1 ✝ଦାଦାନଡ଼ି ନୁ ଏଲାସ୍କ୍‍, ମାସିଦୋନିଆତେ ମଣ୍ଡଲିକିନାଗ୍ ବେଲାନ୍ ଇଶ୍ୱର୍‌ତେ ଅନୁଗ୍ରହ ଲାବ୍ ମାଡ଼୍‍ତଡ଼୍, ଆଦ୍ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତାନ୍ । 2 ଅଡ଼୍‌ ଗାଟି ତିପାଲ୍ ଇସ୍ ପରିକ୍ଷିତ୍ ଆଦ୍‍ତଡ଼୍ ନୁ ଅଡ଼୍‌ ଗାଟି ଗରିବ୍ ଆତ୍‍କେ ମିକା, ନାର୍‍ଗେ ଦାନ୍‍ ଇସ୍ ନିଜେର୍‍ ମାନ୍‍ତାଦ୍‍ ୱାସମିନ୍ଦେନ୍ ୱେଡ଼୍‍କ୍‍ କେସ୍ ମିନ୍ଦେ । 3 ନାନ୍ ନିଜାମ୍‍ତେ କେତୁତାନ୍ ଯେ, ଅଡ଼୍‌ ନିଜେତ୍ ଇଚ୍ଛାତେ ବେସର୍ ପାର୍‍ତ ଆସର୍ ଇତ୍‍ତଡ଼୍ ନୁ ମେଣ୍ଡେ ଅଦିକ୍‌ ମିକା ଦାନ ମାଡ଼ିମିନ୍ଦେଡ଼୍ । 4 ଯିହୁଦାତାଗ୍ ମାନ୍ଦାନ୍ ଇଶ୍ୱର୍‌ତେ ନାରୁଡ୍‍କିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ ସୁଯୋଗ୍ ଇୱିଡ଼୍ ଇଞ୍ଜ୍ ଅଡ଼୍‌ ମାକିଂଙ୍କ୍ ଅନୁରୋଦ୍‍ ମାଡ଼ି କେସ୍‍ମାତ୍‍ତଡ଼୍ । 5 ଅଡ଼୍‌ଆଗାଙ୍କ୍‌ ମାମ୍‍ମେ ଇସର୍ ଆଶେ ମାଡ଼ି ମାନମ୍ । ମୁନେ ଅଡ଼୍‌ ନିଜେ ନିଜେତିଙ୍କ୍ ପ୍ରବୁନ୍ ପାକେ ଉତ୍ସର୍ଗ ମାତ୍‍ତଡ଼୍ ନୁ ପେର୍‍କେ ଇଶ୍ୱର୍‌ତେ ଇଚ୍ଛା ଲେକାମ୍‍ତେ ନିଜେ ନିଜେତିଙ୍କ୍ ମାନ୍‍ ଉଦ୍ଦେଶ୍ୟତେ ଉତ୍ସର୍ଗ ମାଡ଼୍‍ତଡ଼୍ । 6 ତିତସ୍‍ତଡ଼୍ ଇଦ୍ ପାଡ଼୍‍ୟି ଆରାମ୍ ଆସ୍‍ମାତେ । ଇଦିଙ୍କ୍ ଚାଲାମାଡ଼ି ନେହେତାନ୍ ସେଙ୍ଗେ ନୁ ଇଦ୍ ପ୍ରେମାତାଦ୍‍ ସେବା ପାଡ଼ିୟିଦାଗ୍ ମିକିଂଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ତିତସ୍‍ତିଙ୍କ୍ ଅନୁରଦ୍‌ ମାଡ଼୍‍ତମ୍ । 7 ମିଡ଼୍ ମିୟାଗ୍ ବାତ୍ ସାର୍‍ରେ ମିନ୍ଦେ ଆଗେ ସାଉକାର୍ ଆଦ୍‍ତିଡ଼୍, ବିଶ୍ୱାସ୍, ସାୟେ ଗଟି କେତାନଡ଼୍, ବୁଦ୍‍ତେ, ସାହାଯ୍ୟ ମାଡ଼ାନଙ୍କ୍ ତିଆର୍ ନୁ ମା ସେଙ୍ଗେ ପ୍ରେମ ତଅତାନଙ୍କ୍ ନାର୍‍ଗେ ପରିଚୟ ଇମୁଟ୍, ଇଦ୍ ନାୟାଦ୍ ଇଚ୍ଛା ।

8 ଇଦ୍ ବିଷୟ୍‍ତେ ମିଇ ସେଙ୍ଗେ ନାନ୍ ବାତେବା ମିଚ୍‌ ତିଆର୍ ମାଡ଼ନ୍ । ମାତର୍ ସେବାକାମ୍‍ଦାଗ୍ ବାଗାତଡ଼୍ ଇଚ୍ଛାତେ ୱେଷଡ଼୍‍ଇସ୍ ମିଇ ପ୍ରେମତେ ପାଡ଼୍‍ୟି ପୁନ୍ଦାନଙ୍କ୍ ନାନ୍ ଆଲ୍‍ସି ମାଡ଼ୁତାନ୍ । 9 ମୀଡ଼୍ ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ବିଷୟ ପୁନୁଟ୍ । ଅଣ୍ଡ୍‌ ସାଉକାର୍ ଆସ୍‍ମିକା ମିଇ ସେଙ୍ଗେ ଗରିବ୍ ଆତ୍‍ତଣ୍ଡ୍, ଅନ୍‌ ଗରିବ୍ ତଡ଼୍ ମିଡ଼୍ ଗାଲା ବେଲା ସାଉକାର୍ ଆଦ୍ ପାର୍‍ଦ୍‍ତିନ୍ ।

10 ଇଦ୍ ବିଷୟ୍‍ତେ ମିକିଂଙ୍କ୍ ନାୟଦ୍ ଇଦ୍ ଗଟ୍ ଆତ୍‍ତେ ୱେଷଡ଼୍‌ ମିଡ଼୍ ବାତେଏ ଆରାମ୍ ମାଡ଼ି ମାତ୍‍ତିଡ଼୍, ଆଦ୍ ଇଞ୍ଜେ ତେର୍‍ସ୍ପାନାଦ୍ ମିୟାଦ୍ ସାୟେ । ମାତର୍ ପାଡ଼୍‍ୟି ମାଡ଼ାନନ୍ ଆୟ୍‍ୟ, ମାତର୍ ପାଡ଼୍‍ୟି ମାଡ଼ାନଙ୍କ୍ ଯୋଜନା ମାଡ଼ାନାଗ୍ କେତାନାଦ୍ ମିଡ଼୍ ଆଦ୍‍ତିଡ଼୍ ମୁନ୍‍ନେତଡ଼ି । 11 ଆଦିଙ୍କ୍ ପାଡିୟ୍‌ ମାଡ଼ ମାନୁଟ୍ ନୁ ମିଇ ସୁଯଗ୍‍ତେ ଉଡ଼ି ଆଦ୍ ତେର୍ସ୍ପାଟ୍ । ଯୋଜନା ମାଡ଼ାନ୍ ୱେଲେ ମିୟାଦ୍ ବେନ୍ ଲେକାମ୍ ଇଚ୍ଛା ମାତ୍‍ତେ, ପାଡ଼୍‍ୟି ତେର୍‍ନା ଯାକ ଆଦିଙ୍କ୍ ଲେକେତ୍‌ ଆଦ୍‍ପି ୱାଟାଟ୍ । 12 ବାତେଙ୍କ୍ ଇତ୍‍କେ ଦାନ ମାଡ଼ାନାଦ୍ ଇଚ୍ଛା ମାତ୍‍ତେ, ନାରୁନ୍ ତାନ୍ ପାର୍‍ତେ ଆସର୍ ବାତ୍ ଦାନ ମାଡ଼ିତନ୍, ଇଶ୍ୱର୍ ଗ୍ରହନ୍ ମାଡ଼ିତନ୍ । ତାନ୍ ସମ୍ପତିତ୍‍ତେ ତାନ୍ ବାଇଦେ ଅଣ୍ଡ୍‌ ବାତେଏ ଇୱିଣ୍ଡ୍ ଇଞ୍ଜ ଇଶ୍ୱର୍ ଇଚ୍ଛା ମାଡ଼ଣ୍ଡ୍ ।

13 ମିଇ ପରୁ ଇଦ୍ ବଜ୍‍ତିଙ୍ଗ୍ ଲଦାମାଡ଼ି ବାଗାତଡ଼୍‍କ୍ ୱେଡ଼୍‍କ୍‍ ଇଦା‍ନ୍‍ ସେଙ୍ଗେ ନାନ୍‍ନେ ଆଲ୍‍ସି ମାଡ଼ନ୍, 14 ବାତେଙ୍କ୍ ଇତ୍‍କେ ଇଞ୍ଜେ ମିୟାଦ୍ ନାର୍‍ଗେ ମାନ୍‍ନାଙ୍କ୍ ଅବାବ୍‍ତେ ମାନ୍ଦାନ୍ ନାରୁଡ଼୍‍କ୍ ସାହାଯ୍ୟ ମାଡ଼ାନାଦ୍ ମୀୟାଦ୍ ପାଡ଼୍‍ୟି । ଦିନାମ୍ ୱାଦ୍‍ତେ, ମିଡ଼୍ ଅବାବ୍‍ତେ ମାନ୍ଦାନ୍ ୱେଲେ, ଅଡ଼ାଦ୍‌ ସମ୍ପତି ମିୟାଦ୍ ଅବାବ୍ ପୁରନ୍‍ମାଡ଼ାନ୍ ସେଙ୍ଗେ ସାହାଯ୍ୟ ମାଡ଼ିତିଡ଼୍ । ଇଦ୍‍ଲେକାମ୍ ମିଡ଼୍ ଆନ୍‌‍ତେ ସାମାନ୍ ଲେକେମ୍ ଗେଲ୍‍ସାନଙ୍କ୍ ‍ପାର୍‍ଦ୍‍ତିଡ଼୍ । 15 ଦର୍ମଶାସ୍ତ୍ରତାଗ୍ ଲେକାମିନ୍ଦେ, "ବେନ ନାର୍‍ଗେ ଗୁଡ଼୍‍ପିତଣ୍ଡ୍, ଅନାଦ୍‌ ବାତେଏ ମାୟ୍‍ୟ । ବେନ ସୁକୁକ୍ ଗୁଡ଼୍‍ପିତଣ୍ଡ୍, ଅନାଦ୍‌ ମେଣ୍ଡେ ଅବାବ୍ ଆୟ୍‍ୟ ।"

16 ଇଶ୍ୱର୍‌ତେ ଦନ୍ୟବାଦ୍ ଆୟି । ବାତେଙ୍କ୍ ଇତ୍‍କେ ମାନ୍‍ଲେକାମ୍ ତିତସ୍‍ ମିକା ମିକିଂଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ତିଆର୍ ମିନ୍ତେନ୍ । 17 ଅଣ୍ଡ୍‌ ମାତର୍ ମାନ୍‍ ଅନୁରଦ୍‌ତିଙ୍କ୍‌ ସ୍ୱାଗତ୍ ମାଡ଼ଡ଼୍‍, ମାତର୍ ମିକିଂଙ୍କ୍ ସାହାଯ୍ୟ ମାଡ଼ାନଙ୍କ୍ ଇସର୍ ତିଆର୍‍ତେ ମିନ୍ଦେନ୍ ଯେ, ନିଜେତ୍ ଇଚ୍ଛାତେ ମୀଇପାକେ ଆଦାନ୍ ସେଙ୍ଗେ ଅନ୍‌ ମାନ୍‍ ମାଡ଼ିମିନ୍ଦେଣ୍ଡ୍ । 18 ଅନ୍‌ ତଡ଼୍ ମେଣ୍ଡେଅର୍‍ତୁନ୍ ଦାଦାଙ୍କ୍ ରତୁତମ୍ । ସୁସମାଚାର୍‌ ଗଟ୍ ପ୍ରଚାର୍ ମାଡ଼ାନଙ୍କ୍ ସାରେ ମଣ୍ଡଲିନାଗ୍ ଅଣ୍ଡ୍‌ ବିଶେଷ୍ କ୍ୟାତିଲାବ୍ ମାଡ଼୍‍ତଣ୍ଡ୍ । 19 ମାତର୍ ଆସର୍ ଆୟ୍‍ୟ, ପ୍ରବୁନ୍ ଗୈରବ୍ ନୁ ମାନାଦ୍‍ ନମସ୍କାର୍ କେତ୍‍ତାନ୍ ସେଙ୍ଗେ ବେନ୍ ସେବା ପାଡ଼୍‍ୟି ମାନାଡ଼୍ ପାଏମ୍ ଆତ୍‍ତାଡ଼୍, ଆଗେ ମାନାଦ୍‍ ସାରେତାଗ୍‍ତଡ଼୍ ଆଦାନ୍ ସେଙ୍ଗେ ବେନାବେନା ମଣ୍ଡଲି ଅଂକିଙ୍କ୍‌ ଏଞ୍ଚି ମିନ୍ତେ ।

20 ଉଦାର୍‍ତେ ଇସ୍‍ମାନ୍ଦାନ୍ ଇଦ୍ ଦାନତିଙ୍କ୍ ଗାଟି ସାବ୍‍ଦାନ୍‍ତେ ମାମ୍‍ମେ ସେବା କାମ୍‍ତାଗ୍‍ ବ୍ୟବହାର୍‌ ମାଡ଼ୁତମ୍, ନେଲାନ୍ ମା ପରୁ ବେନ ଦୋଷ୍‍ମାଡ଼େ ପାର୍‍ୱନ୍ । 21 ବାତେଙ୍କ୍ ଇତ୍‍କେ ମାତର୍ ପ୍ରବୁନ୍ ସାକ୍ଷାତ୍‍ତେ ଆୟ୍‍ୟ, ମାତର୍ ନାରୁନ୍ ସାକ୍ଷାତ୍ ମିକା ସତ୍ ମାନ୍ଦାନ୍ ମାନାଦ୍‍ ଲକ୍ଷ ।

22 ଆଦିଙ୍କ୍ ଅଡ଼୍‌‍ତଡ଼୍ ଇଣ୍ଡ୍ ଦାଦାଙ୍କ୍ ମାମ୍‍ମେ ରତ୍‍ତମ୍ । ଅଂକିଙ୍କ୍‌ ନାର୍ଗେଦାମ୍ ପରିକ୍ଷା ମାଡ଼ି ଅନ୍‌ ବିଶ୍ୱାସ୍‍ତେ ପରିଚୟ ଦର୍‍ସ୍କ୍‍ତମ୍ । ମିଇ ପରୁ ଅନାଦ୍‌ ଗାଟି ଆଶେ ମାନ୍‍ନାଙ୍କ୍ ଅଣ୍ଡ୍‌ ମିକିଂଙ୍କ୍ ସାହାଯ୍ୟ ମାଡ଼ାଙ୍କ୍ ସେଙ୍ଗେ ଅଦିକ୍‌ ଆଗ୍ରହ ଆତ୍‍ତନ୍ । 23 ତିତସ୍‍ତେ ପରିଚୟ ଇଦ୍, ଅଣ୍ଡ୍‌ ନା ତଡ଼୍‍ଦେ ନଣ୍ଡ୍ ନୁ ମିକିଂଙ୍କ୍ ସାହାଯ୍ୟ ମାଡ଼୍‍ନାଙ୍କ୍ ନା ତଡ଼୍ ପାଡ଼୍‍ୟି ମାଡ଼ାନଣ୍ଡ୍ । ମେଣ୍ଡେ ଅନ୍‌‍ତଡ଼୍‍ ଆଞ୍ଜମାନ୍ତାନ୍ ବାଗାତଡ଼୍ ପ୍ରେରିତ ବିଶ୍ୱାସୀ ଦାଦାନଡ଼୍ ପରିଚୟ, ଅଡ଼୍‌ ମଣ୍ଡଲି ସାରେତାୱିନ୍ ପ୍ରତିନିଦି ନୁ କ୍ରିଷ୍ଟନ୍‍ ଗୌରବ୍ ଲେକାମ୍ । 24 ଅଡ଼୍‌‍କିଂଙ୍କ୍ ମିୟାଦ୍ ପ୍ରେମ ତମୁଟ୍ । ଆଲାଆତ୍‍କେ ସାରେ ମଣ୍ଡଲି ଇଦ୍ ବିଷୟ୍‍ତେ ନିଜାମ୍ ଆଦ୍‍ତେ ନୁ ମିଇ ସେଙ୍ଗେ ମାମ୍‍ମେ ମାଡ଼ମାନ୍ଦାନ୍ ଗର୍ବ ସତ୍ ଇଞ୍ଜ ବୁଜେମ୍ ଆଦ୍‍ପାର୍‍ଦ୍‍ତଡ଼୍ ।