ଯୋଷେପ୍ତେ ଦାଦାଲଡ଼୍ ବିନ୍ୟାମିନ୍ ତଡ଼୍ ମିସର୍ତା ଆଦାନାଦ୍
1 ଆ ସମୟ୍ତେ କିଣାନ୍ ଦେଶ୍ତାଗେ ଗାଟି ମରୁଡ଼ି ମାତ୍ତେ। 2 ଆଦିନ୍ ସେଙ୍ଗେ ଅଡ଼୍ ମିସର୍ ଦେଶ୍ତାଗାଙ୍କ୍ ବେନ୍ କାଦି ତାସ୍ମାତ୍ତଡ଼୍, ଆୱ୍ ସାରେ ତେର୍ତାଙ୍କ୍ ଅଡ଼୍ ବାବାଲ୍ ଅଡ଼୍କିଙ୍କ୍ କେତ୍ତଣ୍ଡ୍, ମିଡ଼୍ ମେଣ୍ଡନ୍ଦାମ୍ ଆଞ୍ଜ୍ ମାନ୍ ମାଇଦିଙ୍କ୍ ବେସ୍କ୍ ୱାଞ୍ଜି ଆସି ତାଡ଼ାଟ୍।
3 ଆସୁଟ୍ ଯିହୁଦାଲ୍ ଅଂକିଙ୍କ୍ କେତ୍ତଣ୍ଡ୍, ଆ ନାରୁଣ୍ଡ୍ ଡୁଟାଙ୍ଗ୍ ତେ ପ୍ରତିଜ୍ଞା ଇସ୍ କେସ୍ ମିନ୍ଦେଣ୍ଡ୍, ମି ତାମୁଣ୍ଡ୍ ମି ତଡ଼୍ ଇଲକଟ ମାତ୍ତ୍କେ, ମିଡ଼୍ ମା ମକମ୍ ଉଡ଼୍ ପାର୍ୱିଡ଼୍। 4 ଆଦିଙ୍କ୍ ବେସୁଙ୍କ୍ ନିମେ ମା ତାମୁଙ୍କ୍ ତଡ଼୍ ରହ୍ଃତିତିନ୍, ଆଲାଇତ୍କେ ମାମେ ମି ମାଇଦିଙ୍କ୍ କାଦି ଆସାନଙ୍କ୍ ଆଦ୍ତମ୍। 5 ମାତ୍ର ବେସୁଙ୍କ୍ ରହ୍ଃୱିନ୍, ଆସୁଙ୍କ୍ ମାମେ ଆନ୍ନମ୍; ବାତେଙ୍କ୍ଇତ୍କେ ଆ ନାରୁଣ୍ଡ୍ କେସ୍ମିନ୍ଦେନ୍, ମି ତାମୁଣ୍ଡ୍ ମି ତଡ଼୍ ଇଲକଟ ମାତ୍ତ୍କେ, ମିଡ଼୍ ନା ମକମ୍ ଉଡ଼୍ ପାର୍ୱିଡ଼୍।
6 ଆସୁଟ୍ ଯାକୁବ କେତ୍ତଣ୍ଡ୍, ମି ମେଣ୍ଡେ ଅର୍ତୁଣ୍ଡ୍ ତାମୁଣ୍ଡ୍ ମିନ୍ଦେଣ୍ଡ୍, ଇଦ୍ ଆ ନାରୁଙ୍କ୍ କେସ୍ ନା ପର ଇଦ୍ ଲେକାମ୍ କରାପ୍ ବ୍ୟବହାର୍ ବାତେଙ୍କ୍ ମାଡ଼୍ତି ?
7 ଅଡ଼୍ କେତ୍ତଡ଼୍, ଅଣ୍ଡ୍ ମାନ୍ ନୁ ମାନ୍ କୁଟୁମାମ୍ତେ ବିଷୟ୍ ସୁଦୁର୍ ପଚ୍ରାରା ମାଡ଼ି କେତ୍ତଣ୍ଡ୍, ମି ବାବାଲ୍ ବେନ ନେଣ୍ଡ୍ ଆଇନା ଗେଲ୍ସି ମିନ୍ଦେଣ୍ଡ୍ ? ମିକିଙ୍କ୍ ମେଣ୍ଡେ ତାମୁସ୍କ୍ ମିନ୍ଦେଡ଼୍ ? ଆଦିଙ୍କ୍ ମାମେ ଆ ଗଟ୍ ଲେକାମ୍ ଉତ୍ତର୍ ଇସ୍ ମାତ୍ତମ୍; ଅଣ୍ଡ୍ ଯେ ମି ତାମୁଙ୍କ୍ ଇଗ୍ ତାଡ଼ାଟ୍ ଇଞ୍ଜ କେତ୍ତଣ୍ଡ୍, ଇଦ୍ ମାମେ ବେଦ୍ ପୁଟୁଙ୍କ୍ ପୁଃନ୍ତମ୍ ?
8 ଯିହୁଦାଲ୍ ତାମ୍ ବାବାଙ୍କ୍ ଯାକୁବତିଙ୍କ୍ ମେଣ୍ଡ୍ କେତ୍ତଣ୍ଡ୍, ନିମେ ଆ ବେଞ୍ଜାମିନ୍ତିଙ୍କ୍ ନା ତଡ଼୍ ରୟ୍ସିମ୍; ମାମେ ତେଦି ଆଦ୍ତମ୍, ଆସୁଟ୍ ମାମେ ନୁ ମିଡ଼୍ ନୁ ପେକଡ଼୍, ସାରେତଡ଼୍ ଗେଲ୍ସିକାଡ଼୍, ଡଲ୍ୱାଡ଼୍। 9 ନାନ୍ ଅନ୍ ଲଗାମ୍ ଆତ୍ତାନ୍, ନା କାଇଦେକଞ୍ଚ୍ ଅଂକିଙ୍କ୍ ବୁଜେମ୍ ଆଦ୍ତାନ୍, ନାନ୍ ବେସୁଙ୍କ୍ ଅଂକିଙ୍କ୍ ତାସ୍ ନି ମୁନେ ୱାଟନ୍, ଆଲାଇତ୍କେ ଆ ଦଷ୍ ସାରେଦାମ୍ ନା' ପର ଆୟି । 10 ବେସୁଙ୍କ୍ ମାନାଦ୍ ଇସର୍ଲେଟ୍ ଆୟଆୟେଡ଼୍, ଆଲାଇତ୍କେ ମାନାଡ଼୍; ମେଣ୍ଡନ୍ ଦାମ୍ ମାଲ୍ସ୍ ୱାଡ଼୍ୱାଡ଼୍ ଆୟେଡ଼୍।
11 ଆସୁଟ୍ ତାମ୍ ବାବାଲ୍ ଯାକୁବ ଅଡ଼୍କିଂଙ୍କ୍ କେତ୍ତଣ୍ଡ୍, ବେସୁଙ୍କ୍ ଇଦ୍ ଲେକାମ୍ ଆଦ୍ତେ, ଆଲାଇତ୍କେ ଅଣ୍ଡୟ ପାଡ଼ିୟ୍ ମାଡ଼ାଟ୍; ମିଡ଼୍ ନିଜର୍ ନିଜର୍ ଗିନେନାଗ୍ ଇ ଦେଶ୍ତେ ଲେକେତ୍ ଜିନିଷ୍, ଇତ୍କେ, ଦୁପାମ୍, ମେଲ୍ତେ, ସାୟେତ୍ ଗାବ୍ତେ ଜିନିଷ, ଗନ୍ଦରସ, ପେସ୍ତା ନୁ ପେସ୍ତାବାଦାମ୍ ସୁକୁକ୍ ସୁକୁକ୍ ଅସ୍ ଆ ନାରୁଙ୍କ୍ କାଇଲି ଇମୁଟ୍। 12 ମେଣ୍ଡେ ନିଜର୍ ନିଜର୍ କାୟ୍କିନାଗେ ରେଣ୍ଡ୍ଗୁଣ ଡାବ୍କ୍ ଅୟ୍ମୁଟ୍ ନୁ ମିୟାଦ୍ ବସ୍କା ମକକଞ୍ଚ୍ ବେନ୍ ଡାବ୍କ୍ ମାଲ୍ସ୍ ୱାସ୍ମିନ୍ଦେଡ଼୍, ଆୱ୍ଆନ୍ତେ କାୟ୍ଦେ ପୟିସ୍ ଅୟ୍ମ୍; ଉମ୍ଭକି ଆଦ୍ ବୁଲ୍ ଆସ୍ମାନ୍ତେ। 13 ମେଣ୍ଡେ ମି ତାମୁଙ୍କ୍ ବେଞ୍ଜାମିନ୍ତିଙ୍କ୍ ପୟିସ୍ ତେଦି ମେଣ୍ଡନ୍ଦାମ୍ ଆ ନାରୁନ୍ ଗାରେ ଆନୁଟ୍। 14 ସର୍ବଶକ୍ତିମାନ୍ ପରମେଶ୍ୱର୍ ମିକିଙ୍କ୍ ଆ ନାରୁନ୍ ଗାରେ ଇଦ୍ ପୁଟୁଙ୍କ୍ ଅନୁଗ୍ରହସାମାନ୍ ମାଡ଼ିଣ୍ଡ୍, ବେଦ୍ପୁଟୁଙ୍କ୍ ଅଣ୍ଡ୍ ମି ୱେର୍ ଅର୍ତୁଣ୍ଡ୍ ତାମୁଙ୍କ୍ ନୁ ବିନ୍ୟାମିନ୍ତିଙ୍କ୍ ୱିଡ଼୍ସିଦ୍ତଣ୍ଡ୍। ମାତ୍ର ବେସୁଙ୍କ୍ ନାକିଙ୍କ୍ ଆଦ୍ ୱେୟ୍କେ, ଆଲାଇତ୍କେ ମାର୍ ଇଲ୍ୱେ ଲେକାମ୍ ଆତ୍ତାନ୍।
15 ଆସୁଟ୍ ଅଡ଼୍ ଆ ପୟ୍ତେ ଜିନିଷ୍ ନୁ ରେଣ୍ଡ୍ଗୁଣ ଡାବ୍କ୍ ନୁ ବିନ୍ୟାମିନ୍ ତିଙ୍କ୍ ତଡ଼େକ୍ ଅସ୍ ମିସର୍ ଦେଶ୍ତାଗେ ଯୋଷେପ୍ତେ ମୁନ୍ନେ ନିତ୍ତଡ଼୍। 16 ଆସୁଟ୍ ଯୋଷେପ୍ ଅଡ଼୍ ତଡ଼୍ ବିନ୍ୟାମିନ୍ତିଙ୍କ୍ ଉଡ଼ି ତାନ୍ ଲତ୍ତେ ମୁକ୍ୟାଙ୍କ୍ କେତ୍ତଣ୍ଡ୍, ଇ ନାରୁଡ଼୍କ୍ ମା ଲୋତ୍ତାଗେ ଅୟ୍ମ୍ ନୁ ପଶୁ ରେହ୍ଃସ୍ କାଦି ତିଆର୍ ମାଡ଼ାଟ୍; ଇଡ଼୍ ମାଦ୍ନା ସମୟ୍ତେ ମା ତଡ଼୍ ତିନ୍ଦ୍ତଡ଼୍। 17 ଆସୁଟ୍ ଆ ନାରୁନ୍ ଯୋଷେପ୍ତେ ଆଦେଶ୍ ଲେକାମ୍ କାମ୍ମାଡ଼ି ଅଡ଼୍କିଙ୍କ୍ ଯୋଷେପ୍ତେ ଲୋନ୍ ଅତ୍ତଣ୍ଡ୍।
18 ମେଣ୍ଡେ ଯୋଷେପ୍ତେ ଲୋନ୍ ୱାତ୍ତାଙ୍କ୍ ଅଡ଼୍ ୱେର୍ସ୍ ନିଜେ ନିଜେ କେତାକେତି ଆତ୍ତଡ଼୍, ମୁନେଙ୍କ୍ ମା ବସ୍କା ନାଗେ ବେନ୍ ଡାବ୍କ୍ ମାଲ୍ସ୍ ଆଞ୍ଜ୍ ମାତ୍ତା, ଆଦିନ୍ ମାଇଦିଙ୍କ୍ ମାନାଙ୍କ୍ ଇଗେ ତାସ୍ ମିନ୍ଦେଣ୍ଡ୍; ଇଞ୍ଜେ ଅଣ୍ଡ୍ ମାନ୍ ପର ଆକ୍ରମନ୍ ମାଡ଼ି ମାନ୍ ଗଦ ସାରେ ଅସ୍ ମାନାଙ୍କ୍ ଚାକର୍ତେ ଲେକାମ୍ ନେଃତିତଣ୍ଡ୍। 19 ଆଦିଙ୍କ୍ ଅଡ଼୍ ଯୋଷେପ୍ତେ ଲୋତ୍ତେ ମୁକ୍ୟାନ୍ ଗାରେ ଆଞ୍ଜ୍ ଲୋନ୍ ଅସାନ୍ ପଡ଼ିୟ୍ତାଗେ ଅନ୍ ତଡ଼୍ ତିର୍ୟି ଆସ୍ କେତ୍ତଣ୍ଡ୍, 20 ପ୍ରବୁ, ମାମେ ମୁନେଙ୍କ୍ କାଦି ଆସାନଙ୍କ୍ ୱାସ୍ମାତ୍ତମ୍; 21 ମେଣ୍ଡେ ଡିଗାନ୍ ପଡ଼ିୟ୍ତାଗେ ନିଜର୍ ନିଜର୍ ବସ୍କା ଟେଣ୍ଡି ଉଡ଼୍ତମ୍ ଯେ, ସାରେ ତଡ଼୍ ବସ୍କାନ୍ ପର ଅନାୱ୍ ଡାୱୁକ୍, ଇତ୍କେ, ବର୍ତ୍ତି ଓଜନ୍ ଲେକାମ୍ ମାୟାୱ୍ ଡାୱୁକ୍ ମିନ୍ଦେ; ଆୱିଙ୍କ୍ ମାମେ କାଇଦେ ମେଣ୍ଡନ୍ ଦାମ୍ ତାସ୍ ମିନ୍ଦେମ୍। 22 ମେଣ୍ଡେ କାଦି ଆସାନ୍ ମାଇଦିଙ୍କ୍ ମାମେ ମେଣ୍ଡେ ଡାୱୁକ୍ ତାସ୍ ମିନ୍ଦେମ୍; ମାତ୍ର ଆ ଡାବ୍କ୍ ମା ବସ୍କାନାଗେ ବେନ ୱାଟିମାତ୍ତଣ୍ଡ୍, ମାମେ ଆଦ୍ ପୁଃନମ୍।
23 ଆସୁଟ୍ ଆ ଲୋତ୍ତେ ମୁକ୍ୟାଲ୍ କେତ୍ତଣ୍ଡ୍, ମି ମଙ୍ଗଲ ଆୟି, ୱେର୍ମାଟ୍; ମି ପରମେଶ୍ୱର୍ ନୁ ମି ଆନିଦାଦିଡ଼୍ ପରମେଶ୍ୱର୍ ମି ବସ୍କାନାଗ୍ ମିକିଙ୍କ୍ ମିଞ୍ଜ୍ପିମେଣ୍ଡ୍ ଦନ୍ ଇସ୍ ମିନ୍ଦେଣ୍ଡ୍; ମି ଡାବ୍କ୍ ନା ଗାରେ ମାତ୍ତା। ଆସୁଟ୍ ଅଣ୍ଡ୍ ଶିମିୟନ୍ତିଙ୍କ୍ ତାନେତାଗାଙ୍କ୍ ବାୟ୍ଦେ ପେସ୍ପି ଅଡ଼୍ ଗାରେ ତାତ୍ତଣ୍ଡ୍। 24 ନିଜେ ଅଣ୍ଡ୍ ଅଡ଼୍କିଂଙ୍କ୍ ଯୋଷେପ୍ତେ ଲୋତ୍ତେ ଲୋପ୍ ଅସ୍ ଏର୍ ଇତ୍ତାଙ୍କ୍, ଅଡ଼୍ ଡେକା ନାରୁଡ଼୍ତଡ଼୍; ମେଣ୍ଡେ ଅଣ୍ଡ୍ ତାମ୍ ଗଦକିଙ୍କ୍ କାଦି ଇତ୍ତଣ୍ଡ୍। 25 ମେଣ୍ଡେ ମାଦ୍ନାତେ ସମୟ୍ତେ ଯୋଷେପ୍ ୱାଦ୍ତଣ୍ଡ୍ ଇଞ୍ଜ ଅଡ଼୍ ତାତ୍ତେ ଜିନିଷ୍ ସଜା ମାଡ଼୍ତଡ଼୍; ଇତ୍କେ ଅଡ଼୍ ଆଗେ ତିନ୍ଦ୍ତଡ଼୍ ଇଞ୍ଜ କେଞ୍ଜିମାତ୍ତଡ଼୍। 26 ତାନ୍ ପେର୍କେ ଯୋଷେପ୍ ଲୋନ୍ ୱାତ୍ତାଙ୍କ୍, ଅଡ଼୍ କାଇଦାଗ୍ ପଇସ୍ ମାନ୍ଦାନ୍ ତାତ୍ତେ ଜିନିଷ୍ ତାନ୍ ଗାରେ ଲୋତ୍ ନାଡ଼୍ମେ ତାସ୍ ଅଂକିଙ୍କ୍ ପାଟିମେଣ୍ଡେ ପ୍ରମାଣ ମାଡ଼୍ତଡ଼୍। 27 ଆସୁଟ୍ ଯୋଷେପ୍ ଅଡ଼୍ ମଙ୍ଗଲ ଗଟ୍ ପଚ୍ରାରା ମାଡ଼ି କେତ୍ତଣ୍ଡ୍, ମି ବାବାଲ୍ ବାତେ ସାୟ୍ ମିନ୍ଦେଣ୍ଡ୍ ? ମିଡ଼୍ ବେନ୍ ମୁୟ୍ତେ ନାରୁନ୍ ଗଟ୍ କେସ ମାତ୍ତିଡ଼୍, ଅଣ୍ଡ୍ କି ନେଣ୍ଡ୍ ଆଇନା ଗେଲ୍ସି ମିନ୍ଦେଣ୍ଡ୍ ?
28 ଅଡ଼୍ କେତ୍ତଡ଼୍, ନି ଦାସ ମା ବାବାଲ୍ ସାୟ୍ ମିନ୍ଦେଣ୍ଡ୍, ଅଣ୍ଡ୍ ନେଣ୍ଡ୍ ଆଇନା ଗେଲ୍ସି ମିନ୍ଦେଣ୍ଡ୍। ଆସୁଟ୍ ଅଡ଼୍ ତାଲା ମଦଲ୍ ମାଡ଼ି ମଡ଼୍କ୍ ତଡ଼୍।
29 ଆସୁଟ୍ ଯୋଷେପ୍ ଲେକେତ୍ ଉଡ଼ି ତାନ୍ ତଡ଼୍ ମାନ୍ଦାନ୍ ବିନ୍ୟାମିନ୍ତିଙ୍କ୍ ଉଡ଼ି କେତ୍ତଣ୍ଡ୍, ମିଡ଼୍ ବେନ୍ ସୁଦୁନ୍ ତାମୁନ୍ ଗଟ୍ କେସମାତ୍ତିଡ଼୍, ଅଣ୍ଡେ କି ଇଣ୍ଡ୍ ? ମେଣ୍ଡେ ଅଣ୍ଡ୍ କେତ୍ତଣ୍ଡ୍, ହେୟ୍ ମା ମାର୍, ପରମେଶ୍ୱର୍ ନିକିଙ୍କ୍ ଅନୁଗ୍ରହ ମାଡ଼ିଣ୍ଡ୍। 30 ଆସୁଟ୍ ତାମୁନ୍ ପର ଯୋଷେପ୍ତେ ହୃଦୟ ସାର୍ଦେତେ ଦୁଃକ ଆତ୍ତାଙ୍କ୍ ଅଣ୍ଡ୍ ସିଟ୍ପାଟ୍ କେୟାଙ୍କ୍ ପଡ଼ିୟେ ମେହ୍ଃକ୍ତଣ୍ଡ୍; ମେଣ୍ଡେ ଅଣ୍ଡ୍ ତାନ୍ ରୁମ୍ଦାଗ୍ ନେଙ୍ଗି ଆଗେ କେୟ୍ତଣ୍ଡ୍। 31 ମେଣ୍ଡେ ମକମ୍ ନର୍ସ୍ ବାୟ୍ଦେ ୱାତ୍ତଣ୍ଡ୍, ମେଣ୍ଡେ ନିଜ୍ତିଙ୍କ୍ ସାମ୍ଲା ମାଡ଼ି କାଦି ଜିନିଷ୍ ତିନ୍ଦାନ୍ ମାଇଦିଙ୍କ୍ ଆଦେଶ୍ ଇତ୍ତଣ୍ଡ୍। 32 ଆସୁଟ୍ ଦାସଡ଼୍ ଯୋଷେପ୍ତେ ସେଙ୍ଗେ ନୁ ତାମ୍ ଦାଦାଲଡ଼୍ ସେଙ୍ଗେ, ମେଣ୍ଡେ ତାମ୍ତଡ଼୍ ତିନ୍ଦାନଡ଼୍ ମିସର ନାରୁଡ଼୍ ସେଙ୍ଗେ ୱେର୍ ୱେର୍ ତିନ୍ଦାନଙ୍କ୍ ଇତ୍ତଡ଼୍, ଇତ୍କେ ଏବ୍ରିୟଡ଼୍ ତଡ଼୍ ତିନ୍ଦାନଙ୍କ୍ ମିସ୍ରିୟଡ଼୍ ବ୍ୟବହାର୍ ଇଲକଟ ମାତ୍ତେ; ଆଦ୍ ମିସ୍ରିୟଡ଼୍ ପାସ୍କାନ୍ ପାଡ଼ିୟ୍। 33 ନିଜେ ଯୋଷେପ୍ତେ ମୁନ୍ନେ ତାମ୍ ବେଡ଼ିୟ୍ ବେଡ଼ିୟ୍ ପଡ଼୍ୟ୍ତାଗ୍ ନୁ ସୁଦୁ ସୁଦୁ ପଡ଼ିୟ୍ତାଗେ କୁଦ୍ତଡ଼୍; ଆସୁଟ୍ ଅଡ଼୍ ନିଜେ ନିଜେ ଆଶ୍ଚର୍ଯ୍ୟ ଏର୍କ୍ ମାଡ଼୍ତଡ଼୍। 34 ମେଣ୍ଡେ ଅଣ୍ଡ୍ ତାନ୍ ମୁନେକଞ୍ଚ୍ ତିନ୍ଦାନ୍ କାଦି ତେୟିସ୍ ଅଡ଼୍କିଂଙ୍କ୍ ତିତ୍ତଣ୍ଡ୍; ମାତ୍ର ସାରେତଡ଼୍ ମୁଟାନାଗାଙ୍କ୍ ବିନ୍ୟାମିନ୍ତେ ମୁଟା ଏଇଙ୍ଗ୍ ବାଗ୍ ନାର୍ଗେ ମାତ୍ତା। ଆଗେ ଅଡ଼୍ ତିଞ୍ଜ୍ ଅନ୍ ତଡ଼୍ ସାର୍ଦେ ମାଡ଼୍ତଡ଼୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)