ଆରାମ୍ ବଇ 14

ଅବ୍ରାମ୍‍ ଲୋଟଙ୍କ୍‍ ଉଦ୍ଧାର ମାଡ଼ାନାଦ୍‍

1 ତାନ୍‌ପେର୍କେ ଶିନିୟର୍‌ତେ ଅମ୍ରାପଲ୍‍ ରାଜାଲ୍‍ ନୁ ଇଲ୍ଲାସରତେ ଅରିୟୋକ୍‍ ରାଜାଲ୍‍ ନୁ ଏଲମର କଦର୍ଲାୟୋମର୍‍ତେ ରାଜାଲ୍‍ ନୁ ଗୋୟିମତେ ତିଦିୟଲ୍‍ ରାଜାନ୍‍ ଅଦିକାର୍‍ ସମୟ୍‍ତେ, 2 ଇଡ଼୍‍ ସଦୋମ୍‍ତେ ରାଜାଲ୍‍ ବିରା, ହମୋରାତେ ରାଜାଲ୍‍ ବିର୍ଶା ନୁ ଅଦ୍ମାତେ ରାଜାଲ୍‍ ଶିନାବ୍‍ ନୁ ସବୋୟିମତେ ରାଜାଲ୍‍ ଶିମେବର ନୁ ବିଲାର, ଇତ୍କେ, ସୋୟର୍‌ତେ ରାଜାନ୍‍ ତଡ଼୍‍ ଯୁଦ୍ଦ୍‍ ମାଡ଼୍‍ତଣ୍ଡ୍‍। 3 ଇଡ଼୍‌ ସାରେତଡ଼୍‌ ସିଦିମ୍‌ତେ ଦୁୱାଡ଼୍‌ତାଗ୍‍, ଇତ୍କେ, ଅୱଡ଼୍‍ ସମୁଦ୍ରତେ ଗାରେ ଅଣ୍ଡୟାଗ୍‍ ଆସ୍‍ମାତ୍‍ତଡ଼୍‍। 4 ବାତେଙ୍କ୍‍ଇତ୍କେ ଅଡ଼୍‍ ବାରବର୍ଷ ହେୱୁନା କଦର୍ଲାୟୋମତେ ରାଜାନ୍‍ ତଡ଼୍‌ମାଞ୍ଜ୍‌ ତେରୱାଡ଼୍‌ସେତେ ତାମ୍‍ ରାମ୍‌କ୍‌ ଆସ୍‍ମାତ୍‍ତଡ଼୍‍, 5 ଇତ୍କେ ଚଉଦ ୱାଡ଼୍‌ସେତେ କଦର୍ଲାୟୋମତେ ରାଜାଲ୍‍ ନୁ ତାନ୍‍ ତଡ଼୍‌ଦେନଡ଼୍‌ ରାଜାଲଡ଼୍‍ ୱାସ୍‌ ଅଷ୍ଟରୋତ୍‍ କର୍ଣ୍ଣୟିମତେ ରପାୟିୟ ନାରୁଡ଼୍‍ ନୁ ହମତେ ସୁଷୀୟ ନାରୁଡ଼୍‍କ୍‍ ନୁ ଶାବିକିରିୟାଥମିତେ ଏମିୟ ନାରୁଡ଼୍‍କ୍‍, 6 ନୁ ବାଟିନ୍‌ ଗାରେତ୍‍ ଏଲପାରଣ ହେଉନା ସେୟିର୍‍ ମେଟେତାଗ୍ ମାନ୍ଦାନ୍‌ ହୋରିୟ ନାରୁଡ଼୍‍ ଜିଡ଼୍‍ତଡ଼୍‍। 7 ମେଣ୍ଡେ ଅଡ଼୍‍ ଆ ପଡ଼୍‍ୟ୍‍ତାଗାଙ୍କ୍‍ ମାଲ୍‍ସ୍‍ ଐଣମିସ୍‍ପଟ, ଇତ୍କେ, କାଦେଶ୍‍ତା ଆଞ୍ଜ୍‌ ଅମାଲେକିୟ ନାରୁଡ଼ାଦ୍‍ ସାରେ ଦେଶ୍‍ ନୁ ହତ୍‌-ସସୋନ୍‍- ତାମତ୍‌ତେ ନାରୁଡ଼୍‌ ଇମୋରିୟ ନାରୁଡ଼୍‍କ୍‍ ହରାମାଡ଼୍‍ତଡ଼୍‍। 8 ବାତେଙ୍କ୍‍ଇତ୍କେ ସଦୋମତେ ରାଜାଲ୍‍ ନୁ ହମୋରାତେ ରାଜାଲ୍‍ ନୁ ଅଦ୍ମାତେ ରାଜାଲ୍‍ ନୁ ସବୋୟିମ୍‌ତେ ରାଜାଲ୍‍ ନୁ ବିଲାର୍‍, ଇତ୍କେ, ସୋୟରତେ ରାଜାଲ୍‍, ଇ ଏୟ୍‍ୱୁଡ଼୍‍ ରାଜାଲଡ଼୍‍ କାଇଲି, 9 ଏଲମତେ କଦର୍ଲାୟୋମତେ ରାଜାଲ୍‍ ନୁ ଗୋୟିମର ତିଦିୟଲ୍ ରାଜାଲ୍‍ ନୁ ଶିନିୟର୍‌ତେ ଅମ୍ରାପଲ୍‍ ରାଜାଲ୍‍ ନୁ ଇଲ୍ଲାସରତେ ଅରିୟୋକ୍‍ ରାଜାଲ୍‍, ଇ ନାଲ୍‍ୱୁଡ଼୍‍ ରାଜାନ୍‍ ତଡ଼୍‍ ସିଦ୍ଦିମତେ ବାୟ୍‍ଦେ ଯୁଦ୍ଦ୍‍ ମାଡ଼ାଙ୍କ୍‍ ପସ୍ପ୍‍ତଡ଼୍‍। 10 ଆ ସିଦିମ ବାୟ୍‍ଦେ ମାଣ୍ଡୁଲ୍‍ ନିୟ୍‌ଦେ ନାର୍ଗେ ଗୁୟିନ୍ଦ୍‍ ମାତ୍‍ତେ; ସଦୋମ ନୁ ହମୋରାତେ ରାଜାଲଡ଼୍‍ ମିର ମିର ଆଦିନ୍‌ ଲୋପେ ରାଲ୍‍ତଡ଼୍‍, ମେଣ୍ଡେ ବେନଡ଼୍‍ ଆୟ୍‍ମାତ୍‍ତଡ଼୍‍, ଅଡ଼୍‍ ମେଟ୍‍ତା ମିର୍‍ତଡ଼୍‍। 11 ଆଦିନ୍‌ ମାଇଦିଙ୍କ୍‍ ଅଡ୍‍ ସଦୋମ ନୁ ହମୋରାତେ ସାରେ ସମ୍ପତ୍ତି ନୁ ସାମାନ୍‌ ଲୁଟ୍‍ମାଡ଼ି ଅତ୍‍ତଡ଼୍‍। 12 ମେଣ୍ଡେ ଅବ୍ରାମ୍‌ତେ ଦାଦାନ୍‌ ମାର୍‌ ସଦୋମନିବାସି ଲୋଟଙ୍କ୍‍ ନୁ ତାନ୍‍ ସାରେ ସମ୍ପତ୍ତି ପୟ୍‍ସ୍‍ ଆତ୍‌ତଣ୍ଡ୍‌। 13 ଆସୁଟ୍‍ ଅର୍‍ତୁଣ୍ଡ୍‍ ମିରିଆଞ୍ଜ୍‌ ଏବ୍ରିୟ ଅବ୍ରାମ୍‍ତିଙ୍କ୍‍ କାବୁର୍‍ ଇତ୍‍ତଣ୍ଡ୍‍; ଆ ସମୟ୍‍ତେ ଅବ୍ରାମ୍‌ ଇଷ୍କୋଲ୍‌ତେ ନୁ ଆନେରତେ ତାମୁଣ୍ଡ୍ ଇମୋରିୟ ମମ୍ରିତେ ଅଲୋନ ମାଡ଼େତ୍‍ ମଦଲ୍‍ ମାଞ୍ଜ ମାତ୍‍ତଣ୍ଡ୍‍, ମେଣ୍ଡେ ଅଡ଼୍‍ ଅବ୍ରାମ୍‌ତେ ସାଙ୍ଗଡ଼୍‌ ମାତ୍‍ତଡ଼୍‍। 14 ଆସୁଟ୍‍ ଅବ୍ରାମ୍‌ ନିଜର୍‍ତେ ଯୁଦ୍ଦ ବିଦ୍ୟାତେ ଶିକ୍ଷିତ ନିଜର୍ ଲନ୍‍ମାନ୍ଦାନ୍‍ ତିନିଶହ ଅଟର ଜାନ୍‍ ନାରୁଡ଼୍‍କ୍‍ ତଡ଼୍‌ଦେ ଅସ୍ ଶତ୍ରୁଡ଼୍‍ ପେର୍କେ ପେର୍କେ ମିରି ଦାନ୍‌ ନଗର୍‌ ହେୱ୍‍ନା ଆତ୍‍ତଡ଼୍‍। 15 ଅଣ୍ଡ୍ ନିଜର୍‍ ଦାସଡ଼୍‍କ୍‍ ରେଣ୍ଡ୍‍ ମାନ୍ଦେ ମାଡ଼ି ନାର୍କାତ୍‍ ସମୟ୍‍ତେ ଶତ୍ରୁଡ଼୍‍କ୍‍ ପୟ୍‍ତଡ଼୍‍। ଅଡ଼୍‌ ଅଡ଼୍‌କିଂଙ୍କ୍‌ ଆରାମାଡ଼ି ଦମ୍ମେଶକର ଉତ୍ତରତେ ହୋବା ୱେଉନା ଅଡ଼୍‍ ପେର୍କେ ପେର୍କେ ତଲ୍‍ତଡ଼୍‍। 16 ମେଣ୍ଡେ, ସାରେ ସମ୍ପତ୍ତି ନୁ ନିଜର୍‍ତାଦ୍‍ ଜ୍ଞାତି ଲୋଟ ନୁ ତାମ୍‌ ସମ୍ପତି, ମେଣ୍ଡେ ନାଟା ନୁ ନାରୁଡ଼୍‍କ୍‍ ମାଲ୍‍ପି ତାତ୍‍ତଡ଼୍‍।

ମଲ୍‍କିଷେଦକ୍‍ ଅବ୍ରାମ୍‍ତିଙ୍କ୍‍ ଆଶିର୍ବାଦ୍‌

17 ଇଦ୍‌ ଲେକାମ୍‍ ଅବ୍ରାମ୍‍ କଦର୍ଲାୟୋମରତିଙ୍କ୍‍ ନୁ ତାନ୍‍ ସପଟ୍‍ତେ ରାଜାଲଡ଼୍‍କିଙ୍କ୍‍ ଜିଡ଼ି ମାଲ୍‍ଦାନ୍‍ ୱେଲେ, ସଦୋମ୍‍ତେ ରାଜାଲ୍‍ ତାମ୍‍ତଡ଼୍‍ କାଇଲାନଙ୍କ୍‌ ଶାବି ବାଇଦେ, ଇତ୍କେ, ରାଜନ୍‍ ବାଇଦେ ଆତ୍‌ତଣ୍ଡ୍‌। 18 ମେଣ୍ଡେ ଶାଲମ୍‌ ରାଜାଲ୍‍ ମଲ୍‌କିଷେଦକ୍‌ ରୁଟି ନୁ ଦ୍ରକ୍ଷାରସ୍‍ ପୟ୍‍ସ୍‍ ତାତ୍‍ତଣ୍ଡ୍‍; ଅଣ୍ଡ୍‍ ସର୍ବୋପରିସ୍ଥ ପରମେଶ୍ୱର୍‍ତେ ଯାଜକ ମାତ୍‌ତଣ୍ଡ୍‌; 19 ଅଣ୍ଡ୍‍ ଅବ୍ରାମ୍‌ତିଙ୍କ୍‍ ଆଶିର୍ବାଦ୍‌ ମାଡ଼ି କେତ୍‍ତଣ୍ଡ୍‍, ଅବ୍ରାମ୍‍ ସ୍ୱର୍ଗ ନୁ ପୃଥିବୀତେ ଅଦିକାରି ସର୍ବୋପରିସ୍ଥ ପରମେଶ୍ୱରତେ ଆଶିର୍ବାଦ୍‍ ପାହେମ୍‍ ଆୟିଣ୍ଡ୍‍; 20 ସର୍ବୋପରିସ୍ଥ ପରମେଶ୍ୱର ଦନ୍ୟ ଆୟିଣ୍ଡ୍‍, ଅଣ୍ଡ୍‍ ନି ଶତ୍ରୁଡ଼୍‍କ୍‍ ନି କାୟ୍‍ଦେ ସର୍ପା ମାଡ଼ିତଣ୍ଡ୍‍। ଆସୁଟ୍‍ ଅବ୍ରାମ୍‍ ସାରେ ଜିନିଷ୍‌ତେ ଦଶମାଂସ ମଲ୍ଲିକିସେଦକ୍‌ତିଙ୍କ୍‌ ଇତ୍‍ତଣ୍ଡ୍‍।

21 ସଦୋମ୍‍ତେ ରାଜାଲ୍‍ ଅବ୍ରାମ୍‌ତିଙ୍କ୍‍ କେତ୍‍ତଣ୍ଡ୍‍, ମାତର୍‌ ମା ନାରୁଡ଼୍‌କିଙ୍କ୍‌ ମାକିଙ୍କ୍‍ ରସିମ୍‍।

22 ଆସୁଟ୍‍ ଅବ୍ରାମ୍‌ ସଦୋମ୍‍ତେ ରାଜାଲ୍‍ ଉତ୍ତର୍‍ ଇତ୍‍ତଣ୍ଡ୍‍, ନାନ୍‍ ସ୍ୱର୍ଗ ନୁ ସର୍ବୋପରିସ୍ଥ ଅଦିକାରି ସଦାପ୍ରବୁ ପରମେଶ୍ୱର୍‌ତେ ମୁନେ ଶପତ୍‌ ମାଡ଼ି କେତୁତାନ୍‌, 23 ନାନ୍ ନିୟାଦ୍‍ ବାତ୍‍ବା ଅୟ୍‍ୟମ୍‍, ସୁଦୁର୍‍ ନୁଲ୍‌ କି ହେର୍‍ପୁତେ ପିତା ବା ଅୟନ୍‍; ପେର୍କେ ଉମ୍ଭ ନିମେ କେତିତିନ୍‍, ମାମେ ଅବ୍ରାମ୍‌ତିଙ୍କ୍‍ ସାଉକାର୍‌ ମାଡ଼ିମିନ୍ଦେମ୍‌। 24 ଇତ୍କେ ନା ଲେୟ୍‍ନାରୁଡ଼୍‍ ନାରୁଡ୍‌କିଙ୍କ୍ ବାତା ତିଞ୍ଜ୍‍ ମିନ୍ଦେଡ଼୍‍, ଆଦ୍‌ ଅଦ୍‍ତାନ୍‍, ମେଣ୍ଡେ ନା ବେନଡ଼୍‍ ସାହାଯ୍ୟତଡ଼୍‌ ତଡ଼େକ୍‌ ଆଞ୍ଜ ମାତ୍‍ତଡ଼୍‍, ଅଡ଼୍, ଇତ୍କେ, ଆନେର୍‍ ନୁ ଇଷ୍କୋଲ୍‌ ନୁ ମମ୍ରି ନିଜର୍‍ ନିଜର୍‍ ଦର୍କ୍‌ତେ ବାଗ୍‍ ନେଃମୁଟ୍‌।