ଯାକୁବ୍ ଏଷୌନ୍ ତଡ଼୍ କାୟ୍ଲାନାଦ୍
1 ଅନନ୍ତର୍ ଯାକୁବ୍ ମାଲ୍ସ୍ ଉଡ଼୍ତଣ୍ଡ୍, ମେଣ୍ଡେ ଉଡ଼ାଟ୍, ଏଷୌ ଆନ୍ତେ ମିନ୍ଦେଣ୍ଡ୍, ମେଣ୍ଡେ ଅନ୍ ତଡ଼୍ ଚାରିଶହ ନାରୁଡ଼୍। ଆସୁଟ୍ ଅଣ୍ଡ୍ ତାନ୍ ପିଲାଙ୍କ୍ ୱେର୍ ମାଡ଼ି ଲେୟାଲ୍ ନୁ ରାହେଲ୍ ନୁ ରେଣ୍ଡ୍ ଦାସିନ୍ ଗାରେ ସର୍ପା ମାଡ଼୍ତଣ୍ଡ୍, 2 ଇତ୍କେ ମୁନେ ରେଣ୍ଡ୍ ଦାସି ନୁ ଅଡ଼୍ ପିଲାଙ୍କ୍, ଅନ୍ ପେର୍କେ ଲେୟାଲ୍ ନୁ ତାନ୍ ପିଲାକିଙ୍କ୍ ସାରେକେ ପେର୍କେ ରାହେଲ୍ତିଙ୍କ୍ ନୁ ଯୋଷେପ୍ତିଙ୍କ୍ ନେହ୍ତଣ୍ଡ୍। 3 ମେଣ୍ଡେ, ନିଜେ ସାରେତଡ଼୍କିଙ୍କ୍ ମୁନେ ଆଞ୍ଜ୍ ସାତ୍ଦାମ୍ ଭୂମ୍ତାଗ୍ ପ୍ରମାଣ ମାଡ଼୍ନା ମାଡ଼୍ନା ତାନ୍ ଦାଦାଲ୍ ଗାରେ ହେୱ୍ତଣ୍ଡ୍। 4 ଆସୁଟ୍ ଏଷୌ ଅଂକିଙ୍କ୍ କାଇଲାଙ୍କ୍ ମିରିୱାସ୍ ଅନ୍ ବଣ୍ଡ୍କ୍ତିଙ୍କ୍ ପୟ୍ସ୍ ଆଲିଙ୍ଗନ୍ ନୁ ଚୁମା ଇତ୍ତଣ୍ଡ୍, ମେଣ୍ଡେ ଇର୍ୱୁଡ଼୍ କେୟ୍ତଡ଼୍। 5 ତାନ୍ ପେର୍କେ ଅଣ୍ଡ୍ ମାଲ୍ସ୍ ମୁତେତିଙ୍କ୍ ନୁ ପେକଡ଼୍କ୍ ଉଡ଼ି ପାଚାରା ମାଡ଼୍ତଣ୍ଡ୍, ନି ତଡ଼୍ ଇଡ଼୍ ବେନଡ଼୍ ? ଆସୁଟ୍ ଅଣ୍ଡ୍ କେତ୍ତଣ୍ଡ୍, ପରମେଶ୍ୱର ଦୟା ମାଡ଼ି ନି ଦାସଙ୍କ୍ ଇ ସାରେ ପିଲାଇସ୍ ମିନ୍ଦେଣ୍ଡ୍। 6 ଆସୁଟ୍ ଦାସିକି ନୁ ଅଡ଼୍ ପିଲା ଗାରେ ୱାସ୍ ମଡ଼୍କ୍ତା। 7 ତାନ୍ ପେର୍କେ ଲେୟାଲ୍ ନୁ ତାନ୍ ପିଲା ୱାସ୍ ମଡ଼୍କ୍ତା; ତାନ୍ପେର୍କେ ଯୋଷେପ୍ ନୁ ରାହେଲ୍ ଗାରେ ୱାସ୍ ମଡ଼୍କ୍ତା।
8 ଆସୁଟ୍ ଏଷୌ ପାଚାରାମାଡ଼୍ତଣ୍ଡ୍, ନାନ୍ ମୁତେଙ୍କ୍ ବେନ୍ ସାରେ ମାନ୍ଦେ ତଡ଼୍ କାୟ୍ଲ୍ତାନ୍; ଆଦ୍ ବାତେତ୍ ମାଇଦିଙ୍କ୍ ? ଯାକୁବ କେତ୍ତଣ୍ଡ୍, ନା ପ୍ରବୁନ୍ ଦୃଷ୍ଟିତେ ଅନୁଗ୍ରହ ପାହେମ୍ ଆଦାନ୍ ମାଇଦିଙ୍କ୍।
9 ଆସୁଟ୍ ଏଷୌ କେତ୍ତଣ୍ଡ୍, ନାକିଙ୍କ୍ ନାର୍ଗେ ମିନ୍ଦେ; ଯାକୁବ୍ ନିୟାୱ୍ ବାତା ମିନ୍ଦେ, ଆୱ୍ ନିୟାଗେ ମାନି।
10 ଯାକୁବ୍ କେତ୍ତଣ୍ଡ୍, ଇଲା ଅନୁରୋଧ ମାଡ଼ୁତାନ୍, ନାନ୍ ନି କଣ୍ଡାନେ ବେସୁଙ୍କ୍ ଅନୁଗ୍ରହ ପାହେମ୍ ଆତ୍ତାନ୍, ଆଲାଇତ୍କେ ନା କାୟ୍ଦେ କଞ୍ଚ୍ ଆ କାଇଲିତେ ଗ୍ରହଣ ମାଡ଼ା; ବାତେଙ୍କ୍ ଇତ୍କେ ପରମେଶ୍ୱର୍ତେ ମକମ୍ ଉଡ଼୍ ମିନ୍ଦେନ୍; ଆନ୍ତେ ନିମେ ନା ପର ୱେଡ଼୍କି ଆସ୍ ମିନ୍ଦେନି। 11 ଆଦିଙ୍କ୍ ଅନୁରୋଧ ମାଡ଼ୁତାନ୍, ନି ଗାରେ ତାତ୍ତେ ଇ ଆଶିର୍ବାଦ୍ ଗ୍ରହଣ ମାଡ଼ା; ବାତେଙ୍କ୍ ଇତ୍କେ ପରମେଶ୍ୱର ନାକିଙ୍କ୍ ଅନୁଗ୍ରହ ମାଡ଼ି ମିନ୍ଦେଣ୍ଡ୍, ମେଣ୍ଡେ ନାକିଙ୍କ୍ ସାରେ ମିନ୍ଦେ। ଇଦ୍ପୁଟୁଙ୍କ୍ ନାର୍ଗେ ଦୟାତଡ଼୍ ପ୍ରାର୍ତନା ମାଡ଼୍ତାଙ୍କ୍, ଏଷୌ ଆୱିଙ୍କ୍ ଗ୍ରହଣ ମାଡ଼୍ତଣ୍ଡ୍।
12 ଅନନ୍ତର୍ ଏଷୌ କେତ୍ତଣ୍ଡ୍, ୱାଡ଼ାଟ୍, ମାନାଡ୍ ଆଦିକାଡ଼୍, ନାନ୍ ମି ମୁନେ ଆଦୁତାନ୍ ।
13 ଆସୁଟ୍ ଯାକୁବ୍ କେତ୍ତଣ୍ଡ୍, ନା ପ୍ରବୁ ପୁତ୍ତଣ୍ଡ୍, ଇ ପେକଡ଼୍ ଲେୟଡ଼୍ ସୁଦୁନଡ଼୍ ମେଣ୍ଡେ ପାଲ୍ଇଦାନ୍ ମେଣ୍ଢା ପେଟି ନୁ ଗଡ୍ପିଲେ ନା ତଡ଼୍ ମିନ୍ଦେ; ଅଣ୍ଡ୍ଦିନ୍ ନାର୍ଗେ ଚାଲାମାଡ଼୍କେ ସାରେ ମାନ୍ଦେ; ଡଲି ଆଦ୍ତା । 14 ଆସୁଟ୍ ଅନୁରୋଧ ମାଡ଼ୁତାନ୍, ନା ପ୍ରବୁ ନା ଦାସନ୍ ମୁନେ ମୁନେ ଆନି; ସେୟିର ପ୍ରଦେଶ୍ତେ ନା ପ୍ରବୁନ୍ ଗାରେ ହେୱ୍ନା ଜାକ ନାନ୍ ପଶୁକିନ୍ ତାକାନ୍ ଶକ୍ତି ଲେକାମ୍ ନୁ ପେକଡ଼୍ ତାକାନ୍ ଶକ୍ତି ଲେକାମ୍ ଜାମେ ଚାଲାମାଡ଼ ଅଦ୍ତାନ୍।
15 ଏଷୌ କେତ୍ତଣ୍ଡ୍, ଆଲାଇତ୍କେ ନା ତଡ଼୍ ମାନ୍ଦାନ୍ ବେସ୍କ୍ତଡ଼୍ ନାରୁଡ଼୍କ୍ ନି ଗାରେ ନେହ୍ସ୍ ଆଞ୍ଜ୍ ମିନ୍ଦେନ୍। ଯାକୁବ୍ କେତ୍ତଣ୍ଡ୍, ବାତ୍ ଦରକାର୍ ? ନା ପର କେବଳ ପ୍ରବୁନ୍ ଅନୁଗ୍ରହତେ କଣ୍ଡା ମାନି। 16 ଆସୁଟ୍ ଏଷୌ ଆ ଦିନ୍ ସେୟିର୍ ଆର୍ ଇସ୍ ମାଲ୍ସ୍ ଆତ୍ତଣ୍ଡ୍ । 17 ମାତ୍ର ଯାକୁବ୍ ସୁକ୍କୋତତା ତାକିଆଞ୍ଜ୍ ନିଜର୍ ତେ ସେଙ୍ଗେ ଲୋନ୍ ନୁ ପଶୁକିନ୍ ସେଙ୍ଗେ ଗୁଡ଼୍ଚେ ତିଆର୍ ମାଡ଼୍ତଣ୍ଡ୍; ଆଦିନ୍ ମାଇଦିଙ୍କ୍ ଇ ପଡ଼୍ୟ୍ ସୁକ୍କୋତତେ ଅର୍ଥ ଗୁଡ଼୍ଚେ ପେଦେର୍ତେ ପେଦେର୍ ଆସ୍ମିନ୍ଦେ।
18 ଇଦ୍ ଲେକାମ୍ ଯାକୁବ୍ ପଦ୍ଦନ୍ ଅରାମତାଗାଙ୍କ୍ ପେୟ୍ସ୍ କୁଶଲତେ କିଣାନ ଦେଶ୍ତେ ଶିକିମ୍ତେ ଅଣ୍ଡୟ୍ ନାର୍ତାଗ୍ ହେୱୁସ୍ ନଗର୍ତେ ବାୟ୍ଦେ ତମ୍ୱୁ ତିଆର୍ ମାଡ଼୍ତଣ୍ଡ୍। 19 ତାନ୍ପେର୍କେ ଶିକିମ୍ତେ ବାବାଲ୍ ହମୋରତେ ପିଲାକିଙ୍କ୍ ଶହେ ସିଲ୍ରାଡାବ୍ ରୁପା ଡ଼ାବ୍କ୍ ଇସ୍ ଆ ତମ୍ୱୁ ତିଆର୍ ମାଡ଼ାନଙ୍କ୍ ବୁମ୍ସୁଦୁର୍ ଆସ୍ତଣ୍ଡ୍। 20 ମେଣ୍ଡେ ଆଗେ ଅଣ୍ଡୟ୍ ବେଦି ତିଆର୍ ମାଡ଼ି ତାନ୍ ପେଦେର୍ ଏଲ ଇଲୋହେ ଇସ୍ରାଏଲ୍ତେ ଅର୍ଥ ପରମେଶ୍ୱର ଇସ୍ରାଏଲ୍ତେ ପରମେଶ୍ୱର୍ ୱାଟ୍ତଣ୍ଡ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)