1 ସାରାଲ୍‌ ଶହେ ସତାଇଶ୍‍ ବର୍ଷ ବାଦ୍‌କ୍‌ତେ। 2 ସାରାଲ୍‍ କିଣାନ୍‍ ଦେଶ୍‍ତେ କିରୀୟତ୍‌ ଅର୍ବତେ, ଇତ୍କେ, ହିବ୍ରୋଣତାଗ୍‍ ଡଲ୍‍ତେ। ଅବ୍ରାହାମ୍‌ ସାରାନ୍‍ ସେଙ୍ଗେ ଦୁଃକାମ୍‌ ନୁ ଚିନ୍ତେ ମାଡ଼୍‌ତଣ୍ଡ୍‌।

3 ଅବ୍ରାହାମ୍‌ ତାନ୍‍ ଡଲ୍‍ତେ ମୁତେନ୍‌ ଗାରେଙ୍କ୍‍ ତେଦି ଆଞ୍ଜ୍‌ ହେତ୍‌ତେ ପିଲାକିଙ୍କ୍‍ କେତ୍‍ତଣ୍ଡ୍‍, 4 ନାନ୍ ମି ଲୋପେଙ୍କ୍‍ ନାନେ ବିଦେଶି ନୁ ପ୍ରବାସି ଆତ୍‌ତାନ୍‌; ମି ଲୋପେଙ୍କ୍‍ ନାକିଙ୍କ୍‍ କବର୍‍ତେ ପଡ଼୍‍ୟେ ସେଙ୍ଗେ ଇସୁର୍‌ ୱାୟା ଆସାନଙ୍କ୍‌ ଇମୁଟ୍‍, ଆସୁଟ୍‍ ନାନ୍ ନା ଡଲ୍‍ତେ ମୁତେନ୍‌ କବର୍‍ ଇଦ୍‍ତାନ୍‍।

5 ଆସୁଟ୍‍ ହେତ୍‌ତେ ପିଲା ଅବ୍ରାହାମ୍‌ତିଙ୍କ୍‍ ଉତ୍ତର୍‍ ଇତ୍‍ତା, 6 ହେ ପ୍ରବୁ ପରମେଶ୍ୱର, ମା ଗଟି କେଞ୍ଜା, ନିମେ ମା ଲୋପେ ଶକ୍ତିଶାଲି ରାଜାନି; ଇଞ୍ଜେ ମା ସାୟେତ୍‍ କବର୍‍ ପଡ଼ିୟେତ୍‍ ଲୋପେ ନି ଡଲ୍‌ତେ ମୁତେଙ୍କ୍‍ କବର୍‍ ଇମ୍‍; ମା ଲୋପେଙ୍କ୍‍ ବେନ କବର୍‌ଇଦାନଙ୍କ୍‌ ନି ଡଲ୍‍ତେ ମୁତେଙ୍କ୍‌ ମନା ମାଡ଼ଡ଼୍‍।

7 ଆସୁଟ୍‍ ଅବ୍ରାହାମ୍‌ ତେଦି ଆଗେତ୍‌ଦେଶୀୟ ନାରୁଡ଼୍‍କ୍‍, ଇତ୍କେ, ହେତ୍‌ତେ ପିଲାଙ୍କ୍‍ ମଡ଼୍‍କ୍‍ତଣ୍ଡ୍‍। 8 ମେଣ୍ଡେ ତିର୍‍ୟାତିର୍‍ୟି ଆସ୍‍ କେତ୍‍ତଣ୍ଡ୍‍, ନା କଣ୍ଢେତେ ବାୟ୍‍ଦେ ନା ଡଲ୍‍ତେ ମୁତେଙ୍କ୍‍ କବର୍‍ତାଗ୍‍ ନେଃତାଙ୍କ୍‍ ବେସୁଙ୍କ୍‍ ମିଡ଼୍‍ ସମ୍ମତି ଆଦ୍‌ତିଡ଼୍‌, ଆଲାଇତ୍କେ ନା ଗଟ୍‍ କେଞ୍ଜାଟ୍‍; ମିଡ଼୍‍ ନା ମାଇଦିଙ୍କ୍‍ ସୋହରତେ ମାର୍‍ ଇଫ୍ରୋଣତେ ଗାରେ ନିବେଦନ ମାଡ଼ାଟ୍‍। 9 ଅଣ୍ଡ୍ ମି ଲୋପେଙ୍କ୍‍ ନା କାବୁର୍ ପଡ଼ୟେତ୍‍ ଅଦିକାର୍‌ତେ ମାଇଦିଙ୍କ୍ ମକ୍‌ପେଲାତାଗ୍‍ ତାନ୍‍ ୱା‍ୟାନ୍‍ ନାଡ଼୍‌ମେ ପଡ଼୍‍ୟିତାଗ୍‍ ମାନ୍ଦାନ୍‍ ପଡ଼ିୟେ ନାକିଙ୍କ୍‍ ଡାବୁକ୍‌କିନେ ୱାମିଣ୍ଡ୍‍; ଆଦିନ୍‌ ବେସର୍‍ ଦାମ୍‌ ଆଦ୍‌ତେ ଆସର୍‌ ଅୟ୍‌ମୁଟ୍‌।

10 ଆସୁଟ୍‍ ଇଫ୍ରୋଣ ହେତ୍‌ତେ ପିଲାକିନ୍‍ ଲୋପେ କୁଦିମାତ୍‍ତଣ୍ଡ୍‍; ଆଦିଙ୍କ୍‌ ହିତ୍ତୀୟ ଇପ୍ରୋଣ ନିଜର୍‍ ନଗର୍‍ତେ ଆର୍‍ଦାଗ୍‍ ଅସାନ୍‍ ହେତର୍‌ତେ ପିଲା ସାର୍‍ତଡ଼୍‍ ମୁନେ ଅବ୍ରାହାମ୍‌ତିଙ୍କ୍‍ ଉତ୍ତର୍‍ ଇତ୍‍ତଣ୍ଡ୍‍, 11 ପ୍ରବୁ, ଆଦ୍‍ ଲେକାମ୍‌ ଆୟ, ନା ଗଟି କେଞ୍ଜା; ନାନ୍‍ ନିକିଙ୍କ୍‍ ଆ ପଡ଼୍‍ୟି ନୁ ଆଗେତ୍‌ ନାଡ଼୍‍ମ୍‍ତାଦ୍‍ ପାଡ଼୍‌ ଇତ୍‍ତାନ୍‍; ନାନ୍‍ ନିଜର୍‌ ପିଲୁଡ଼୍‍ତେ ପିଲାକିନ୍‍ ମୁନେ ଆଦ୍‍ ନିକିଙ୍କ୍‍ ଇତ୍‍ତାନ୍‍, ନିମେ ନିଜେ ଡଲ୍‍ତେ ମୁତେଙ୍କ୍‌ ସମାଦି ଇମ୍‍।

12 କିନ୍ତୁ ଅବ୍ରାହାମ୍‌ ଆ ଦେଶ୍‍ତେ ନାରୁଡ଼୍‍ ମୁନେ ମଡ଼୍‍କ୍‍ତଣ୍ଡ୍ ।‍ 13 ମେଣ୍ଡେ ଆ ଦେଶ୍‍ତେ ନାରୁଡ଼୍‍ କେୱ୍‍କିନ୍‍ନାଗ୍‍ ଇଫ୍ରୋଣଙ୍କ୍‍ ସାରେତଡ଼୍‌ ମୁନେ କେତ୍‍ତଣ୍ଡ୍‍, ନିମେ ବେସୁଙ୍କ୍‍ ନାକିଙ୍କ୍‍ ଆଦ୍‍ ଇଦ୍‍ତି, ଆଲାଇତ୍କେ ନିବେଦନ ମାଡ଼ୁତାନ୍‍, ନା ଗଟ୍‍ କେଞ୍ଜାଟ୍‍; ନାନ୍‍ ଆ ୱାୟେତ୍‍ ଦାମ୍‌ ଇଦୁତାନ୍‍, ନିମେ ଆଦିଙ୍କ୍‌ ଗ୍ରହଣ ମାଡ଼ା; ତାନ୍‍ ପେର୍କେ ନାନ୍‍ ଆ ପଡ଼୍‍ୟ୍‍ତାଗ୍‍ ନା ଡଲ୍‍ତେ ମୁତେଙ୍କ୍‍ ସମାଦି ଇଦ୍‍ତାନ୍‍।

14 ଆସୁଟ୍‍ ଇଫ୍ରୋଣ ଅବ୍ରାହାମ୍‌ତିଙ୍କ୍‍ ଉତ୍ତର୍‍ ଇସ୍‍ କେତ୍‍ତଣ୍ଡ୍‍, 15 ପ୍ରବୁ, ନା ଗଟ୍‍ କେଞ୍ଜା; ବୁମ୍‍ଦେ ସୁଦୁର୍‍ ବୂମ୍‌ଦେ ଦାମ୍‌ ତ ଚାରିଶହ ରୂପା ଡାବ୍‌କ୍‌, ନି ନୁ ନା ଲୋପେ ଆଦ୍‍ ବା ବେସର୍‍ ? ଆଦିନ୍‌ ମାଇଦିଙ୍କ୍‍ ନିମେ ନିଜେ ଡଲ୍‍ତାଦିଙ୍କ୍‍ ସମାଦି ଇମ୍‍। 16 ଇଫ୍ରୋଣତେ ଇ ଗଟ୍‍ କେଞ୍ଜି ଅବ୍ରାହାମ୍‌ ହିତ୍ତୀୟତେ ପିଲାକିନ୍‍ ମୁନେ ଇଫ୍ରୋଣ କେସ୍‌ମାନ୍ଦାନ୍‌ ସଂକ୍ୟାତେ ଇଞ୍ଜେତ୍‌ ବେପାରିଡ଼୍‌ ଲୋପେ ଚାଲେମ୍‌ଆତ୍‌ତେ ଚାରିଶହ ରୂପା ଡାବ୍‌କ୍‌ ଲେକି ଇଫ୍ରୋଣଙ୍କ୍‍ ଇତ୍‍ତଡ଼୍‍।

17 ତାନ୍‍ ପେର୍କେ ମମ୍ରିତେ ମୁନେତ୍‍ ମକ୍‌ପେଲାତେ ଇଫ୍ରୋଣତେ ବେନ୍‍ ୱାୟା ମାତ୍‍ତା, ଆ ୱାୟା ନୁ ଆୱିନ୍‍ନାଡ଼୍‍ମେତ୍‍ ପଡ଼ିୟେ ନୁ ଆଗେତ୍‌ ନାଲୁପାକେତ୍‍ ମାଡ଼ାକ୍‍ ଅବ୍ରାହାମ୍‍ତାୱୁ ଆତ୍‌ତା, 18 ଇ ସାରେତ୍‍ ହିତ୍ତୀୟତେ ପିଲାକିନ୍‍ ମୁନେ, ଇତ୍କେ, ଅନ୍‍ ନଗର୍‍ତେ ଆର୍‍ଦାଗ୍‍ ଅସାନଡ଼୍‍ ସାରେତଡ଼୍‍ ମୁନେ ଅବ୍ରାହାମ୍‌ତେ ଅଦିକାର୍‍ ତିଆର୍‌ ମାଡ଼୍‍ତଡ଼୍‍।

19 ଅବ୍ରାହାମ୍‌ ମମ୍ରିତେ ମୁନେତ୍‍ ମକ୍‌ପେଲା ୱାୟେତ୍‍ ପଡ଼ିୟେକଞ୍ଚ୍‍ ଅନ୍‍ ମୁତେ ସାରାଙ୍କ୍‍ ସମାଦି ଇତ୍‍ତଣ୍ଡ୍‍। ଆ ପଡ଼୍‍ୟେ କିଣାନ୍‍ ଦେଶ୍‍ତେ ହିବ୍ରୋଣ୍‍। 20 ଇଦ୍‍ପୁଟୁଙ୍କ୍‍ ସମାଦି ପଡ଼୍‍ୟେତ୍‍ ଅଦିକାର୍‍ତେ ମାଇଦିଙ୍କ୍‍ ଆ ପଡ଼୍‍ୟି ନୁ ଆଗେତ୍‌ ନାଡ଼୍‍ମେତ୍‍ ପଡ଼ିୟେ ଅବ୍ରାହାମ୍‌ତେ ଅଦିକାର୍‍ ହେତ୍‌ତେ ପିଲାକିନ୍‍ ତଡ଼୍‌ ରାଜି ଆତ୍‌ତେ ।