1 ଆ ସମୟ୍‌ତେ ଯାକୁବ ତାମ୍‌ ବାବାନ୍‌ ମାଞ୍ଜମାନ୍ଦାନ୍‌ ପଡ଼୍‌ୟେ କିଣାନ୍‌ ଦେଶ୍‌ତାଗ୍‌ ମାଞ୍ଜ ମାତ୍‌ତଣ୍ଡ୍‌। 2 ଇଦ୍‌ ଆଦୁତ୍‌ ଯାକୁବତେ ପରିବାର୍‌ ବିଷୟ୍। ଯୋଷେପ୍‌, ସତର ବର୍ଷ ବୟସ୍‌ ସମୟ୍‌ତେ, ତାମ୍‌ ଦାଦାଲଡ଼୍‌ ତଡ଼୍‌ ପଶୁ ମାନ୍ଦେ ମେୟ୍‌ସ ମାତ୍‌ତଣ୍ଡ୍‌; ଅଣ୍ଡ୍‌ ତାମ୍‌ ବାବାନ୍‌ ଆୱାତ୍‌ ମୁତେ ବିଲ୍‍ହା ନୁ ସିଲ୍ପାନ୍‌ ମାର୍କ୍ ମାତ୍‌ତଣ୍ଡ୍‌; ମେଣ୍ଡେ ଯୋଷେପ୍‌ ଆ ଦାଦାଲଡ଼୍‌ କାରାପ୍‌ ବ୍ୟବହାର୍‌ତେ ଗଟି ବାବାନ୍‌ ଗାରେ ତାସ ମାତ୍‌ତଣ୍ଡ୍‌। 3 ଆ ଯୋଷେପ୍‌ ଇସ୍ରାଏଲ୍‌ ମୁୟ୍‌ତେ ସମୟତେ ପିଲ୍‌ ଆତ୍‌ତାଙ୍କ୍‌ ଯାକୁବ୍‌ତେ ସାରେତଡ଼୍‌ ମାରିନାଗାଙ୍କ୍‌ ଅଂକିଙ୍କ୍‌ ଗାଟି ପ୍ରେମ ମାଡ଼୍‌ତଣ୍ଡ୍‌, ମେଣ୍ଡେ ଅଂକିଙ୍କ୍‌ ରକମ୍‌ରକମ୍‌ କଲର୍‌ତେ ଅଣ୍ଡୟ୍‌ ସକା ତିଆର୍‌ ମାଡ଼ି ଇସ୍‌ମାତ୍‌ତଣ୍ଡ୍‌। 4 ମାତ୍ର ବାବାଲ୍‌ ସାରେ ମାର୍‌କିନ୍‌ ଅପେକ୍ଷା ଯୋଷେପ୍‌ତିଙ୍କ୍‌ ଗାଟି ସ୍ନେହ ମାଡ଼ାନାଦ୍‌ ଉଡ଼ି ତାମ୍‌ ଦାଦାଲଡ଼୍‌ ଅଂକିଙ୍କ୍‌ ଗୃଣା ମାଡ଼୍‌ତଡ଼୍‌ ନୁ ଅନ୍‌ ପର ପ୍ରେମତେ ଗଟି କେତ୍‌ତେ ପାର୍‌ୱଡ଼୍‌ ଆତ୍‌ତଡ଼୍‌।

5 ଆସୁଙ୍କ୍‌ ଯୋଷେପ୍‌ ଅଣ୍ଡୟ୍‌ ନାର୍କା ସାପ୍ନା ଉଡ଼୍‌ତଣ୍ଡ୍‌ ନୁ ଆଦ୍‌ ତାମ୍‌ ଦାଦାଲଡ଼୍‌କ୍‌ କେତ୍‌ତଣ୍ଡ୍‌; ଆସୁଙ୍କ୍‌ ଅଡ଼୍‌ ଅଂକିଙ୍କ୍‌ ମେଣ୍ଡେ ଗାଟି ଗୃଣା ମାଡ଼୍‌ତଡ଼୍‌। 6 ଯୋଷେପ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ନାନ୍‌ ବେନ୍‌ ସାପ୍ନା ଉଡ଼୍‌ତାନ୍‌, ଅନୁରୋଦ୍‌ ମାଡ଼ୁତାନ୍‌, ଆଦ୍‌ କେଞ୍ଜାଟ୍‌। 7 ଉଡ଼ାଟ୍‌, ମାମେ ୱାୟାନାଗ୍‌ କାଟା ତଃସ୍‌ ମାତ୍‌ତାଡ଼୍‌, ଆସୁଟ୍‌ ଉଡ଼ାଟ୍‌, ନାୟାଦ୍‌ କାଟା ତେଦି ନିତ୍‌ତେ; ମେଣ୍ଡେ ଉଡ଼ାଟ୍‌, ମିୟାୱ୍‌ କାଟା ସାରେ ନା କାଟ୍‌ତିଙ୍କ୍‌ ସାରେପାକା ଉଡି ମଡ଼୍‌କ୍‌ତା।

8 ତାନ୍‌ପେର୍କେ ତାମ୍‌ ଦାଦାଲଡ଼୍‌ ଅଂକିଙ୍କ୍‌ କେତ୍‌ତଡ଼୍‌, ନିମେ ବାତେ ନିଜାମ୍‌ ମା ରାଜାନି ଆଦ୍‌ତିନ୍‌ ? ନିମେ କି ନିଜାମ୍‌ ମା ପର ଶାସନ ମାଡ଼ିତି ? ତାନ୍‌ ପେର୍କେ ଅଡ଼୍‌ ତାନ୍‌ ସାରେ ସାପ୍ନା ନୁ ଗଟିନ୍‌ ସେଙ୍ଗେ ଅଂକିଙ୍କ୍‌ ମେଣ୍ଡେ ଗାଟି ଗୃଣା ମାଡ଼୍‌ତଡ଼୍‌।

9 ତାନ୍‌ପେର୍କେ ଯୋଷେପ୍‌ ମେଣ୍ଡନ୍‌ ସାପ୍ନା ଉଡ଼ି ଦାଦାଲଡ଼୍‌କ୍‌ କେଞ୍ଜାନଙ୍କ୍‌ କେତ୍‌ତଣ୍ଡ୍‌, ଉଡ଼ାଟ୍‌, ନାନ୍‌ ମେଣ୍ଡ୍‌ ଅଣ୍ଡୟ୍‌ ସାପ୍ନା ଉଡ଼ି ମିନ୍ଦେନ୍‌, ଉଡ଼ାଟ୍‌, ପଡ଼୍‌ଦ୍‌ ନୁ ନେଲ୍‌ଞ୍ଜ୍‌ ନୁ ଏଗାର୍‌ଟାନ୍‌ ଉକାକ୍‌ ନାକିଙ୍କ୍‌ ମଡ଼୍‌କ୍‌ତା।

10 ମାତ୍ର ଅଣ୍ଡ୍‌ ତାମ୍‌ ବାବାଲ୍‌ ନୁ ଦାଦାଲଡ଼୍‌ ମୁନେ ଆଦ୍‌ କେତ୍‌ତାଙ୍କ୍‌, ତାମ୍‌ ବାବାଲ୍‌ ଅଂକିଙ୍କ୍‌ ଦମ୍‌କା ମାଡ଼ି କେତ୍‌ତଣ୍ଡ୍‌, "ନିମେ ଇ ବେସତ୍‌ ଲେକେତ୍‌ ସାପ୍ନା ଉଡ଼୍‌ତି ? ନାନ୍‌ ନୁ ନି ୟାୟ୍ ନୁ ନି ଦାଦାଲଡ଼୍‌, ମାମେ ବାତେ ବୁମ୍‌ଦାଗ୍‌ ଆଡ଼୍‌କି ଆସ୍‌ ନିକିଙ୍କ୍‌ ମଡ଼୍‌କାନଙ୍କ୍‌ ୱାଦ୍‌ତମ୍‌ ?" 11 ଆସୁଟ୍‌ ତାମ୍‌ ଦାଦାଲଡ଼୍‌ ଅଂକିଙ୍କ୍‌ କପାମ୍‌ ଆତ୍‌ତଡ଼୍‌, ମାତ୍ର ତାମ୍‌ ବାବାଲ୍‌ ଆ ଗଟି ମାନ୍‌ତାଗ୍‌ ହେର୍‌କ୍‌ ନେହ୍‌ତଣ୍ଡ୍‌।

12 ତାନ୍‌ପେର୍କେ ତାମ୍‌ ଦାଦାଲଡ଼୍‌ ବାବାନ୍‌ ପଶୁ ମାନ୍ଦ୍‌ତିଙ୍କ୍‌ ମେୟ୍‌ତାନ୍‌ ମାଇଦିଙ୍କ୍‌ ଶିକିମ୍‌ତା ଆତ୍‌ତେ ୱେଲେ 13 ଇସ୍ରାଏଲ ଯୋଷେପ୍‌ତିଙ୍କ୍‌ କେତ୍‌ତଣ୍ଡ୍‌, ନି ଦାଦାଲଡ଼୍‌ ବାତେ ଶିକିମ୍‌ତାଗ୍‌ ପଶୁ ମାନ୍ଦ୍‌ ମେୟ୍‌ୱଡ଼୍‌ କି ? ୱାଡ଼ାଟ୍‌, ନାନ୍‌ ନିକିଙ୍କ୍‌ ଅଡ଼୍‌ ଗାରେ ରହ୍‌ତିତାନ୍‌; ଆସୁଟ୍ ଅଡ଼୍‌ କେତ୍‌ତଣ୍ଡ୍‌, ଉଡ଼ାଟ୍‌, ନାନ୍‌ ଇଗ୍‌ ମିନ୍ଦେନ୍‌। 14 ଆସୁଟ୍‌ ଯାକୁବ୍‌ ଅଂକିଙ୍କ୍‌ କେତ୍‌ତଣ୍ଡ୍‌, ନିମେ ଆଞ୍ଜ୍‌ ନି ଦାଦାଲଡ଼୍ ନୁ ପଶୁମାନ୍ଦ୍‌ ସାୟେ ମିନ୍ଦେ କି ଇଲେ, ଆଦ୍‌ ଉଡ଼ି ନା ଗାରେ କାବୁର୍‌ ତାଡ଼ା। ଇଦ୍‌ ପୁଟୁଙ୍କ୍ ଅଣ୍ଡ୍‌ ହିବ୍ରୋଣ୍‌ତେ ମଦଲ୍‌ ବୁମ୍‌ତାଗାଙ୍କ୍‌ ଯୋଷେପ୍‌ତିଙ୍କ୍‌ ରହ୍‌ତାଙ୍କ୍‌, ଅଣ୍ଡ୍‌ ଶିକିମ୍‌ତାଗ୍‌ ହେୱ୍‌ତଣ୍ଡ୍‌। 15 ଆସୁଟ୍‌ ଅର୍‌ତୁଣ୍ଡ୍‌ ନାରୁଣ୍ଡ୍‌ ଯୋଷେପ୍‌ତିଙ୍କ୍‌ ୱାୟାନା ଇକ୍‌ ଆକ୍‌ ଉଡାନାଦ୍‌ ଉଡ଼ି ପାଚାରା ମାଡ଼୍‌ତଣ୍ଡ୍‌, ନିମେ ବାତା ମେହ୍‌କୁତି ?

16 ଅଣ୍ଡ୍‌ କେତ୍‌ତଣ୍ଡ୍‌, ନା ଦାଦାଲଡ଼୍‌କ୍‌ ମେହ୍‌କୁତାନ୍‌, ଅଡ଼୍‌ ବେଗେ ପଶୁ ମାନ୍ଦେ ମେୟ୍‌ତୁତଡ଼୍‌, ଦୟାମାଡ଼ି ନାକିଙ୍କ୍‌ କେଲ୍‌ମ୍‌।

17 ଆ ନାରୁଣ୍ଡ୍‌ କେତ୍‌ତଣ୍ଡ୍‌, ଅଡ଼୍‌ ଆଗାକଞ୍ଚ୍‌ ଆତ୍‌ତଡ଼୍‌; ବାତେଙ୍କ୍‌ଇତ୍କେ ନାନ୍‌ କେଞ୍ଜ୍‌ତାନ୍‌, ଅଡ଼୍‌ ଦୋତନ୍‌ତା ଆଦ୍‍ତଡ଼୍‌ ଇଞ୍ଜ କେସ ମାନ୍‌ନଡ଼୍‌। ଆଦିଙ୍କ୍‌ ଯୋଷେପ୍‌ ତାମ୍‌ ଦାଦାଲଡ଼୍‌ ପେର୍କେ ପେର୍କେ ଆଞ୍ଜ୍‌ ଦୋତନ୍‌ତାଗ୍‌ ଅଡ଼୍‌କିଂଙ୍କ୍‌ ଉଡ଼୍‌ତଣ୍ଡ୍‌।

18 ଅଡ଼୍‌ ଅଂକିଙ୍କ୍‌ ଦୁରାମ୍‌କଞ୍ଚ୍‌ ଉଡ଼୍‌ତଡ଼୍, ମେଣ୍ଡେ ଅଣ୍ଡ୍‌ ଅଡ଼୍‌ ଗାରେ ଏୱ୍‌ଦାନ୍ ମୁନେ ଅଡ଼୍ ଅଂକିଙ୍କ୍‌ ଆୱ୍‌କାନ୍‌ ମାଇଦିଙ୍କ୍‌ ବିଚାର୍‌ ମାଡ଼୍‌ତଡ଼୍। 19 ମେଣ୍ଡେ, ଅଡ଼୍‌ ଅଣ୍ଡୟ୍‌ ନିଜେ ନିଜେତିଙ୍କ୍‌ କେତ୍‌ତଡ଼୍, ଇ ଉଡ଼ାଟ୍‌, ସାପ୍ନା ଉଡ଼ାନଣ୍ଡ୍‌ ୱାଦୁତଣ୍ଡ୍‌। 20 ୱାଡ଼ାଟ୍‌, ମାନାଡ଼୍ ଅଂକିଙ୍କ୍‌ ଆୱ୍‌କି ବେନ୍‌ଆଇ ଗୁୟ୍‌ନ୍ଦେତାଗ୍ ୱାଟିନ୍‌ନା; ମେଣ୍ଡେ ବେନ୍‌ ଆୟି ହିଂସ୍ରକ ଜନ୍ତୁ ଅଂକିଙ୍କ୍‌ ତିତ୍‌ତା ଇଞ୍ଜ କେଲ୍‌ନା; ଅଣ୍ଡ୍‌ ଉଡ଼୍‌ନା, ସାପ୍ନା ସାରେ ବେଲା ପୁରା ଆଦ୍‌ତେ।

21 ଇ ଗଟ୍‌ କେଞ୍ଜି ରୁବେନ୍‌ ଅଡ଼୍‌ କାୟ୍‌ଦେକଞ୍ଚ୍‌ ଅଂକିଙ୍କ୍‌ ଗେଲ୍‌ସ୍ପାନଙ୍କ୍‌ ଆଲ୍ସ୍‌ତଣ୍ଡ୍‌, ଇଲ୍ଲା, ମାନାଡ଼୍‌ ଅଂକିଙ୍କ୍‌ ଡଲ୍‌ନା ଆୱୁକ୍‌ୱାଡ଼୍‌। 22 ମେଣ୍ଡେ ରୁବେନ୍‌ ଅଡ଼୍‌ କାୟ୍‌ଦେକଞ୍ଚ୍‌ ଅଂକିଙ୍କ୍‌ ଗେଲ୍‌ସ୍ପି ବାବାନ୍‌ ଗାରେ ମାଲ୍‌ପି ରହ୍‌ତାନ୍‌ ସେଙ୍ଗେ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ମିଡ଼୍ ଅଙ୍କ୍‌ ଆୱୁକ୍‌ମାଟ୍‌; ଆଞ୍ଚିନ୍‌ ଇ ଗୁୟ୍‌ନ୍ଦେତ୍‌ ଲୋପେ ଅଂକିଙ୍କ୍‌ ୱାଟିମୁଟ୍‌, ମାତ୍ର ଅନ୍‌ ପର କାୟ୍‌ ତେମାଟ୍‌। 23 ତାନ୍‌ପେର୍କେ ଯୋଷେପ୍‌ ଦାଦାଲଡ଼୍‌ ଗାରେ ୱାତ୍‌ତାଙ୍କ୍‌, ଅଡ଼୍ ଅନ୍‌ ଚକା, ଆ ରକମ୍‌ ରକମ୍‌ କଲର୍‌ତେ ଚକ୍‌ତିଙ୍କ୍‌ ଅନ୍‌ ମେନ୍ଦୁଲ୍‌କଞ୍ଚ୍‌ କୁସ୍‌ପି ଅତ୍‌ତଡ଼୍‌; 24 ଅଂକିଙ୍କ୍‌ ପୟିସ୍‌ ଗୁୟ୍‌ନ୍ଦେତ୍‌ ଲୋପେ ହେସ୍‌ତଡ଼୍‌, ଆ ଗୁୟ୍‌ନ୍ଦେତାଗ୍‌ ବାତ୍‌ ଇଲକଟ ମାତ୍‌ତେ, ଆଗେ ଏର୍ ଇଲକଟ ମାତ୍‌ତେ।

25 ତାନ୍‌ପେର୍କେ ଅଡ଼୍‌ ତିନ୍ଦାନଙ୍କ୍‌ ପସ୍ପ୍‌ତଡ଼୍‌; ଅଡ଼୍‌ ମାଡ଼୍‌କି ଉଡ଼୍‌ତଡ଼୍, ଯେ ଗିଲିୟଦ୍‌କଞ୍ଚ୍‌ ଅନ୍‌ ମାନ୍ଦେ ଇଶ୍ମାଏଲିୟ ଆଦାନ୍‌ ନାରୁଡ଼୍‌ ଉଟ୍‌କିନ୍‌ ପର ସାୟେତ୍‌ ଗାବ୍‌ତେ ଜିନିଷ୍ ନୁ ପାର୍‌ୱା ନୁ ଗନ୍ଦରସ୍‌ ପୟିସ୍‌ ମିସର୍‌ ଦେଶ୍‌ତା ଆଦୁତଡ଼୍‌। 26 ଆସୁଟ୍‌ ଯିହୁଦାଲ୍ ଦାଦାଲଡ଼୍‌କ୍‌ କେତ୍‌ତଣ୍ଡ୍‌, ମାନ୍‌ ତାମୁଙ୍କ୍ ଆୱ୍‌କି ଅନ୍‌ ନେତୁର୍‌ତିଙ୍କ୍‌ ମିଞ୍ଜ୍‌ପ୍‌କେ, ମାନାଙ୍କ୍‌ ବାତେ ଲାବ୍‌ ? 27 ୱାଡ଼ାଟ୍‌, ମାନାଡ଼୍ ଅଂକିଙ୍କ୍‌ ଇ ଇଶ୍ମାଏଲିୟ ନାରୁଡ଼୍‌କ୍‌ ୱାମ୍‌ଇନା, ମାନାୱ୍‌ କାଇ ଅନ୍‌ ପର ତେଦ୍‌ମା କି; ବାତେଙ୍କ୍‌ଇତ୍କେ ଅଣ୍ଡ୍‌ ମାନ୍‌ ତାମୁଣ୍ଡ୍‌ ନୁ ମାନ୍‌ ଆୱୁମ୍‌ତେ ଲେକାମ୍‌। ଆସୁଟ୍‌ ତାମ୍‌ ଦାଦାଲଡ଼୍‌ ରାଜି ଆତ୍‌ତଡ଼୍‌। 28 ଆସୁଟ୍‌ ଆ ମିଦୀୟନୀୟ ବେପାରିଡ଼୍‌ ଗାରେ ୱାତ୍‌ତାଙ୍କ୍‌, ଯୋଷେପ୍‌ତେ ଦାଦାଲଡ଼୍‌ ଗୁଇନ୍ଦେ ଲପେକଞ୍ଚ୍‌ ପର ଲାଗିତାତ୍‌ତଡ଼୍‌; ମେଣ୍ଡେ, ଇଶ୍ମାଏଲିୟକଞ୍ଜ୍‌ କୋଡ଼ିଏ ରୂପାଡାବ୍‌କ୍‌ ଅସ୍‌ ଯୋଷେପ୍‌ତିଙ୍କ୍‌ ୱାମିତ୍‌ତଡ଼୍‌; ଆସୁଙ୍କ୍‌ ଅଡ଼୍‌ ଯୋଷେପ୍‌ତିଙ୍କ୍‌ ମିସର୍‌ ଦେଶ୍‌ତା ଅତ୍‌ତଡ଼୍‌।

29 ଆସୁଙ୍କ୍‌ ରୁବେନ୍‌ ଗୁୟ୍‌ନ୍ଦେତ୍‌ ଗାରେ ମାଲ୍‌ସ୍‌ ଆଞ୍ଜ୍‌ ଯୋଷେପ୍‌ ଗୁୟ୍‌ନ୍ଦେତାଗ୍‌ ଇଲେଣ୍ଡ୍‌, ଇଦ୍‌ଉଡ଼ି ତାନ୍‌ ଚକ୍‌ ଇକ୍‌ତଣ୍ଡ୍‌। 30 ମେଣ୍ଡେ ତାମୁଡ଼୍‌କିନ୍‌ ଗାରେ ମାଲ୍‌ସ୍‌ୱାସ୍‌ କେତ୍‌ତଣ୍ଡ୍‌, ପେକାଲ୍‌ ଇଲେଣ୍ଡ୍‌, ମେଣ୍ଡେ ନାନ୍‌ ବେନ୍‌ପାକା ଆଦ୍‌ତାନ୍‌ ?

31 ତାନ୍‌ପେର୍କେ ଅଡ଼୍‌ ଯୋଷେପ୍‌ତେ ଚକ୍‌ତିଙ୍କ୍‌ ଅସ୍‌ ଅଣ୍ଡୟ୍‌ ମେକ୍‌ତିଙ୍କ୍‌ ଆୱୁକି ତାନ୍‌ ନେତୁର୍‌ତାଗ୍‌ ମୁହ୍‌ତଡ଼୍‌। 32 ମେଣ୍ଡେ, ଅଡ଼୍‌ ତାମ୍‌ ବାବାନ୍‌ ଗାରେ ଆ ରକମ୍‌ ରକମ୍‌ କଲର୍‌ତେ ଚକ୍‌ତିଙ୍କ୍‌ ରୟ୍‌ସିସ୍‌ କେତ୍‌ତଡ଼୍‌, ମାମ୍‌ମେ ଇସ୍‌କେ ଦର୍‌ସ୍କ୍‌ତମ୍‌, ଇଦ୍‌ ନି ମାରିନ୍‌ ଚକ୍‌ କି ଇଲେ, ଏଞ୍ଚାସା।

33 ଆସୁଟ୍‌ ଅଣ୍ଡ୍‌ ଆଦ୍‌ ଏଞ୍ଚି କେତ୍‌ତଣ୍ଡ୍‌, ଇ ଚକ୍‌ ତ ନା' ମାରିନାଦ୍‌; ବାତ୍‌ମାତି ହିଂସ୍ରକ ଜନ୍ତୁ ଅଂକିଙ୍କ୍‌ ତିଞ୍ଜ୍‌ମିନ୍ଦେ, ଯୋଷେପ୍‌ ନିଜାମ୍‌ ଦୁଙ୍କା ଦୁଙ୍କା ଆସ୍‌ ଡଲ୍‌ତଣ୍ଡ୍‌। 34 ଆସୁଟ୍‌ ଯାକୁବ ଅନ୍‌ ଚକ୍‌ ଇକି ବାସ୍ତ୍‌ତେ କେର୍ସ୍‌ ମାରିନ୍‌ ସେଙ୍ଗେ ନାର୍ଗେ ଦିନ୍‌ ଜାକ ଦୁଃକ ମାଡ଼୍‌ତଣ୍ଡ୍‌। 35 ତାନ୍‌ ସାରେ ମାର୍‌କ୍‌ ନୁ ସାରେ ମାୟାସ୍କ୍‌ ତେଦି ଅଂକିଙ୍କ୍‌ ସାନ୍ୱନା ମାଡ଼ାଙ୍କ୍‌ ଯତ୍ନ ମାଡ଼୍‌ତଡ଼୍‌; ମାତ୍ର ଅଣ୍ଡ୍‌ କେଞ୍ଜଣ୍ଡ୍‌; ମେଣ୍ଡେ ଅଣ୍ଡ୍‌ କେତ୍‌ତଣ୍ଡ୍‌, ନାନ୍‌ ଦୁଃକ ମାଡ଼ ମାଡ଼ ମାରିନ୍‌ ଗାରେ ସମାଦିତାଗ୍‌ ଦୁଡ଼େ ଆଦ୍‌ତାନ୍‌। ଇଦ୍‌ ଲେକାମ୍‌ ତାମ୍‌ ବାବାଲ୍‌ ଅନ୍‌ ସେଙ୍ଗେ କେୟ୍‌ତଣ୍ଡ୍‌।

36 ତାନ୍‌ପେର୍କେ ଆ ମିଦୀୟନୀୟଡ଼୍ ମିସର୍‌ ଦେଶ୍‌ତା ପୋଟୀପର୍‌ ପେଦେର୍ତେ ଫାରୋନ୍‌ ଦାସ, ଇତ୍କେ, ରକ୍ଷା ମାଡ଼ାନ୍‌ ସେନାପତିନ୍‌ କାୟ୍‌ଦେ ଯୋଷେପ୍‌ତିଙ୍କ୍‌ ୱାମିତ୍‌ତଡ଼୍‌।