1 ଆଦମ୍‌ ନିଜର୍‍ ମୁତେ ହବାନ୍‍ତଡ଼୍‍ ଉଞ୍ଚ୍‍ତାଙ୍କ୍‍, ଆଦ୍‌ ଡଙ୍କେତ୍‍ ଆସ୍‍ କୟିନ୍‍* ପେଦେର୍‍ତଣ୍ଡ୍ ଅର୍‍ତୁଣ୍ଡ୍‍ ମାର୍‍ଦିଙ୍କ୍‍ ଜନ୍ମ ମାଡ଼ି କେତ୍‌ତେ, ସଦାପ୍ରବୁନ୍‍ ସାହାଯ୍ୟତେ ନାକ୍‍ ୱେରଣ୍ଡ୍ ମାର୍‌ ଆତ୍‌ତଣ୍ଡ୍‌ । 2 ତାନ୍‍ପେର୍କେ ଆଦ୍‌ ହେବଲ ତାନ୍‍ଅର୍ତ ସାରେ ଦିନା ହେବଲ୍‌ ପେଦେର୍‍ତେ ତାନ୍‍ ତଡ଼୍‌ଦେନଙ୍କ୍‌ ଜନ୍ମ ମାଡ଼୍‍ତେ। ହେବଲ* ମେଣ୍ଢା ଗଲାଲ୍‍ ନୁ କୟିନ୍‍ ଚାଷ୍‍ମାଡ଼ାନଣ୍ଡ୍‍ ମାତ୍‍ତଣ୍ଡ୍‍। 3 ସମୟ୍‍ ଅନୁସାରେ କୟିନ୍‍ ସଦାପ୍ରବୁନ୍‍ ଉଦେଶ୍‍ତେ ବୁମ୍‍ତାଗାଙ୍କ୍‍ ସାୟେତ୍‌ କାୟା ତାସ୍‍ ଉତ୍ସର୍ଗ ମାଡ଼୍‍ତଣ୍ଡ୍‍। 4 ମେଣ୍ଡେ ହେବଲ୍‍ ଆନ୍ତେ ନିଜର ମେଣ୍ଢା ଲୋପେଙ୍କ୍‍ ମୁନ୍‍ଜନ୍ମ ଆତ୍‌ତେ ବେସ୍କ୍‍ ପଶୁ ନୁ ଆୱିନ୍‍ ମେଦ ଉତ୍ସର୍ଗ ମାଡ଼୍‍ତଣ୍ଡ୍‍। ସଦାପ୍ରବୁ ହେବଲ୍‍ତିଙ୍କ୍‍ ନୁ ତାନ୍‍ ନିୟ୍‌ଦିଙ୍କ୍‍ ଅଣ୍ଡ୍‍ ଗ୍ରହଣ ମାଡ଼୍‌ତଣ୍ଡ୍‍। 5 ମାତ୍ରମ୍‍ କୟିନ୍‍ତିଙ୍କ୍‍ ନୁ ତାନ୍‍ ନିୟ୍‌ଦିଙ୍କ୍‍ ଅଣ୍ଡ୍ ଗ୍ରହଣ ମାଡ଼ଣ୍ଡ୍‍। ଆଦିନ୍‌ ମାଇଦିଙ୍କ୍‍ କୟିନ୍‍ ଗାଟି କପାମ୍‍ ଆସ୍ ଦୁଃକ ଆତ୍‌ତଣ୍ଡ୍‌। 6 ଆସୁଟ୍‍ ସଦାପ୍ରବୁ କୟିନ୍‍ତିଙ୍କ୍‍ କେତ୍‍ତଣ୍ଡ୍‍, ନିମେ ବାତେଙ୍କ୍‍ କପାମ୍‍ ଆଦୁତି ? ମେଣ୍ଡେ ବାତେଙ୍କ୍ ଦୁଃକ ଆସ ମିନ୍ଦେନି ? 7 ସତ୍‌ ପାଡ଼ିୟ୍‌ ମାଡ଼୍‍କେ, ବା ନିମେ କାୱକଟ ମାନେନି ? ନିଜାମ୍‍ତେ ପାଡ଼ିୟ୍‌ ମାଡ଼୍‍ୱାଙ୍କ୍‍, ପାପ୍‌ ଆର୍‍ଦାଗ୍‍ କେପି ମାନ୍ତ୍‍ତେ; ନି ପର ତାନାଦ୍‍ ଗାବ୍‌ ମାନ୍ତ୍‍ତେ, ମାତ୍ର ନିମେ ତାନ୍‍ ପର ଅଦିକାର୍‍ ମାଡ଼ିତିନ୍।

8 ତାନ୍‌ପେର୍କେ କୟିନ୍‍ ନିଜର୍‍ ତାମୁନ୍‍ ହେବଲ୍‍ ତଡ଼୍‍ ଗଟି ତିର୍‍ୟାତିର୍‍ୟି ଆତ୍‌ତଡ଼୍‌ । ଆସୁଟ୍‍ ଅଡ଼୍‍ ୱାୟାନା ମାନ୍ଦାନ୍‍ ୱେଲେ କୟିନ୍‍ ନିଜର୍‍ ତାମୁଙ୍କ୍‍ ହେବଲ୍‍ତିଙ୍କ୍‍ ରେହ୍‍ସ୍‍ ଆୱୁକ୍‍ତଣ୍ଡ୍‍।

9 ସଦାପ୍ରବୁ କୟିନ୍‍ତିଙ୍କ୍‍ ପାଚାରାମାଡ଼୍‍ତଣ୍ଡ୍‍, ନି ତାମୁନ୍‍ ହେବଲ ବେକେ ? ଅଣ୍ଡ୍‍ କେତ୍‍ତଣ୍ଡ୍‍, ନାନ୍‍ ପୁନ୍‍ନନ୍‍, ନାନ୍‍ ବାତେ ନା ତାମୁନ୍‍ତିଙ୍କ୍‍ ରାକ୍‍ମାନ୍ଦାନନ୍‍ ? 10 ତାନ୍‌ପେର୍କେ ପ୍ରବୁ କେତ୍‍ତଣ୍ଡ୍, ନିମେ ବାତ୍‍ ମାଡ଼ି ମିନ୍ଦେନି ? ନି ତାମୁନ୍‍ତେ ନେତୁର୍‍ ବୁମ୍‍ତାଗାଙ୍କ୍‍ ନାକିଙ୍କ୍‍ କାର୍ଙ୍ଗୁତ୍‍। 11 ଆଦିନ୍‌ ମାଇଦିଙ୍କ୍‍ ବେନ୍‍ ବୁମ୍‍ ନି କାୟ୍‍ଦେକଞ୍ଚ୍ ନି ତାମୁନ୍‍ତେ ନେତୁର୍‍ ଗ୍ରହନ୍‍ ମାଡ଼୍‍ତାଙ୍କ୍‍ ନିଜର୍‍ ପାୟୁର୍‍ କୁଲା ମାଡ଼ିମିନ୍ଦେନି, ଆ ବୁମ୍‌ତାଗ୍‌ ଇଞ୍ଜେ ନିମେ ଅବିଶାପ୍‍ ଆତ୍‌ତିନ୍‌; 12 ବୂମ୍‍ତାଗ୍‍ ଚାଷ୍‍ ପାଡ଼ିୟ୍‌ ମାଡ଼୍‍କେ କେ ଆଦ୍‌ ନିଜର୍‍ ଶକ୍ତି ଇସ୍‍ ମେଣ୍ଡେ ମିୟାଦ୍‍ ସେବା ମାଡ଼; ନିମେ ପୃତିବିତାଗ୍‍ ମିରାନନ୍‍ ନୁ ଉଡାନନ୍‍ ଲେକାମ୍‍ ଆଦ୍‌ତିନ୍‌ ।

13 କୟିନ୍‍ ସଦାପ୍ରବୁଙ୍କ୍‍ କେତ୍‍ତଣ୍ଡ୍‍, ନାୟାଦ୍‍ ଦଣ୍ଡ ନାର୍ଗେ, ସହ୍ୟ ମାଡ଼୍‌ଡ଼େ ପାର୍‌ୱନ୍‌। 14 ଉଡ଼ାଟ୍‍, ନିମେ ନେଣ୍ଡ୍‍ ନାକିଙ୍କ୍‍ ଇ ପଡ଼୍‍ୟ୍‍ତାଗାଙ୍କ୍‍ ତଲିତ୍‍ତି, ଆଲାଇତ୍କେ ନି ମୁନେକଞ୍ଚ୍‍ ନାନ୍ ମିଞ୍ଜିତାନ୍‍; ଇଦ୍‍ ଲେକାମ୍‌ ପୃତିବିତାଗ୍‍ ମିରାନନ୍‍ ନୁ ଉଡାନନ୍‍ ଆତ୍କେ ଇଦ୍‍ ଲେକାମ୍‍ ଆଦ୍‌ତଣ୍ଡ୍‌ ଯେ, ବେନ୍‍ଆଇ ନାରୁଣ୍ଡ୍ ନାକିଙ୍କ୍‍ ଦର୍‍ସ୍କେ ଆୱ୍‍କିତଣ୍ଡ୍‍ ।

15 ମେଣ୍ଡେ ସଦାପ୍ରବୁ ଅଂକିଙ୍କ୍‍ କେତ୍‍ତଣ୍ଡ୍‍, ଇତ୍କେ ବେନ କୟିନ୍‍ତିଙ୍କ୍‍ ଆୱ୍‍କେ, ଅଂକିଙ୍କ୍‍ ସାତ୍‍ଗୁଣ ଦଣ୍ଡ ଆଦ୍‌ତେ । ମେଣ୍ଡେ ବେନ ଅଂକିଙ୍କ୍‍ ଉଡ଼ି ବା ଆୱ୍‍କଣ୍ଡ୍, ଆଦିନ୍‌ ମାଇଦିଙ୍କ୍‍ ସଦାପ୍ରବୁ କୟିନ୍‍ତେ ମାଇଦିଙ୍କ୍‍ ଅଣ୍ଡୟ୍‍ ଚିହ୍ନେ ତିଆର୍ ମାଡ଼୍‍ତଣ୍ଡ୍। 16 କୟିନ୍‍ ସଦାପ୍ରବୁନ୍‍ ମୁନେକଞ୍ଚ୍‍ ପେୟ୍‌ସ୍‌ ଏଦନ୍‍ତେ ପୂର୍ବଦିଗେତ୍‍ ପାକେ ନୋଦ ପେଦେର୍‍ତେ ଦେଶ୍‍ତାଗ୍‍ ଆଞ୍ଜ୍‌ ଆଗେ ମାତ୍‍ତଣ୍ଡ୍‍।

17 ମେଣ୍ଡେ କୟିନ୍‍ ନିଜର୍‍ ମୁତେନ୍ ତଡ଼୍‍ ଉଞ୍ଜ୍‍ତାଙ୍କ୍, ଆଦ୍‌ ଡଙ୍କେତ୍‍ ଆସ୍‍ ହନୋକତିଙ୍କ୍‍ ଜନ୍ମ ଇତ୍‍ତେ; ମେଣ୍ଡେ ଅଣ୍ଡ୍ ୱେରଡ୍‍ ନଗର ତିଆର୍‍ ମାଡ଼ି ନିଜର୍‍ ମାରିନ୍‍ ପେଦେର୍‍ ଅନୁସାରେ ଆଗେତ୍‌ ପେଦେର୍‍ ହନୋକ ଇତ୍‍ତଣ୍ଡ୍‍। 18 ଆ ହନୋକ୍‍ତେ ମାର୍‍ ଇରଦ୍‌ ନୁ ଇରଦ୍‍ତେ ମାର୍‍ ମତୁସାୟେଲ୍ ନୁ ମହୁୟାୟେଲ୍‌ତେ ମାର୍‍ ମତୁଶାୟେଲ ନୁ ମତୁଶାୟେଲ୍‌ତେ ମାର୍‍ ଲେମକ। 19 ଇ ଲେମକ ରେଣ୍ଡ୍‍ ମୁତେକିଙ୍କ୍‍ ପେଣ୍ଡୁଲ୍‍ ଆତ୍‌ତଣ୍ଡ୍‌, ଅଣ୍ଡିନ୍‍ ପେଦେର୍‍ ଆଦା ନୁ ମେଣ୍ଡନିନ୍‍ ପେଦେର୍‍ ସିଲ୍ଲା ମାତ୍‌ତେ। 20 ଆଦାର୍‌ତେ ଡଙ୍କେତ୍‍କଞ୍ଚ୍‍ ଜାବଲ ଜନ୍ମ ଆତ୍‌ତଣ୍ଡ୍‌, ଅଣ୍ଡ୍ କଟାମ୍ ମାନ୍ଦାନ୍‌ ଜିୱାକ୍‌ ପାନଡ଼୍‌ତେ ମୁନେତ୍‌ ନାରୁଣ୍ଡ୍‌ ମାତ୍‍ତଣ୍ଡ୍‍। 21 ତାନ୍‍ ତାମୁନ୍‍ତେ ପେଦେର୍‍ ଯୁବଳ, ଅଣ୍ଡ୍ ଡୁମିର୍‍ ନୁ ଅଶଡ଼୍‍ ଉଦାନଡ଼୍‍ ମୁନେତ୍‌ ନାରୁଣ୍ଡ୍‌ ମାତ୍‍ତଣ୍ଡ୍‍। 22 ସିଲ୍ଲାତେ ଡଙ୍କେତ୍‍କଞ୍ଚ୍‍ ତୁବଲ୍‍ କୟିନ ଜନ୍ମ ଆତ୍‍ତଡ଼୍‍, ଅଣ୍ଡ୍‍ ପିତ୍ତଲ୍ ନୁ ଲୁହାତେ ରକମ୍‍ ରକମ୍‍ ପ୍ରକାର୍‍ତେ ଅସ୍ତ୍ର ତିଆର ମାଡ଼ାନଣ୍ଡ୍ ମାତ୍‍ତଣ୍ଡ୍‍; ତୂବଲ୍ କୟିନ୍‍ତେ ନୟମା ପେଦେର୍‍ତେ ଅଣ୍ଡୟ୍‍ ଏଲାଡ଼୍‍ ମାତ୍‍ତେ।

23 ଅନନ୍ତର ଲେମକ ନିଜର୍‍ ମୁତେକିଙ୍କ୍‍ କେତ୍‍ତଣ୍ଡ୍,

ଆଦା ନୁ ସିଲ୍ଲା, ନା ଗଟି କେଞ୍ଜାଟ୍‍; ଇ ଲେମକ୍‍ତେ ମୁତେନଡ଼ି, ମିଡ଼୍‍ ନା ଗଟ୍‌ତିଙ୍କ୍‍ କେୱ୍‍କ୍‍ ତାରି କେଞ୍ଜାଟ୍‍;

ନାନ୍‍ କଷ୍ଟ ପରିଶୋଦତେ ଅର୍‍ତୁଙ୍କ୍‍ ନାରୁଙ୍କ୍ ନୁ ରେହ୍‍ସ୍‍ମାନ୍ଦାନ୍‍ ପ୍ରତିସଦ୍‌ ଅର୍‍ତୁଙ୍କ୍‍ ଲେୟଙ୍କ୍‍ ଆୱ୍‍କି ମିନ୍ଦେନ୍‍; 24 ବେସୁଙ୍କ୍‍ କୟିନ୍‍ତେ ଆୱ୍‍କିମାନ୍ଦାନ୍‍ କାୟେ

ସାତଗୁଣ ଆଦ୍‌ତେ, ଆଲାଇତ୍କେ ଲେମକ୍‍ତେ କାୟେ

ସତୁରି ସାତ ଗୁଣ ନିଜାମ୍‍ ଆଦ୍‌ତେ ।

25 ତାନ୍‍ପେର୍କେ ଆଦମ୍‌ ମେଣ୍ଡନ୍‍ଦାମ୍‍ ନିଜର୍‍ ମୁତେନ୍‍ତଡ଼୍‍ ଉଞ୍ଜ୍‍ତାଙ୍କ୍‍, ଆଦ୍‌ ଅଣ୍ଡୟ୍‍ ମାରିଙ୍କ୍‍ ଜନ୍ମ ମାଡ଼ି ଅନ୍‍ ପେଦେର୍‍ ଶେଥ* ଇତ୍‍ତେ; ବାତେଙ୍କ୍‍ଇତ୍କେ ଆଦ୍‌ କେତ୍‍ତେ, ପରମେଶ୍ୱର ହେବଲତେ ଲେକାମ୍‌ ମେଣ୍ଡ୍‍ଅର୍‍ତୁଣ୍ଡ୍‍ ମାର୍‍ ନାକିଙ୍କ୍‍ ଇସ୍‍ମିନ୍ଦେଣ୍ଡ୍‍, ଇତ୍କେ କୟିନ୍‍ ଅଂକିଙ୍କ୍‍ ଆୱ୍‍କି ମାତ୍‍ତଣ୍ଡ୍। 26 ଆସୁଟ୍ ଶେଥଙ୍କ୍‍ ଆନ୍ତେ ୱେରଣ୍ଡ୍‍ ମାର୍‍ ଜନ୍ମ ଆତ୍‌ତଣ୍ଡ୍‌; ମେଣ୍ଡେ ଅଣ୍ଡ୍ ଅନ୍‍ ପେଦେର୍‍ ଈନୋଶ ଇତ୍‍ତଣ୍ଡ୍‍। ଆ ସମୟ୍‍ତେ ନାରୁଡ଼୍‍ ସଦାପ୍ରବୁନ୍‍ ପେଦେର୍‍ତେ ପାର୍ତନା ମାଡ଼ାନଙ୍କ୍‍ ପସ୍ପତଡ଼୍‍।