ଡେ ବେନାବେନା ଉଡ଼ୁତିନ୍‍, ଆୱ୍‍ ସାରେ ନାୟାୱ୍‍; ବାତେଙ୍କ୍‍ଇତ୍କେ ନା ଇ ପିକିଙ୍କ୍‍ ନୁ ଇୱିନ୍‍ ପୁଟ୍‍ତେ ପିଲାକିଙ୍କ୍‍ ନାନ୍‍ ବାତେ ମାଡ଼ିତାନ୍‍ ? 44 ୱାଡ଼ା ମାନା ଇର୍‍ୱୁଡ଼୍‍ ନିୟମ୍‌ ତିଆର୍‍ ମାଡ଼ିକା, ଆଦ୍‍ ମାନ୍‍ ସାକ୍ଷି ଆଦ୍‌ତେ ।

45 ଆସୁଟ୍‍ ଯାକୁବ୍‍ ଅଣ୍ଡୟ୍‍ କାଲ୍‍ ଅସ୍‍ ଗୁଞ୍ଜେ ଲେକାମ୍‍ ତିଆର୍‍ ମାଡ଼୍‍ତଣ୍ଡ୍‍। 46 ମେଣ୍ଡେ ଯାକୁବ୍‍ ତାନ୍‍ କୁଟ୍‌ମାମ୍‌ତିଙ୍କ୍‍ କେତ୍‍ତଣ୍ଡ୍‍, ମିଡ଼୍‍ କାଲ୍‍କ୍‍ ଗୁଡ଼୍‍ପାଟ୍‍; ଆସୁଟ୍‍ ଅଡ଼୍‍ କାଲ୍‍କ୍‍ ତାସ୍‍ ଅଣ୍ଡୟ୍‍ ରାଶି ମାଡ଼୍‍ତାଙ୍କ୍‍, ସାରେ ତଡ଼୍‍ ଆ ପଡ଼୍‍ୟ୍‍ତାଗ୍‍ ଆ ରାଶିତ୍‍ ପର ତିତ୍‍ତଡ଼୍‍।

47 ଅନନ୍ତର୍‍ ଲାବାନ୍‌ ତାନ୍‍ ପେଦେର୍‍ ଯିଗର୍‍- ସାହଦୂତା ସାକ୍ଷିତେ ରାଶିତେ ଅର୍ଥ ଏର୍କେ ମାଡ଼ାନାଦ୍‌ ୱାଟ୍‍ତଣ୍ଡ୍‍, ମାତ୍ର ଯାକୁବ ତାନ୍‍ ପେଦେର୍‍ ଗଲ୍‍ୟଦ୍‍ ସାକ୍ଷିତେ ରାଶି ୱାଟ୍‍ତଣ୍ଡ୍‍। 48 ଆସୁଟ୍‍ ଲାବାନ୍‌ କେତ୍‍ତଣ୍ଡ୍‍, ଇ ରାଶି ନେଣ୍ଡ୍‍ ନାକିଙ୍କ୍‍ ନାକିଙ୍କ୍‍ ସାକ୍ଷି ଆସ୍‍ ମାନ୍ତ୍‍ତେ; ଆଦିନ୍‌ ମାଇଦିଙ୍କ୍‍ ତାନ୍‍ ପେଦେର୍‍ ଗଲୟଦ୍‍ ନୁ ମିସ୍‍ପା ପ୍ରହରିତେ ଅର୍ଥ କେପାନ୍‌ ପଡ଼୍‍ୟ୍‍ ୱାଟ୍‍ତଣ୍ଡ୍‍; 49 ବାତେଙ୍କ୍‍ ଇତ୍କେ ଅଣ୍ଡ୍‍ କେତ୍‍ତଣ୍ଡ୍‍, ମାନାଡ଼୍‍ ନିଜେ ୱେର୍‌ ଆତ୍‌ତାଙ୍କ୍‌, ସଦାପ୍ରବୁ ନା ନୁ ନି କେପାନଣ୍ଡ୍‍ ମାନ୍ତ୍‍ତଣ୍ଡ୍‍। 50 ନିମେ ବେସୁଙ୍କ୍‍ ନା ପିକିଙ୍କ୍‍ ଦୁଃକାମ୍‍ ଇଦ୍‍ତିନ୍‍, ଇତ୍କେବା ନା ପିକି ମାନା ମାନା ୱେର୍‍ ମୁତେକିଙ୍କ୍‍ ପେଣ୍ଡୁଲ୍‍ ଆଦ୍‌ତିନ୍‌, ଆଲାଇତ୍କେ ଆ ସମୟ୍‍ତେ ବେନ୍‍ ଆୟି ନାରୁଣ୍ଡ୍‍ ମା ଗାରେ ମାନ୍‍ ପ୍ରମାଣ, ମାତ୍ରମ୍‍ ଉଡ଼ା, ପରମେଶ୍ୱର୍‍ ନା ନୁ ନି ଲୋପେ ସାକ୍ଷି ଆଦ୍‌ତଣ୍ଡ୍‌ । 51 ମେଣ୍ଡେ ଲାବାନ୍‌ ଯାକୁବ୍‍ତିଙ୍କ୍‍ କେତ୍‍ତଣ୍ଡ୍‍, ଇଦ୍‍ କାଲ୍‌ଦିବେ ଉଡ଼ା, ମେଣ୍ଡେ ମାନ୍‍ ଇର୍‍ୱୁଡ଼୍‍ ନାଡ଼୍‍ମେ ନାନ୍‍ ମାଡ଼୍‍ତେ ଇ ଗୁଞ୍ଜେ ଉଡ଼ା। 52 ନାନ୍‍ ଅତିତ ମାଡ଼ାନ୍‍ ସେଙ୍ଗେ ଇ ରାଶି ୱେୟିସ୍‍ ନି ଗାରେ ଆନ୍‍ନନ୍‍ , ନିମେ ଆନ୍ତେ ଇ ରାଶି ନୁ ଇ ଗୁଞ୍ଜେ ୱେୟିସ୍‍ ନା ଗାରେ ୱାଡ଼୍‍ମା; ଆଦିଙ୍କ୍‌ ଇଦିନ୍‍ ସାକ୍ଷି ଇ ରାଶି ନୁ ଇଦିନ୍‍ ସାକ୍ଷି ଇ ଗୁଞ୍ଜେ। 53 ଇ ବିଷୟ୍‍ତେ ଅବ୍ରାହାମ୍‌ତେ ପରମେଶ୍ୱର୍‍, ନାହୋର୍‍ତେ ପରମେଶ୍ୱର ନୁ ଅଡ଼୍‍ ଆନିଦାଦିଡ଼୍‍ ପରମେଶ୍ୱର ମା ନୁ ମି ଲୋପେ ବିଚାର୍‍ ମାଡ଼ିତଣ୍ଡ୍‍; ଆସୁଟ୍‍ ଯାକୁବ୍‍ ତାମ୍‍ବାବାଲ୍‍ ଇସ୍‍ହାକ୍‍ତେ ୱେର୍‍ଦାନ୍‍ ପଡ଼୍‍ୟ୍‍ତାଗ୍‍ ପ୍ରମାଣ ମାଡ଼୍‍ତଣ୍ଡ୍‍। 54 ଅନନ୍ତର୍‍ ଅଣ୍ଡ୍‍ ଆ ମେଟେତାଗ୍‍ ବଲିଦାନ୍‌ ମାଡ଼ି ତିନ୍ଦାନ୍‍ ମାଇଦିଙ୍କ୍‍ ତାମ୍‍ କୁଟୁମାମ୍‌ତିଙ୍କ୍‍ କାର୍ଙ୍ଗତଣ୍ଡ୍‍, ଆସୁଟ୍‍ ଅଡ଼୍‍ ତିଞ୍ଜ୍‍ ମେଟେତାଗ୍‍ ନାର୍କାପାଲ୍‌ଲି ମାତ୍‍ତଡ଼୍‍। 55 ତାନ୍‍ ପେର୍କେ ଲାବାନ୍‌ ନାର୍କକ୍‍ ତେଦି ତାନ୍‍ ମାୟାସ୍‍କିଙ୍କ୍‍ ନୁ ପେକଡ଼୍‍କ୍‍ ଚୁମା ଇସ୍‍ ଆଶିର୍ବାଦ୍‌ ମାଡ଼୍‍ତଣ୍ଡ୍‍; ଇଦ୍‍ ଲେକାମ୍‌ ଲାବାନ୍‍ ନିଜର୍‍ ପଡ଼୍‍ୟ୍‍ତାଗ୍‍ ମାଲ୍‌ସ୍‌ ଆତ୍‌ତଣ୍ଡ୍‌ ।