1 ତାନ୍‌ପେର୍କେ ତାନ୍‍ଆଗାକଞ୍ଚ୍‍ ଯାକୁବନ୍‍ ମାର୍‍କ୍‍ ଜନ୍ମ ଆୟଡ଼୍‍, ଇଦ୍‍ ଉଡ଼ି ରାହେଲ୍‌ ତାନ୍‍ ଏଲାଡ଼୍‍ତେ ପର କପାମ୍‍ ଆସ୍‍ ଯାକୁବ୍‍ତିଙ୍କ୍‍ କେତ୍‍ତେ, ନାକିଙ୍କ୍‍ ପିଲା ଇମ୍‌, ଇଲୁକ୍‍ ଆସୁଙ୍କ୍‍ ନାନ୍‍ ଡଲିତାନ୍‍।

2 ଆସୁଟ୍‍ ରାହେଲ୍‌ତେ ପର ଯାକୁବ୍‍ କପାମ୍‍ ଆତ୍‌ତଣ୍ଡ୍‌; ମେଣ୍ଡେ ଅଣ୍ଡ୍‍ କେତ୍‍ତଣ୍ଡ୍, ନାନ୍‍ ବାତେ ପରମେଶ୍ୱର୍‍ତେ ଲେକ୍‍ତନ୍‍ କି ? ଅଣ୍ଡ୍ ସିନା ନିକିଙ୍କ୍‍ ଡଙ୍କେତ୍‍ ଆଦାଙ୍କ୍‌ ଇୱଣ୍ଡ୍‍।

3 ଆସୁଟ୍‍ ରାହେଲ୍‍ କେତ୍‍ତେ, ଉଡ଼ା, ନା ଦାସିଲ୍‍ ବିଲ୍‍ହାଲ୍‍ ମିନ୍ଦେ, ତାନ୍‍ତଡ଼୍‍ ଉଞ୍ଜା; ଆଦ୍‍ ମାର୍‍ ଜନ୍ମ ମାଡ଼ି ନା କାଇତାଗ୍‍ ଇତ୍କେ ତାନ୍‍ ସେଙ୍ଗେ ନାନ୍‍ ଆନ୍ତେ ମାରିନ୍‌ ୟାୟନ୍‌ ଆଦ୍‌ତାନ୍‌ । 4 ମେଣ୍ଡେ ଆଦ୍‍ ତାନ୍‍ ଦାସି ବିଲ୍‍ହାଙ୍କ୍‍ ଅନ୍‍ ତଡ଼୍‍ ପେଣ୍ଡୁଲ୍‍ ମାଡ଼ିତ୍‍ତେ। 5 ଆସୁଟ୍‍ ଯାକୁବ୍‍ ତାନ୍‍ତଡ଼୍‍ ଉଞ୍ଜ୍‍ତାଙ୍କ୍‍, ବିଲ୍‍ହାଲ୍‍ ଡଙ୍କେତ୍‍ ଆସ୍‍ ଯାକୁବଙ୍କ୍‍ ଅଣ୍ଡୟ୍‍ ମାର୍‍ ଜନ୍ମ ମାଡ଼୍‍ତେ। 6 ଆସୁଟ୍‍ ରାହେଲ୍‌ କେତ୍‍ତେ, ପରମେଶ୍ୱର୍‍ ନା ବିଚାର୍‍ ମାଡ଼୍‍ତଣ୍ଡ୍‍, ଆନ୍ତେ ନା କାକ୍ରୁତି କେଞ୍ଜି ନାକିଙ୍କ୍‍ ମାର୍‍ ଇତ୍‍ତଣ୍ଡ୍‍; ଆଦିନ୍‌ ମାଇଦିଙ୍କ୍‍ ଆଦ୍‍ ଅନ୍‍ ପେଦେର୍‍ ଦାନ୍‌ (ଇତ୍କେ ବିଚାର) ୱାଟ୍‍ତେ। 7 ରାହେଲ୍‌ତେ ଦାସି ବିଲ୍‍ହାଲ୍‍ ମେଣ୍ଡନ୍‍ଦାମ୍‍ ଡଙ୍କେତ୍‍ ଆସ୍‍ ଯାକୁବ୍‍ତେ ସେଙ୍ଗେ ରେଣ୍ଡ୍‍ଦାମ୍‍ ମାର୍‍ ଜନ୍ମ ମାଡ଼୍‍ତେ। 8 ଆସୁଟ୍‍ ରାହେଲ୍‌ କେତ୍‍ତେ, ନାନେ ବାଇନ୍‍ତଡ଼୍‍ ପରମେଶ୍ୱର୍‍ ମଲ୍ଲଯୁଦ୍ଧ ମାଡ଼ି ଜିଡ଼୍‍ତାନ୍‍; ଆଦିନ୍‌ ମାଇଦିଙ୍କ୍‍ ଆଦ୍‍ ଅନ୍‍ ପେଦେର୍‍ ନପ୍ତାଲିତେ ଅର୍ଥ ଯୁଦ୍ଦ୍‌ ୱାଟ୍‍ତେ।

9 ତାନ୍‌ପେର୍କେ ଲେୟାଲ୍‍ ତାନ୍‍ ଡଙ୍କେତ୍‌ ଆଦାନାଦ୍‌ ପୁଞ୍ଜ୍‍ ତାନ୍‍ ସିଲ୍ପା ପେଦେର୍‍ତେ ଦାସିଙ୍କ୍‍ ଅସ୍‍ ଯାକୁବନ୍‍ ତଡ଼୍‍ ପେଣ୍ଡୁଲ୍‍ ମାଡ଼ିତ୍‍ତେ। 10 ଆସୁଟ୍‍ ଲେୟାନ୍‍ ଦାସି ସିଲ୍ପାନାଗାକଞ୍ଚ୍‍ ଯାକୁବ୍‍ତିଙ୍କ୍‍ ଅଣ୍ଡୟ୍‍ ମାର୍‍ ଜନ୍ମ ଆତ୍‌ତଣ୍ଡ୍‌ । 11 ଆସୁଟ୍‍ ଲେୟାଲ୍‍ କେତ୍‍ତେ, ଇଦ୍‌ ବାତେ ବାଗ୍ୟ ! ଆଦିନ୍‌ ମାଇଦିଙ୍କ୍ ଅନ୍‍ ପେଦେର୍‍ ଗାଦ୍‍ ଇତ୍କେ ବାଗ୍ୟ ୱାଟ୍‍ତେ। 12 ଲେୟାନ୍‍ ଦାସି ସିଲ୍ପାଲ୍‍ ଯାକୁବ୍‍ତେ ମାଇଦିଙ୍କ୍‍ ଦ୍ୱିତିୟ ଦାମ୍‍ ମାର୍‍ ଜନ୍ମ ମାଡ଼୍‍ତେ। 13 ଆସୁଟ୍‍ ଲେୟାଲ୍‍ କେତ୍‍ତେ, ନାକ୍‍ ବେସର୍‍ ସାର୍‍ଦେ। ପିକି ନାକିଙ୍କ୍‍ ସାର୍‍ଦେତାଦ୍‍ ଇଞ୍ଜ କେତିତା; ଆଦିନ୍‌ ମାଇଦିଙ୍କ୍‍ ଆଦ୍‍ ଅନ୍‍ ପେଦେର୍‍ ଆଶେର୍‍ ଇତ୍କେ ସାର୍‌ଦେ ୱାଟ୍‍ତେ।

14 ଆସୁଙ୍କ୍‌ ଗହମ କୟ୍‍ଦାନ୍‍ ସମୟ୍‍ତେ ରୁବେନ୍‍ ବାୟ୍‍ଦେ ଆଞ୍ଜ୍‌ ୱାୟାନାଗାଙ୍କ୍‍ ଦୁଦାକାୟା ଦର୍‍ସ୍କି ତାସ୍‍ ତାମ୍‍ ୟାୟଙ୍କ୍‍ ଲେୟାଙ୍କ୍‍ ଇତ୍‍ତଣ୍ଡ୍‍। ଆସୁଟ୍‍ ରାହେଲ୍‌ ଲେୟାଙ୍କ୍‍ କେତ୍‍ତେ, ନି ମାର୍‍ ତାତ୍‍ତେ ଦୁଦାକାୟା ସୁକୁକ୍‍ ନାକିଙ୍କ୍‍ ଇମ୍‍।

15 ଆସୁଟ୍‍ ଆଦ୍‍ କେତ୍‍ତେ, ନିମେ ନା ମୁଦ୍‍ପାଙ୍କ୍‍ ଲାଗି ଅସ୍‍ମିନ୍ଦେନି, ଇଦ୍‍ ବାତେ ସୁଦୁର୍‍ ବିଷୟ୍‍ ? ନିମେ ନା ମାରିନ୍‍ ଦୁଦାକାୟାଙ୍କ୍‍ ଆନ୍ତେ ବାତେଙ୍କ୍‌ ଲାଗି ଅଦ୍‍ତି ? ଆସୁଟ୍‍ ରାହେଲ୍‌ କେତ୍‍ତେ, ନି ମାରିନ୍‍ ଦୂଦାକାୟା ବାଦୁଲ୍‌ତେ ଅଣ୍ଡ୍‍ ନେଣ୍ଡ୍‍ ନାର୍କା ନି ତଡ଼୍‍ ଉଞ୍ଜିତଣ୍ଡ୍‍।

16 ମୁଲ୍‍ପୁଟ୍ ୱାୟାନାଗାଙ୍କ୍‍ ଯାକୁବ୍‍ ୱାଦାନ୍‍ ସମୟ୍‍ତେ ଲେୟାଲ୍‍ ଅନ୍‍ ତଡ଼୍‍ କାୟ୍‍ଲାନ୍‍ ମାଇଦିଙ୍କ୍‍ ବାୟ୍‍ଦେ ଆଞ୍ଜ୍‌ କେତ୍‍ତେ, ନିମ୍‍ ନେଣ୍ଡ୍‌ ନାର୍କା ନାୟାଗ୍‌ ଉଞ୍ଜିତିନ୍‌; ଇତ୍କେ ନାନ୍‍ ନି ତଡ଼୍‌ ଉଞ୍ଜାନଙ୍କ୍‌ ଦୁଦାକାୟା ଇସ୍‍ ନିକିଙ୍କ୍‌ ପାହେମ୍‌ ଆତ୍‌ତାନ୍‌। ଆସୁଙ୍କ୍‍ ଅଣ୍ଡ୍‍ ଆ ନାର୍କା ତାନ୍‍ ତଡ଼୍‍ ବିତାମାଡ଼୍‍ତଣ୍ଡ୍‍।

17 ଆସୁଟ୍‍ ପରମେଶ୍ୱର୍‍ ଲେୟାନ୍‍ ପ୍ରାର୍ତନା କେଞ୍ଜ୍‍ତାଙ୍କ୍‍ ଆଦ୍‍ ଡଙ୍କେତ୍‍ ଆସ୍‍ ଯାକୁବନ୍‍ ପଞ୍ଚମ୍ ମାର୍‌ ଜନ୍ମ ଇତ୍‍ତେ। 18 ଆଲାଇତ୍କେ ଲେୟାଲ୍‍ କେତ୍‍ତେ, ନାନ୍‍ ମୁଦ୍‍ପାଙ୍କ୍‍ ନା ଦାସିଙ୍କ୍‍ ଇସ୍‍ମାତ୍‍ତାନ୍‍, ପରମେଶ୍ୱର୍‍ ତାନାଦ୍‍ ଦରମା ନାକିଙ୍କ୍‍ ଇସ୍ ମିନ୍ଦେଣ୍ଡ୍‍; ତାନ୍‍ପେର୍କେ ଆଦ୍‍ ଅନ୍‍ ପେଦେର୍‍ ଇଷାଖର୍‌ ଇତ୍‌ତେ ତାନ୍‌ ଅର୍ଥ ପୁରସ୍କାର। 19 ଲେୟାଲ୍‍ ମେଣ୍ଡନ୍‍ଦାମ୍‍ ଡଙ୍କେତ୍‍ ଆସ୍‍ ଯାକୁବ୍‍ତେ ଷଷ୍ଠ ମାର୍ ଜନ୍ମ ମାଡ଼୍‍ତେ। 20 ଆସୁଟ୍ ଲେୟାଲ୍‍ କେତ୍‍ତେ, ପରମେଶ୍ୱର୍‍ ନାକିଙ୍କ୍‍ ଲେକେତ୍‍ ଯୌତୁକ ଇତ୍‍ତଣ୍ଡ୍; ଇଞ୍ଜେ ନା ମୁଦ୍‍ପାଲ୍‍ ନା ତଡ଼୍‍ ମାନ୍ଦ୍‍ତଣ୍ଡ୍‍, ବାତେଙ୍କ୍‍ଇତ୍କେ ନାନ୍‍ ତାନ୍‍ ଆରୁ ମାର୍‍କ୍‍ ଜନ୍ମ ମାଡ଼ିମିନ୍ଦେଣ୍ଡ; ଇତ୍କେ ଆଦ୍‍ ଅନ୍‍ ପେଦେର୍‍ ସବୂଲୂନ୍‍ ୱାଟ୍‍ତେ ଇଦିନ୍‌ ଅର୍ଥ ମାନ୍ଦାନାଦ୍‌। 21 ତାନ୍‍ ପେର୍କେ ଆଦ୍‍ ଅଣ୍ଡୟ୍‍ ପିକ୍‍ତିଙ୍କ୍‍ ଜନ୍ମ ଇତ୍‍ତେ, ତାନ୍‍ ପେଦେର୍‍ ଦୀଣା ୱାଟ୍‍ତେ।

22 ପରମେଶ୍ୱର୍‍ ରାହେଲ୍‌ତିଙ୍କ୍‍ ହେର୍‍କ୍‍ ମାଡ଼୍‍ତଣ୍ଡ୍‍ ନୁ ପରମେଶ୍ୱର୍‍ ତାନ୍‍ ପ୍ରାର୍ତନା କେଞ୍ଜି ତାଂକିଙ୍କ୍‍ ଡଙ୍କେତ୍‍ ଆଦାନାଦ୍‌ ଶକ୍ତି ଇତ୍‍ତଣ୍ଡ୍‍। 23 ଆସୁଟ୍‍ ଆଦ୍‍ ଡଙ୍କେତ୍‍ ଆସ୍‍ ମାର୍‍ ଜନ୍ମ ମାଡ଼ି କେତ୍‍ତେ, ପରମେଶ୍ୱର୍‍ ଇଞ୍ଜେ ନା ଅପମାନ୍‍ ଦୂରାମ୍‍ ମାଡ଼୍‍ତଣ୍ଡ୍‍। 24 ଆଦିଙ୍କ୍‌ ଆଦ୍‍ ଅନ୍‍ ପେଦେର୍‍ ଯୋଷେପ୍‌ ୱାଟ୍‌ତେ, ଇଦିନ୍‌ ଅର୍ଥ ପେର୍‌ସାନାଦ୍‌ ୱାଟି, କେତ୍‍ତେ, ସଦାପ୍ରବୁ ନାକିଙ୍କ୍‍ ମେଣ୍ଡେ ଅର୍‍ତୁଣ୍ଡ୍‍ ମାର୍‍ ଇୱିଣ୍ଡ୍‍।

25 ମେଣ୍ଡେ ରାହେଲ୍‌ତାଗାଙ୍କ୍‍ ଯୋଷେପ୍‌ ଜନ୍ମ ଆତ୍‌ତେ ପେର୍କେ ଯାକୁବ୍‍ ଲାବାନ୍‌ତିଙ୍କ୍‍ କେତ୍‍ତଣ୍ଡ୍‍, ନାକିଙ୍କ୍‍ ରୟ୍‍ସିମ୍‍, ନାନ୍‍ ନା ପଡ଼୍‍ୟ୍‍ତାଗ୍ ନୁ ନିଜର୍‍ ଦେଶ୍‍ତାଗ୍‍ ଆଦ୍‌ତାନ୍‌ । 26 ନାନ୍‍ ବେନଡ଼୍‍ ସେଙ୍ଗେ ନି ଦାସ ପାଡ଼ିୟ୍‌ ମାଡ଼ି ମିନ୍ଦେନ୍‍, ନା ଆ ମୁତେକିଙ୍କ୍‍ ନୁ ମାର୍‍କିଡ଼୍‍କ୍‍ ଅଦାନଙ୍କ୍‍ ଇମ୍‍; ବାତେଙ୍କ୍‍ଇତ୍କେ ନି ଦାସ ପାଡ଼ିୟ୍‌ ମାଡ଼ି ମିନ୍ଦେନ୍‍, ଆଦ୍‍ ନିମ୍‍ ପୁତ୍‍ତିନ୍‍। 27 ଆସୁଟ୍‍ ଲାବାନ୍‌ ଅଂକିଙ୍କ୍‍ କେତ୍‍ତଣ୍ଡ୍‍, ଅନୁରଦ୍‍ ମାଡ଼ୁତାନ୍‍, ନିମେ ମା ପର ଅନୁଗ୍ରହ ମାଡ଼ା, ବାତେଙ୍କ୍‍ଇତ୍କେ ନି ସେଙ୍ଗେ ସଦାପ୍ରବୁ ନାକିଙ୍କ୍‍ ଆଶିର୍ବାଦ୍‌ ମାଡ଼ିମିନ୍ଦେଣ୍ଡ, ଇଦ୍‍ ନାନ୍‍ ନାରୁନ୍‌ ଗଟିନ୍‌ତଡ଼୍‌ ପୁଞ୍ଜ୍‍ ମିନ୍ଦେନ୍‍। 28 ଇତ୍କେ ନିମେ ନିଜେ ନିଜର୍‍ ଦରମା ସ୍ଥିର ମାଡ଼ା, ନାନ୍‍ ଆଦ୍‍ ନିକିଙ୍କ୍‍ ଇଦ୍‍ତାନ୍‍।

29 ଆସୁଟ୍‍ ଯାକୁବ୍‍ ଅଂକିଙ୍କ୍ କେତ୍‍ତଣ୍ଡ୍‍, ନାନ୍‍ ନି ବେଦ୍‍ ଲେକାମ୍‌ ଦାସ ପାଡ଼ିୟ୍‌ ମାଡ଼ିମିନ୍ଦେଣ୍ଡ ନୁ ନା ଗାରେ ନିୟାୱ୍‍ ପଶୁ ବେଦ୍‍ପୁଟୁଙ୍କ୍‍ ମିନ୍ଦେ, ଆଦ୍‍ ନିମେ ପୁଞ୍ଜ୍‌ମିନ୍ଦେନି। 30 ବାତେଙ୍କ୍‍ଇତ୍କେ ନାନ୍‍ ୱାଡ଼୍‍ୱେ ମୁନେ ନିୟାଦ୍‍ ସୁଦୁର୍‍ ସମ୍ପତ୍ତି ମାତ୍‍ତେ, ଇତ୍କେ ଇଞ୍ଜେ ବଡ଼େମ୍‍ ଆସ୍‍ ନାର୍ଗେ ଆସ୍‍ ମିନ୍ଦେ; ମେଣ୍ଡେ ନାନେ ବେନେଆୟି ପଡ଼ିୟେତାଗ୍‌ ନିୟାୱୁ ମେକାମାନ୍ଦେତିଙ୍କ୍‌ ମେୟ୍‌ତାନଙ୍କ୍‌ ଅତ୍‌ତାନ୍‌; ସଦାପ୍ରବୁ ନିକିଙ୍କ୍‍ ମଙ୍ଗଲ ମାଡ଼ିମିନ୍ଦେଣ୍ଡ୍‍; ଇତ୍କେ ନାନ୍‍ ନା ପରିବାର୍‍ ସେଙ୍ଗେ ବେସୁଙ୍କ୍‍ ଗୁଡ଼୍‌ପିତାନ୍‌ ?

31 ଆସୁଟ୍‍ ଲାବାନ୍‍ କେତ୍‍ତଣ୍ଡ୍‍, ନାନ୍‍ ନିକିଙ୍କ୍‍ ବାତ୍‍ ଇଦ୍‍ତାନ୍‍ ? ଯାକୁବ୍‍ କେତ୍‍ତଣ୍ଡ୍‍, ନିକିଙ୍କ୍‍ ବାତେ ଇଦ୍‍ୱେୟ; ବେସୁଙ୍କ୍‍ ନିମେ ନା ମାଇଦିଙ୍କ୍‍ ଅଣ୍ଡୟ୍‍ ପାଡ଼୍‍ୟି ମାଡ଼ିତିନ୍‍, ଆସୁଟ୍‍ ନାନ୍‍ ନି ଜିୱାକିଙ୍କ୍‍ ମେଣ୍ଡନ୍‍ଦାମ୍‍ ମେୟ୍‍ସ୍‍ ମେକା ଗଡ଼୍‌କ୍‌ ପଡ଼୍‌ପିତାନ୍‌ । 32 ନେଣ୍ଡ୍‍ ନାନ୍‍ ନି ସାରେ ମାନ୍ଦେତ୍‌ ନାଡ଼୍‍ମେକଞ୍ଚ୍‌ ଇସ୍‍ ଆଞ୍ଜ୍‌ ମେଣ୍ଡାକିନ୍‍ ଲୋପେଙ୍କ୍‍ ଚିତ୍ରାକାବ୍‍ରି ନୁ ଚିହ୍ନା ହେଞ୍ଚାନାଦ୍‍ ନୁ ଗୁଡ଼ି କଲର୍‌ତେ ମେଣ୍ଢାକିଙ୍କ୍‍, ମେଣ୍ଡେ ମେକାକିଙ୍କ୍‍ ଲୋପେଙ୍କ୍‍ ଚିହ୍ନେ ହେଞ୍ଚାଙ୍କ୍‍ ନୁ ଚିତ୍ରାକାବ୍‍ରି ମେକାକିଙ୍କ୍‍ ୱେର୍‍ ମାଡ଼ିତାନ୍‍; ଆୱ୍‍ସାରେ ନାୟାୱ୍‍ ଦରମା ଲେକାମ୍‍ ଆଦ୍‌ତା । 33 ତାନ୍‍ପେର୍କେ ବେସୁଙ୍କ୍‍ ନି ମୁନେ ନାୟାଦ୍‍ ଦରମା ବିଷୟ୍‍ ହେୱ୍‍ତେ, ଆସୁଟ୍‍ ନାୟାଦ୍‍ ଦାର୍ମିକତା ନା ବିଷୟ୍‍ତେ ସାକ୍ଷ୍ୟ ଇଦ୍‍ତେ, ଇତ୍କେ, ମେକାକିନ୍‍ ଲୋପେଙ୍କ୍‍ ଚିତ୍ରାକାବ୍‍ରି ନୁ ଚିହ୍ନା ହେଞ୍ଚ୍‍ତେ ମେକା ୱେର୍‍ ବେସ୍‍କ୍‍ ମାନ୍ତ୍‍ତା, ଆୱ୍‍ ସାରେ ନାୟାୱୁ ଇନା ଆଦ୍‌ତା । 34 ଆସୁଟ୍‍ ଲାବାନ୍‌ କେତ୍‍ତଣ୍ଡ୍‍, ଲେକେତ୍‍, ନି ଗଟ୍‍ ଅନୁସାରେ ଆୟି। 35 ଅଣ୍ଡ୍‍ ଆ ଦିନ୍‍ ରେଖାଙ୍କିତ ନୁ ଚିହ୍ନେ ତାୱୁ ମେକା ସାରେ ନୁ ଚିତ୍ରାକାବ୍‍ରି ନୁ ଚିହ୍ନେ ହେଞ୍ଚ୍‍ତେ ଇତ୍କେବା ପାଣ୍ଡ୍ରିକଲର୍‌ ପେଟି ମେକା ସାରେ, ମେଣ୍ଢା ଗୁଡି କଲର୍‌ ମେଣ୍ଢା ସାରେ ୱେର୍‍ ୱେର୍‍ ମାଡ଼ି ତାମ୍‍ ମାରିଡ଼୍‍ କାୟ୍‍ଦେ ସମର୍ପଣ ମାଡ଼୍‍ତଣ୍ଡ୍‍; 36 ମେଣ୍ଡେ ଅଣ୍ଡ୍‍ ତାନ୍‍ ନୁ ଯାକୁବ୍‍ତେ ଲୋପେ ମୁଣ୍ଡ୍‍ଦିନାତେ ଆର୍‍ଦାଗାଙ୍କ୍‌ ଯେକା ନେହ୍‍ତଣ୍ଡ୍‍; ମେଣ୍ଡେ ଯାକୁବ୍ ‍ଲାବାନ୍‌ତିଙ୍କ୍‌ ମାନ୍ଦାନ୍‍ ପଶୁ ମାନ୍ଦ୍‍ତିଙ୍କ୍‍ ମେୟ୍‍ତାଙ୍କ୍‍ ପସ୍ପ୍‍ତଣ୍ଡ୍‍।

37 ମେଣ୍ଡେ ଯାକୁବ୍‍ ଲିବ୍‍ନି ନୁ ଲୂସ୍‍ ନୁ ଆର୍ମୋନ୍‍ ମାଡ଼୍‍ତେ ପୁନ୍‍ କମା ନାଡ଼୍‍କି ଆଗାଙ୍କ୍‍ ତଲ୍‌କେ ଟେଣ୍ଡି ମାଡ଼େତେ ବାକାର୍‌ ପେସ୍ପ୍‍ତଣ୍ଡ୍‍। 38 ବେନ୍‍ ପଡ଼୍‍ୟେତାଗ୍‍ ପଶୁମାନ୍ଦେ ଏର୍‍ ଉନ୍ଦାନ୍‍ ମାଇଦିଙ୍କ୍‍ ୱାଦ୍‍ତା, ଆ ପଡ଼୍‍ୟ୍‍ତାଗ୍‍ ଆୱିନ୍‍ ମୁନେ ଏର୍‍ ଗୁୟ୍‍ନ୍ଦେତେ ଲୋପେ ଆ ତଲ୍‌କା ଇଲ୍‌ୱେ କମା ସାରେ ଡେଙ୍ଗ୍‍ ମାଡ଼ି ୱାଟ୍‍ତଣ୍ଡ୍‍; ଆସୁଟ୍‍ ଏର୍‍ ଉନ୍ଦାଙ୍କ୍‌ ସୁବିଦା ଆତ୍‌ତେ । 39 ମେଣ୍ଡେ ଆ କମାନ୍‍ ଗାରେ ଆୱିନ୍‍ ସଙ୍ଗମ୍‍ ଆତ୍‌ତାଙ୍କ୍‌ ପଶୁସାରେ ରେଖାଙ୍କିତ ନୁ ଚିତ୍ରାକାବ୍‍ରି ଚିହ୍ନା ମାନ୍ଦାନ୍‍ ପିଲା ଆତ୍‌ତା। 40 ଆସୁଟ୍‍ ଯାକୁବ୍‍ ଆ ପିଲାକିଙ୍କ୍‍ ୱେର୍‍ ୱେର୍ ମାଡ଼୍‍ତଣ୍ଡ୍‍, ମେଣ୍ଡେ ଲାବାନ୍‌ତେ ରେକାଙ୍କିତ ନୁ କୁର୍ଣ୍ଣକଲର୍‌ ସାରେ ମାନ୍ଦାନ୍‍ ପର ପେଟି ମେଣ୍ଡାକିଙ୍କ୍‍ କଣ୍ଡେ ୱାଟ୍‍ତଣ୍ଡ୍‍; ଇଦ୍‍ ଲେକାମ୍‍ ଅଣ୍ଡ୍‍ ଲାବନ୍‌ତେ ମାନ୍ଦେତ୍‍ ତଡ଼୍‍ ତାନ୍‍ ମାନ୍ଦେ କାଲ୍‍ପକଟ୍‌ ୱେର୍‍ ମାଡ଼୍‍ତଣ୍ଡ୍‍।

41 ମେଣ୍ଡେ ଶକ୍ତି ମାନ୍ଦାନ୍‍ ପଶୁମାନ୍ଦେ ବେଦ୍‍ପୁଟୁଙ୍କ୍‍ କମାନ୍‍ ଗାରେ ଡ଼ଙ୍କେତ୍‌ ଆଦ୍‌ତା, ଆଦିନ୍‌ ମାଇଦିଙ୍କ୍‍ ଏର୍‍ ଗୁୟ୍‍ନ୍ଦେତ୍‍ ନାଡ଼୍‍ମେ ପଶୁକିନ୍‍ ମୁନେ ଆ କମା ୱାଟ୍‍ତଣ୍ଡ୍‍; ଇତ୍କେ ଦୁର୍ବଳ ପଶୁକିନ୍‍ ମୁନେ ୱାଟଣ୍ଡ୍‌; 42 ଆସୁଟ୍‍ ଦୁର୍ବଳ ପଶୁ ସାରେ ଲାବାନ୍‌ତାୱ୍‍ ନୁ ମେନ୍ଦୁଲ୍‌ ମାନ୍ଦାନ୍‍ ପଶୁସାରେ ଯାକୁବତାୱ୍‍ ଆତ୍‌ତା । 43 ବାତେଙ୍କ୍‍ଇତ୍କେ ଯାକୁବ୍‍ ଗାଟି ଦନି ଆତ୍‌ତଣ୍ଡ୍‌, ମେଣ୍ଡେ ଅନ୍‍ ପଶୁ, ଦାସ ଦାସିଡ଼୍‍, ଉଟ୍‌କ୍‍ ନୁ ଗଦ ନାର୍ଗେ ଆତ୍‌ତା ।