1 ଇସ୍‍ହାକ୍‍ ମୁୟ୍‍ତାଙ୍କ୍‍, କଣ୍ଡା ୱେୟିସ୍‍ ଇଲ୍‍ୱାଙ୍କ୍‍ ମେଣ୍ଡେ ଉଡ଼୍‍ ପାର୍‍ୱଣ୍ଡ୍‍; ଆସୁଟ୍‍ ଅଣ୍ଡ୍‍ ନିଜର୍‍ ବେଡ଼ିୟ୍‌ ମାର୍‍ ଏଷୌଙ୍କ୍‍ କାର୍ଙ୍ଗି କେତ୍‍ତଣ୍ଡ୍‍, ପେକା, ଆସୁଟ୍‍ ଅଣ୍ଡ୍‍ ଅଂକିଙ୍କ୍‍ କେତ୍‍ତଣ୍ଡ୍‍, ଉଡ଼୍‌, ନାନ୍‍ ଇଗେ।

2 ଆସୁଟ୍‍ ଅଣ୍ଡ୍‍ ଅଂକିଙ୍କ୍‍ କେତ୍‍ତଣ୍ଡ୍‍, ଉଡ଼ା, ନାନ୍‍ ମୁୟ୍‍ସ୍‍ ମିନ୍ଦେନ୍‍, ବେନ୍‍ ଦିନା ନାନ୍‍ ଡଲିଆଦ୍‍ତାନ୍‍, ଆଦ୍‍ ନାନ୍‍ ପୁନନ୍‍। 3 ଇଞ୍ଜେ ଅନୁରୋଦ୍‍ ମାଡ଼ୁତାନ୍‍, ନିମେ ଇଞ୍ଜେ ତୂଣ ନୁ ୱିଲ୍‍କାଡ଼୍‍କ୍‍ ପୟ୍‍ସ୍‍ ମେଟେତା ଆଞ୍ଜ୍‌ ନା ମାଇଦିଙ୍କ୍‍ କଡ଼୍‌ମାୱୁ ତାଡ଼ା। 4 ମେଣ୍ଡେ ନାନ୍‍ ବେଦ୍‍ପୁଟୁଙ୍କ୍‍ ପ୍ରେମ ମାଡ଼୍‌ତାନ୍‍, ଆଦେପୁଟୁଙ୍କ୍‌ ଲେକେତ୍‍ ମିଙ୍ଗ୍‍ତେ କାଦ୍ୟ ତିଆର୍‍ ମାଡ଼ି ତିନ୍ଦାନ୍‍ ମାଇଦିଙ୍କ୍‍ ନା ଗାରେ ତାଡ଼ା; ଆସୁଟ୍‍ ନାୟାଦ୍‍ ଜିଉନ୍‍ ଡଲାନ୍‍ ମୁନେଙ୍କ୍‍ ନିକିଙ୍କ୍‍ ଆଶିର୍ବାଦ୍‌ ମାଡ଼ିତେ।

5 ଇସ୍‍ହାକ୍‍ ତାନ୍‍ ମାର୍‍ ଏଷୌଙ୍କ୍‍ ଇ ଗଟ୍‍ କେତାନ୍‍ୱେଲେ ରିବିକାଲ୍‍ କେଞ୍ଜ୍‍ତେ। ଆସୁଟ୍‍ ଏଷୌ କଡ଼୍‌ମାୱୁ ଆୱ୍‍ଙ୍ଗ୍‍ ତାତାନ୍‍ ମାଇଦିଙ୍କ୍‍ ୱାୟାନା ଆତ୍‍ତେୱେଲେ, 6 ରିବିକାଲ୍‍ ତାନ୍‍ ମାର୍‍ ଯାକୁବ୍‍ତିଙ୍କ୍‍ କେତ୍‍ତେ, ଉଡ଼୍‌, ନି ଦାଦାଲ୍‍ ଏଷୌନ୍‍ ତଡ଼୍‍ ମି ବାବାଲ୍‍ ତିରିୟାତିରିୟ୍‌ ଆଦାନାଦ୍‌ ନାନ୍‍ କେଞ୍ଜ୍‍ତାନ୍‍; 7 ଆଦ୍‍ ଅଂକିଙ୍କ୍‍ କେତ୍‍ତେ, ନିମେ କଡ଼୍‍ମାତେ ଆୱ୍‍ଙ୍ଗ୍‍ ତାସ୍‍ ନା ମାଇଦିଙ୍କ୍‍ ଲେକେତ୍‍ ମିଙ୍ଗ୍‌ତେ କାଦ୍ୟ ତିଆର୍‍ ମାଡ଼ା, ଆସୁଟ୍‍ ନାନ୍‍ ତିଞ୍ଜ୍‍ ଡଲାନ୍‍ ମୁନେ ସଦାପ୍ରବୁନ୍‍ ମୁନେ ନିକିଙ୍କ୍‍ ଆଶିର୍ବାଦ୍‌ ମାଡ଼ିତାନ୍‍। 8 ଆଦିନ୍‌ ମାଇଦିଙ୍କ୍‌, ମାର୍‌, ଇଞ୍ଜେ ନାନେ ନିକିଙ୍କ୍‌ ବେନ୍‌ ଆଦେଶ୍‌ ଇଦୁତାନ୍‌, ନା ଆ ଗଟ୍‍ କେଞ୍ଜା। 9 ନିମେ ଇଞ୍ଜେ କେତୁଲ୍‌ତେ ଗଡ଼୍‌କଟାମ୍‌ତାଗ୍‌ ଆଞ୍ଜ୍‌ ଆଗାକଞ୍ଚ୍‌ ରେଣ୍ଡ୍‍ଗଟି ଲେକେତାୱ୍‍ ମେଣ୍ଢାପିଲା ତାଡ଼ା; ଆସୁଟ୍‍ ମି ବାବାଲ୍‍ ବେଦ୍‍ପୁଟୁଙ୍କ୍‍ ପ୍ରେମ ମାଡ଼ିତଣ୍ଡ୍‍, ଆଦ୍‍ପୁଟୁଙ୍କ୍‍ ଲେକେତ୍‍ ତିନ୍ଦାନାଦ୍‍ ନାନ୍‍ ଆଟିଦ୍‍ତାନ୍। 10 ନିମେ ଆଦ୍‍ ଅସ୍‍ ବାବାନ୍‍ ଗାରେ ଆନ୍‍; ଆସୁଟ୍‍ ଅଣ୍ଡ୍‍ ଆଦିଙ୍କ୍‌ ତିଞ୍ଜ୍‍ ଡଲାନ୍‍ ମୁନେ ନିକିଙ୍କ୍‍ ଆଶିର୍ବାଦ୍‌ ମାଡ଼ିତଣ୍ଡ୍‍।

11 ଆସୁଟ୍‍ ଯାକୁବ୍‍ ତାମ୍‍ ୟାୟଙ୍କ୍‍ ରିବିକାଙ୍କ୍‍ କେତ୍‍ତଣ୍ଡ୍‍, ଉଡ଼୍‌, ନା ଦାଦାଲ୍‍ ଏଷୌ କେଲ୍‍କ୍‍ ମାନ୍ଦାନଣ୍ଡ୍, ମାତ୍ର ନାନ୍‍ କେଲ୍‍କ୍‍ ଇଲ୍‍ୱେନନ୍‍। 12 ବାତେଙ୍କ୍‍ଇତ୍କେ ବେସୁଟ୍‍ ବାବାଲ୍‍ ନାକିଙ୍କ୍‍ ଇଟିତଣ୍ଡ୍‍, ଆଲାଇତ୍କେ ନାନ୍‍ ଅନ୍‍ ମୁନେ ବୁସା ମାଡ଼ାନନ୍‍ ଲେକାମ୍‍ ତନ୍ଦିତାନ୍‍; ଆଲାଇତ୍କେ ନାନ୍‍ ନା ପର ଆଶିର୍ବାଦ୍‌ ତାଡ଼କଟ ଅବିସାପ୍‍ ତାତିତାନ୍‍। 13 ମାତର୍‌ ତାମ୍‍ ୟାୟ୍‍ କେତ୍‍ତେ, ପେକା ଆ ଅବିସାପ୍‍ ନାକିଙ୍କ୍‍ ତାଲ୍‍ଗି, ବେଲାବା ନିମେ ନା ଗଟ୍‍ ମାନେମ୍‍ ଆୟିମ୍‍ ନୁ ଆଞ୍ଜ୍‌ ମେଣ୍ଢା ପିଲା ତାଡ଼ା। 14 ଆସୁଟ୍‍ ଯାକୁବ୍‍ ଆଞ୍ଜ୍‌ ଆଦ୍‍ ପୟିସ୍‍ ୟାୟ୍‌ନାଗ୍‍ ତାତ୍‍ତାଙ୍କ୍‍, ୟାୟେ ତାମ୍‍ ବାବାନ୍‌ ପ୍ରେମ ଅନୁସାରେ ସାୟେ ମିଙ୍ଗ୍‍ତାଦ୍‍ ତିନ୍ଦାନାଦ୍‍ ଆଟେତ୍‌ । 15 ଆସୁଟ୍‍ ରିବିକାଲ୍‍ ଲୋନ୍‍ ତାନ୍‍ ଗାରେ ବେଡ଼ିୟ୍‌ ମାର୍‍ ଏଷୌନାଗ୍‍ ମାନ୍ଦାନ୍‍ କେର୍‍ଦାନାୱ୍‍ ତାସ୍‍ ସୁଦୁନ୍‍ ମାରିଙ୍କ୍ ଯାକୁବ୍‍ତିଙ୍କ୍‍ କେର୍‍ସ୍ପ୍‍ତେ। 16 ମେଣ୍ଡେ ମେଣ୍ଢ୍‌ପିଲାତ୍‌ ତଲ୍‍କେ ଅସ୍‍ ଅନ୍‍ କାୟ୍‍ଦାଗ୍‍ ନୁ ଗୁଡ଼୍‍ଙ୍ଗେତାଗ୍‌ ମୁସିତ୍‌ତା। 17 ମେଣ୍ଡେ ଆଟେତ୍‌ ସାୟେମିଙ୍ଗ୍‌ତେ କାଦି ନୁ ରୁଟି ଯାକୁବନ୍‍ କାୟ୍‍ଦେ ଇତ୍‍ତେ। 18 ଆସୁଟ୍‍ ଯାକୁବ୍‍ ତାମ୍‍ ବାବାନ୍‍ ଗାରେ ଆଞ୍ଜ୍‌ କେତ୍‍ତଣ୍ଡ୍‍, ବାବା; ଅଣ୍ଡ୍‍ ଉତ୍ତର୍‍ ଇତ୍‍ତଣ୍ଡ୍‍, ଉଡ଼ା, ନାନେ ଇଗେମିନ୍ଦେନ୍‍ ବାବୁ, ନିମ୍‍ ବେନନି ?

19 ଯାକୁବ୍ ତାମ୍‍ ବାବାଙ୍କ୍‍ କେତ୍‍ତଣ୍ଡ୍‍, ନାନ୍‍ ନି ବେଡ଼ିୟ୍‌ ମାର୍‍ ଏଷୌନ୍‍; ନିମେ ବେନ୍‍ କେସ୍‌ ମାତ୍‍ତିନ୍‍, ନାନ୍‍ ଆଦ୍‍ ମାଡ଼୍‍ତାନ୍‍; ଇଞ୍ଜେ ନିବେଦନ ମାଡ଼ିତାନ୍‍, ନିମେ ତେଦା ମେଣ୍ଡେ କୁଦି ନାୟାୱ୍‍ କଡ଼୍‌ମାୱୁ ଆୱ୍‍ଙ୍ଗ୍‍ ତିନ୍‍, ତାନ୍‍ ପେର୍କେ ନିମେ ନାକିଙ୍କ୍‍ ଆଶିର୍ବାଦ୍‌ ମାଡ଼େ। 20 ଆସୁଟ୍‍ ଇସ୍‍ହାକ୍‍ ତାନ୍‍ ମାରିଙ୍କ୍‍ କେତ୍‍ତଣ୍ଡ୍‍; ବାବୁ, ନିମେ ଇସର୍‍ ସିଟ୍‍ପାଟ୍‍ ଆଦିଙ୍କ୍‌ ବେଦ୍‍ପୁଟୁଙ୍କ୍‍ ପାହେମ୍‍ ଆତ୍‌ତିନ୍‌ ? ଅଣ୍ଡ୍‍ କେତ୍‍ତଣ୍ଡ୍‍, ନି ସଦାପ୍ରବୁ ପରମେଶ୍ୱର୍‍ ନାକିଙ୍କ୍‍ ଆଦିଙ୍କ୍‌ କାଲ୍‍ପିତ୍‍ତଣ୍ଡ୍‍।

21 ଇସ୍‍ହାକ୍‍ ଯାକୁବଙ୍କ୍‍ ମେଣ୍ଡେ କେତ୍‍ତଣ୍ଡ୍‍, ବାବୁ, ନା ଗାରେ ୱାଡ଼ା ନିମେ ନିଜାମ୍‍ ନା ମାର୍‍ ଏଷୌନି କି ଇଲେ, ନିକିଙ୍କ୍‍ ଇଟିମେଣ୍ଡେ ପୁନ୍ଦ୍‍ତାନ୍‍। 22 ଆସୁଟ୍‍ ଯାକୁବ୍‍ ତାମ୍‍ ବାବାନ୍‍ ଇସ୍‍ହାକ୍‍ତେ ଗାରେ ଆତ୍‌ତାଙ୍କ୍‌, ଅଣ୍ଡ୍‍ ଆସୁଟ୍‍ ଇଟି କେତ୍‍ତଣ୍ଡ୍, ଇ ଲେଙ୍ଗ୍‍ ଯାକୁବ୍‍ତେ ଲେଙ୍ଗ୍‍ ଲେକାମ୍‌, ମାତ୍ର ଇ କାଇ ଏଷୌନ୍‍ କାୟ୍‍। 23 ଇଦ୍‍ପୁଟୁଙ୍କ୍‍ ଅଣ୍ଡ୍‍ ଅଂକିଙ୍କ୍‍ ହେଞ୍ଚ୍‍ ପାର୍‍ୱଣ୍ଡ୍‍, ବାତେଙ୍କ୍‍ଇତ୍କେ ଅଣ୍ଡ୍ ତାନ୍‍ ତାମୁଣ୍ଡ୍ ଏଷୌନ୍‍ କାଇକିନ୍‍ ଲେକାମ୍‍ ଅନାୱୁ କାଇକିଙ୍କ୍‍ କେଲ୍‍କିନ୍‍ ଲେକାମ୍ ମାଡ଼ିମାତ୍‍ତଣ୍ଡ୍‍; ଆସୁଟ୍‍ ଅଣ୍ଡ୍ ଆଶିର୍ବାଦ୍‌ ମାଡ଼୍‍ତଣ୍ଡ୍‍। 24 ତାନ୍‌ପେର୍କେ ଅଣ୍ଡ୍‍ କେତ୍‍ତଣ୍ଡ୍‍, ନିମେ କି ନିଜାମ୍‍ ନା ମାର୍ ଏଷୌନି ? ଅଣ୍ଡ୍‍ କେତ୍‌ତଣ୍ଡ୍‌ ଅ ନାନେ ଅଣ୍ଡେ।

25 ଆସୁଟ୍‍ ଇସ୍‍ହାକ୍‍ କେତ୍‍ତଣ୍ଡ୍‍, ଆୱ୍‍ ନା ଗାରେ ତାଡ଼ା; ନାନେ ନା ମାର୍‌ ତାତ୍‍ତେ କଡ଼୍‍ମାତେ ଆୱ୍‍ଙ୍ଗ୍‍ ତିନ୍ଦ୍‍ତାନ୍‍, ଆସୁଟ୍‍ ନା ଜିଉନ୍‍ ନିକିଙ୍କ୍‍ ଆଶିର୍ବାଦ୍‌ ମାଡିତେ। ଆସୁଟ୍‍ ଅଣ୍ଡ୍‍ ଗାରେ ତାସ୍‍ ଇତ୍‍ତାଙ୍କ୍‍, ଇସ୍‍ହାକ୍‍ ଆୱ୍‍ ତିତ୍‍ତଣ୍ଡ୍‍; ମେଣ୍ଡେ ଦ୍ରାକ୍ଷାରସ୍‍ ତାସିତ୍‍ତାଙ୍କ୍‍ ଆଦ୍‍ ଉତ୍‍ତଣ୍ଡ୍‍। 26 ତାମ୍‍ ବାବାଲ୍‍ ଇସ୍‍ହାକ୍‍ କେତ୍‍ତଣ୍ଡ୍‍, ବାବୁ, ଇଞ୍ଜେ ନା ଗାରେ ୱାସ୍‍ ନାକିଙ୍କ୍‍ ଚୁମା ଇମ୍‍। 27 ଆସୁଟ୍‍ ଅଣ୍ଡ୍‍ ଗାରେ ଆଞ୍ଜ୍‌ ଚୁମା ଇତ୍‍ତାଙ୍କ୍‍ ଇସ୍‍ହାକ୍‍ ଅନାଦ୍‍ ଚକେତେ ଗାବ୍‍ ମୁସ୍‍କି ଅଂକିଙ୍କ୍‍ ଆଶିର୍ବାଦ୍‌ ମାଡ଼ି କେତ୍‍ତଣ୍ଡ୍‍, ଉଡ଼ା, ସଦାପ୍ରବୁନ୍‍ ଆଶିର୍ବାଦ୍‍ ପାହେମ୍‍ଆତ୍‍ତେ ୱାୟେତ୍‍ ଲେକାମ୍‍ ସାୟେତ୍‍ ଗାବ୍‍ତେ ଲେକାମ୍‍ ନା ମାରିନ୍‍ ଗାବ୍‍। 28 ପରମେଶ୍ୱର୍‍ ମାବ୍‍ତେ ଇଡ଼ାଗାକଞ୍ଚ୍‍ ନୁ ପୃଥିବୀତେ କାତାମ୍‌ତାଗ୍‌ ଆଦାନ୍‌ କାୟା ନୁ ନାର୍ଗେ ଶସ୍ୟ ନୁ ଦ୍ରାକ୍ଷାରସ୍‍ ନିକିଙ୍କ୍‍ ଇୱିଣ୍ଡ୍‍; 29 ନାରୁଡ଼୍‍ସାରେ ନିକିଙ୍କ୍‍ ସେବା ମାଡ଼ିଡ଼୍‍ ନୁ ସାରେ ପିଲୁଡ଼୍‍ତଡ଼୍‍ ନିକିଙ୍କ୍‍ ମଡ଼୍‍କିତଡ଼୍‍; ନିମେ ନି କୁଟ୍‌ମାମ୍‍ତେ ମାଲିକ୍‌ ଆୟିମ୍‍, ମେଣ୍ଡେ ନି ୟାୟାନ୍‍ ମାର୍‍କ୍‍ ନିକିଙ୍କ୍‍ ମଡ଼୍‍କିଡ଼୍‌; ବେନ ନିକିଙ୍କ୍‍ ଅବିସାପ୍‍ ଇଦ୍‍ତଣ୍ଡ୍‍, ଅଣ୍ଡ୍ ଅବିଶାପ୍‍ ଆଇଣ୍ଡ୍, ମେଣ୍ଡେ ବେନ ନିକିଙ୍କ୍‍ ଆଶିର୍ବାଦ୍‌ ମାଡ଼ିତଣ୍ଡ୍‍, ଅଣ୍ଡ୍‍ ଆଶିର୍ବାଦ୍‍ ପାହେମ୍‍ ଆୟିଣ୍ଡ୍‍।

30 ଇଦ୍‍ ଲେକାମ୍‌ ଇସ୍‍ହାକ୍‍ ଯାକୁବଙ୍କ୍‍ ଆଶିର୍ବାଦ୍‌ ମାଡ଼୍‍ତେ ପେର୍କେ ଯାକୁବ୍‍ ତାମ୍‍ ବାବାଲ୍‍ ଇସ୍‍ହାକ୍‍ତେ ଗାରେଙ୍କ୍‍ ପେୟ୍‍ତାନ୍‍ ୱେଲେ ତାମ୍‍ ଦାଦାଲ୍‍ ଏଷୌ କଡ଼୍‌ମାୱୁ ରେହ୍‍ତାନାଗାକଞ୍ଚ୍‍ ୱାତ୍‍ତଣ୍ଡ୍‍। 31 ମେଣ୍ଡେ ଅଣ୍ଡ୍‍ ଆନ୍ତେ ସାୟେତ୍‍ ଗାବ୍‍ତେ ତିନ୍ଦାନାଦ୍‍ ତିଆର୍‍ ମାଡ଼ି ବାବାନ୍‍ ଗାରେ ତାସ୍‍ କେତ୍‍ତଣ୍ଡ୍‍, ବାବା, ନିମେ ତେଦି ମାର୍‍ ତାତ୍‍ତେ କଡ଼୍‌ମାୱୁ ଆୱ୍‍ଙ୍ଗ୍‍ ତିନ୍‍, ତାନ୍‍ ପେର୍କେ ନିମେ ନାକିଙ୍କ୍‍ ଆଶିର୍ବାଦ୍‌ ମାଡ଼େ। 32 ଆସୁଟ୍‍ ତାମ୍‍ ବାବାଲ ଇସ୍‍ହାକ୍‍ କେତ୍‍ତଣ୍ଡ୍‍, ନିମେ ବେନନି ? ଅଣ୍ଡ୍‍ କେତ୍‍ତଣ୍ଡ୍‍, ନାନ୍‍ ନି ବେଡ଼ିୟ୍‌ ମାର୍‍ ଏଷୌନ୍‍। 33 ଆସୁଟ୍‍ ଇସ୍‍ହାକ୍‍ ଗାଟି ୱାଡ଼୍‌କି କେତ୍‍ତଣ୍ଡ୍‍, ଆଲାଇତ୍କେ ବେନ୍‍ ନା ଗାରେ କଡ଼୍‌ମାୱୁ ଆୱ୍‍ଙ୍ଗ୍‍ ତାସ୍‍ ମାତ୍‍ନଣ୍ଡ୍‍ ଅଣ୍ଡ୍‍ ବେନ ? ନିମେ ୱାଡ଼୍‍ୱେ ମୁନେ ନାନ୍‍ ଆୱ୍‍ ତିଞ୍ଜ୍‍ ଅଂକିଙ୍କ୍‍ ଆଶିର୍ବାଦ୍‌ ପାହେମ୍‍ ଆଦ୍‌ତଣ୍ଡ୍‌ । 34 ଏଷୌ ବାବାନାଦ୍‍ ଇ ଗଟି କେଞ୍ଜ୍‍ତେ ସାଙ୍ଗେ ସାଙ୍ଗେ କପାମ୍‍ ଆସ୍‍ ଗାଟି କିଡ଼୍‍କ୍‍ତଣ୍ଡ୍‍, ମେଣ୍ଡେ ତାମ୍‍ ବାବାଙ୍କ୍‍ କେତ୍‍ତଣ୍ଡ୍‍, ବାବା ନାକିଙ୍କ୍‍, ଆନ୍ତେ ଆଶିର୍ବାଦ୍‌ ମାଡ଼ା।

35 ଆସୁଟ୍‍ ଇସ୍‍ହାକ୍‍ କେତ୍‍ତଣ୍ଡ୍‍, ନି ତାମୁଣ୍ଡ୍‍ ୱାସ୍‍ ବୁସା ମାଡ଼ି ନିୟାଦ୍‍ ଆଶିର୍ବାଦ୍‌ ଅତ୍‍ତଣ୍ଡ୍‍।

36 ଆସୁଟ୍‍ ଏଷୌ କେତ୍‍ତଣ୍ଡ୍‍, ଅନାଦ୍‍ ସତ୍‌ ପେଦେର୍‍ ବାତ୍ ଯାକୁବ୍‍ ଆୟଣ୍ଡ୍‍ ? ବାତେଙ୍କ୍‍ଇତ୍କେ ଅଣ୍ଡ୍‍ ରେଣ୍ଡ୍‍ଦାମ୍‍ ନାକିଙ୍କ୍‍ ବୁସା ମାଡ଼୍‍ତଣ୍ଡ୍‍, ଅଣ୍ଡ୍‍ ମୁନେଙ୍କ୍‍ ନାୟାଦ୍‍ ବେଡ଼୍‍ୟନ୍‍ ଅଦିକାର୍‍ ଅସ୍‍ ମାତ୍‍ତଣ୍ଡ୍‍, ମେଣ୍ଡେ, ଇଞ୍ଜେ ନାୟାଦ୍‍ ଆଶିର୍ବାଦ୍‌ତିଙ୍କ୍‍ ଅତ୍‍ତଣ୍ଡ୍‍। ଅଣ୍ଡ୍‍ ମେଣ୍ଡନ୍‍ଦାମ୍‍ କେତ୍‍ତଣ୍ଡ୍‍, ନିମେ କି ନା ମାଇଦିଙ୍କ୍‍ ୱେରଟ୍‍ବା ଆଶିର୍ବାଦ୍‍ ନେହ୍‍ୱିନ୍‍ କି ?

37 ଆସୁଟ୍‍ ଇସ୍‍ହାକ୍‍ ଏଷୌଙ୍କ୍‍ କେତ୍‍ତଣ୍ଡ୍‍, ଉଡ଼୍‌, ନାନ୍‍ ଅଂକିଙ୍କ୍‍ ନି ବିଚାର୍‍ ମାଡ଼ାନଙ୍କ୍‌ ଅଙ୍କ୍‌ ମାଲିକ୍‌ ମାଡ଼୍‍ତାନ୍‍, ମେଣ୍ଡେ ଅନ୍‍ କୁଟ୍‍ମାତେ ସାରେତଡ଼୍‍କିଙ୍କ୍‍ ଅନ୍‍ ଅଦିନ ମାଡ଼୍‍ତାନ୍‍, ମେଣ୍ଡେ ଶସ୍ୟ ନୁ ଦ୍ରାକ୍ଷାରସ୍‍ ତଡ଼୍‍ ଅଂକିଙ୍କ୍‍ ଶକ୍ତି ମାଡ଼୍‍ତାନ୍‍; ଇତ୍କେ ମାର୍‍, ଇଞ୍ଜେ ନି ମାଇଦିଙ୍କ୍‍ ମେଣ୍ଡେ ବାତ୍‍ ମାଡ଼୍‍ ପାର୍ଦ୍‍ତାନ୍‍ ?

38 ଆସୁଟ୍‍ ଏଷୌ ମେଣ୍ଡନ୍‍ଦାମ୍‍ ତାମ୍‍ ବାବାଙ୍କ୍‍ କେତ୍‍ତଣ୍ଡ୍‍, ବାବା, ନିୟାଦ୍‍ ବାତ୍‍ ୱେରଡେ ଆଶିର୍ବାଦ୍‌ ମାତ୍‍ତେ ? ହୋ ବାବା, ନାକିଙ୍କ୍‍ ଆନ୍ତେ ଆଶିର୍ବାଦ୍‍ ମାଡ଼ା। ଇଲା କେସ୍‍ ଏଷୌ ଗାଟି ଲେଙ୍ଗ୍‍ତେ କେୟାଙ୍କ୍‍ ପସ୍ପ୍‍ତଣ୍ଡ୍‍।

39 ଆସୁଟ୍‍ ତାମ୍‍ ବାବାଲ୍‍ ଇସ୍‍ହାକ୍‍ ଉତ୍ତର୍‍ ଇସ୍‍ କେତ୍‍ତଣ୍ଡ୍‍, ଉଡ଼ା, ନିୟାଦ୍‍ ମାନ୍ଦାନାଦ୍‍ ପୃଥିବୀତେ କାତାମ୍‌ ଇଲ୍‌ୱେ ନୁ ପରଙ୍କ୍‌ ମେଣ୍ଡେ ସାଲ୍‍ ରାଲ। 40 ନିମେ ସାକୁ ପୟିସ୍‍ ନୁ ନି ତାମୁନ୍‍ତେ ଦାସ୍‍ ଆଦ୍‌ତିନ୍‌, ମାତ୍ର ବେସୁଟ୍‍ ନିମେ ବନ୍ଦନ୍‍ ଦେଃତିତିନ୍‍, ଆସୁଟ୍‍ ନି ଆଟ୍‍ତାଗାଙ୍କ୍‍ ଜୁୱାଡ଼୍‍ ଟେଣ୍ଡିତଣ୍ଡ୍‍। 41 ଇଦ୍‍ ଲେକାମ୍‌ ଯାକୁବ୍‍ ତାମ୍‍ ବାବାନାଗାଙ୍କ୍‍ ଆଶିର୍ବାଦ୍‌ ପାହେମ୍‍ ଆତ୍‍ତାଗାଙ୍କ୍‍ ଏଷୌ ଅନ୍‍ ପର କପାମ୍‍ ଆସ୍‍ ଲପ୍‍ ଆଲ୍‍ସ୍‍ତଣ୍ଡ୍‍, ନା ଆନିଦାଦିଡ଼୍‍ ପ୍ରାୟ ମାତ୍‍ତଡ଼୍‍ ତନ୍ ପେର୍କେ ନାନ୍‍ ନା ତାମୁଙ୍କ୍‍ ଯାକୁବ୍‍ତିଙ୍କ୍‍ ଆୱ୍‍କିତାନ୍‍।

42 ମାତ୍ର ବେଡ଼ିୟ୍‌ ମାର୍‍ ଏଷୌନ୍‍ ଇଦ୍‍ରକତ୍‍ ଗଟି ରିବିକାନ୍‍ କେୱ୍‍ଦାଗ୍‍ ହେୱ୍‍ତା; ଆସୁଟ୍‍ ଅଣ୍ଡ୍‍ ନାରୁଡ଼୍‍କ୍‍ ରୟ୍‍ସ୍‍ ସୁଦୁର୍‍ ମାର୍‍ ଯାକୁବ୍‍ ଇସ୍‌ କେତ୍‍ତଣ୍ଡ୍‍, ଉଡ଼୍‌, ମି ଦାଦାଲ୍‍ ଏଷୌ ନିକିଙ୍କ୍‍ ଆୱ୍‍କାଙ୍କ୍ ମନ୍‍ତାଗ୍‍ ନିଜ୍‍ତିଙ୍କ୍‍ ଶେଷ୍ଟା ମାଡ଼ୁତଣ୍ଡ୍‍। 43 ଆଦିନ୍‌ ମାଇଦିଙ୍କ୍‍ ବାବୁ, ନା ଗଟ୍‍ କେଞ୍ଜା; ନିମେ ହାରଣ ଦେଶ୍‌ତାଗ୍‍ ମିରି ନା ତାମୁଣ୍ଡ୍‍ ଲାବାନ୍‌ତେ ଗାରେ ଆନ୍‍। 44 ମେଣ୍ଡେ ବେସୁଙ୍କ୍‍ ଆୟିନା ନି ତାମୁନ୍‍ତାଦ୍‍ କପାମ୍‍ ୱିର୍‍ୟ, ଆସୁଙ୍କ୍‌ ଆୟିନା ବେସ୍‍କ୍‍ ବର୍ଷ ଆଗେ ମାନ୍‍; 45 ତାନ୍‌ପେର୍କେ ନି ପର ନି ଦାଦାନ୍‍ କପାମ୍‍ ୱିର୍‍ୟିକେ ନୁ ନିମେ ଅନ୍‍ ପର ବାତ୍‍ ମାଡ଼ିମିନ୍ଦେନି ଆଦ୍‍ ଅଣ୍ଡ୍‍ ମାର୍‌ଙ୍ଗ୍‌ତଣ୍ଡ୍‌, ନାନ୍‍ ନାରୁଡ଼୍‍କ୍‍ ରସ୍‍ ଆଗାକଞ୍ଚ୍ ନିକିଙ୍କ୍‍ ତାତିତମ୍‍; ଅଣ୍ଡୟ୍‍ଦିନେତ୍‌ ମି ଇର୍‍ୱୁଡ଼୍‍କ୍‍ ବାତେଙ୍କ୍‍ ନଷ୍ଟ ମାଡିତାନ୍‍ ? 46 ରିବିକାଲ୍‍ ଇସ୍‍ହାକ୍‍ତିଙ୍କ୍‍ କେତ୍‍ତେ, ଇ ହିତ୍ତୀୟ ପିକିନ୍‍ ସେଙ୍ଗେ ନାନ୍‍ ନା ଜିଉନ୍‍ତେ ଲୋପେ କପାମ୍‍ ଆସ୍ ମିନ୍ଦେନ୍‍; ବେସୁଟ୍‍ ଯାକୁବ୍‍ ଇୱିନ୍‍ ଲେକାମ୍‍ ବାତ୍‍ବା ହିତ୍ତିୟ ପିକିଙ୍କ୍‍, ଇତ୍କେ, ଇ ଦେଶ୍‍ତେ ପିକିନ୍‍ ଲୋପେଙ୍କ୍‍ ବେନ୍ଆୟି ପିକ୍‌ତିଙ୍କ୍‍ ପେଣ୍ଡୁଲ୍‍ ଆତ୍କେ, ଆଲାଇତ୍କେ ନାନ୍‍ ବାଦ୍‍କିମେଣ୍ଡେ ବାତ୍‍ ସୁକାମ୍‍ ?