1 ତାନ୍‍ ପେର୍କେ ଯାକୁବ୍‍ ଆତ୍‌ତାଙ୍କ୍‌, ପରମେଶ୍ୱର୍‍ତେ ଦୂତ୍‍କ୍‍ ଅନ୍‍ ତଡ଼୍‍ କାୟ୍‍ଲ୍‍ତା। 2 ଆସୁଟ୍‍ ଯାକୁବ୍‍ ଅଡ଼୍‍କିଙ୍କ୍‍ ଉଡ଼ି କେତ୍‍ତଣ୍ଡ୍‍, ଇଡ଼୍‍ ପରମେଶ୍ୱର୍‍ତେ ମାନ୍ଦା; ଆଦିଙ୍କ୍‌ ଆ ପଡ଼୍‍ୟେତ୍‍ ପେଦେର୍‍ ମହନୟିମ୍‌ତେ ଅର୍ଥ ରେଣ୍ଡ୍‍ ମାନ୍ଦେ ୱାଟ୍‍ତଣ୍ଡ୍‍।

3 ତାନ୍‍ ପେର୍କେ ଯାକୁବ୍‍ ଅନ୍‍ ମୁନେ ସେୟିର୍‍ ଦେଶ୍‍ତେ ଇଦୋମ୍‍ ଅଞ୍ଚଳତାଗ୍‍ ଦାଦାଲ୍‍ ଏଷୌନ୍‌ ଗାରେ କାବୁର୍‌ ରହ୍‍ତଣ୍ଡ୍‍। 4 ମେଣ୍ଡେ ଅଣ୍ଡ୍‍ ଅଡ଼୍‍କିଙ୍କ୍‍ ଇ ଆଦେଶ୍‌ ଇତ୍‍ତଣ୍ଡ୍‍, ମିଡ଼୍‍ ମା ପ୍ରବୁ ଏଷୌଙ୍କ୍‍ କେତିତିଡ଼୍‍, ନି ଦାସ ଯାକୁବ ନିକିଙ୍କ୍‍ କେଞ୍ଜ୍‍ପ୍‍ତଣ୍ଡ୍‍, ନାନ୍‍ ଲାବାନ୍‌ତେ ଗାରେ ମାଞ୍ଜ ମାତ୍‍ତାନ୍‍, ନେଣ୍ଡ୍‍ ଆୟ୍‍ନା ନାୟାଦ୍‍ ଲେଟ୍‍ ଆତ୍‌ତେ । 5 ନା ଗଡ୍‍କ୍‍, ଗଦ, ମେଣ୍ଡ୍‍ମାନ୍ଦ୍‍ ନୁ ଦାସଦାସିଡ଼୍‍ ମିନ୍ଦେଡ଼୍‍, ମେଣ୍ଡେ ନାନ୍‍ ନା ପ୍ରବୁ ବା ମାଲିକ୍‌ତେ ମୁନେ ଅନୁଗ୍ରହ ପାହେମ୍‍ ଆଦାନ୍‌ ମାଇଦିଙ୍କ୍‍ ନି ଗାରେ କବର୍‍ ରହ୍‍ତାନ୍‍।

6 ତାନ୍‌ ପେର୍କେ ଦୂତଡ଼୍‍ ମାଲ୍‍ସ୍‍ ୱାସ୍‍ ଯାକୁବ୍‍ତିଙ୍କ୍‍ କେତ୍‍ତଡ଼୍‍, ମାମେ ନି ଦାଦାନ୍‍ ଏଷୌନ୍‍ ଗାରେ ଆଞ୍ଜ୍‌ ମାତ୍‍ତମ୍‍, ଅଣ୍ଡ୍‍ ଚାରିଶହ ନାରୁଡ଼୍‍କ୍‍ ତଡ଼୍‍ ପୟ୍‍ସ୍‍ ନିକ୍‍ ଉଡ଼ାଙ୍କ୍‍ ୱାଦୁତଣ୍ଡ୍‍। 7 ଆସୁଟ୍‍ ଯାକୁବ ଗାଟି ୱେର୍‌ତଣ୍ଡ୍‍ ନୁ ଦାଦ୍‌ରେଲ୍‌ତଣ୍ଡ୍‌ , ମେଣ୍ଡେ ତଡ଼୍‍ ମାନ୍ଦାନ୍‍ ନାରୁଡ଼୍‍ ନୁ ମେଣ୍ଢା ଗଡ୍‌କିଙ୍କ୍‍ ସାରେ ମାନ୍ଦା ନୁ ଉଟ୍‌କିଙ୍କ୍‍ ୱେରେ ୱେରେ ରେଣ୍ଡ୍‍ ମାନ୍ଦେ ମାଡ଼ି କେତ୍‍ତଣ୍ଡ୍, 8 ଏଷୌ ୱାସ୍‍ ଯଦି ଅଣ୍ଡୟ୍‍ ମାନ୍ଦେତିଙ୍କ୍‍ ରେହ୍‍ତିତଣ୍ଡ୍‍, ଇତ୍କେବା ୱେର୍‍ ମାନ୍ଦେ ଗେଲ୍‍ସି ମିରିତଡ଼୍‍;

9 ଆସୁଟ୍‍ ଯାକୁବ୍‍ କେତ୍‍ତଣ୍ଡ୍‍, ହୋ ନା ବାବା ଅବ୍ରାହାମ୍‌ତେ ପରମେଶ୍ୱର୍‍, ହୋ ନା ବାବା ଇସ୍‍ହାକ୍‍ତେ ପରମେଶ୍ୱର୍‍, ହୋ ସଦାପ୍ରବୁ, ନିମେ ବାକିଙ୍କ୍‌ କେସ୍‌ମତ୍‌ତିନ୍‌, ନିମେ ନି ଦେଶ୍‍ ନୁ ନାରୁଡ଼୍‍ ଗାରେ ମାଲ୍‍ସ୍‍ ଆନ୍‍, ଆସୁଟ୍‍ ମାମେ ନିକ୍‍ ମଙ୍ଗଲ ମାଡ଼ିତମ୍‍। 10 ନିମେ ଇ ଦାଦାନ୍‍ ପର ବେନ୍‍ ସାରେ ଦୟା ନୁ ବେନ୍‍ ସାରେ ବିଶ୍ୱାସ୍ ତୟ୍‌ସ୍‌ ମିନ୍ଦେନି, ନାନ୍‍ ଆଗେତ୍‌ ସୁଦୁର୍‌ ବା ପାହେମ୍‍ ଆଦାନ୍‌ ଯୋଗ୍ୟ ଆୟନ୍‍; ନିଜାମ୍‌ତେ ନାନ୍‍ ନିଜର୍‍ ଟେଙ୍ଗ୍‍ ପୟ୍‍ସ୍‍ ଇ ଯର୍ଦ୍ଦନ ୱେୟିସ୍‍ ମାତ୍‍ତାନ୍‍, ଇତ୍କେ ନାନ୍‍ ରେଣ୍ଡ୍‍ ମାନ୍ଦେ ଆସ୍‍ ମିନ୍ଦେନ୍‍। 11 ଅନୁରଦ୍‌ ମାଡ଼ୁତାନ୍‍, ନା ଦାଦାନ୍‍ କାଇଦେକଞ୍ଚ୍‍, ଏଷୌନ୍‍ କାୟ୍‍ଦେକଞ୍ଚ୍ ନାକିଙ୍କ୍‍ ଗେଲ୍‍ସ୍ପା; ବାତେଙ୍କ୍‍ଇତ୍କେ ନାନ୍‍ ଅଂକିଙ୍କ୍‍ ୱେର୍‍ସ ମିନ୍ଦେନ୍‍, ଉମ୍ଭକି ଅଣ୍ଡ୍‍ ୱାସ୍‍ ନାକିଙ୍କ୍‍ ନୁ ୟାୟାଙ୍କ୍‍ ନୁ ପିଲାକିଙ୍କ୍‍ ଆୱ୍‍କିତଣ୍ଡ୍‍। 12 ନିମେ ତ କେସ୍‍ମିନ୍ଦେନି, ମାମେ ନିଜାମ୍‍ ନିକ୍‍ ମଙ୍ଗଲ ମାଡ଼ିତମ୍‍, ମେଣ୍ଡେ ସମୁଦ୍ରତାଗ୍‍ ମାନ୍ଦାନ୍‍ ବେନ୍‍ ଉସ୍କ ଉସ୍‍କତ୍‍ ଲେକାମ୍‌ ଲେକାନଙ୍କ୍ ଆୟ, ଆଦିନ୍‌ ଲେକାମ୍‍ ନିୟାଦ୍‍ ପିଲୁଡ଼୍‍ ନାର୍ଗେ ମାଡ଼ିତମ୍‍।

13 ମେଣ୍ଡେ ଯାକୁବ୍‍ ଆ ପଡ଼୍‍ୟ୍‍ତାଗ୍‍ ନାର୍କା ମାତ୍‍ତଣ୍ଡ୍‍; ମେଣ୍ଡେ ଅନ୍‍ ଗାରେ ବାତା ମାତ୍‍ତା, ଆଗାକଞ୍ଚ୍ ତାମ୍‍ ଦାଦାନ୍‍ ଏଷୌନ୍‍ ସେଙ୍ଗେ ଇଦାନଙ୍କ୍‍ ତିଆର୍‍ ମାଡ଼୍‍ତଣ୍ଡ୍‍; 14 ଇତ୍କେ, ଦୁଇଶହ ମେକା ପେଟି ନୁ କୋଡ଼ିଏଟାନ୍‍ ମେକା ବକ୍‍ଡ଼ା, ଦୁଇଶହ ମେଣ୍ଢା ପେଟି ନୁ କୋଡ଼ିଏଟାନ୍‍ ମେଣ୍ଢା ବକ୍‍ଡ଼ା,

15 ମେଣ୍ଡେ ଗଡ୍‌କ୍‌ ପାଲ୍‌ ଉନ୍ଦାନାୱ୍‌ ନୁ ଇଦାନାୱ୍‌ ତିରିଶ୍‍ଟାନ୍‍ ଉଟ୍‌କ୍‍ ନୁ ଚାଲିଶଟାନ୍‍ ଗଡ୍‌କ୍‌ ନୁ ଦଶଟାନ୍‍ କନ୍ଦା, ମେଣ୍ଡେ କୋଡ଼ିଏଟାନ୍‍ ଗଦ ନୁ ଦଶ୍‍ଟାନ୍‍ ପେୟା ତିଆର୍‍ ମାଡ଼୍‍ତଣ୍ଡ୍‍। 16 ତାନ୍‌ପେର୍‌କେ ମାନ୍ଦେ ସାରେ ୱେର୍‍ ୱେର୍‍ ମାଡ଼ି ତାନ୍‍ ଦାସଡ଼୍‍ କାୟ୍‍ଦେ ଅଣ୍ଡୟ୍‍ ମାନ୍ଦେ ପସ୍ପିସ୍‍ ଅଡ଼୍‍କିଙ୍କ୍‍ ଆଦେଶ୍‌ ଇତ୍‍ତଣ୍ଡ୍‍, ମିଡ଼୍‍ ନା ମୁନ୍‍ ମୁନ୍‍ ଆନୁଟ୍‍, ମେଣ୍ଡେ ନାଡ଼୍‍ମେ ନାଡ଼୍‍ମେ ପଡ଼୍‍ୟ୍‍ ନେହ୍‍ସ୍‍ ସାରେ ମାନ୍ଦେତିଙ୍କ୍‍ ୱେର୍‍ ମାଡ଼ାଟ୍‍। 17 ମେଣ୍ଡେ ଅଣ୍ଡ୍‍ ଆ ନାର୍ଦେ ପେଦାଙ୍କ୍‍ ଇ ଆଦେଶ୍‌ ଇତ୍‍ତଣ୍ଡ୍‍, ନା ଦାଦାଲ୍‍ ଏଷୌନ୍‍ ତ କାଇଲ୍‌କେ, ଅଣ୍ଡ୍‍ ବେସୁଙ୍କ୍‍ ପାଚାରା ମାଡ଼ିତଣ୍ଡ୍‍, ନିମେ ବେନନ୍‍ ଦାସ୍‍ ? ବେକ୍‍ ଆଦୁତିନ୍‌ ? ମେଣ୍ଡେ ନି ମୁନ୍‍ ଆଦାନ୍‌ ଇ ସାରେ ବେନନାୱ୍‍ ? 18 ବେସୁଙ୍କ୍‍ ନିମେ ଉତ୍ତର୍‍ ଇଦ୍‍ତିନ୍‍, ଇଞ୍ଜ୍‍ ସାରେ ନି ଦାସ ଯାକୁବ୍‍ତାୱ୍‍, ଇୱ୍‍ ସାରେ ଅଦାନାୱ୍‍ ମା ପ୍ରବୁ ବା ମାଲିକ୍‌ ଏଷୌନ୍‍ ମାଇଦିଙ୍କ୍‍ ରହ୍‍ତଣ୍ଡ୍‍; ଉଡ଼ା, ଅଣ୍ଡ୍‍ ଆନ୍ତେ ପେର୍କେ ପେର୍କେ ୱାଦୁତଣ୍ଡ୍‍। 19 ଇଦ୍‍ ପ୍ରକାର୍‍ ଅଣ୍ଡ୍‍ ଦ୍ୱିତୀୟ ନୁ ତୃତିୟ ମାନ୍ଦେତ୍‍ ପେର୍କେ ମାନ୍ଦାନ୍‍ ସାରେ ଦାସଡ଼୍‍କ୍‍ ଆଦେଶ୍‌ ଇସ୍‍ କେତ୍‍ତଣ୍ଡ୍‍, ଏଷୌନ୍‍ ତଡ଼୍‍ କାୟ୍‍ଲ୍‍କେ, ମିଡ଼୍‍ ଇଦ୍‍ ରକମ୍‍ ଗଟି କେତିତିଡ଼୍‍। 20 ମେଣ୍ଡେ କେତିତିଡ଼୍‍, ଉଡ଼ା, ନି ଦାସ ଯାକୁବ୍‍ ମା ପେର୍କେ ୱାଦୁତଣ୍ଡ୍‍; ଇତ୍କେ ଅଣ୍ଡ୍‍ ହେର୍‍କ୍‍ ମାଡ଼୍‍ତଣ୍ଡ୍‍, ମୁନେଙ୍କ୍‍ ଇଦାନାୱ୍‍ ରୟ୍‍ସିମ୍ ଅଂକିଙ୍କ୍‍ ଶାନ୍ତି ମାଡ଼ି ପେର୍କେ ଅନ୍‍ ତଡ଼୍‍ କାୟ୍‍ଲିକା, ଆସୁଟ୍‍ ଅଣ୍ଡ୍‍ ମାନ୍‍ ପର କ୍ଷମା ମାଡ଼୍‍କେ ମାଡ଼୍‍ ପାର୍‍ଦ୍‍ତଣ୍ଡ୍‍। 21 ଇଦ୍‍ ରକମ୍‍ ଅନ୍‍ ମୁନେ କାୟ୍‍ଲି ଜିନିଷ୍ ଆତ୍‌ତା; ଇତ୍କେ ଅଣ୍ଡ୍‍ ନିଜେ ଆଦ୍‍ ନାର୍କା ନିଜର୍‍ ମାନ୍ଦେ ଲୋପେ ମାତ୍‍ତଣ୍ଡ୍‍।

22 ତାନ୍‌ପେର୍‌କେ ଅଣ୍ଡ୍ ଆ ନାର୍କା ତେଦି ତାନ୍‍ ରେଣ୍ଡ୍‍ ମୁତେକିଙ୍କ୍‍ ନୁ ରେଣ୍ଡ୍‍ ଦାସି ନୁ ଏଗାର୍‍ଟାନ୍‍ ପିଲାଙ୍କ୍‍ ଯବ୍ଦୋକ୍‌ ଗାଟିତାଗ୍‍ ୱେୟ୍‍ସ୍ପାନ୍‍ ସେଙ୍ଗେ ତଡ଼୍‌ ଆତ୍‌ତଣ୍ଡ୍‌ । 23 ମେଣ୍ଡେ ଆୱିଙ୍କ୍‍ ଇଲ୍‌କେ ୱେୟ୍‍ସ୍ପି ତାନ୍‍ ସାରେ ଜିନିଷ୍‍ ମେଣ୍ଡନ୍‍ ପାକା ରୟ୍‍ସିତ୍‍ତଣ୍ଡ୍‍। 24 ଆସୁଟ୍‍ ଯାକୁବ୍‍ ଆଗେ ୱେରଣ୍ଡ୍‌ ମାତ୍‍ତଣ୍ଡ୍‍; ଆସୁଟ୍‍ ୱେରଣ୍ଡ୍‍ ନାରୁଣ୍ଡ୍‍ ନାର୍କକ୍‍ ଜାକ ଅନ୍‍ତଡ଼୍‍ ଯୁଦ୍ଦ ମାଡ଼୍‍ତଣ୍ଡ୍‍। 25 ଇତ୍କେ ଅଂକିଙ୍କ୍‍ ଜିଡ଼ାଙ୍କ୍‍ ପାର୍‍ୱଣ୍ଡ୍‍ ଉଡ଼ି ଅଣ୍ଡ୍‍ ଯାକୁବନ୍‍ ଉଋଦେଶ୍‌ତେ ପଡ଼୍‍ୟ୍‍ତାଗ୍‍ ରେଃତ୍‌ତଣ୍ଡ୍‌; ଅନ୍‍ତଡ଼୍‍ ଇଦ୍‍ ପ୍ରକାର୍‍ ଯୁଦ୍ଦ ମାଡ଼୍‍ତାଙ୍କ୍‍ ଯାକୁବନ୍‍ ଉଦାମ୍‌ ବୁଲେତାଗ୍‌ ରେହ୍‌ତଣ୍ଡ କସେମ୍‍ ଆତ୍‌ତେ । 26 ଅନନ୍ତର୍‍ ଆ ନାରୁଣ୍ଡ୍‍ କେତ୍‍ତଣ୍ଡ୍‍, ନାକିଙ୍କ୍‍ ୱିଡ଼୍‍ସା, ବାତେଙ୍କ୍‍ ଇତ୍କେ ନାର୍କକ୍‍ ଆତ୍‌ତା । ଆସୁଟ୍‍ ଯାକୁବ୍‍ କେତ୍‍ତଣ୍ଡ୍‍, ନିମେ ନାକିଙ୍କ୍‍ ଆଶିର୍ବାଦ୍‌ ମାଡ଼କଟ ମାତ୍‍ତ୍କେ, ନାନ୍‍ ନିକିଙ୍କ୍‍ ୱିଡ଼୍‍ସନ୍‍।

27 ମେଣ୍ଡନ୍‍ ଦାମ୍‍ ଆ ନାରୁଣ୍ଡ୍‍ କେତ୍‍ତଣ୍ଡ୍‍, ନି ପେଦେର୍‍ ବାଆତେ ? ଅଣ୍ଡ୍‍ କେତ୍‍ତଣ୍ଡ୍‍ ଯାକୁବ।

28 ଅଣ୍ଡ୍‍ କେତ୍‍ତଣ୍ଡ୍‍, ନିମେ ଯାକୁବ ପେଦେର୍‍ତେ ମେଣ୍ଡେ ଏକାମ୍ ଆୟ୍‍ୱିନ୍‍, ବାତେଙ୍କ୍‍ ଇତ୍କେ ନିମେ ଇସ୍ରାଏଲ୍‌ ପେଦେର୍‌ତେ ଏକାମ୍ ଆଦ୍‌ତି ପରମେଶ୍ୱର୍‍ ନୁ ନାରୁନ୍‍ ତଡ଼୍‍ ଯୁଦ୍ଦ୍‍ ମାଡ଼ି ଜିଡ଼ି ମିନ୍ଦେନି।

29 ଆସୁଟ୍‍ ଯାକୁବ୍‍ ପାଚାରାମାଡ଼ି କେତ୍‍ତଣ୍ଡ୍‍, ନାନ୍‍ ଅନୁରଦ୍‍ ମାଡ଼ୁତାନ୍‍, ନି ପେଦେର୍‍ କେଲମ୍‍। ଅଣ୍ଡ୍‍ କେତ୍‍ତଣ୍ଡ୍‍, ନିମେ ବେନନି ମାୟାଦ୍‍ ପେଦେର୍‍ତିଙ୍କ୍‍ ପାଚାରା ମାଡ଼ୁତିନ୍‍ ? ଆସୁଟ୍‍ ଅଣ୍ଡ୍ ଆଗେ ଯାକୁବଙ୍କ୍‍ ଆଶିର୍ବାଦ୍‌ ମାଡ଼୍‍ତଣ୍ଡ୍‍।

30 ଆସୁଟ୍‍ ଆ ପଡ଼୍‍ୟେତ୍‍ ପେଦେର୍‍ ପେନିୟେଲ୍‌ ଅର୍ଥ ସାମ୍‌ନା ସାମ୍‌ନି ପରମେଶ୍ୱର୍‍ତେ ମକମ୍‍ ନେହ୍‍ତଣ୍ଡ୍‍; ବାତେଙ୍କ୍‍ ଇତ୍କେ ଅଣ୍ଡ୍‍ କେତ୍‍ତଣ୍ଡ୍‍; ନାନ୍‍ ପରମେଶ୍ୱର୍‍ତେ ସାମ୍‍ନା ସାମ୍‍ନି ଉଡ଼୍‍ତାନ୍‍ ମାତି ନାୟାଦ୍‍ ଜିଉନ୍‍ ଗେଲ୍‍ସ୍‍ତା। 31 ତାନ୍‌ପେର୍‌କେ ଅଣ୍ଡ୍‍ ପେନୂୟେଲ୍‍ ୱେୟ୍‍ତାଙ୍କ୍‍, ପଡ଼୍‍ଦ୍‍ ପେୟ୍‍ତା; ବାତେଙ୍କ୍‍ ଇତ୍କେ ଅଣ୍ଡ୍‍ ଉଦାମ୍‌ତେ ସେଙ୍ଗେ କୁଟ କୁଟ ତାକ୍‍ତଣ୍ଡ୍‍। 32 ଇତ୍କେ ଇସ୍ରାଏଲ୍‌ତେ ପିଲା ବେସୁଙ୍କ୍‍ ବା ବାତା ଉର୍‍ଦେଶ୍‍ତେ ପରତାୱ୍‍ ସନ୍ଦିଶିରା ତିନ୍‍ନଡ଼୍‍, ବାତେଙ୍କ୍‍ ଇତ୍କେ ଅଣ୍ଡ୍‍ ଯାକୁବନ୍‍ ଉର୍‍ଦେଶ୍‍ତେ ସନ୍ଦିଶିରା ଇଟିମାତ୍‍ତଡ଼୍‍।