ବୈତଲ୍ତାଗ୍ ଇଶ୍ୱରତେ ଯାକୁବଙ୍କ୍ ଆଶିର୍ବାଦ୍
1 ତାନ୍ପେର୍କେ ପରମେଶ୍ୱର୍ ଯାକୁବଙ୍କ୍ କେତ୍ତଣ୍ଡ୍, ନିମେ ତେଦି ବୈତେଲ୍ ତା ଆଞ୍ଜ୍ ଆଗେ ବାସ ମାଡ଼ା; ମେଣ୍ଡେ ନି ଦାଦାଲ୍ ଏଷୌନ୍ ମୁନେଙ୍କ୍କଞ୍ଚ୍ ମିରାନ୍ ସମୟତେ ବେନ୍ ପରମେଶ୍ୱର୍ ଦର୍ଶନ୍ ଇସ୍ ମାତ୍ତଣ୍ଡ୍, ତାନ୍ ଆଦେଶ୍ ତେ ଯଜ୍ଞବେଦି ତିଆର୍ ମାଡ଼ାଟ୍। 2 ଆସୁଟ୍ ଯାକୁବ ଅନ୍ କୁଟ୍ମାମ୍ ନୁ ତାନ୍ ତଡ଼୍ ମାନ୍ଦାନ୍ ନାରୁଡ଼୍କ୍ କେତ୍ତଣ୍ଡ୍, ମି ଗାରେଙ୍କ୍ ବେନ୍ ସାରେ ବିଦେଶ୍ତେ ଦେୟାକ୍ ମିନ୍ଦେ, ଆୱିଙ୍କ୍ ଦୁର୍ ମାଡ଼ାଟ୍, ମିକିଙ୍କ୍ ସାକ୍ସାକା ମାଡ଼ାଟ୍, ମେଣ୍ଡେ ମି ସିଲେକିଙ୍କ୍ ବଦଲା ମାଡ଼ାଟ୍। 3 ମେଣ୍ଡେ ୱାଡ଼ାଟ୍, ମାନାଡ଼୍ ତେଦି ବୈତେଲ୍ତା ଆଦିକା; ବେନ୍ ପରମେଶ୍ୱର୍ ନା ଦୁକାତେ ଦିନାତେ ନା ପାର୍ତନାତେ ଉତ୍ତର୍ ଇତ୍ତଣ୍ଡ୍, ନୁ ନାନ୍ ଆଦାନ୍ ଆର୍ଦାଗ୍ ନା ସହାୟ ଆସ୍ ମାତ୍ତଣ୍ଡ୍, ଅନ୍ ଉଦେଶ୍ତେ ନାନ୍ ଆ ପଡ଼ିୟେ ତାଗ୍ ଅଣ୍ଡୟ୍ ଯଜ୍ଞବେଦି ତିଆର୍ ମାଡ଼ିତାନ୍। 4 ଆସୁଟ୍ ଅଡ଼୍ ମି ଗାରେ ମାନ୍ଦାନ୍ ବିଦେଶି ଦେୟାକ୍ ନୁ କେୱୁକ୍ କୁଣ୍ଡଲ ସାରେ ପୟିସ୍ ଯାକୁବଙ୍କ୍ ଇତ୍ତଣ୍ଡ୍, ମେଣ୍ଡେ, ଅଣ୍ଡ୍ ଆୱ୍ସାରେ ଅସ୍ ଶିକିମ୍ତେ ଗାରେ ଅଲୋନ ମାଡ଼େତ୍ ମଦଲ୍ ମିଞ୍ଜ୍ପି ୱାଟ୍ତଡ଼୍।
5 ତାନ୍ ପେର୍କେ ଅଡ଼୍ ଆତ୍ତଡ଼୍; ଆସୁଟ୍ ସାରେ ପାକାତେ ନଗର୍ତାଗ୍ ପରମେଶ୍ୱର୍ ତାଗାଙ୍କ୍ ୱେର୍ଦାନାଦ୍ ହେୱ୍ତାଙ୍କ୍ ଅଡ଼୍ ଯାକୁବନ୍ ମାର୍କିଡ଼୍କ୍ ତଲଡ଼୍। 6 ତାନ୍ପେର୍କେ ଯାକୁବ ନୁ ତାନ୍ ସାଙ୍ଗଡ଼୍ କିଣାନ୍ ଦେଶ୍ତେ ଲୂସ୍ତାଗ୍, ଇତ୍କେ, ବୈତେଲ୍ତାଗ୍ ହେୱ୍ତଡ଼୍। 7 ଆଗେ ଅଣ୍ଡ୍ ଅଣ୍ଡୟ୍ ଯଜ୍ଞବେଦି ତିଆର୍ ମାଡ଼ି ଆ ପଡ୍ୟେତ୍ ପେଦେର୍ ଏଲ- ବୈତେଲ୍ ତେ ଅର୍ଥ ବୈତେଲ୍ତେ ପରମେଶ୍ୱର୍ ୱାଟ୍ତଣ୍ଡ୍; ବାତେଙ୍କ୍ ଇତ୍କେ ଯାକୁବ ଦାଦାନ୍ ୱେର୍ଙ୍ଗିଙ୍କ୍ ମିରାନ୍ ୱେଲେ ପରମେଶ୍ୱର୍ ଆ ପଡ଼୍ୟିତାଗ୍ ଅଂକିଙ୍କ୍ ଦର୍ଶନ ଇସ୍ ମାତ୍ତଣ୍ଡ୍। 8 ମେଣ୍ଡେ ଆ ପଡ଼୍ୟ୍ତାଗ୍ ରିବିକାନ୍ ଦବୋରା ପେଦେର୍ ତେ ଦାସିଲ୍ ଡଲ୍ତାଙ୍କ୍, ବୈତେଲ୍ତେ ଅଦଃସ୍ଥିତ ଅଲୋନ୍ ମାଡ଼େତ୍ ମଦଲ୍ ତାନ୍ ସମାଦି ଇତ୍ତଡ଼୍, ମେଣ୍ଡେ ଆ ପଡ଼୍ୟେତ୍ ପେଦେର୍ ଅଲୋନ-ବାକୁତତେ ଇତ୍କେ ଦୁଃକ ମାଡ଼୍ତେ।
9 ତାନ୍ପେର୍କେ ଯାକୁବ୍ ପଦ୍ଦନ୍ ଅରାମକଞ୍ଚ୍ ମାଲ୍ସ୍ ୱାତ୍ତାଙ୍କ୍, ପରମେଶ୍ୱର୍ ମେଣ୍ଡନ୍ ଦାମ୍ ଦର୍ଶନ୍ ଇସ୍ ଅଂକିଙ୍କ୍ ଆଶିର୍ବାଦ୍ ମାଡ଼୍ତଣ୍ଡ୍। 10 ମେଣ୍ଡେ ପରମେଶ୍ୱର୍ ଅଂକିଙ୍କ୍ କେତ୍ତଣ୍ଡ୍, ନି ପେଦେର୍ ଯାକୁବ; ମାତ୍ର ନି ପେଦେର୍ ମେଣ୍ଡେ ଯାକୁବ ଆୟ, ନି ପେଦେର୍ ଇସ୍ରାଏଲ୍ ଆଦ୍ତେ; ମେଣ୍ଡେ ଅଣ୍ଡ୍ ତାନ୍ ପେଦେର୍ ଇସ୍ରାଏଲ୍ ୱାଟ୍ତଣ୍ଡ୍। 11 ପରମେଶ୍ୱର୍ ଅଂକିଙ୍କ୍ ମେଣ୍ଡେ କେତ୍ତଣ୍ଡ୍, ମାମେ ସର୍ବଶକ୍ତିମାନ୍ ପରମେଶ୍ୱର୍; ନିମେ ଲେଉଡ଼୍ ନୁ ନାର୍ଗେ ପିଲୁଡ଼୍ ଆୟିମ୍; ନିୟାଗାକଞ୍ଚ୍ ଅଣ୍ଡୟ୍ ଗୋଷ୍ଠି, ବରଂ ଗୋଷ୍ଠି ସମାଜ ତିଆର୍ ଆଦ୍ତା; ମେଣ୍ଡେ ନି କଟିଦେଶତାଗାଙ୍କ୍ ରାଜାଲଡ଼୍ ଜନ୍ମ ଆଦ୍ତଡ଼୍ । 12 ମେଣ୍ଡେ ମାମେ ଅବ୍ରାହାମ୍ ନୁ ଇସ୍ହାକ୍ତିଙ୍କ୍ ବେନ୍ ଦେଶ୍ ଦାନ ମାଡ଼ି ମିନ୍ଦେମ୍, ଆ ଦେଶ୍ ନୁ ନି ମୁନେତ୍ ପିଲୁଡ଼୍ତିଙ୍କ୍ ଇଦ୍ତମ୍। 13 ଆ ପଡ଼୍ୟେ ତାଗ୍ ଅନ୍ ତଡ଼୍ ଇଦ୍ରକମ୍ ତିର୍ୟି ପରମେଶ୍ୱର୍ ତାନ୍ ଗାରେଙ୍କ୍ ଆତ୍ତଣ୍ଡ୍। 14 ତାନ୍ ପେର୍କେ ଯାକୁବ୍ ଆ ତିର୍ୟ୍ତେ ପଡ଼ିୟ୍ତାଗେ ଅଣ୍ଡୟ ଗୁଞ୍ଜେ, ଇତ୍କେ; କାଲ୍ଦେ ଗୁଞ୍ଜେ ତିଆର୍ ମାଡ଼ି ତାନ୍ ପର ଅଙ୍ଗୁରସ୍ ନୈବେଦ୍ୟ ଉସର୍ଗ ମାଡ଼୍ତଣ୍ଡ୍ ନୁ ନିୟ୍ ତସିତ୍ତଣ୍ଡ୍। 15 ମେଣ୍ଡେ ଯାକୁବ ପରମେଶ୍ୱର୍ ତଡ଼୍ ତିରିୟାତିରିୟି ପଡ଼୍ୟେତ୍ ପେଦେର୍ ବୈତେଲ୍ ୱାଟ୍ତଣ୍ଡ୍।
ରାୟେଲ୍ ଡଲ୍ତେ
16 ତାନ୍ପେର୍କେ ଅଡ଼୍ ବୈତେଲ୍କଞ୍ଚ ଆତ୍ତଡ଼୍, ମାତ୍ର ଇଫ୍ରାତାତେ ହେଉଦାନ୍ ମାଇଦିଙ୍କ୍ ସୁଦୁର୍ ଜେକେ ଆର୍ ମାନା ମାନା ରାହେଲ୍ତେ ଡ଼ଙ୍କେତ୍ ଆତ୍ତେ ନପ୍ ତେଲ୍ତେ; ମେଣ୍ଡେ ତାନ୍ ଜନ୍ମ ମାଡ଼ାନ୍ ୱେଲେ ଗାଟି କଷ୍ଟ ଆତ୍ତେ। 17 ମେଣ୍ଡେ ଡ଼ଙ୍କେତ୍ ଆତ୍ତେ ନପ୍ ଗାଟି ଆତ୍ତାଙ୍କ୍, ଦାସିଲ୍ ତାଂକିଙ୍କ୍ କେତ୍ତେ, ୱେର୍ମା, ନିମେ ଇଞ୍ଜେକେ ମାର୍ ପିଲା ଜନ୍ମ ମାଡ଼ିତିନ୍। 18 ଇତ୍କେ ବା ଆଦ୍ ଡଲ୍ତେ, ମେଣ୍ଡେ ଡଲାନ୍ ସମୟ୍ତେ ମାରିନ୍ ପେଦେର୍ ବିନନୀତେ ଅର୍ଥ କଷ୍ଟତେ ଜନ୍ମ ଆତ୍ତେ ମାର୍ ୱାଟ୍ତଣ୍ଡ୍; ମାତ୍ର ତାମ୍ ବାବାଲ୍ ଅନ୍ ପେଦେର୍ ବିନ୍ୟାମିନ୍ତେ ଅର୍ଥ ଦକ୍ଷିଣ କାୟ୍ଦେ ମାର୍ ଇଞ୍ଜ୍ ପେଦେର୍ ୱାଟ୍ତଣ୍ଡ୍।
19 ଇଦ୍ ଲେକାମ୍ ରାହେଲ୍ ଡଲ୍ତାଙ୍କ୍, ଇଫ୍ରାତା, ଇତ୍କେ, ବେତ୍ଲିହିମ୍ତିଙ୍କ୍ ଆଦାନ୍ ଆର୍ଦେ ଗାରେ ତାନାଦ୍ ସମାଦି ଇତ୍ତଡ଼୍। 20 ତାନ୍ପେର୍କେ ଯାକୁବ୍ ଆ ସମାଦିତେ ପର ଅଣ୍ଡୟ୍ ଗୁଞ୍ଜେ ତିଆର୍ ମାଡ଼୍ତଣ୍ଡ୍; ରାହେଲ୍ ସମାଦି ଆ ଗୁଞ୍ଜେ ଇଞ୍ଜେକ୍ ଆଇନା ମିନ୍ଦେ। 21 ତାନ୍ପେର୍କେ ଇସ୍ରାଏଲ୍ ଆଗାକଞ୍ଚ୍ ଆଞ୍ଜ୍ ଏଦର୍ ଗଡ଼୍ ୱେସ୍ ତାନ୍ ଗାରେ ତମ୍ୱୁ ତିଆର୍ ମାଡ଼୍ତଣ୍ଡ୍।
ଯାକୁବ୍ତେ ମାର୍କିଡ଼୍
22 ଆ ଦେଶ୍ତାଗ୍ ଇସ୍ରାଏଲ୍ ମାଞ୍ଜ ମାନ୍ଦାନ୍ ୱେଲେ ରୁବେନ୍ ଆଞ୍ଜ୍ ତାମ୍ ବାବାନ୍ ବିଲ୍ହା ପେଦେର୍ତେ ମେଣ୍ଡନ୍ ମୁତେନ୍ ତଡ଼୍ ଉଞ୍ଜ୍ତଣ୍ଡ୍, ମେଣ୍ଡେ ଇସ୍ରାଏଲ୍ ଆଦ୍ କେଞ୍ଜ୍ ନୁ କପାମ୍ ଆତ୍ତଣ୍ଡ୍। 23 ଯାକୁବନ୍ ବାରଜାନ୍ ମାର୍କ୍ ମାତ୍ତଡ଼୍; ଅଡ଼୍ ଲୋପେଙ୍କ୍ ରୁବେନ୍ ଯାକୁବନ୍ ବେଡ଼ିୟ୍ ମାର୍, ଅଣ୍ଡ୍, ମେଣ୍ଡେ ଶିମିୟନ୍, ଲେବି, ଯିହୁଦା, ଇଷାଖର୍ ନୁ ସବୂଲୂନ୍, ଇଡ଼୍ ଲେୟାନ୍ ମାର୍କ୍; 24 ମେଣ୍ଡେ ଯୋଷେପ୍ ନୁ ବିନ୍ୟାମିନ୍ ରାହେଲ୍ତେ ମାର୍; 25 ମେଣ୍ଡେ ଦାନ୍ ନୁ ନପ୍ତାଲି ରାହେଲ୍ତେ ଦାସି ବିଲ୍ହାର୍ତେ ମାର୍; 26 ମେଣ୍ଡେ ଗାଦ୍ ନୁ ଆଶେର୍ ଲେୟାନ୍ ଦାସି ସିଲ୍ପାନ୍ ମାର୍। ଯାକୁବନ୍ ଇ ସାରେ ମାର୍କ୍ ପଦ୍ଦନ୍ ଅରାମ୍ତାଗେ ଜନ୍ମ ଆସ୍ ମାତ୍ତଣ୍ଡ୍।
ଇସ୍ହାକ୍ ଡଲ୍ତଣ୍ଡ୍
27 ତାନ୍ପେର୍କେ କିରୀୟତ୍ ଅର୍ବ, ଇତ୍କେ, ହିବ୍ରୋଣ ନଗର୍ତାଗେ ଗାରେ ମମ୍ରି ପେଦେର୍ତେ ବେନ୍ ପଡ଼ିୟ୍ତାଗେ ଅବ୍ରାହାମ୍ ନୁ ଇସ୍ହାକ୍ ମାଞ୍ଜ୍ମାତ୍ତଣ୍ଡ୍, ଆ ପଡ଼ିୟ୍ତାଗେ ଯାକୁବ୍ ତାମ୍ ବାବାଲ୍ ଇସ୍ହାକ୍ତେ ଗାରେ ହେୱ୍ତଣ୍ଡ୍। 28 ଇସ୍ହାକ୍ତେ ବୟଷ୍ତେ ଗେଲ୍ସ୍ତାଦ୍ ଏକଶହ ଅଶେ ବର୍ଷ ମାତ୍ତେ। 29 ଅନନ୍ତର୍ ଇସ୍ହାକ୍ ମୁୟ୍ତଣ୍ଡ୍ ନୁ ପୁରା ବୟସ୍ ଆସ୍ ଡଲ୍ତାଙ୍କ୍, ତାନ୍ ନାରୁଡ଼୍ ଗାରେ ଗୁଡ଼୍ତଡ଼୍; ମେଣ୍ଡେ ତାନ୍ ମାର୍ ଏଷୌ ନୁ ଯାକୁବ୍ ଅଂକିଙ୍କ୍ ସମାଦି ଇତ୍ତଡ଼୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)