1 ସଦାପ୍ରବୁ ନିଜର୍‍ ବାକ୍ୟ ଅନୁସାରେ ସାରାନ୍‍ କେସ୍‌ ମାନ୍ଦାନାଦ୍‌ ଅନୁସାର୍‌ତେ ମାଡ଼୍‍ତଣ୍ଡ୍‍; ମେଣ୍ଡେ ସଦାପ୍ରବୁ ବାତ୍‍ ମାଡ଼ିମାତ୍‍ତଣ୍ଡ୍‍, ସାର୍‍ନ୍‍ ପର ଆଦ୍‍ ମାଡ଼୍‍ତଣ୍ଡ୍‍। 2 ଆସୁଟ୍‍ ସାରାଲ୍‍ ଅବ୍ରାହାମ୍‌ତେ ମୁୟ୍‍ତେ ସମୟତେ ଡଙ୍କେତ୍‍ ଆସ୍‍ ପରମେଶ୍ୱର୍‍ତେ ତଡ଼୍‌ ଟିକ୍‍ ମାଡ଼ିମାନ୍ଦାନ୍‍ ସମୟ୍‍ତେ ମାର୍‍ ଜନ୍ମ ମାଡ଼୍‍ତେ। 3 ଆସୁଙ୍ଗ୍‌ ଅବ୍ରାହାମ୍‌ ସାରାନାଗାଙ୍କ୍‌ ଜନମ୍‌ ଆତ୍‌ତେ ମାରିନ୍‍ ପେଦେର୍‍ ଇସ୍‍ହାକ୍‍ ୱାଟ୍‍ତଣ୍ଡ୍‍। 4 ମେଣ୍ଡେ ଅବ୍ରାହାମ୍‌ ପରମେଶ୍ୱରତେ ଆଦେଶ୍‌ ଅନୁସାରେ ନିଜର ମାର୍‍ ଇସ୍‍ହାକ୍‍ତିଙ୍କ୍‍ ଆଟ୍‌ ଦିନେତ୍‌ ଲପେ ସୁନ୍ନତ ମାଡ଼୍‍ତଣ୍ଡ୍‍। 5 ଅବ୍ରାହାମ୍‌ତେ ଶହେ ବର୍ଷ ବୟସ୍‍ତେ ତାନ୍‍ ମାର୍‍ ଇସ୍‍ହାକ୍‍ ଜନ୍ମ ଆତ୍‌ତଣ୍ଡ୍‌ । 6 ମେଣ୍ଡେ ସାରାଲ୍‍ କେତ୍‍ତେ, ପରମେଶ୍ୱର ନାକିଙ୍କ୍‌ କୁସି ନୁ କାୱୁଦାନା ଇତ୍‌ତଣ୍ଡ୍‌ , ଇଦ୍‍ କେଞ୍ଜି ସାରେତଡ଼୍‍ ନା ତଡ଼୍‍ କାୱ୍‍ଦ୍‌ତଡ଼୍‍। 7 ଅଣ୍ଡ୍‌ ମେଣ୍ଡେ କେତ୍‍ତଣ୍ଡ୍‍, ସାରା ପିଲାକିଙ୍କ୍‍ ବମ୍‍ତାଗ୍‍ ପାଲ୍‍ ଉସ୍‍ପିତିନ୍‍, ଇ ଗଟ୍‍ ଅବ୍ରାହାମ୍‌ତିଙ୍କ୍‍ ବେନ କେତ୍‍ପାର୍‍ୱେଣ୍ଡ୍ ? ଆଗେକ୍‌ମିକା ନାନ୍‍ ଇଞ୍ଜେ ତାନ୍‍ ମୁୟ୍‍ତନ୍‍ ସମୟତେ ମାର୍‍ ଜନ୍ମ ଇତ୍‌ତାନ୍‍।

8 ମେଣ୍ଡେ ପେକାଲ୍‍ ବେଡ଼ିୟ୍‌ ଆତ୍‌ତାଙ୍କ୍‌, ଅଡ଼୍‍ ଅଂକିଙ୍କ୍‍ ପାଲ୍‍ ଉସ୍‍ପାନାଦ୍‍ ୱିଡ଼୍‍ସ୍ପ୍‍ତଡ଼୍‍, ମେଣ୍ଡେ ବେନ୍‌ ଦିନେ ଇସ୍‍ହାକ୍‍ତିଙ୍କ୍‌ ପାଲ୍‌ ଉନ୍ଦାନାଦ୍‌ ୱିଡ଼୍‌ସ୍ପତେ, ଆଦ୍‌ ଦିନେ ଅବ୍ରାହାମ୍‌ ବେଡ଼୍‍ୟାଦ୍‍ ବଜି ତିଆର୍‍ ମାଡ଼୍‍ତଣ୍ଡ୍‍।

9 ମିସ୍ରିୟ ହାଗାର୍‍ ଅବ୍ରାହାମ୍‌ତେ ମାଇଦିଙ୍କ୍‍ ବେନ୍‍ ମାର୍‍ ଜନ୍ମ ମାଡ଼ିମାତ୍‍ତେ, ଆ ମାର୍‌ ଇସାକ୍‌ତିଙ୍କ୍ ପାସ୍କାନାଦ୍‌ ସାରାଲ୍‌ ଉଡ଼୍‌ତେ। 10 ଆଦିଙ୍କ୍‌ ସାରାଲ୍‌ ଅବ୍ରାହାମ୍‌ତିଙ୍କ୍‍ କେତ୍‍ତେ, ନିମେ ଇ ଦାସିଙ୍କ୍‍ ନୁ ଇଦିନ୍‍ ମାରିଙ୍କ୍‍ ଦୁର୍‍ ମାଡ଼ିମ୍‍; ଇତ୍କେ ଇ ଦାସିନ୍‍ ମାର୍‍ ନା ମାର୍‍ ଇସ୍‍ହାକ୍‍ ତଡ଼୍‍ ଉତ୍ତରାଦିକାରି ଆୟ୍‍ୟଣ୍ଡ୍‍। 11 ଇଦ୍‍ ଗଟି କେଞ୍ଜି ଅବ୍ରାହାମ୍‌ ଦୁଃକାମ୍‌ ଆତ୍‌ତଣ୍ଡ୍‌, ବାତେଙ୍କ୍‌ଇତ୍କେ ଇସାକ୍‌ ଆନ୍ତେ ଅନ୍‌ ମାର୍‌ ମାତ୍‌ତଣ୍ଡ୍‌। 12 ଆସୁଟ୍‍ ପରମେଶ୍ୱର ଅବ୍ରାହାମ୍‌ତିଙ୍କ୍‍ କେତ୍‍ତଣ୍ଡ୍‍, ନିମେ ଇ ପେକାଙ୍କ୍‍ ନୁ ନି ଦାସିନ୍‍ ସେଙ୍ଗେ ଦୁଃକାମ୍‌ ଆୟ୍‍ମା; ସାରାଲ୍‍ ନିକିଙ୍କ୍‍ ବାତେ କେତୁତେ, ତାନ୍‍ ଆ ଗଟିନେ ମନ୍‌ ଇମ୍‌; ବାତେଙ୍କ୍‍ଇତ୍କେ ଇସ୍‍ହାକ୍‍ତାଗାଙ୍କ୍‌ ମିୟାଦ୍‍ ପିଲୁଡ଼୍‍ ନାର୍ଗେ ଆଦ୍‌ତା । 13 ମେଣ୍ଡେ ଇ ଦାସିନ୍‍ ମାର୍‍ ମି ପିଲୁଡ଼୍‍, ଆଦିଙ୍କ୍‌ ମାମ୍‌ ଅନ୍‍ଆଗାଙ୍କ୍‍ ଅଣ୍ଡୟ୍‍ ଗୋଷ୍ଠି ତିଆର୍‌ ମାଡ଼ିକା।

14 ତାନ୍‌ପେର୍କେ ଅବ୍ରାହାମ୍‌ ନାର୍କକ୍‍ ତେଦି ରୁଟି ନୁ ଏର୍‍ବର୍ତ୍ତିମାଡ୍‍ତେ ବୁର୍‌କେ ଅସ୍ ହାଗାର୍‍ତେ ଆଟ୍‌ତାଗ୍‌ ଇସ୍‍ ପେକାଙ୍କ୍‍ ସର୍ପା ମାଡ଼ି ତାଂକିଙ୍କ୍‍ ରୟ୍‍ସିତ୍‍ତଣ୍ଡ୍‍; ଆସୁଟ୍‍ ଆଦ୍‍ ଆଞ୍ଜ୍‌ ବେର୍‌ଶେବା ପେଦେର୍‍ ଆଞ୍ଚିନା ଆତ୍‌ତେ । 15 ମେଣ୍ଡେ ବୁର୍‌କେତ୍‌ ଏର୍‍ ତେର୍‍ତାଙ୍କ୍‍, ହାଗାର୍‍ ଅଣ୍ଡୟ୍‍ ପଦ୍‍ଲେତ୍‍ ମଦଲ୍‍ ପେକାଙ୍କ୍‍ ୱିଡ଼୍‍ସିତ୍‍ତେ। 16 ନୁ ହାଗାର୍‌ ଆଗାଙ୍କ୍‍ ସୁଦୁର୍ ଦୁରାମ୍‍ ଆଞ୍ଜ୍‌ କୁଦ୍‍ତେ; ଇତ୍କେ ଆଦ୍‍ କେତ୍‍ତେ, ପେକାଲ୍‍ ଡଲାନାଦ୍‍ ନାନେ ଉଡ଼େପାର୍‌ୱନ୍‌। ମେଣ୍ଡେ ଆଦ୍‍ ଅନ୍‍ ମୁନେ କୁଦି ଗାଟି ଲେଙ୍ଗ୍‍ଦେ କେୟ୍‍ତେ।

17 ଆସୁଟ୍‍ ପରମେଶ୍ୱର୍‍ ପେକାନ୍‍ ଲେଙ୍ଗ୍‍ କେଞ୍ଜ୍‍ତଣ୍ଡ୍‍; ମେଣ୍ଡେ ପରମେଶ୍ୱର୍‍ତେ ଦୂତ୍‍ ମାବ୍‍ ତାଗାଙ୍କ୍‍ କାର୍ଙ୍ଗି ହାଗାର୍‍ତିଙ୍କ୍‍ କେତ୍‍ତେ, ହୋ ଆଗାର୍‍, ନିକ୍‍ ବାଲା ଆତ୍‌ତେ ? ୱେର୍‌ମା; ଇତ୍କେ ବେନ୍‍ ପଡ଼୍ୟ୍‍ତାଗ୍‍ ପେକାଲ୍‍ ମିନ୍ଦେଣ୍ଡ୍‍, ଆ ପଡ୍‍ୟିତାଗ୍‍ ପରମେଶ୍ୱର୍‍ ଅନାଦ୍‍ ଲେଙ୍ଗ୍‍ କେଞ୍ଜ୍‍ତଣ୍ଡ୍‍। 18 ନିମେ ନିସ୍‍ ପେଃକାଙ୍କ୍‌ ତେୟ୍‍ସ୍‍ କାୟିଦେ ପୟିମ୍‌; ମାମ୍‌ ଅନ୍‍ ଆଗାଙ୍କ୍‍ ଅଣ୍ଡୟ୍‍ ବେଡ଼୍‍ୟାଦ୍‍ ଗୋଷ୍ଠି ତିଆର୍‍ ମାଡ଼ିତମ୍‍। 19 ଆସୁଟ୍‍ ପରମେଶ୍ୱର୍‍ ଅନ୍‍ କଣ୍ଢା ଉଡ଼୍‍ତାଙ୍କ୍‍, ଆଦ୍‍ ୱେରଡ଼୍‌ ନୂୟ୍‍ ଉଡ଼ିମେଣ୍ଡ୍‍ ଆଗେ ଆଞ୍ଜ୍‌ ବୁର୍‌କାତାଗ୍‍ ଏର୍‍ ବର୍ତ୍ତିମାଡ଼ି ପେକାଙ୍କ୍‍ ଉସ୍ପ୍‍ତେ। 20 ଅନନ୍ତର ପରମେଶ୍ୱର୍‍ ପେକାନ୍‍ ତଡ଼୍‌ ଆତ୍‌ତାଙ୍କ୍‌, ଅଣ୍ଡ୍‍ ବେଡ଼୍‍ୟଣ୍ଡ୍‍ ଆତ୍‌ତଣ୍ଡ୍‌, ବାତେଙ୍କ୍‌ଇତ୍କେ ଆଞ୍ଚିନାଗ୍‌ ମାଞ୍ଜ୍‍ ୱିଲ୍‌ବନୁୱାଲ୍‌ ଆତ୍‌ତଣ୍ଡ୍‌ । 21 ଅଣ୍ଡ୍‍ ପାରଣ୍‍ ପେଦେର୍‍ତେ ଆଞ୍ଚିନାଗ୍‌ ବାସ ମାଡ଼୍‍ତଣ୍ଡ୍‍; ତାନ୍‍ପେର୍କେ ତାମ୍‍ ୟାୟ୍‍ ଅଣ୍ଡୟ୍‍ ମିସର ଦେଶ୍‍ତେ ପିକ୍‍ତଡ଼୍‍ ଅଂକିଙ୍କ୍‍ ପେଣ୍ଡୁଲ୍‍ ମାଡ଼୍‍ତେ।

22 ଇ ସମୟ୍‍ତେ ଅବିମେଲକ୍‍ ନୁ ଫିକୋଲ ପେଦେର୍‍ତେ ତାନ୍‍ ସେନାପତି ଅବ୍ରାହାମ୍‌ତିଙ୍କ୍‍ କେତ୍‍ତଣ୍ଡ୍‍, ପରମେଶ୍ୱର୍‍ ନି ସାରେ ପାଡ଼୍‍ୟିତାଗ୍‍ ତଡ଼୍‍ ମିନ୍ଦେଣ୍ଡ୍‍। 23 ଆଦିନ୍‌ ମାଇଦିଙ୍କ୍‍ ନିମେ ମା ପର ନୁ ମା ମାର୍‌ଇରିୱୁଡ଼୍‌ ପର ବିଶ୍ୱାସ୍‍ଗାତକତା ମାଡ଼୍‍ମା; ମେଣ୍ଡେ ମାମ୍‌ ନି ପର ବେଦ୍‌ପୁଟୁଙ୍କ୍‍ ଅନୁଗ୍ରହ ମାଡ଼ିମିନ୍ଦେମ୍‍, ଆଦେ ଅନୁସାରେ ନିମେ ମା ପର ନୁ ମି ମାନ୍ଦାନ୍‍ ପଡ଼୍‍ୟ୍‍ ଇ ଦେଶ୍‍ ପର ଦୟା ମାଡ଼ିତ୍‍, ମା ଗାରେ ପରମେଶ୍ୱର୍‍ତିଙ୍କ୍ ପ୍ରମାଣ ମାଡ଼ି ଇ ଗଟ୍‍ କେଲ୍‌ମ୍‌।

24 ଆସୁଟ୍‍ ଅବ୍ରାହାମ୍‌ କେତ୍‍ତଣ୍ଡ୍‍, ନାନ୍‍ ପ୍ରମାଣ ମାଡ଼୍‌ତାନ୍‍।

25 ମେଣ୍ଡେ ଅବିମେଲ୍‍କତେ ଦାସଡ଼୍‍ ଅବ୍ରାହାମ୍‌ତେ ଅଣ୍ଡ୍‍ ନୂୟ୍‍ତିଙ୍କ୍‍ ଶକ୍ତିତଡ଼୍‍ ରାମ୍କ୍‌ ମାଡ଼ିମାତ୍‍ତଡ଼୍‍, ଆଦିନ୍‌ ମାଇଦିଙ୍କ୍‍ ଅବ୍ରାହାମ୍‍ ଅବିମେଲକଙ୍କ୍‍ କାଲ୍‌ପ୍‌ତଣ୍ଡ୍‌। 26 ଆସୁଟ୍‍, ଅବିମେଲକ କେତ୍‍ତଣ୍ଡ୍‍, ଇ ପାଡ଼ିୟ୍‌ ବେନ ମାଡ଼୍‍ତଣ୍ଡ୍‍, ଆଦ୍‍ ମାମେ ପୁନମ୍‍; ମେଣ୍ଡେ ନିମେ କେ ମାକିଙ୍କ୍‍ ଜଣା ମାଡ଼୍‍ୱିନ୍‍; ମାମ୍‌ ମାତର୍‌ ନେଣ୍ଡେ ଇ ଗଟ୍‍ କେଞ୍ଜ୍‍ତମ୍‍। 27 ଅବ୍ରାହାମ୍‌ ମେଣ୍ଢା ନୁ ଗଡ୍‌କ୍‍ ଅସ୍‍ ଅବିମେଲକଙ୍କ୍‍ ଇତ୍‍ତଣ୍ଡ୍‍, ମେଣ୍ଡେ ଇର୍‍ୱୁଡ଼୍‍ ଅଣ୍ଡୟ୍‌ ନିୟମ୍‌ ତିଆର୍‌ ମାଡ଼୍‍ତଣ୍ଡ୍‍। 28 ମେଣ୍ଡେ ଅବ୍ରାହାମ୍‌ ମାନ୍ଦ୍‍ତାଗାଙ୍କ୍‍ ସାତ୍‍ଟାନ୍‍ ମେଣ୍ଢା ୱେର୍‍ ମାଡ଼ି ନେହ୍‍ତଣ୍ଡ୍‍। 29 ଆସୁଟ୍‍ ଅବିମେଲକ ଅବ୍ରାହାମ୍‌ତିଙ୍କ୍‍ ପାଚାରା ମାଡ଼୍‍ତଣ୍ଡ୍‍, ନିମେ କି ବାତେଙ୍କ୍‌ ଇ ସାତ୍‍ଟାନ୍‍ ମେଣ୍ଢାକିଙ୍କ୍‍ ୱେର୍‍ ମାଡ଼ି ନେଃତିନ୍‍ ?

30 ଅବ୍ରହାମ୍‍ କେତ୍‍ତଣ୍ଡ୍‍, ନାନେ ଯେ ଇ ନୂୟ୍‍ ଡେୱି ମିନ୍ଦେନ୍‍, ଆଦିନ୍‌ ପ୍ରମାଣ୍‌ତେ ସେଙ୍ଗେ ନାୟାଗାକଞ୍ଚ୍‍ ଇ ସାତ୍‍ଟାନ୍‍ ମେଣ୍ଢା ଅଦ୍‍ୱେୟ୍‍ତିତ୍‍। 31 ଆଦିଙ୍କ୍‌ ଆ ପଡ଼୍‍ୟେତ୍‍ ପେଦେର୍‍ ବେର୍‌ଶେବା ଆତ୍‌ତେ, ବାତେଙ୍କ୍‌ଇତ୍କେ ଅଡ଼୍‌ ଇର୍‌ୱୁଡ଼୍‌ ପ୍ରମାଣ ମାଡ଼ିମାତ୍‌ତଡ଼୍‌।

32 ଇଦ୍‍ପୁଟୁଙ୍କ୍‍ ଅଡ଼୍‍ ବେର୍‌ଶେବାତ୍‍ ଗାରେ ନିୟମ୍‌ ତିଆର୍‌ ମାଡ଼୍‍ତାଙ୍କ୍‍; ଅବିମେଲକ ନୁ ଫିକୋଲ ପେଦେର୍‍ତେ ତାନ୍‍ ସେନାପତି ତେଦି ପଲେଷ୍ଟିୟଡ଼୍‍ ଦେଶ୍‍ତା ମାଲ୍‍ସ୍‍ ଆତ୍‌ତଣ୍ଡ୍‌। 33 ଅବ୍ରାହାମ୍‍ ଆ ବେର୍‌ଶେବାତେ ଗାରେ ଅଣ୍ଡୟ୍‍ ଜାଉଁ ମାଡ଼ା ଉର୍‍ସ୍କି ଆ ପଡ଼୍ୟ୍‍ତାଗ୍‍ ଅନାଦି ଅନନ୍ତ ପରମେଶ୍ୱର୍‌ ସଦାପ୍ରବୁନ୍‍ ପେଦେର୍‍ତଡ଼୍‍ ପ୍ରାର୍ତନା ମାଡ଼୍‍ତଣ୍ଡ୍‍। 34 ମେଣ୍ଡେ ଅବ୍ରାହାମ୍‌ ପଲେଷ୍ଟିୟଡ଼୍‍ ଦେଶ୍‍ତାଗ୍‍ ନାର୍ଗେ କାଲାମ୍‍ ଯାକ ବାସ ମାଡ଼୍‍ତଣ୍ଡ୍‍।