1 ଆସୁଟ୍ ଯୋଷେପ୍ ନିଜର୍ ବାବାନ୍ ମକତାଗେ ମକମ୍ ୱାଟି କେଇ ଚୁମା ଇତ୍ତଣ୍ଡ୍। 2 ତାନ୍ ପେର୍ରକେ ଯୋଷେପ୍ ତାମ୍ ବାବାନ୍ ମଡ଼୍ ମିସାନ୍ ସାମାନ୍ ମାଡ଼ାନଙ୍କ୍ ତାନ୍ ଦାସ ବୈଦ୍ୟନଡ଼୍କ୍ ଆଦେଶ୍ ଇତ୍ତଣ୍ଡ୍; ଆସୁଙ୍କ୍ ବୈଦ୍ୟନଡ଼୍ ଇସ୍ରାଏତେ ମଡ଼୍ଦିଙ୍କ୍ ମିସ୍ତଡ଼୍। 3 ଆଦ୍ ମାଡ଼ାଙ୍କ୍ ଚାଲିଶ୍ ଦିନ୍ ଲାଗେମ୍ ଆଦ୍ତା; ବାତେଙ୍କ୍ଇତ୍କେ ମିସାନ୍ ଜିନିଷ୍ ବେଲାନେକି ଗାବିନ୍ ନିୟ୍ ଉସାନ୍ ମାଇଦିଙ୍କ୍ ନୁ ମିସାନ୍ ମାଇଦିଙ୍କ୍ ଚାଲିଶ୍ ଦିନ୍ ଲାଗେମ୍ ଆତ୍ତେ; ମେଣ୍ଡେ, ମିସ୍ରିୟ ନାରୁଡ଼୍ ଅଡ଼୍ ସେଙ୍ଗେ ସତୁରି ଦିନ୍ ଯାକ ଦୁଃକ ମାଡ଼୍ତଡ଼୍।
4 ଆ ଦୁଃକ ଦିନ୍ ତେର୍ନା, ଯୋଷେପ୍ ଫାରୋନ୍ ପୁତ୍ତେନଡ଼୍କିଙ୍କ୍ କେତ୍ତଣ୍ଡ୍, "ଯଦି ନାନ୍ ମି କଣ୍ଢ୍ତେ ଅନୁଗ୍ରହ ପାହେମ୍ ଆସ୍ ମାନେନ୍, ଆଲେକ୍ ଅନୁରଦ୍ ମାଡ଼ୁତାନ୍, ଫାରୋନ୍ କେୱ୍ଦାଗେ ଇ ଗଟି କେଲ୍ମୁଟ୍," 5 ନା ବାବାଲ୍ ନାକିଙ୍କ୍ ପ୍ରମାଣ ମାଡ଼ି କେସ୍ ମିନ୍ଦେଣ୍ଡ୍, ଉଡ଼ା, ମାନାଡ଼୍ ଡଲ୍କେ, କିଣାନ୍ ଦେଶ୍ତାଗ୍ ନିଜର୍ ସେଙ୍ଗେ ବେନ୍ କାବୁର୍ ମାଡ଼ିମିନ୍ଦେଡ଼୍, ଆଦିନ୍ତଡ଼୍ ମାନାଙ୍କ୍ କାବୁର୍ ଇଦ୍ତିଡ଼୍। ଆଦିଙ୍କ୍ ଇଞ୍ଜେ ନାକିଙ୍କ୍ ଆଦାଙ୍କ୍ ଇମୁଟ୍, ନାନ୍ ବାବାଙ୍କ୍ କାବୁର୍ ଇସ୍ ମେଣ୍ଡେ ୱାଦ୍ତାନ୍।
6 ଆସୁଟ୍ ଫାରୋ କେତ୍ତେ, ଆନ୍, ନି ବାବାଲ୍ ନିକିଙ୍କ୍ ବେନ୍ ପ୍ରମାଣ ମାଡିସ୍ମିନ୍ଦେଣ୍ଡ୍, ନିମେ ଆଦ୍ ଲେକାମ୍ ଅଂକିଙ୍କ୍ କାବୁର୍ ଇମ୍।
7 ଆସୁଟ୍ ଯୋଷେପ୍ ନିଜର୍ ବାବାଙ୍କ୍ ସମାଦି ଇଦାଙ୍କ୍ ଆତ୍ତଣ୍ଡ୍ ଆସୁଟ୍ ଫାରୋନ୍ ଦାସଡ୍ ନୁ ତାନ୍ ଲୋତ୍ତେ ବେଡ଼ିୟ୍ ନାରୁଡ଼୍ ନୁ ମିସର୍ ଦେଶ୍ତେ ବେଡ୍ୟା ନାରୁଡ୍ ଆତ୍ତଡ଼୍, 8 ମେଣ୍ଡେ ଯୋଷେପ୍ତେ ସାରେ ପରିବାର୍ ନୁ ତାନ୍ ଦାଦାଲଡ୍ ନୁ ତାନ୍ ବାବାନ୍ ପରିବାର୍ ତାନ୍ ତଡ୍ ଆତ୍ତଡ଼୍; ଗୋଶନ୍ ପ୍ରଦେଶ୍ତାଗ୍ ଅଡ଼୍ ମାତର୍ ମି ପେକାଲଡ୍ ନୁ ମେଣ୍ଡାମାନ୍ଦା ନୁ ଗଡ୍ମାନ୍ଦେ ୱିଡ୍ସି ଆତ୍ତଡ଼୍ । 9 ଅଡ୍ ତଡ୍ ରତ୍ ନୁ ଗୁରାକିନ୍ତଡ଼୍ ମିରାନଡ଼୍ ଆତ୍ତଡ଼୍ ଆସୁଟ୍ ଗାଟି ଗଲି ଆତ୍ତେ।
10 ଆସୁଙ୍କ୍ ଅଡ୍ ଯର୍ଦ୍ଦନ ୱେସ୍ ଆଟଦର୍ କଲାତାଗେ ହେୱ୍ତାଙ୍କ୍, ଆଗେ ଅଡ଼୍ ଗାଟି କେୟ୍ତଡ୍; ଯୋଷେପ୍ ଆଗେ ନିଜର୍ ବାବାନ୍ ସେଙ୍ଗେ ସାତ ଦିନ୍ ହେୱ୍ନା ଦୁଃକ ମାଡ୍ତଣ୍ଡ୍। 11 ମେଣ୍ଡେ ଆ ଦେଶ୍ ନିବାସିଡ୍ କିଣାନୀୟ ନାରୁଡ଼୍ ଆଟଦର୍ କଲାତାଗେ ଅଡ଼ାଦ୍ ଇଦ୍ ଗାଟି ଦୁଃକ; ଆଦିନ୍ ମାଇଦିଙ୍କ୍ ଯର୍ଦ୍ଦନ୍ ୱେୟ୍ତେ ଆ ପଡ଼୍ୟେ ଆବେଲ ମିସର୍ ମିସ୍ରୀୟଡ୍ ଦୁଃକ ପେଦେର୍ତେ ଆତ୍ତେ।
12 ଯାକୁବ୍ ନିଜର୍ ମାର୍କିଡ୍କ୍ ବେଦ୍ପୁଟୁଙ୍କ୍ ଆଦେଶ୍ ଇସ୍ ମାଡ୍ତଣ୍ଡ୍, ଅଡ୍ ଅନ୍ ପର ଆଦ୍ ଲେକାମ୍ ମାଡ୍ତଡ୍। 13 ଇତ୍କେ, ତାନ୍ ମାର୍କ୍ ଅଂକିଙ୍କ୍ କିଣାନ୍ ଦେଶ୍ତା ଅସ୍ ମକ୍ପେଲା ୱାୟ୍ତାଗେ ନାଡ୍ମେ ପଡ଼ିୟ୍ତାଗେ ସମାଦି ଇତ୍ତଡ୍; ଆ ପଡ଼୍ୟେ ମମ୍ରିତେ ମୁନେତ୍ ୱାୟେତଡ୍ ସମାଦି ପଡ୍ୟେତ୍ ଅଦିକାର୍ ଲେକାମ୍ ହିତ୍ତୀୟ ଇଫ୍ରୋଣକଞ୍ଚ୍ ଅବ୍ରାହାମ୍ ତଡ୍ ଆସିମାତ୍ତଣ୍ଡ୍। 14 ଯୋଷେପ୍ ନିଜର୍ ବାବାଙ୍କ୍ ସମାଦି ଇତ୍ତେ ପେର୍କେ ଅଣ୍ଡ ନୁ ତାନ୍ ଦାଦାଲଡ୍ ଲେକାମ ବେସ୍କ୍ତଡ୍ ନାରୁଡ୍ ତାମ୍ ବାବାଙ୍କ୍ ସମାଦି ଇଦାଙ୍କ୍ ଅନ୍ ତଡ୍ ଆଞ୍ଜମାତ୍ତଡ୍ ଅଡ଼୍ ସାରେତଡ୍ ମିସର୍ତା ଆତ୍ତଡ଼୍ ।
ଯୋଷେପ୍ତେ ତାମ୍ ଦାଦାଲଡ଼୍କ୍ ସାନ୍ତନା ହିତ୍ତଣ୍ଡ
15 ମେଣ୍ଡେ ମି ବାବାଲ୍ ଡଲିମିନ୍ଦେଣ୍ଡ୍ ଇଦ୍ ଉଡ଼ି ଯୋଷେପ୍ତେ ଦାଦାଲଡ୍ କେତ୍ତଡ୍, ଉମ୍ଭକି ଯୋଷେପ୍ ମାନାଙ୍କ୍ ଗୃଣା ମାଡିତଣ୍ଡ୍, ମେଣ୍ଡେ ମାନାଡ୍ ଅନାଦ୍ ଯେ ସାରେ କାରାପ୍ ମାଡିମିନ୍ଦେଡ୍, ଆଦିଙ୍କ୍ ପୁରା ପ୍ରତିସଦ୍ ମାନାଙ୍କ୍ ଇଦ୍ତଣ୍ଡ୍। 16 ବାତେଙ୍କ୍ଇତ୍କେ ଅଡ୍ ଯୋଷେପ୍ତେ ଗାରେ ଇ ଗଟ୍ କେସ୍ ରତଡ୍, ନି ବାବାଲ୍ ଡଲାନ୍ ମୁନେ ମାକିଙ୍କ୍ ଇଦ୍ କେସ୍ମାତ୍ତଣ୍ଡ୍, ମିଡ୍ ଯୋଷେପ୍ତିଙ୍କ୍ ଇ ଗଟି କେତିତିଡ୍, 17 ମିଇ ଦାଦାଲଡ୍ ନିୟାଦ୍ ଦୋଷ ମାଡିମିନ୍ଦେଡ୍; ମାତ୍ର ନିମେ ଅନୁଗ୍ରହ ମାଡ଼ି ଅଡ଼ାଦ୍ ଆ ଅଦର୍ମ ନୁ ପାପ୍ କ୍ଷମାମାଡ଼୍; ଆଦିନ୍ ମାଇଦିଙ୍କ୍ ମାମେ ଅନୁରଦ୍ ମାଡ଼ୁତମ୍, ନି ଆନିଦାଦିଡ଼୍ ପରମେଶ୍ୱରତେ ଦାସଡ୍ ଅଦର୍ମ କ୍ଷମାମାଡ଼୍। ଅଡ୍ ଇଦ୍ ଗଟ୍ କେତାନ୍ ୱେଲେ ଯୋଷେପ୍ କେୟାଙ୍କ୍ ପସ୍ପତଣ୍ଡ୍।
18 ତାନ୍ପେର୍କେ ତାମ୍ ଦାଦାଲଡ୍ ତାନ୍ ମୁନେ ଆଞ୍ଜ୍ ମଡ୍କି କେତ୍ତଡ୍, ଉଡା ମାମେ ନି ଦାସମ୍।
19 ଆସୁଟ୍ ଯୋଷେପ୍ ଅଡ଼୍କିଂଙ୍କ୍ କେତ୍ତଣ୍ଡ୍ , ମିଡ଼୍ ସୁଦୁର୍ ବା ୱେର୍ମାଟ୍, ନାନ୍ ବାତେ ପରମେଶ୍ୱରତେ ପଡ଼ିୟେ ଅଦେ ପାର୍ତାନ୍ ? 20 ମିଡ୍ ନା ବିରୁଦ୍ଦତେ କାରାପ୍ ଚିନ୍ତ୍ ମାଡିମାତ୍ତିଡ୍ ପ୍ରମାଣ, ମାତ୍ରମ୍ ପରମେଶ୍ୱର ଆଦିଙ୍କ୍ ମଙ୍ଗଲତେ ଚିନ୍ତ୍ ମାଡ୍ତଣ୍ଡ୍, ଇଞ୍ଜେ ବେଦ୍ ପୁଟୁଙ୍କ୍ ଉଡୁତିଡ୍ ଆଦ୍ପୁଟୁଙ୍କ୍ ନାର୍ଗେ ନାରୁଡ୍କ୍ ଜିୱୁନ୍ ରକ୍ଷା ମାଡ଼ାଙ୍କ୍ ଅନାଦ୍ ଇଚ୍ଛା ମାତ୍ତା। 21 ଆଦିନ୍ ମାଇଦିଙ୍କ୍ ମିଡ୍ ଇଞ୍ଜେ ୱେର୍ମାଟ୍, ନାନ୍ ମିକିଙ୍କ୍ ନୁ ମି ପିଲାଙ୍କ୍ ପଡ୍ପିତାନ୍ । ଇଦ୍ ଲେକାମ୍ ଚିନ୍ତେତ୍ ଗଟି କେସ୍ ଅଣ୍ଡ୍ ଅଡ଼କିଙ୍କ୍ ସାନ୍ତନା ଇଦ୍ତଣ୍ଡ୍।
ଯୋଷେପ୍ ଡଲ୍ତଣ୍ଡ୍
22 ଆସୁଙ୍କ୍ ଯୋଷେପ୍ ନୁ ତାନ୍ ବାବାନ୍ ପରିବାର୍ ମିସର୍ତାଗେ ମାତ୍ତଡ୍; ଯୋଷେପ୍ ଶହେ ଦଶ ବର୍ଷ ଜିୱୁନ୍ ମାତ୍ତଣ୍ଡ୍। 23 ଯୋଷେପ୍ ଇଫ୍ରୟିମତେ ତୃତୀୟ ମାନେଇ ହେୱ୍ନା ପିଲାଙ୍କ୍ ଉଡ୍ତଣ୍ଡ୍; ମେଣ୍ଡେ ଯୋଷେପ୍ ମନଃଶିତେ ମାଖୀର ପେଦେର୍ତେ ମାରିନ୍ ଶୁଦୁ ପିଲାଙ୍କ୍ ବରେତାଗ୍ ମାଡ୍ତଣ୍ଡ୍। 24 ତାନ୍ପେର୍କେ ଯୋଷେପ୍ ଦାଦାଲଡ୍କ୍ କେତ୍ତଣ୍ଡ୍ ନାନ୍ ଡଲମିନ୍ଦେନ୍, ମାତ୍ରମ୍ ପରମେଶ୍ୱର ନିଜାମ୍ ମିୟାଦ୍ ଯତ୍ନ ମାଡ଼ିତଣ୍ଡ୍, ମେଣ୍ଡେ ଇ ଦେଶ୍କଞ୍ଚ୍ ମିକିଙ୍କ୍ ବାଇଦେ ପେସ୍ପି ବେନ୍ ଦେଶ୍ ଇଦାନ୍ ମାଇଦିଙ୍କ୍ ଅବ୍ରାହାମ୍, ଇସ୍ହାକ୍ ନୁ ଯାକୁବ୍ତେ ଗାରେ ପ୍ରମାଣ ମାଡ଼ିମିନ୍ଦେଣ୍ଡ୍, ଆଦେଶ୍ ମିକିଙ୍କ୍ ଅଦ୍ତଣ୍ଡ୍। 25 ମେଣ୍ଡେ ଯୋଷେପ୍ ଇସ୍ରାଏଲତେ ପିଲାକିଙ୍କ୍ ପ୍ରମାଣ ମାଡାଙ୍କ୍ କେତ୍ତଣ୍ଡ୍, ପରମେଶ୍ୱର ନିଜାମ୍ ମି ଯତ୍ନ ମାଡ଼ିତଣ୍ଡ୍, ଆ ସମୟତେ ମିଡ଼୍ ଇ ପଡ୍ୟିକଞ୍ଚ୍ ନା ବୁଲାଙ୍କ୍ ଅଦ୍ତିଡ୍। 26 ଇଦ୍ ଲେକାମ୍ ଯୋଷେପ୍ ଶହେ ଦଶ ବର୍ଷ ସମୟ୍ତେ ମିସର୍ ଦେଶ୍ତାଗ୍ ଡଲ୍ତଣ୍ଡ୍; ଆସୁଟ୍ ଅଡ଼୍ ଅନାଦ୍ ମଡ଼୍ଦିଙ୍କ୍ ମିସାନ୍ ଜିନିଷ୍ ମାଡ଼ି ମିସର୍ ଦେଶ୍ତାଗେ ଅଣ୍ଡୟ ପେଟ୍ ଲୋପେ ୱାଟ୍ତଡ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)