1 ଅବ୍ରାମ୍‌ତିଙ୍କ୍‍ ନବେ ନଅ ବର୍ଷ ବୟସ୍‍ତେ ସଦାପ୍ରବୁ ଅଂକିଙ୍କ୍‍ ଦର୍ଶନ ଇସ୍‍ କେତ୍‍ତଣ୍ଡ୍‌, ମାମ୍‍ ସର୍ବଶକ୍ତିମାନ୍‌ ପରମେଶ୍ୱର; ମା ମୁନେ ଦର୍ମବେବାର୍‌ ମାଡ଼ି ନିମେ ସିଦ୍ଦ ଆୟିମ୍‍। 2 ମାମେ ନି ତଡ଼୍‍ ମା ନିୟମ୍‌ ବ୍ୟବହାର ମାଡ଼ି ନିକିଙ୍କ୍‍ ଅଦିକ୍‌ ବେଡ଼ିୟ୍‌ ମାଡ଼ିତମ୍‍। 3 ଆସୁଟ୍‍ ଅବ୍ରାମ୍‌ କାପ୍‍ମୁଡ଼୍‍ନ୍ଦି ରାଲ୍‍ତାଙ୍କ୍‍, ପରମେଶ୍ୱର ଅନ୍‍ ତଡ଼୍‍ ଗଟ୍‌ କେତ୍‍ତଣ୍ଡ୍‍, 4 ଉଡ଼ା, ମାମେ ନି ତଡ଼୍‍ ମା ନିୟମ୍‌ ମାଡ଼ମିନ୍ଦେମ୍‍, ନିମେ ନାର୍ଗେ ଗୋଷ୍ଠିତେ ଆନିଦାଦି ଆଦ୍‌ତିନ୍‌ । 5 ମେଣ୍ଡେ ନି ପେଦେର୍‍ ଅବ୍ରାମ୍‌ ଆୟ, ମାତର୍‌ ଅବ୍ରାହାମ୍‌ ନାର୍ଗେ ନାରୁଡ଼୍‍ତେ ବାବାନି ଆଦ୍‌ତିନ୍‌ । ବାତେଙ୍କ୍‍ଇତ୍କେ ମାମେ ନିକିଙ୍କ୍‍ ନାର୍ଗେ ଗୋଷ୍ଠିତେ ମୁନେତ୍‍ ବାବାଲ୍‍ ମାଡ଼୍‍ତମ୍‍। 6 ମାମେ ନିକିଙ୍କ୍‍ ଗାଟି ବେଡ଼ିୟ୍‌ ମାଡ଼ିତମ୍‍, ନିଆଗାଙ୍କ୍‍ ନାର୍ଗେ ଗୋଷ୍ଠି ଜନ୍ମ ମାଡ଼ିତମ୍‍ ନୁ ରାଜାଲଡ଼୍‍ ନିୟାଗାଙ୍କ୍‍ ତିଆର୍‌ ଆଦ୍‍ତଡ଼୍‌ ।

7 ମାମେ ନି ତଡ଼୍‍ ନୁ ନି ବବିଷତ୍‍ ପିଲୁଡ଼୍‍ତେ ନିତିନିୟମ୍‌ ତଡ଼୍‍ ବେନ୍‍ ନିୟମ୍‌ ମାଡ଼୍‍ତମ୍‍, ଆଦ୍‌ ଅନନ୍ତକାଲ ଆସ୍‍ ମାନ୍ତ୍‍ତେ। ଆସୁଟ୍‍ ମାମେ ନିକିଙ୍କ୍‍ ନୁ ନି ମୁନେତ୍‌ ପିଲୁଡ଼୍‍ତେ ପରମେଶ୍ୱର ଆତ୍‌ତମ୍‌ । 8 ମେଣ୍ଡେ ନିମେ ଇଞ୍ଜେ ଇ ବେନ୍‍ କିଣାନ୍‍ ଦେଶ୍‍ତାଗ୍‍ ମାଞ୍ଜ ମିନ୍ଦେଡ଼ି, ଆଗେ ସାରେ ମାମେ ନିକିଙ୍କ୍‍ ନୁ ନି ମୁନେତ୍‍ ପିଲୁଡ଼୍‍ତିଙ୍କ୍‍ ଅନନ୍ତକାଲତେ ଅଦିକାର୍‍ଦେ ସେଙ୍ଗେ ଇଦ୍‍ତମ୍‍ ନୁ ମାମେ ଅଡ଼୍‍ ପରମେଶ୍ୱର ଆଦ୍‌ତମ୍‌ । 9 ପରମେଶ୍ୱର ଅବ୍ରାହାମ୍‌ତିଙ୍କ୍‍ ମେଣ୍ଡେ କେତ୍‍ତଣ୍ଡ୍‍, ନିମେ ନା ନିୟମ୍‌ ପାଲନ ମାଡ଼ିତିନ୍‍; ନିମେ ନୁ ନି ମୁନେତ୍‌ ପିଲୁଡ଼୍‍ତେ ପିଲୁଡ଼୍‍ ଆଦ୍‌ ପାଳନ୍‍ ମାଡ଼ିତଡ଼୍‍। 10 ନିକ୍‍ ନୁ ନି ମୁନେତ୍‌ ପିଲୁଡ଼୍‍ ତଡ଼୍‍ ମାଡ଼୍‍ତେ ମାୟାଦ୍‍ ବେନ୍‍ ନିୟମ୍‌ ମିଡ଼୍‍ ପାଲନ ମାଡ଼ିତିଡ଼୍‍ ଆଦ୍‌ ଇଦ୍‍, ମି ସାରେତଡ଼୍‍ ନାରୁଡ଼୍‍ *ସୁନ୍ନତ ଆଦ୍‌ତିଡ଼୍‌ । 11 ମିଡ଼୍‍ ନିଜର୍‍ ନିଜର୍‍ତେ ପିପଡ଼୍‌ତେ ଆୱୁମ୍‍ତିଙ୍କ୍‍ କୟ୍‍ଦ୍‍ତିଡ଼୍‍ । ମେଣ୍ଡେ ଆଦ୍‌ ମି ତଡ଼୍‍ ମାୟାଦ୍‍ ନିୟମ୍‌ତେ ଚିହ୍ନେ ଆଦ୍‌ତେ । 12 ପିଲୁଡ଼୍‍ ପିଲୁଡ଼୍‍ତେ ମି ସାରେ ପିଲାନ୍‍ ପିଲା ଆଟ୍‌ ଦିନେତ୍‍ ବୟସ୍‍ତେ ସୁନ୍ନତ ଆଦ୍‌ତା । ମେଣ୍ଡେ ବେନଡ଼୍‍ ନି ପିଲୁଡ଼୍‍ ଆୟଡ଼୍‍, ଇଦ୍‍ ଲେକାମ୍‍ ବିଦେଶ୍‌ତେ ବେନ ନାରୁଡ଼୍‍ ନି ଲୋନ୍‍ ଜନ୍ମ ଆତ୍‍ତଡ଼୍‍ ବାତ୍‍ଇତ୍କେ ଡାବୁକ୍‌କିନ୍‌ ଦାମ୍‌ଦେ ଆସ୍‍ ୱେୟ୍‍ତିତ୍‍, ଅନାଦ୍‍ ଆନ୍ତେ ସୁନ୍ନତ ଆଦ୍‌ତେ । 13 ମେଣ୍ଡେ ନି ଲୋତ୍‍ତାଗ୍‍ ଜନ୍ମ ଆତ୍କେବା ଡାବୁକ୍‌ଇସ୍‍ ଆସ୍‌ତେ ନାରୁଡ଼ାଦ୍‍ ସୁନ୍ନତ ବେଲାଇତ୍କେବା ମାଡ଼୍‍ୱେୟ୍‍ତିତ୍‍; ଆସୁଟ୍‍ ଅନନ୍ତକାଲ ଯାକ ମିୟାଦ୍‍ ନିୟମ୍‌ତେ ଚିହ୍ନେ ମାନ୍ତ୍‍ତେ। 14 ମାତର୍‌ ବେନନାଦ୍‍ ପିପଡ଼୍‍ତେ ଆୱୁମ୍‍ତିଙ୍କ୍‍ କୟିୟଡ଼୍‍, ଇଦ୍‍ପୁଟୁଙ୍କ୍‍ ବେନ ଅସୁନ୍ନତ ନାରୁଣ୍ଡ୍‍, ଅଣ୍ଡ୍‍ ପ୍ରାଣି ନିଜର୍‍ ନାରୁଡ଼୍‍ ଲୋପେଙ୍କ୍‍ ବିରାବାରା ଆଦ୍‌ତଣ୍ଡ୍‌; ଅଣ୍ଡ୍‍ ମା ନିୟମ୍‌ତିଙ୍କ୍‍ ମାନେମ୍‍ ଆୟ୍‍ୟଣ୍ଡ୍।

15 ତାନ୍‍ ପେର୍କେ ପରମେଶ୍ୱର ଅବ୍ରାହାମ୍‌ତିଙ୍କ୍‍ କେତ୍‍ତଣ୍ଡ୍‍, ନିମେ ନିଜର ମୁତେ ସାରିଙ୍କ୍‍ ମେଣ୍ଡେ ସାରିଲ୍‌ ଇଞ୍ଜ କାର୍ଙ୍ଗମା; ତାନ୍‍ ପେଦେର୍‍ ସାରା ଆଦ୍‌ତେ । 16 ମାମେ ତାଂକିଙ୍କ୍‍ ଆଶିର୍ବାଦ୍‌ ମାଡ଼ିତମ୍‍ ନୁ ତାନାଗାକଞ୍ଚ୍‍ ନିକିଙ୍କ୍‍ ଅଣ୍ଡୟ୍‍ ମାର୍‍ ଇଦ୍‍ତମ୍‍; ମାମେ ତାଂକିଙ୍କ୍‍ ଆଶିର୍ବାଦ୍‍ ମାଡ଼ିତମ୍‍, ଆଦ୍‌ ନାର୍ଗେ ଗୋଷ୍ଠିତେ ମୁନେତ୍‍ ୟାୟ୍‍ ଆଦ୍‌ତେ, ତାନାଗାକଞ୍ଚ୍‍ ସାରେ ଦେଶ୍‍ତାଗାଙ୍କ୍‍ ରାଜାଲୋଡ଼୍‍ ପେୟ୍‍ତିତଡ଼୍‍।

17 ଆସୁଟ୍‍ ଅବ୍ରାହାମ୍‌ କାପ୍‍ମୁଡ଼୍‍ନ୍ଦି ରାଲି କାୱ୍‍ତଣ୍ଡ୍‍, ମେଣ୍ଡେ ମନେ ମନେ କେତ୍‍ତଣ୍ଡ୍‍, ନାରୁଙ୍କ୍‍ ଶହେ ବର୍ଷ ବୟସ୍‍ତେ ବାତ୍‍ ପିଲା ଜନ୍ମ ଆଦ୍‌ତେ ? ନବେ ବର୍ଷ ବୟସ୍‍ତେ ସାରାଲ୍‍ ବାତ୍‍ ଜନ୍ମ ମାଡ଼ିତେ ? 18 ଆସୁଟ୍‍ ଅବ୍ରାହାମ୍‌ ପରମେଶ୍ୱର୍‍ତିଙ୍କ୍‍ କେତ୍‍ତଣ୍ଡ୍‍, ଇଶ୍ମାଏଲ୍‍ ନି ମୁନ୍ନେ ଗେଲ୍‍ସି ମାନିଣ୍ଡ୍‍।

19 ଆସୁଟ୍‍ ପରମେଶ୍ୱର୍‍ କେତ୍‍ତଣ୍ଡ୍‍, ନି ମୁତେ ସାରାଲ୍‍ ନି ମାଇଦିଙ୍କ୍‍ ନିଜାମ୍‌ ମାର୍‍ ଜନ୍ମ ମାଡ଼ିତ୍‍,ମେଣ୍ଡେ, ନିମେ ଅନ୍‌ ପେଦେର୍‌ ଇସ୍‍ହାକ୍‍ ୱାଟିତିନ୍‌ ମେଣ୍ଡେ ମାମେ ଅନ୍‍ ତଡ଼୍‍ ମାୟାଦ୍‍ ନିୟମ୍‌ ମାଡ଼ିତମ୍‍; ଆଦ୍‌ ଅନାଦ୍‍ ବବିଷ୍ୟତ୍‍ ପିଲୁଡ଼୍‍ତେ ସେଙ୍ଗେ ନିୟମ୍‍ ଆଦ୍‌ତେ । 20 ମେଣ୍ଡେ ଇଶ୍ମାଏଲ୍‍ ବିଷୟ୍‍ତେ ନିୟାଦ୍‍ ପ୍ରାର୍ତନା କେଞ୍ଜ୍‍ତମ୍‍, ଉଡ଼ା, ମାମେ ଅଂକିଙ୍କ୍‍ ଆଶିର୍ବାଦ୍‌ ମାଡ଼ିତମ୍‍, ମେଣ୍ଡେ ନାର୍ଗେ ପିଲୁଡ଼୍‌ ମାଡିତମ୍‍। ଅନ୍‍ଆଗାକଙ୍କ୍‌ ବାର ଜାନ୍‍ ରାଜାଲଡ଼୍‍ ଜନ୍ମ ଆଦ୍‍ତଡ଼୍‌ ନୁ ମାମେ ଅଂକିଙ୍କ୍‍ ବେଡ଼ିୟ୍‌ ଗୋଷ୍ଠି ମାଡ଼ିତମ୍‍। 21 ମାତର୍‌ ୱାଦାନ୍‍ ୱାଡ଼୍‌ସେତେ ଇ ସମୟ୍‍ତେ ସାରାନ୍‍ ଡଙ୍କେତ୍‍କଞ୍ଚ୍‍ ବେନ୍‍ ଇସ୍‍ହାକ୍‍ ଜନ୍ମ ଆଦ୍‌ତଣ୍ଡ୍‌, ଅନ୍‍ ତଡ଼୍‍ ମାମେ ମା ନିୟମ୍‌ ମାଡ଼ିତମ୍‍। 22 ଇ ଲେକାମ୍‌ ତିର୍‍ୟାତିର୍‍ୟି ଆଦାନାଦ୍‌ ତେର୍‍ସ୍ପି ପରମେଶ୍ୱର ଅବ୍ରାହାମ୍‌ତେ ଗାରେଙ୍କ୍‍ ପର ଆତ୍‌ତଣ୍ଡ୍‌ ।

23 ତାନ୍‍ପେର୍କେ ଅବ୍ରାହାମ୍‌ ନିଜର୍‍ ମାର୍ର୍ ଇଶ୍ମାଏଲ୍‍ତିଙ୍କ୍‍ ନୁ ନିଜର୍‍ ଲୋତ୍‍ତାଗ୍‍ ଜନ୍ମ ଆତ୍‌ତେ ନୁ ଡାବୁକ୍‌ ଆସ୍‌ତେ ସାରେ ନାରୁଡ଼୍‍କ୍‍, ଇତ୍କେ ଅବ୍ରହାମ୍‍ତେ ଲୋତ୍‍ତାଗ୍‍ ମାନ୍ଦାନ୍‍ ସାରେ ନାରୁଡ଼୍‍କ୍‍ ଅସ୍‍ ପରମେଶ୍ୱର୍‍ତେ ଆଦେଶ୍‌ ଲେକାମ୍‌ ଆ ଦିନ୍‌ ସାରେତଡ଼୍‍ ପିପଡ଼୍‍ତେ ଆୱୁମ୍‍ କୟିତଡ଼୍‍। 24 ଅବ୍ରାହାମ୍‌ତାଦ୍‍ ନବେ ନଅ ବର୍ଷ ବୟସ୍‍ତେ ଅନାଦ୍‍ ପିପଡ଼୍‍ତେ ଆୱୁମ୍‍ କୟିତଡ଼୍‍। 25 ମେଣ୍ଡେ ତାନ୍‍ ମାର୍‌ ଇଶ୍ମାଏଲ୍‍ତିଙ୍କ୍‍ ତେର ବର୍ଷ ବୟସ୍‍ତେ ପିପଡ଼୍‍ତେ ଆୱୁମ୍‍ କୟିତଡ଼୍‍। 26 ଇଦ୍‍ ଲେକାମ୍‌ ଅଣ୍ଡୟ୍‍ଦିନେତ୍‌ ଅବ୍ରାହାମ୍‌ତେ ନୁ ତାନ୍‍ ମାର୍ର୍ ଇଶ୍ମାଏଲ୍‍ତେ ସୁନ୍ନତ ଆତ୍‌ତେ । 27 ମେଣ୍ଡେ ତାନ୍‍ ଲୋତ୍‍ତାଗ୍‍ ଜନ୍ମଆତ୍‍ତେ ନୁ ବିଦେଶିଡ଼୍‍ ଗାରେଙ୍କ୍‍ ଡାବୁକ୍‌କିନ୍‌ ଆସ୍‌ତେ ତାନ୍‍ ଲୋତ୍‍ତେ ସାରେ ନାରୁଡ଼୍‍କିଙ୍କ୍‍ ସୁନ୍ନତ ଆତ୍‌ତେ ।