1 ଅବ୍ରାହାମ୍‌ କଟୂରା ପେଦେର୍‍ତାଦ୍‍ ମେଣ୍ଡେ ଅଣ୍ଡୟ୍‍ ମୁତେଙ୍କ୍‍ ପେଣ୍ଡୁଲ୍‍ ଆସ୍‍ ମାତ୍‍ତଣ୍ଡ୍‍। 2 ଆଦ୍‍ ତାନ୍‍ ମାଇଦିଙ୍କ୍‍ ସିମ୍ରନ୍‌, ଯକ୍‍ଷନ୍‍, ମଦାନ୍‍, ମିଦୀୟନ୍‍, ଯିଶ୍‍ବକ ନୁ ଶୂହ, ଇଡ଼୍‍କିଙ୍କ୍‍ ଜନ୍ମ ଇସ୍‍ମାତ୍‍ତେ। 3 ଆ ଯକ୍‍ଷନ୍‍ ଶିବା ନୁ ଦଦାଙ୍କ୍‍ ଜନ୍ମ ଇତ୍‍ତେ। ଦଦାନ୍‍ ଅଶୂରିୟ , ଲଟୂଶୀୟ ନୁ ଲୀୟମ୍ମୀୟ ନାରୁଡ଼୍‍କିନ୍‍ ମୁନେତ୍‍ ନାରୁଣ୍ଡ୍। 4 ମିଦୀୟନ୍‌ତେ ପିଲା ଐପା, ଏପର, ହନୋକ୍‍, ଅବୀଦ ନୁ ଇଲଦାୟା; ଇଡ଼୍‍ ସାରେ ତଡ଼୍‍ କଟୂରାନିନ୍‌ ପିଲା।

5 ନିଜେ ଅବ୍ରାହାମ୍‌ ଇସ୍‍ହାକ୍‍ତିଙ୍କ୍‍ ତାନାୱ୍‍ ସାରେ ଜିନିଷ୍ ଇତ୍‍ତଣ୍ଡ୍‍। 6 ମାତର୍‌ ଅବ୍ରାହାମ୍‌ ମୁନେତ୍‍ ମୁତେକିନ୍‍ ପିଲାଙ୍କ୍‍ ସୁକୁ ସୁକୁ ଇସ୍‍ ଅନ୍‍ ପାୟୁର୍‍କଞ୍ଚ୍‍ ଇସ୍‍ହାକ୍‍ ତେ ଗାରେକଞ୍ଚ୍‍ ଅଡ଼୍‍କିଙ୍କ୍‍ ପଡ଼ଦ୍‌ପେୟିତାନ୍‌ ପାକେ ମାନ୍ଦାନ୍‌ ଦେଶ୍‍ତାଗ୍‍ ରସିତ୍‍ତଣ୍ଡ୍।

7 ଅବ୍ରାହାମ୍‌ ଶହେ ପଞ୍ଚସ୍ତରି ବର୍ଷ; ବର୍ଷ ଗେଲ୍ସତଣ୍ଡ୍‌। 8 ନିଜେ ଅବ୍ରାହାମ୍‌ ସାୟେତ୍‍ ମୁୟ୍‌ତ୍‌ତେ ଅବସ୍ଥାତେ ମୁୟ୍‌ସ୍‌ ନୁ ପୁରା ମୁୟ୍‍ସ୍ ‍ଡଲ୍‍ତଣ୍ଡ୍‍; ମେଣ୍ଡେ , ମୁନେ ଡ଼ଲି ମାନ୍ଦାନ୍‌ ନିଜର ଆନିଦାଦିଡ଼୍‌ ତଡ଼୍‌ କାଇଲ୍‌ତଣ୍ଡ। 9 ମେଣ୍ଡେ ତାନ୍‍ ମାର୍‍ ଇସ୍‍ହାକ୍‍ ନୁ ଇଶ୍ମାଏଲ୍‍ ମମ୍ରିତେ ମୁନେ ହିତ୍ତୀୟ ସୋହର୍‌ତେ ମାର୍‍ ଇଫ୍ରୋଣତେ ୱାୟେତ୍‍ ମକ୍‌ପେଲା ପେଦେର୍‍ତେ ପାଡ଼୍‌ତାଗ୍ ଅଂକିଙ୍କ୍‍ ସମାଦି ଇସ୍‌ମାତ୍‌ତଡ଼୍‍। 10 ବାତେଙ୍କ୍‍ଇତ୍କେ ଅବ୍ରାହାମ୍‌ ହିତ୍ତୀୟତେ ପିଲାକିନ୍‍ ଗାରେଙ୍କ୍‍ ଆ ୱାୟେ ଆସିମାତ୍‍ତଣ୍ଡ୍‍। ଆ ପଡ଼ିୟ୍‍ତାଗ୍‍ ଅବ୍ରାହାମ୍‍ତିଙ୍କ୍‍ ନୁ ତାନ୍‍ ମୁତେ ସାରାଙ୍କ୍‍ ସମାଦି ଇସ୍‌ମାତ୍‌ତଡ଼୍‌। 11 ଅବ୍ରାହାମ୍‌ ଡଲ୍‍ତେ ପେର୍‍କେ ପରମେଶ୍ୱର ତାନ୍‍ ମାର୍‍ ଇସ୍‍ହାକ୍‍ତିଙ୍କ୍‍ ଆଶିର୍ବାଦ୍‌ ମାଡ଼୍‍ତଣ୍ଡ୍‍; ମେଣ୍ଡେ ଇସ୍‍ହାକ୍‍ ବେର୍‍- ଲହର୍‍- ରୋୟୀ ପେଦେର୍‍ତେ ପଡ଼୍‍ୟ୍‍ତାଗ୍‍ ମାତ୍‌ତଣ୍ଡ୍‌।

12 ସାରାନ୍‍ ଦାସି ମିସ୍ରିୟତେ ହାଗାର୍‍ ଅବ୍ରାହାମ୍‌ତେ ମାଇଦିଙ୍କ୍‍ ବେନଙ୍କ୍‍ ଜନ୍ମ ଇସ୍‍ ମାତ୍‍ତେ, ଅବ୍ରାହାମ୍‍ତେ ଆ ମାର୍ ଇଶ୍ମାଏଲ୍‍ତେ ପିଲୁଡ଼୍‍। 13 ପେଦେର୍‍ ନୁ ଗୋଷ୍ଟି ଅନୁସାରେ ଇଶ୍ମାଏଲ୍‍ତେ ପିଲାନ୍‍ ପେଦେର୍‍ ଇଦ୍‍ । ଇଶ୍ମାଏଲତେ ବାଡ଼୍‌ୟି ମାର୍‌ ନବାୟୋତ୍‌; ଅନ୍‌ ପେର୍‌କେ କେଦାର୍‌, ଅଦ୍‌ବେଲ ନୁ ମିବ୍‌ସମ୍‌, 14 ମିଶମ୍‍, ଦୂମା, ମସା, 15 ହଦଦ୍‌, ତେମା, ଯିଟୁର୍‍, ନାଫୀଶ୍‍ ନୁ କେଦ୍‍ମା। 16 ଇ ସାରେ ଇଶ୍ମାଏଲ୍‍ତେ ପିଲା, ମେଣ୍ଡେ ଅଡ଼୍‍ ପେଦେର୍‍ ଅନୁସାରେ ଅଡ଼୍‍ ନାର୍‍ ନୁ ୱେସ୍‍ତାଦ୍‍ ପଡ଼୍‍ୟ୍‍ ମାତ୍‍ତେ; ମେଣ୍ଡେ ଅଡ଼୍‍ ତାମ୍‍ ଜାମେତ୍‌ଲେକାମ୍‌ ବାରଜାନ୍‍ ନେତାଲଡ଼୍‌ ମାତ୍‍ତଡ଼୍‍। 17 ଇଶ୍ମାଏଲ୍‍ ବାଦ୍‌କ୍‌ତେ ବର୍ଷ ଶହେ ତିରିଶ୍‍ ସାତ୍‍ ବର୍ଷ ମାତ୍‍ତଣ୍ଡ୍‍; ଆସୁଟ୍‍ ଅଣ୍ଡ୍‍ ଡଲ୍‍ତଣ୍ଡ୍‍; ମେଣ୍ଡେ ଅଣ୍ଡ୍‍ ତାମ୍‍ ନାରୁଡ଼୍‍ ଗାରେ କାୟ୍‍ଲ୍‍ତଣ୍ଡ୍‍। 18 ତାନ୍‍ ପିଲା ହବୀଲା ନୁ ମିସରତେ ମୁନେଙ୍କ୍‌ତେ ଶୂରେତ୍‌ ପଡ଼୍‌ଦ୍‌ ପେୟିତାନ୍‌ ପାକେତ୍‌ ଅଶୂରିୟା ଦିଗ୍‌ତା ମାନ୍ଦାନ୍‌ ପଡ଼୍‌ୟେ ପାହେମ୍‌ ଆତ୍‌ତଣ୍ଡ୍‌। ଇଦ୍‍ପୁଟୁଙ୍କ୍ ଅଣ୍ଡ୍‍ ତାମ୍‍ ସାରେ ଦାଦାଲଡ଼୍‍ ମୁନେ ମାନ୍ଦାନଙ୍କ୍‍ ପଡ଼୍‍ୟ୍‍ ଦରସ୍କ୍‍ତଣ୍ଡ୍‍।

19 ଅବ୍ରାହାମ୍‌ତେ ମାର୍‍ ଇସ୍‍ହାକ୍‍ତେ ପିଲୁଡ଼୍‍। ଅବ୍ରାହାମ୍‍ ଇସ୍‌ହାକ୍‌ତିଙ୍କ୍‌ ଜନ୍ମ ମାଡ଼୍‌ତଣ୍ଡ। 20 ଆ ଇସ୍‍ହାକ୍‍ ଚାଲିଶ୍‍ ବର୍ଷ ବୟସ୍‍ତେ ପଦ୍ଦନ୍‌ ଅରାମୀୟ ବତୂୟେଲ୍‍ତେ ପିକିର୍‍, ଇତ୍କେ, ଅରମୀୟ ଲାବାନ୍‌ତେ ଏଲାଡ଼୍‍ତିଙ୍କ୍‍ ରିବିକାଙ୍କ୍‌ ପେଣ୍ଡୁଲ୍‍ ଆତ୍‌ତଣ୍ଡ୍‌ । 21 ଇସ୍‍ହାକ୍‍ତେ ଆ ମୁତେ ୱାଞ୍ଜଲ୍‍ ଆତ୍‌ତାଙ୍କ୍‌ ଅଣ୍ଡ୍ ଆଦିନ୍‌ ମାଇଦିଙ୍କ୍‍ ସଦାପ୍ରବୁନ୍‍ ଗାରେ ପ୍ରାର୍ତନା ମାଡ଼୍‍ତଣ୍ଡ୍; ଆସୁଟ୍‍ ସଦାପ୍ରବୁ ଅନ୍‍ ପ୍ରାର୍ତନା କେଞ୍ଜ୍‍ତାଙ୍କ୍‍, ତାନ୍‍ ମୁତେ ରିବିକାଲ୍‍ ଡଙ୍କେତ୍‍ ଆତ୍‌ତେ । 22 ତାନ୍‍ ଡଙ୍କେତ୍‍ ଲୋପେ ପିଲା ପେଟ୍‌ପେଟ୍‌ ଆତ୍‌ତାଙ୍କ୍‌, ନାକିଙ୍କ୍‍ ଇଦ୍‍ପୁଟୁଙ୍କ୍‍ ବାତେଙ୍କ୍‍ ଆତ୍‌ତେ ? ଇଦ୍‍ ଲେକାମ୍‌ ଆସ୍‍ ମାନ୍ତେ ? ଇଲା ଆଲ୍‍ସି ଆଦ୍‍ ସଦାପ୍ରବୁନ୍‍ ଗାରେ ପାଚାରା ମାଡ଼ାନ୍‍ ମାଇଦିଙ୍କ୍‍ ଆତ୍‌ତେ ।

23 ଆସୁଟ୍‍ ସଦାପ୍ରବୁ ତାଂକିଙ୍କ୍‍ କେତ୍‍ତଣ୍ଡ୍‍, ନି ଡଙ୍କ୍‍ତାଗ୍‍ ରେଣ୍ଡ୍‍ ଗୋଷ୍ଠି ମିନ୍ଦେଡ଼୍‍ ନୁ ରେଣ୍ଡ୍‍ ଜାମେ ନି ଉଦର୍‍କଞ୍ଚ୍‍ ୱେର୍‍ ଆଦ୍‍ତଡ଼୍‌; ଅଣ୍ଡୟ୍‍ ଜାମେ ୱେର୍‍ ପିଲୁଡ଼୍‌କଞ୍ଚ୍‍ ଶକ୍ତିତଣ୍ଡ୍‌ ଆଦ୍‌ତଣ୍ଡ୍‌ ମେଣ୍ଡେ ବେଡ଼୍‍ୟଣ୍ଡ୍‍ ସୁଦୁନନ୍‍ ସେବା ମାଡ଼ିତଣ୍ଡ୍‍।

24 ଏର୍‌ମିଦାନ୍‌ ଦିନାମ୍‍ ପୁରା ଆତ୍‌ତାଙ୍କ୍‌ ତାନ୍‍ ଡଙ୍କେତ୍‍କଞ୍ଚ୍‍ କାୱ୍‌ଲେ ମାର୍‍କ୍‍ ଜନ୍ମ ଆତ୍‍ତଡ଼୍‍। 25 ତାନ୍‍ ବେଡ଼୍‍ୟି ମାର୍‌ ନୁ ସାରେ କେଲିନ୍‍ ସିଲେ ଲେକାମ୍‍ ମାତ୍‍ତଣ୍ଡ୍‍; ଇତ୍କେ ଅନ୍‍ ପେଦେର୍‍ ଏଷୌନ୍‌ ଇତ୍‌ତଡ଼୍‌ ଇତ୍କେ ଜାଟେଲି ସିଲ୍‌ ଇତ୍‍ତଡ଼୍‍। 26 ତାନ୍‍ ପେର୍କେ ଏଷୌତେ ଡେକେତ୍‍ ମଦଲ୍‍ ପୟ୍‌ସ୍‍ ଅନ୍‍ ତାମୁଣ୍ଡ୍‍ ମଡ଼୍‌କ୍‌ତଣ୍ଡ; ଆଦିନ୍‌ ମାଇଦିଙ୍କ୍‍ ଅନ୍‍ ପେଦେର୍‍ ଯାକୁବ୍‍ତେ ଅର୍ଥ ଡେକେତ୍‌ ପାଦାମ୍‌ ଇତ୍‍ତଡ୍‍। ଇସ୍‍ହାକ୍‍ତେ ଷାଠିଏ ବର୍ଷ ବୟସ୍‍ତେ ଇ କାୱ୍‌ଲେ ମାର୍‍କ୍‍ ଜନ୍ମ ଆତ୍‍ତଡ଼୍‍।

27 ପେକଡ଼୍‍ ପେର୍‍ସ୍ତେ ୱେଲେ ଏଷୌ କଡ଼୍‌ମାୱୁ ରେହ୍‌ତାନ୍‌ ବନୁଆଲ୍‌ ଆତ୍‌ତଣ୍ଡ୍‌; ମେଣ୍ଡେ ଯାକୁବ୍‍ ସରଲ ନାରୁଣ୍ଡ୍‌ ଆତ୍‌ତଣ୍ଡ୍‌ ପ୍ରାନ୍ତର୍‌ତାଗ୍‌ ବାସେ ଆତ୍‌ତଣ୍ଡ୍‌। 28 ଇସ୍‍ହାକ୍‍ କଡ଼୍‌ମାୱୁ ଆୱ୍‍ଗିଙ୍କ୍‍ ଗାଟି ସାୟେମିଙ୍ଗ୍‍ତା ଇଞ୍ଜ ଏଷୌଙ୍କ୍‍ ପ୍ରେମତେ ସାୟେ ଉଡ଼୍‍ତଣ୍ଡ୍; ମାତର୍‌ ରିବିକା ଯାକୁବ୍‍ତିଙ୍କ୍‍ ସାୟେ ଉଡ଼୍‍ତେ।

29 ଅଣ୍ଡୟ୍‍ ଦିନେ ଯାକୁବ୍‍ ଡାଲି ଆଟମାତ୍‍ତଣ୍ଡ୍, ଆ ସମୟ୍‍ତେ ଏଷୌ ଆୟ୍‍ୱି ମେଣ୍ଡେ ୱାୟାନାଗାଙ୍କ୍‍ ୱାତ୍‍ତଣ୍ଡ୍; 30 ଆସୁଙ୍ଗ୍‌ ଏଷୌ ଯାକୁବ୍‍ତିଙ୍କ୍‍ କେତ୍‍ତଣ୍ଡ୍‍, ନାନ୍‍ ଆୟ୍‍ୱି ମିନ୍ଦେନ୍‍, ଅନୁରୋଦ ମାଡ଼ୁତାନ୍‍, ଆ ଆଟେତ୍‌ ଡାଲି ଇସ୍‍ ତିନ୍ଦାଙ୍କ୍‍ ଇମ୍‍; ଇଦିନ୍ ମାଇଦିଙ୍କ୍‍ ଅନ୍‍ ପେଦେର୍‍ ଇଦୋମ୍‍ ଇଞ୍ଜ ଆତ୍‌ତେ ।

31 ଆସୁଟ୍‌ ଯାକୁବ୍‍ କେତ୍‍ତଣ୍ଡ୍, ଯଦି ନିମେ ନାକିଙ୍କ୍‍ ନିୟାଦ୍‍ ବେଡ଼୍‍ୟନ୍‍ ଅଦିକାର୍‍ ୱାମ୍‌କେ ଆସୁଙ୍କ୍‌ ନାନେ ଇଦ୍‌ତାନ୍‌।

32 ଏଷୌ ଉତ୍ତର୍‍ ଇତ୍‍ତଣ୍ଡ୍, ଉଡ଼ା, ନାନ୍‍ ଡଲ୍‍ତେ ଲେକାମ୍‍, ବେଡ଼୍‍ୟନ୍‍ ଅଧିକାର୍‍ତେ ନାକିଙ୍କ୍‍ ବାତେ ଲାବ୍‍ ?

33 ଯାକୁବ୍‍ କେତ୍‍ତଣ୍ଡ୍‍, ନିମେ ନେଣ୍ଡ୍‍ ନାକିଙ୍କ୍‍ ଶପଥ ମାଡ଼ା; ଆସୁଟ୍‍ ଅଣ୍ଡ୍‍ ଅନ୍‍ଗାରେ ପ୍ରମାଣ ମାଡ଼୍‍ତଣ୍ଡ୍; ଇଦ୍‍ପୁଟୁଙ୍କ୍‍ ଅଣ୍ଡ୍‍ ନିଜର୍‍ତେ ବେଡ଼୍‍ୟନାଦ୍‍ ଅଦିକାର୍‍ ଯାକୁବ୍‍ତିଙ୍କ୍‍ ୱାମ୍‍ତଣ୍ଡ୍‍। 34 ଆସୁଟ୍‍ ଯାକୁବ୍‍ ଏଷୌଙ୍କ୍‍ ରୁଟି ନୁ ଆଟେତ୍‌ ମସୁରି ଡାଲି ଇତ୍‍ତାଙ୍କ୍‍, ଅଣ୍ଡ୍‍ ତିଞ୍ଜ୍‍ମେଣ୍ଡେ ତେଦ୍‍ତଣ୍ଡ୍‍। ଇଦ୍‍ପୁଟୁଙ୍କ୍‍ ଏଷୌ ନିଜର୍‍ତେ ବେଡ଼୍‍ୟନ୍‍ ଅଦିକାର୍‍ ଜ୍ଞାନ୍‌ଇଲ୍‌ୱେ ଲେକାମ୍‌ ମାଡ଼୍‍ତଣ୍ଡ୍‍।