1 ମେଣ୍ଡେ ମିସର୍‌ ଦେଶ୍‌ତାଗେ କାଦି ମିନ୍ଦେ, ଇ ଗଟ୍ କେଞ୍ଜି ଯାକୁବ ତାନ୍‌ ମାରିଡ଼୍‌କ୍‌ କେତ୍‌ତଣ୍ଡ୍‌, ମିଡ଼୍‌ ବାତେଙ୍କ୍‌ ନିଜର୍‌ ନିଜର୍‌ତେ ପର ଉଡ଼ ମିନ୍ଦେଡ଼ି ? 2 ଅଣ୍ଡ୍‌ ମେଣ୍ଡେ କେତ୍‌ତଣ୍ଡ୍‌ , ଉଡ଼ାଟ୍‌, ନାନ୍‌ କେଞ୍ଜ୍‌ତାନ୍‌, ମିସର୍‌ ଦେଶ୍‌ତାଗ୍‌ କାଦି ମିନ୍ଦେ; ଆଦିଙ୍କ୍‌ ମିଡ଼୍ ଆଗେ ଆଞ୍ଜ୍‌ ମାନ୍‌ ମାଇଦିଙ୍କ୍‌ କାଦି ଆସି ତାଡ଼ାଟ୍‌; ଆସୁଟ୍‌ ମାନାଡ଼୍‌ ଡଲକଟ ବାଦ୍‌କିକାଡ଼୍‌। 3 ତାନ୍‌ପେର୍କେ ଯୋଷେପ୍‌ତେ ଦଶଜାନ୍‌ ଦାଦାଲଡ଼୍ କାଦି ଆସାନ୍‌ ମାଇଦିଙ୍କ୍‌ ମିସର୍ ଦେଶ୍‌ତା ଆତ୍‌ତଡ଼୍। 4 ମାତ୍ରମ୍‌ ଯାକୁବ୍‌ ଯୋଷେପ୍‌ତେ ତଡ଼୍‌ଦେନଙ୍କ୍‌ ବିନ୍ୟାମିନ୍‌ତିଙ୍କ୍‌ ଦାଦାଲଡ଼୍‌ ତଡ଼୍ ରୱଣ୍ଡ୍; ଇତ୍କେ ଅଣ୍ଡ୍‌ କେତ୍‌ତଣ୍ଡ୍‌, ଉମ୍ଭକି ଇକିଙ୍କ୍‌ ବିପଦ୍‌ ଗଟେମ୍ ଆତ୍କେ।

5 ଆସୁଟ୍‌ ଆଗେ ଆଦାନ୍‌ ନାରୁଡ଼୍‌ ଲୋପେଙ୍କ୍‌ ଇସ୍ରାଏଲତେ ମାର୍‌କ୍‌ କାଦି ଆସାନ୍‌ ମାଇଦିଙ୍କ୍ ଆତ୍‌ତଡ଼୍‌: ବାତେଙ୍କ୍‌ଇତ୍କେ କିଣାନ୍‌ ଦେଶ୍‌ତାଗେ ଆନ୍ତେ ମରୁଡି ମାତ୍‌ତେ। 6 ଆ ସମୟତେ ଯୋଷେପ୍‌ ମିସର୍‌ ଦେଶ୍‌ତାଗ୍‌ ଅଧ୍ୟକ୍ଷ ଆତ୍‌ତାଙ୍କ୍‌ ଦେଶ୍‌ତେ ନାରୁଡ଼୍‌ ସାରେତଡ଼୍‌କିଙ୍କ୍‌ କାଦି ୱାମ ମାତ୍‌ତଣ୍ଡ୍‌; ଆସୁଟ୍‌ ଯୋଷେପ୍‌ତେ ଦାଦାଲଡ଼୍ ୱାସ୍ ଅକିଂଙ୍କ୍‌ ମଡ଼୍‌କ୍‌ତଡ଼୍‌। 7 ଆସୁଟ୍‌ ଯୋଷେପ୍‌ ତାମ୍‌ ଦାଦାଲଡ଼କ୍ ଉଡ଼ି ହେଞ୍ଚ୍‌ତଣ୍ଡ୍‌, ମାତ୍ରମ୍ ଅଡ୍‌ ମୁନେ ପୁନ୍‌ୱେ ନାରୁନ୍ ଲେକାମ୍‌ ବ୍ୟବହାର୍‌ ମାଡ଼ି ଚାଲାକ୍‌ ଗଟ୍‌ତେ କେତ୍‌ତଣ୍ଡ୍‌, ମିଡ଼୍ ବେଗାକଞ୍ଚ୍‌ ୱାସ୍‌ ମିନ୍ଦେଡ଼ି ? ଅଡ଼୍‌ କେତ୍‌ତଡ଼୍, ମାମେ କିଣାନ୍ ଦେଶ୍‌ତାଗାଙ୍କ୍‌ କାଦି ଆସାନଙ୍କ୍‌ ୱାସ୍‌ ମିନ୍ଦେମ୍‌।

8 ମାତ୍ରମ୍‌ ଯୋଷେପ୍‌ ତାମ୍‌ ଦାଦାଲଡ଼୍‌କ୍‌ ଉଡ଼ି ହେଞ୍ଚ୍‌ତଣ୍ଡ୍‌, ଇତ୍କେ ଅଡ଼୍‌ ଅଂକିଙ୍କ୍‌ ହେଞ୍ଚ୍‌ପାର୍‌ୱଡ଼୍‌। 9 ଆସୁଟ୍‌ ଯୋଷେପ୍‌ ଅଡ଼୍ ବିଷୟ୍‌ତେ ବେନ୍‌ ସାରେ ସାପ୍ନା ଉଡ଼ିମାତ୍‌ତଣ୍ଡ୍‌, ଆଦ୍‌ ହେର୍‌କ୍‌ ମାଡ଼ି ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ଡଙ୍ଗାଲ୍‌ ନାରୁଡ଼ି; ଦେଶ୍‌ତେ ବସା ମେଃକାନ୍‌ ମାଇଦିଙ୍କ୍‌ ମିଡ଼୍‌ ୱାସ୍‌ମିନ୍ଦେଡ଼ି।

10 ଅଡ଼୍‌ କେତ୍‌ତଡ଼୍‌, ଇଲା ପ୍ରବୁ, ଆଲା ଆୟ, ନିଇ ଦାସନଡ଼୍‌ କାଦି ଆସାନଙ୍କ୍‌ ୱାସ୍‌ମିନ୍ଦେଡ଼୍‌। 11 ମାମେ ସାରେତମ୍‌ ୱେରନ୍‌ ବାବାନ୍‌ ମାର୍‌କ୍‌, ମାମେ ବିଶ୍ୱାସ୍‌ତେ ନାରୁମ୍‌, ନି ଦାସଡ଼୍‌ ଡଙ୍ଗାଲଡ଼୍ ଆୟଡ଼୍‌।

12 ଆସୁଟ୍‌ ଅଣ୍ଡ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ଇଲ୍ଲା, ଇଲ୍ଲା, ମିଡ଼୍‌ ଦେଶ୍‌ତେ ବସା ମେହ୍‌କାନଙ୍କ୍‌ ୱାସ୍‌ ମିନ୍ଦେଡ଼ି।

13 ଅଡ଼୍ କେତ୍‌ତଡ଼୍‌, ନିଇ ଦାସଡ଼୍‌ ବାରଜାନ୍‌ ଦାଦାଲଡ଼୍‌, କିଣାନ୍‌ ଦେଶ୍‌ତାଗେ ମାନ୍ଦାନ୍‌ ଅର୍‌ତୁନ୍‌ ମାର୍‌କ୍‌; ମେଣ୍ଡେ ଉଡ଼ା, ମା ସୁଦୁନଣ୍ଡ୍‌ ତାମୁଣ୍ଡ୍‌ ବାବାନ୍‌ ତଡ଼୍ ମିନ୍ଦେଣ୍ଡ୍‌, ମେଣ୍ଡେ ଅର୍‌ତୁଣ୍ଡ୍‌ ଇଲେଣ୍ଡ୍‌।

14 ଆସୁଟ୍‌ ଯୋଷେପ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ମାମେ ମିକିଙ୍କ୍‌ ଡଙ୍ଗା ଇଞ୍ଜ ବାତ୍‌ କେତ୍‌ତମ୍‌, ମିଡ଼୍‌ ଆଦିନ୍‌ ପ୍ରମାଣ। 15 ଇୱିନ୍ ତଡ଼୍‌ ମିକିଙ୍କ୍‌ ପରିକ୍ଷା ମାଡ଼୍‌ ୱେୟ୍‌ତିତ୍‌, ମାମେ ଫାରୋନ୍‌ ଜିଉନ୍‌ତିଙ୍କ୍‌ ପ୍ରମାଣ ମାଡ଼ି କେତୁତମ୍‌, ମି ସୁଦୁନଣ୍ଡ୍‌ ତାମୁଣ୍ଡ୍‌ ଇଗେ ୱାଡ଼କଟ ମାତ୍‌ତ୍କେ, ମିଡ଼୍‌ ଇଗାକଞ୍ଚ୍ ଆଦ୍‌ ପାର୍‌ୱିଡ଼୍‌। 16 ମିୟାଗାକଞ୍ଚ୍‌ ୱେରଙ୍କ୍‌ ରହ୍‌ମୁଟ୍‌, ଅଣ୍ଡ୍‌ ମି ତାମୁଙ୍କ୍‌ ତାଡ଼ିଣ୍ଡ୍‌, ମିଡ଼୍‌ ବନ୍ଦି ଆସ୍‌ମାନୁଟ୍‌; ମିୟାଦ୍‌ ଗଟ୍‌ ସତ୍‌ କି ଇଲେ, ପରୀକ୍ଷା ଆତ୍କେ ପୁନ୍ଦାଙ୍କ୍‌ ଆଦ୍‌ତେ; ଆୟକଟମାତ୍କେ ମାମେ ଫାରୋନ୍‌ ଜିଉନ୍‌ତିଙ୍କ୍‌ ପ୍ରମାଣ ମାଡ଼ି କେତୁତାନ୍‌, ମିଡ଼୍‌ ନିଜାମ୍‌ତେ ଡଙ୍ଗାଲଡ଼ି। 17 ଆସୁଟ୍ ଯୋଷେପ୍‌ ଅଡ଼୍‌କିଂଙ୍କ୍‌ ମୁଣ୍ଡ୍‌ ଦିନା ତାନାତାଗ୍‌ ବନ୍ଦି ମାଡ଼ି ନେଃତଣ୍ଡ୍‌।

18 ମେଣ୍ଡେ ମୁଣ୍ଡ୍‌ଦିନାନେ ଯୋଷେପ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ପରମେଶ୍ୱର୍‌ତେ ପର ମାୟାଦ୍‌ ୱେର୍‌ ମିନ୍ଦେ; ଆଦିଙ୍କ୍‌ ଇଦ୍‌ ପାଡ଼ିୟ୍ ମାଡ଼ାଟ୍‌, ଆଲାଇତ୍କେ ଗେଲ୍‌ସିତିଡ଼୍‌। 19 ମିଡ଼୍ ବେସୁଙ୍କ୍‍ ବିଶ୍ୱାସ୍‌ତେ ନାରୁଡ଼ି, ଆଲାଇତ୍କେ ମି ଲୋପେଙ୍କ୍‌ ଅର୍‌ତୁଣ୍ଡ୍‌ ତାମୁଙ୍କ୍‌ ଇ ତାନାତାଗ୍‌ ବନ୍ଦ୍‌ମାଡ଼ି ମରୁଡିତେ ସେଙ୍ଗେ ଲୋନ୍ କାଦି ଅୟ୍‌ମୁଟ୍‌। 20 ମାତ୍ରମ୍‌ ମିଡ଼୍‌ ମି ସୁଦୁନ୍‌ ତାମୁଙ୍କ୍‌ ମା ଗାରେ ତାତିତିଡ଼୍‌, ମିଡ଼୍ ଡଲ୍‌ୱିଡ଼୍‌। ଆସୁଟ୍‌ ଅଡ଼୍‌ ଆଦ୍‌ ଲେକାମ୍‌ ମାଡ଼୍‌ତଡ଼୍‌।

21 ଆସୁଟ୍‌ ଅଡ଼୍‌ କେତାକେତି ଆତ୍‌ତଡ଼୍‌, ମାମେ ମା ତାମୁନ୍‌ ସେଙ୍ଗେ ନିଜାମ୍‌ ଦୋଷ ଆଦ୍‌ତମ୍; ଅଣ୍ଡ୍‌ ମାକିଙ୍କ୍ ଅନୁରୋଦ ମାଡ଼୍‌ତେ ୱେଲେ ମାମେ ଅନ୍‌ ଜିଉନ୍‌ତେ କଷ୍ଟ ଉଡ଼୍‌କେ ବା ଆଦ୍‌ କେଞ୍ଜମ୍‌, ଆଦିନ୍‌ ମାଇଦିଙ୍କ୍‌ ମାକିଙ୍କ୍‌ ଇ ବିପତ୍ତି ଗଟେମ୍‌ ଆସ୍‌ ମିନ୍ଦେ।

22 ଆସୁଟ୍ ରୁବେନ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ଆ ପେକାନ୍‌ ବିଷୟ୍‌ତେ ପାପ୍‌ ମାଡ଼୍‌ମାଟ୍‌, ଇ ଗଟ୍‌ କି ନାନ୍‌ ମିକିଙ୍କ୍‌ କେଲନ୍‌ କି ? ଇତ୍କେ ବା ମିଡ଼୍‌ କେଞ୍ଜ୍‌ୱିଡ଼୍; ଆଦିନ୍‌ ସେଙ୍ଗେ ଉଡ଼ାଟ୍, ଇଞ୍ଜେ ଅନ୍‌ ନେତୁର୍‌ତେ ଇସାପ୍‌ ଆଦ୍‌ୱେୟ୍‌ତୁତ୍‌। 23 ମାତ୍ରମ୍‌ ଯୋଷେପ୍‌ ସାରେତଡ଼୍‌ତ ଗଟି କେଞ୍ଜ୍‌ତଣ୍ଡ୍‌, ଇଦ୍ ଅଡ଼୍ ବୁଜେମ୍‌ ଆଦ୍‌ ପାର୍‌ୱଡ଼୍‌; ବାତେଙ୍କ୍‌ଇତ୍କେ ଅଣ୍ଡ୍‌ ରେଣ୍ଡ୍‌ ଗଟ୍‌ତେ ଗଟି ଅଡ଼୍ ତଡ଼୍ ତିର୍‌ୟା ତିର୍‌ୟି ମାଡ଼୍‌ତଣ୍ଡ୍‌; 24 ଆସୁଟ୍‌ ଯୋଷେପ୍‌ ଅଡ଼୍‌ ଗାରେ ଆଞ୍ଜ୍‌ କେୟ୍‌ତଣ୍ଡ୍‌; ମେଣ୍ଡନ୍‌ଦାମ୍‌ ୱାସ୍‌ ଅଡ଼୍‌ ତଡ଼୍ ତିର୍‌ୟି ଅଡ଼୍‌ ଲୋପେଙ୍କ୍‌ ଶିମିୟନ୍‍ତିଙ୍କ୍ ପୟସ୍ ଅଡ଼୍ ମୁନେ ତଃତ୍‌ତଣ୍ଡ୍‌।

25 ଆସୁଟ୍‌ ଯୋଷେପ୍‌ ଅଡ୍‌ ତିନ୍ଦାନ୍‌ଗିନେତାଗ୍‌ କାଦି ବର୍ତ୍ତି ମାଡ଼ି ସାରେତଡ଼୍ ପାକାଙ୍କ୍ ଡାବ୍‌ ମାଲ୍‌ପାଙ୍କ୍‌ ନୁ ଅଡ଼୍‌କିଂଙ୍କ୍‌ ପାତେୟ ବସ୍‌କ୍‌କେତ୍‌ ଜିନିଷ ଇଦାନଙ୍କ୍‌ ଆଦେଶ୍‌ ଇତ୍‌ତଣ୍ଡ୍‌; ଆସୁଟ୍‌ ଆଦ୍‌ରକମ୍‌ ମାଡ଼୍‌ତଡ଼୍‌।, 26 ଆସୁଟ୍‌ ଅଡ଼୍‌ ନିଜର୍‌ ନିଜର୍‌ ଗଦକିନ୍‌ ପର କାଦି ୱାଟି ଆଗାକଞ୍ଚ୍ ଆତ୍‌ତଡ଼୍‌। 27 ମାତ୍ରମ୍‌ ଡିଗାନ୍‌ ଜାଗାତାଗ୍‌ ଅର୍‌ତୁଣ୍ଡ୍‌ ଗଦତିଙ୍କ୍‌ କାଦି ଇଦାନ୍‌ ମାଇଦିଙ୍କ୍‌ ବସ୍‌କ୍‌ ଲେତାଙ୍କ୍‌, ଆଗେ ଡାବ୍‌କ୍‌ ଉଡ଼୍‌ତଣ୍ଡ୍‌; ଇତ୍କେ ବସ୍କେତ୍‌ ଲୋପ୍‌ ଡାବ୍‌କ୍‌ ମାତ୍‌ତା। 28 ଆସୁଟ୍‌ ଅଣ୍ଡ୍‌ ଦାଦାଲଡ଼୍‌କ୍‌ କେତ୍‌ତଣ୍ଡ୍‌, ନାୟାୱୁ ଡାବ୍‌କ୍‌ ମାଲ୍‌ସ୍‌ ୱାସ୍‌ମିନ୍ଦେ; ଇୱ୍‌ ଉଡ଼ାଟ୍, ଆୱ୍‌ ନା ବସ୍କାତାଗ୍‌ ମିନ୍ଦେ। ଆଦିଙ୍କ୍‌ ଅଡ଼ାଦ୍‌ ହସ୍‌ ଉଡ଼େମ୍‌ ଆତ୍‌ତେ, ମେଣ୍ଡେ ଅଡ଼୍ ଦାଦ୍‌ରେଲି ଅର୍‌ତୁନ୍‌ ପର ଅର୍‌ତୁନ୍‌ ଉଡ଼ି କେତ୍‌ତଡ଼୍‌, ପରମେଶ୍ୱର୍ ମାନ୍‌ ପର ଇଦ୍‌ ବେଲା ପାଡ଼ିୟ୍‌ ମାଡ଼୍‌ତଣ୍ଡ୍‌ ?

29 ଅଡ଼୍‌ କିଣାନ୍‌ ଦେଶ୍‌ତାଗ୍‌ ତାମ୍‌ ବାବାନ୍‌ ଯାକୁବ୍‌ତେ ଗାରେ ଏଉସ୍‌ ତାମ୍‌ ପର ବାତେ ବାତେ ଘଟେମ୍‌ ଆସ୍‌ମାତ୍‌ତେ, ଆୱ୍‌ ସାରେ ଅଂକିଙ୍କ୍‌ କେଞ୍ଜ୍‌ପ୍‌ତଡ଼୍‌, 30 ବେନ୍‌ ନାରୁନ୍‌ ଆ ଦେଶ୍‌ତେ ମାଲିକ୍‌, ଅଣ୍ଡ୍‌ ମାକିଙ୍କ୍‌ ଦେଶ୍‌ତେ ଡଙ୍ଗାଲ୍‌ ଜ୍ଞାନମାଡ଼ି କପାମ୍‌ତେ ଗଟ୍‌ କେତ୍‌ତଣ୍ଡ୍‌। 31 ଆସୁଟ୍‌ ମାମେ ଅଂକିଙ୍କ୍‌ କେତ୍‌ତମ୍‌, ମାମେ ବିଶ୍ୱାସ୍‌ତେ ନାରୁମ୍‌, ଡଙ୍ଗାନମ୍‌ ଆୟମ୍‌; 32 ମାମେ ବାରଜାନ୍‌ ଦାଦାନମ୍‌, ସାରେତମ୍‌ ୱେରନ୍‌ ବାବାନ୍‌ ମାର୍କ୍‌; ମା ଲୋପେ ୱେରଣ୍ଡ୍‌ ଇଲେଣ୍ଡ୍‌, ମେଣ୍ଡେ ଅର୍ତୁଣ୍ଡ୍‌ ସୁଦୁନଣ୍ଡ୍‌ ତାମୁଣ୍ଡ୍‌ କିଣାନ୍‌ ଦେଶ୍‌ତାଗ୍‌ ମିନ୍ଦେଣ୍ଡ୍‌। 33 ଆସୁଟ୍‌ ଦେଶ୍‌ତେ ମାଲିକ୍‌ ଆ ନାରୁଣ୍ଡ୍‌ ମାକିଙ୍କ୍‌ କେତ୍‌ତଣ୍ଡ୍‌, ଇଲା ମାଡ଼୍‌କେ ମାମେ ମିକିଙ୍କ୍‌ ବିଶ୍ୱାସ୍‌ତେ ନାରୁଡ଼୍‌ ଇଞ୍ଜ ବୁଜେମ୍‌ ଆଦ୍‌ତମ୍‌; ମିଡ଼୍‌ ମି ୱେରଣ୍ଡ୍‌ ତାମୁଙ୍କ୍‌ ମା ଗାରେ ୱାଟିସ୍‌ ମି ଲୋତ୍‌ତେ ମରୁଡ଼ି ସେଙ୍ଗେ କାଦି ପୟିସ୍‌ ଆନୁଟ୍‌। 34 ମେଣ୍ଡେ ମି ସୁଦୁନଣ୍ଡ୍ ତାମୁଙ୍କ୍ ମା ଗାରେ ତାଡ଼ାଟ୍, ଆଲାଇତ୍କେ ମିଡ଼୍‌ ଯେ ବିଶ୍ୱାସ୍‌ତେ ନାରୁଡ଼ି, ଡଙ୍ଗାଲିଡ଼୍ ଆୟ୍‌ୱିଡ଼୍, ଇଦ୍‌ ବୁଜେମ୍‌ ଆଦ୍‌ତମ୍‌; ଆସୁଟ୍‌ ମି ତାମୁଙ୍କ୍‌ ମିକିଙ୍କ୍‌ ସର୍ପା ମାଡ଼ିଦ୍‌ତମ୍‌, ମେଣ୍ଡେ ମିଡ଼୍ ଇ ଦେଶ୍‌ତାଗେ ବେପାର୍‌ ମାଡ଼୍ ପାର୍ଦ୍‌ତିଡ଼୍।

35 ଆସୁଙ୍ଗ୍ ଅଡ଼୍ ବସ୍କା କାଲି ମାଡ଼୍‌ତାଙ୍କ୍‌, ସାରେତଡ଼୍ ତାମ୍‌ ତାମ୍‌ ବସ୍‌କ୍‌କାନ୍‌ ଲୋପେଙ୍କ୍‌ ଡାବ୍‌କ୍‌ ଦରସ୍କ୍‌ତଡ଼୍। ଆସୁଟ୍‌ ଆ ସାରେ ଡାବ୍‌କିଙ୍କ୍‌ ଉଡ଼ି, ଅଡ଼୍ ନୁ ତାମ୍‌ ବାବାଲ୍‌ ୱେର୍‌ତଡ଼୍। 36 ଆସୁଟ୍‌ ତାମ୍‌ ବାବାଲ୍‌ ଯାକୁବ୍‌ କେତ୍‌ତଣ୍ଡ୍‌, ମିଡ଼୍‌ ନାକିଙ୍କ୍‌ ମାର୍‌ ଇଲ୍‌ୱେ ଲେକାମ୍‌ ମାଡ଼ୁତିଡ଼୍‌; ଯୋଷେପ୍‌ ଇଲେଣ୍ଡ୍‌, ଶିମିୟନ୍‍ ଇଲେଣ୍ଡ୍‌, ମେଣ୍ଡେ ବିନ୍ୟାମିନ୍‌ତିଙ୍କ୍‌ ଆନ୍ତେ ଅଦାନଙ୍କ୍‌ ଉପାୟ୍‌ ମାଡ଼ୁତିଡ଼୍‌, ଇୱ୍‌ସାରେ ସିନା ନା ଗାରେ ଆସମିନ୍ଦେ।

37 ଆସୁଟ୍‌ ରୁବେନ୍‌ ବାବାଙ୍କ୍ କେତ୍‌ତଣ୍ଡ୍‌, ନାନ୍‌ ଯଦି ନି ଗାରେ ଅଂକିଙ୍କ୍‌ ତାଡ଼ନ୍‌, ଆଲାଇତ୍କେ ନିମ୍‌ ନା ଇର୍‌ୱୁଡ଼୍‌ ମାର୍‌କିଙ୍କ୍‌ ଆୱ୍‌କିତିନ୍‌; ନା କାୟ୍‌ଦେ ଅଂକିଙ୍କ୍‌ ସର୍ପା ମାଡ଼ା; ନାନ୍‌ ଅଂକିଙ୍କ୍‌ ମେଣ୍ଡନ୍‌ ଦାମ୍‌ ନି ଗାରେ ତାସିଦ୍‌ତାନ୍‌।

38 ଆସୁଟ୍‌ ଯାକୁବ୍‌ କେତ୍‌ତଣ୍ଡ୍‌, ନା' ମାର୍‌ ମି ତଡ଼୍ ଆନ୍‌ନଣ୍ଡ୍‌, ତାନ୍‌ ତଡ଼୍‌ଦେନଣ୍ଡ୍‌ ଡଲ୍‌ତଣ୍ଡ୍‌, ଅଣ୍ଡେକେ ମାତ୍ରମ୍‌ ବାକି ମିନ୍ଦେ; ମିଡ଼୍‌ ବେନ୍‌ ଆର୍‌ ଆଦୁତିଡ଼୍‌, ଆସୁଟ୍‌ ଇକିଙ୍କ୍‌ ବେସୁଙ୍କ୍‌ ବାତ୍‌ବା ବିପଦ୍ ଗଟେମ୍‌ ଆଦ୍‌ତା, ଆଲାଇତ୍କେ ମିଡ଼୍‌ ନାକିଙ୍କ୍‌ ଦୁଃକତେ ଇ ୱିସ୍‌କିନା ରହ୍‌ତିତିଡ଼୍‌।