1 ଯାକୁବ୍‍ ଆଦାନାଗାଙ୍କ୍‍ ତିଆର୍‌ ଆସ୍‍ ପଡ଼ଦ୍‌ ପେଇତାନ୍‌ପାକ୍‌ ନାରୁଡ଼୍‍ ଦେଶ୍‍ତା ଏୱୁତଣ୍ଡ୍‍। 2 ଆସୁଟ୍‍ ଅଣ୍ଡ୍ ଉଡ଼୍‍ତଣ୍ଡ୍‍, ମେଣ୍ଡେ ଉଡ଼୍‌, ୱାୟାନ୍‍ ଲୋପେ ଅଣ୍ଡୟ ନୂୟ୍‍, ମେଣ୍ଡେ ଉଡ଼୍‌, ଆଦିନ୍‌ ଗାରେ ମୁଣ୍ଡ୍‍ ମାନ୍ଦେ ମେଣ୍ଢା ପାଟିମିନ୍ଦେ; ଇତ୍କେ ନାରୁଡ଼୍‍ ମେଣ୍ଢା ମାନ୍ଦେତିଙ୍କ୍‍ ଆ ନୂୟ୍‍କଞ୍ଚ୍‍ ଏର୍‍ ଉସ୍‍ପିତଡ଼୍‍; ଆ ନୁୟ୍‍ଦେ ପର ଅଣ୍ଡୟ୍‍ ବେଡ଼୍‍ୟାଦ୍‍ କାଲ୍‍ ମୁସ୍‍ପିତ୍‍ତଡ଼୍‍। 3 ଆ ନୂୟ୍‍ଦେ ଗାରେ ସାରେ ମାନ୍ଦେ ଅଣ୍ଡୟାଗ୍‍ ଗୁଡ଼ିତା; ମେଣ୍ଡେ, ନାରୁଡ଼୍‍ ତାନ୍‍ ପର କଞ୍ଚ୍‍ କାଲ୍‍ ଗୁଞ୍ଚାମାଡ଼ି ମେଣ୍ଢାକିଙ୍କ୍‍ ଏର୍‍ ଉସ୍‍ପିତଡ଼୍‍। ମେଣ୍ଡନ୍‍ଦାମ୍‍ ନୂୟ୍‍ଦେ ପର ବେଲା ମାତ୍‍ତେ କାଲ୍‍ ଆଲା ତାନ୍‍ ପର ମୁସିଦ୍‍ତଡ଼୍‍।

4 ଯାକୁବ୍‍ ଅଡ଼୍‍କିଙ୍କ୍ ପାଚାରାମାଡ଼୍‍ତଣ୍ଡ୍‍, ହୋ ଦାଦାଲଡ଼ି, ମିଡ଼୍‍ ବେନ୍ ନାର୍‍ଦେ ନାରୁଡ଼ି ? ଅଡ଼୍‍ କେତ୍‍ତଡ଼୍, ମାମେ ହାରଣ ନାର୍‍ଦେ ନାରୁମ୍‍।

5 ଆସୁଟ୍‍ ଯାକୁବ୍ ପାଚାରା ମାଡ଼୍‍ତଣ୍ଡ୍‍, ମିଡ଼୍‍ ନାହୋର୍‍ତେ ମାର୍‍ ଲାବାନ୍‌ତିଙ୍କ୍‍ ପୁତ୍‍ତଡ଼୍‍ କି ? ଅଡ଼୍‍ କେତ୍‍ତଡ଼୍‍, ମାମେ ଅଂକିଙ୍କ୍‍ ପୁତ୍‍ତମ୍‍।

6 ଯାକୁବ୍‍ ପାଚାରା ମାଡ଼୍‍ତଣ୍ଡ୍‍, ଅଣ୍ଡ୍‍ ଲେକେତ୍‍ ମିନ୍ଦେଣ୍ଡ୍‍ ତ ? ଅଡ଼୍‍ କେତ୍‍ତଡ଼୍‍, ଲେକେତ୍‍ ମିନ୍ଦେଣ୍ଡ୍‍; ଇକ୍‍ ଉଡ଼୍‌, ତାନ୍‍ ମାୟାଡ଼୍‍ ରାହେଲ୍‌ ମେଣ୍ଢାମାନ୍ଦେ ପୟ୍‍ସ୍‍ ୱାଦୁତ୍‍।

7 ଆସୁଟ୍‍ ଯାକୁବ୍‍ କେତ୍‍ତଣ୍ଡ୍‍, ଉଡ଼ାଟ୍‍, ଇଞ୍ଜେ ନାର୍ଗେ ପଡ଼୍‍ଦ୍‍ ହେକ୍‌ତେ; ମେଣ୍ଢାମାନ୍ଦେ ଅଣ୍ଡୟ୍‍ ଆଗେ ଗୁଡ଼୍‍ପାନ୍‍ ସମୟ୍‍ ଆୟିୱାକେ; ମିଡ଼୍‍ ମାଣ୍ଢାକିଙ୍କ୍‍ ଏର୍‍ ଉସ୍‍ପି ମେଣ୍ଡନ୍‍ଦାମ୍‍ ମେୟ୍‍ତାନଙ୍କ୍‍ ଅୟ୍‍ମୁଟ୍‍।

8 ଇତ୍କେ ଅଡ଼୍‍ କେତ୍‍ତଡ଼୍‍, ଆଲା ମାମେ ମାଡ଼୍‍ ପାର୍‍ୱମ୍‍; ସାରେ ମାନ୍ଦେ ଗୁଡ଼୍‍ନା ଯାକ କେପ୍‍ ୱେୟ୍‍ତିତ୍‍; ତାନ୍‍ ପେର୍କେ ନୂୟ୍‍ଦେ ପରକଞ୍ଚ୍‍ କାଲ୍‍ ଗୁଞ୍ଚା ମାଡ଼୍‍ୱେୟ୍‍ତିତ୍‍, ତାନ୍‍ ପେର୍କେ ମାମେ ମେଣ୍ଢାକିଙ୍କ୍‍ ଏର୍‍ ଉସ୍‍ପିତମ୍‍।

9 ଯାକୁବ୍‍ ଅଡ଼୍‍ ତଡ଼୍‍ ଇଦ୍‍ପୁଟୁଙ୍କ୍‍ ଗଟି ଆଦୁତଣ୍ଡ୍‌, ତାନ୍‍ପେର୍କେ ରାହେଲ୍‌ ତାମ୍‍ ବାବାନ୍‍ ମେଣ୍ଢାମାନ୍ଦେ ତାସ୍‍ ହେୱ୍‍ତେ, ବାତେଙ୍କ୍‍ଇତ୍କେ ଆଦ୍‍ ମେଣ୍ଢା ମେୟ୍‍ତାନାଦ୍‍ ମାତ୍‍ତେ। 10 ଆସୁଟ୍‍ ଯାକୁବ୍‍ ତାମ୍‍ ମାମାଲ୍‌ ଲାବାନ୍‌ତେ ମାୟାଡ଼୍‍ ରାହେଲ୍‌ତିଙ୍କ୍‍ ନୁ ମାମାନ୍‌ ମେଣ୍ଢାମାନ୍ଦେତିଙ୍କ୍‍ ଉଡ଼ି ଗାରେ ଆଞ୍ଜ୍‌ ନୂୟ୍‍ଦେ ପରକଞ୍ଚ୍‍ କାଲ୍‍ ଗୁଞ୍ଚାମାଡ଼ି ମାମାନ୍‌ ଲାବାନ୍‍ତେ ମାନ୍ଦେତିଙ୍କ୍‍ ଏର୍‍ ଉସ୍‍ପ୍‍ତଣ୍ଡ୍‍। 11 ତାନ୍‌ପେର୍କେ ଯାକୁବ୍‍ ରାହେଲ୍‌ତିଙ୍କ୍‍ ଚୁମା ଇସ୍‍ ଗାଟି ଲେଙ୍ଗ୍‍ଦେ କେୟାନଙ୍କ୍‍ ପସ୍ପ୍‍ତଣ୍ଡ୍‍। 12 ମେଣ୍ଡେ ନିଜେ କେ ତାମ୍‍ ବାବାନ୍‍ କୁଟ୍‍ମାମ୍‍ ନୁ ରିବିକାନ୍‍ ମାର୍‍, ଇଦ୍‍ ପରିଚୟ୍‍ ଇତ୍‌ତଣ୍ଡ୍‍; ଆସୁଟ୍‍ ରାହେଲ୍‌ ମିରିଆଞ୍ଜ୍‍ ତାମ୍‍ ବାବାଙ୍କ୍‍ କାବୁର୍‍ ଇତ୍‍ତେ। 13 ଆସୁଟ୍‍ ଲାବାନ୍‌ ତାମ୍‍ ବାଡ଼୍‍ଞ୍ଜାଲ୍‍ ଯାକୁବ୍‍ତେ କାବୁର୍‍ କେଞ୍ଜି ଅନ୍‍ ତଡ଼୍‍ କାଇଲାଙ୍କ୍‍ ମିର୍‍ତଣ୍ଡ୍‍, ମେଣ୍ଡେ ଅଂକିଙ୍କ୍‍ ଉର୍‍ଙ୍ଗ୍‍ତଣ୍ଡ୍‍ ନୁ ଚୁମା ଇସ୍‍ ତାମ୍‍ ଲୋନ୍‍ ଅତ୍‍ତଣ୍ଡ୍‍; ଆସୁଟ୍‍ ଆ ସାରେ ବିଷୟ୍‍ ଲାବନ୍‍ତିଙ୍କ୍‍ ପୁଞ୍ଜ୍‌ପ୍‌ତଣ୍ଡ୍‍। 14 ଆସୁଟ୍‍ ଲାବାନ୍‌ କେତ୍‍ତଣ୍ଡ୍‍, ନିମେ ନିତାଲ୍‌ ମା ନେତୁର୍‌ ନୁ ଆୱୁଙ୍ଗିନ୍‌ ଲେକାମ୍‌। ଆସୁଟ୍‍ ଯାକୁବ୍‍ ଅନ୍‍ ଲୋନ୍‍ ଅଣ୍ଡୟ୍‍ ନେଲ୍‍ଞ୍ଜ୍‍ ମାତ୍‍ତଣ୍ଡ୍‍।

15 ଲାବାନ୍‌ ଯାକୁବ୍‍ତିଙ୍କ୍‍ କେତ୍‍ତଣ୍ଡ୍‍, ନିମେ ନା କୁଟ୍‍ମାମ୍‍ ଇଞ୍ଜ କି ଦରମା ଅୟକଟ୍‌ ଆସାମ୍‍ତେ ନାୟାଦ୍‍ ଦାସ୍‍ ପାଡ଼ିୟ୍‌ ମାଡ଼ିତି ? ଆଦିଙ୍କ୍‌ ବେନ ଦରମା ଅଦ୍‍ତିନ୍‍ ? ଆଦ୍‍ କେଲ୍‍ମ୍‍। 16 ଆ ଲାବାନ୍‌ତେ ରେଣ୍ଡ୍‍ ପିକି ମାତ୍‍ତା; ବେଡ଼୍‍ୟାଦିନ୍‍ ପେଦେର୍‍ ଲେୟା, ସୁଦୁରାଦିନ୍‍ ପେଦେର୍‍ ରାହେଲ୍‌ । 17 ଲେୟା ଇସୁର୍ତିଙ୍କ୍‌ ଉଡ଼ାନାଦ୍‌ ମାତ୍‌ତେ, ଇତ୍କେ ରାହେଲ୍‌ ସୁନ୍ଦର୍‍ ନୁ ରୂପବତିଲ୍‍ ମାତ୍‍ତେ।

18 ମେଣ୍ଡେ ଯାକୁବ୍‍ ରାହେଲ୍‍ତିଙ୍କ୍‍ ପ୍ରେମ ମାଡ଼୍‍ତଣ୍ଡ୍‍; ଆଦିନ୍‌ ମାଇଦିଙ୍କ୍‍ ଅଣ୍ଡ୍‍ ଉତ୍ତର୍‍ ଇତ୍‍ତଣ୍ଡ୍‍, ନି ଯଦି ସୁଦୁରାଦ୍‍ ମାୟାଡ଼୍‍ ରାହେଲ୍‌ତେ ସେଙ୍ଗେ ନାକିଙ୍କ୍‌ ପେଣ୍ଡୁଲ୍‌ ମାଡ଼ିତିନ୍‌ ଆଲେକେ ସାତ ବର୍ଷ ନି ଦାସ ପାଡ଼ିୟ୍‌ ମାଡ଼ିତାନ୍‍।

19 ଆସୁଟ୍‍ ଲାବାନ୍‌ କେତ୍‍ତଣ୍ଡ୍‍, ୱେର୍‍ ନାରୁଙ୍କ୍‍ ଇଦାନ୍‍ ବାଦୁଲ୍‌ତେ ନିକିଙ୍କ୍‍ ଇଦାନାଦ୍‍ ଗାଟି ସାୟେ; ନା ଗାରେ ମାନ୍‍। 20 ଇଦ୍‍ ରକମ୍‍ ଯାକୁବ୍‍ ରାହେଲ୍‌ତେ ସେଙ୍ଗେ ସାତ ବର୍ଷ ଦାସ ପାଡ଼ିୟ୍‌ ମାଡ଼୍‍ତଣ୍ଡ୍‍; ମେଣ୍ଡେ ରାହେଲ୍‌ତେ ସେଙ୍ଗେ ଅନାଦ୍‍ ଇଦ୍‍ରକମ୍‍ ପ୍ରେମ ମାତ୍‍ତେ, ଯେ ଆ ସାତ ବର୍ଷ ଅନ୍‍ ମାଇଦିଙ୍କ୍‍ ମାତର୍‌ ସୁଦୁର୍‍ ଦିନାମ୍‍ ଲାଗେମ୍‍ ଆଦ୍‌ତେ ।

21 ଆସୁଙ୍କ୍‌ ଯାକୁବ୍‍ ଲାବାନ୍‌ତିଙ୍କ୍‍ କେତ୍‍ତଣ୍ଡ୍‍, ନାୟାଦ୍‍ ନିୟମ୍‍ତେ କାଲାମ୍ ପୁରା ଆତ୍‌ତେ, ଇଞ୍ଜେ ନାକିଙ୍କ୍‌ ରାହେଲ୍‌ତିଙ୍କ୍‌ ଇମ୍‍, ନାନ୍‍ ତାନ୍‍ତଡ଼୍‍ ପେଣ୍ଡୁଲ୍‌ ମାଡ଼ିତାନ୍‌। 22 ଆସୁଟ୍‍ ଲାବାନ୍‌ ଆ ପଡ଼୍‍ୟେତ୍‍ ସାରେ ନାରୁଡ଼୍‍କ୍‍ ଅଣ୍ଡୟ୍‍ଆଗେ ଗୁଡ଼୍‍ପି ବଜି ମାଡ଼୍‍ତଣ୍ଡ୍‍। 23 ମୁଲ୍‍ପୁଟ୍ ସମୟ୍‍ତେ ଅଣ୍ଡ୍‍ ତାନ୍‍ ମାୟାଡ଼୍‍ ଲେୟାଙ୍କ୍‍ ପୟିସ୍‍ ଯାକୁବ୍‍ତେ ଗାରେ ତାତ୍‍ତଣ୍ଡ୍‍; ମେଣ୍ଡେ ଅଣ୍ଡ୍ ତାନ୍‍ ତଡ଼୍‍ ଉଞ୍ଜ୍‍ତଣ୍ଡ୍‍। 24 ମେଣ୍ଡେ ଲାବାନ୍‌ ତାନ୍‍ ମାୟାଡ଼୍‍ ଲେୟାନ୍‍ ଦାସି ଆଦାନ୍‌ ମାଇଦିଙ୍କ୍‍ ସିଲ୍ପା ପେଦେର୍‍ତେ ତାନ୍‍ ଦାସିଙ୍କ୍‍ ଇତ୍‍ତଣ୍ଡ୍‍। 25 ଇତ୍କେ ନାର୍କକ୍‍ ଆତ୍‌ତାଙ୍କ୍‌, ଉଡ଼ା, ଆଦ୍‍ ତ ଲେୟାଲ୍‍। ଆସୁଟ୍‍ ଯାକୁବ୍‍ ଲାବାନ୍‌ତିଙ୍କ୍‍ କେତ୍‍ତଣ୍ଡ୍‍, ନିମେ ନା ତଡ଼୍‍ ଇଲା ବାତେଙ୍କ୍‍ ବ୍ୟବହାର ମାଡ଼୍‍ତି ? ନାନ୍‍ ବାତେ ରାହେଲ୍‌ତେ ସେଙ୍ଗେ ନି ଦାସ୍‍ ପାଡ଼୍‍ୟି ମାଡ଼ନେ; ଆଲାଇତ୍କେ ବାତେଙ୍କ୍‌ ନାକିଙ୍କ୍‍ ବୁସା ମାଡ଼ିତି ?

26 ଆସୁଟ୍‍ ଲାବାନ୍‌ କେତ୍‍ତଣ୍ଡ୍‍, ବେଡ଼୍‍ୟାଦ୍‍ ମାନା ମାନା ସୁଦୁରାଦିଙ୍କ୍‍ ପେଣ୍ଡୁଲ୍‌ ଇଦାନାଦ୍‍ ପିନ୍ଦ ଇଦି ମାୟାଦ୍‌ ଦେଶତେ ନିୟମ୍‌ ଆୟ। 27 ଇଦ୍‌ ଆଟ୍‌ ପୁରା ମାଡ଼ା, ତାନ୍‍ ପେର୍କେ ବେସୁଙ୍କ୍‍ ମେଣ୍ଡେ ସାତ ବର୍ଷ ନା ଦାସ ପାଡ଼୍‍ୟି ମାଡ଼ିତିନ୍‍, ଆଲାଇତ୍କେ ମେଣ୍ଡନ୍‍ ପିକ୍‍ତିଙ୍କ୍‍ ଆନ୍ତେ ନିକିଙ୍କ୍‍ ଇଦ୍‍ତାନ୍‍। 28 ଆସୁଟ୍‍ ଯାକୁବ୍‍ ଆଦେ ଲେକାମ୍‍ ତାନାଦ୍‍ ଆଟ୍‌ ପୁରା ମାଡ଼୍‍ତଣ୍ଡ୍‍; ଆସୁଟ୍‍ ଲାବନ୍‍ ଅନ୍‍ ତଡ଼୍‍ ତାନ୍‍ ପିକ୍‍ତିଙ୍କ୍‍ ରାହେଲ୍‌ତିଙ୍କ୍‍ ପେଣ୍ଡୁଲ୍‍ ମାଡ଼ିତଣ୍ଡ୍‍। 29 ମେଣ୍ଡେ ରାହେଲ୍‌ତେ ଦାସିଲ୍‍ ଆଦାନ୍‌ ମାଇଦିଙ୍କ୍‍ ଅଣ୍ଡ୍‍ ତାନ୍‍ ବିଲ୍‍ହା ପେଦେର୍‍ତେ ଦାସିଙ୍କ୍‍ ଇତ୍‍ତଣ୍ଡ୍‍। 30 ଆସୁଟ୍‍ ଅଣ୍ଡ୍‍ ରାହେଲ୍‌ ତ ଆନ୍ତେ ଉଞ୍ଜ୍‍ତଣ୍ଡ୍‍ ନୁ ଲେୟାଙ୍କ୍‍ ଆନ୍‍ ରାହେଲ୍‍ତିଙ୍କ୍‍ ଗାଟି ପ୍ରେମ୍‍ ମାଡ଼୍‍ତଣ୍ଡ୍‍; ମେଣ୍ଡେ ଆସୁଟ୍‍ ସାତ ବର୍ଷ ଲାବନ୍‌ତେ ଦାସ ପାଡ଼୍‌ୟି ମାଡ଼୍‍ତଣ୍ଡ୍‍।

31 ସଦାପ୍ରବୁ ଲେୟାଙ୍କ୍‍ ଅପମାନ୍‍ ଉଡ଼ି ତାଂକିଙ୍କ୍‍ ଡଙ୍କେତ୍‍ ଆଦାନାଦ୍‌ ଶକ୍ତି ଇତ୍‍ତଣ୍ଡ୍‍; ମାତ୍ର ରାହେଲ୍‌ ୱାଞ୍ଜଲ୍‍ ଆତ୍‌ତେ । 32 ଆଦିନ୍‌ ମାଇଦିଙ୍କ୍‍ ଲେୟାଲ୍‍ ଡଙ୍କେତ୍‍ ଆସ୍‍ ମାର୍‍ ଜନ୍ମ ମାଡ଼୍‍ତାଙ୍କ୍‍, ଅନ୍‍ ପେଦେର୍‍ ରୁବେନ୍‌ତେ ଅର୍ଥ ମାରିଙ୍କ୍‌ ଉଡ଼ା ଇତ୍‍ତଡ଼୍‍; ବାତେଙ୍କ୍‍ଇତ୍କେ ଆଦ୍‍ କେତ୍‍ତେ, ସଦାପ୍ରବୁ ନା ଦୁକାମ୍‍ ଉଡ଼ିମିନ୍ଦେଣ୍ଡ୍‍; ଇଞ୍ଜେ ନା ମୁଦ୍‍ପାଲ୍‍ ନାକିଙ୍କ୍‍ ସାୟେ ପ୍ରେମ ମାଡ଼ିତଣ୍ଡ୍‍। 33 ଆସୁଟ୍‍, ଆଦ୍‍ ମେଣ୍ଡନ୍‍ ଦାମ୍‍ ଡଙ୍କେତ୍‍ ଆସ୍‍ ମାର୍‍ ଜନ୍ମ ମାଡ଼ି କେତ୍‍ତେ, ନାନ୍‍ ଅପମାନ୍‍ ଆଦ୍‌ତାନ୍‌, ଇଦ୍‍ ସଦାପ୍ରବୁ କେଞ୍ଜି ନାକିଙ୍କ୍‍ ଇ ମାର୍‍ ଇତ୍‍ତଣ୍ଡ୍‍; ଆଦିଙ୍କ୍‌ ଆଦ୍‍ ଅନ୍‍ ପେଦେର୍‍ ଶିମିୟନ୍‍ତେ (ଅର୍ଥ କେଞ୍ଜାନାଦ୍‌) ୱାଟ୍‍ତେ। 34 ମେଣ୍ଡନ୍‍ଦାମ୍‍ ଆଦ୍‍ ଡଙ୍କେତ୍‍ ଆସ୍‍ ମାର୍‍ ଜନ୍ମ ମାଡ଼ି କେତ୍‍ତେ, ଇଞ୍ଜେ ମୁଦ୍‍ପାଲ୍‍ ନା ତଡ଼୍‍ ମାନ୍ତ୍‍ତଣ୍ଡ୍, ବାତେଙ୍କ୍‍ଇତ୍କେ ନାନ୍‍ ଅନ୍‍ ମୁୱୁଡ଼୍‍ ମାର୍‍କିଙ୍କ୍‍ ଜନ୍ମ ମାଡ଼ିମିନ୍ଦେଣ୍ଡ; ଇତ୍କେ ଅନ୍‍ ପେଦେର୍‍ ଲେବିତେ (ଇତ୍କେ ତଃସ୍‌ଆସ୍‌ ମାନ୍ଦାନାଦ୍‌) ଇତ୍‍ତେ। 35 ମେଣ୍ଡନ୍‍ଦାମ୍‍ ଆଦ୍‍ ଡଙ୍କେତ୍‍ ଆତ୍‌ତାଙ୍କ୍‌ ଆଦ୍‍ ମାର୍‍ ଜନ୍ମ ମାଡ଼ି କେତ୍‍ତେ, ଇଞ୍ଜେ ନାନ୍‍ ସଦାପ୍ରବୁଙ୍କ୍ ଆରାଦନା ମାଡ଼ିତାନ୍‍; ଆଦିଙ୍କ୍‌ ଆଦ୍‍ ଅନ୍‍ ପେଦେର୍‍ ଯିହୁଦା ୱାଟ୍‌ତେ, (ଅର୍ଥ ପ୍ରଶଂସା ଇତ୍‍ତେ)। ତାନ୍‍ ପେର୍କେ ଆଦିନାଦ୍‌ ଡଙ୍କେତ୍‍ ଆଦାନାଦ୍‌ ବନ୍ଦ୍‍ ଆତ୍‌ତେ ।