1 ଅର୍ତ୍ତକ୍ଷସ୍ତ ରାଜାନ୍‌ ଅଦିକାର୍‌ତେ ସମୟତେ ନିଜର ନିଜରତେ ବାବାନ୍‌ପିଲୁଡ଼୍‌ତେ ବେନ୍‌ ବାଡ଼ିୟଡ଼୍‌ ମା ତଡ଼୍‌ ବାବିଲ୍‌କନ୍‌ ଆତ୍‌ତଡ଼୍‌, ଅଡ଼୍‌ ପିଲୁଡ଼୍‌ ଇଦ୍‌, 2 ପୀନହସ୍‌ତେ ପିଲାନେକନ୍‌ ଗେର୍ଶୋମ; ଈଥାମରତେ ପିଲାନାଗାଙ୍କ୍‌ ଦାନିୟେଲ; ଦାଉଦତେ ପିଲାନାଗାଙ୍କ୍‌ ହଟୁଶ୍‌। 3 ଶକନିୟତେ ପିଲାକନ୍‌; ପରିୟୋଶତେ ପିଲାକନ୍‌ ଜିକରୀୟ ନୁ ମାନେୟିଡ଼୍‌ ପିଲୁଡ଼୍‌ତେ ଆଦିନ୍‌ତଡ଼୍‌ ଲେକା ଆତ୍କେ ଏକ ଶହ ପଚାଶ ଜାନ୍‌। 4 ପହତ୍‌ ମୋୟାବତେ ପିଲାନାଗାଙ୍କ୍‌ ସରିହିୟରତେ ମାର୍‌ ଇଲିହୋଐନୟ ନୁ ଆଦିନ୍‌ତଡ଼୍‌ ଦୁଇ ଶହ ମାନେୟିଡ଼୍‌। 5 ଶକନିୟତେ ପିଲାନାଗାଙ୍କ୍‌ ଯହସୀୟେଲତେ ମାର୍‌କ୍‌; ଅନ୍‌ତଡ଼୍‌ ତିନି ଶହ ମାନେୟି। 6 ମେଣ୍ଡେ, ଆଦିନରତେ ପିଲାନାଗାଙ୍କ୍‌ ଯୋନାତନ୍‌ତେ ମାର୍‌କ୍‌ ଏବଦ୍‌ ନୁ ଅନ୍‌ତଡ଼୍‌ ପଚାଶ ଜାନ୍‌। 7 ମେଣ୍ଡେ, ଏଲମ୍‌ତେ ପିଲାକନ୍‌ ଅତଲିୟତେ ମାର୍‌କ୍‌ ଯିଶାୟାହ ନୁ ଅନ୍‌ତଡ଼୍‌ ସତୁରି ଜାନ୍‌ ମାନେୟି। 8 ମେଣ୍ଡେ, ଶଫଟିୟତେ ପିଲାନାଗାଙ୍କ୍‌ ମିକାୟେଲ୍‌ତେ ମାର୍‌କ୍‌ ସବଦିୟ ନୁ ଅନ୍‌ତଡ଼୍‌ ଅଶେ ଜାନ୍‌ ମାନେୟି। 9 ଯୋୟାବରତେ ପିଲାନାଗାଙ୍କ୍‌ ଯିହିୟେଲ୍‌ତେ ମାର୍‌କ୍‌ ଓବଦିୟ ନୁ ଅନ୍‌ତଡ଼୍‌ ଦୁଇ ଶହ ଅଟର ଜାନ୍‌ ମାନେୟି। 10 ମେଣ୍ଡେ, ଶଲୋମିତ୍‌ରତେ ପିଲାନାଗାଙ୍କ୍‌ ଯୋଷିଫିୟରତେ ମାର୍‌କ୍‌ ନୁ ଅନ୍‌ତଡ଼୍‌ ଏକ ଶହ ଷାଠିଏ ମାନେୟି ମାତ୍‌ତଡ଼୍‌। 11 ମେଣ୍ଡେ, ବେବୟରତେ ପିଲାନାଗାଙ୍କ୍‌ ବେବୟରତେ ମାର୍‌କ୍‌ ଜିକରୀୟ ନୁ ଅନ୍‌ତଡ଼୍‌ କୁଡ଼ିଏ ଆଟ୍‌ ଜାନ୍‌ ମାନେୟି। 12 ଅସ୍‌ଗଦରତେ ପିଲାନାଗାଙ୍କ୍‌ ହକାଟନରତେ ମାର୍‌କ୍‌ ଯୋହାନନ୍‌ ନୁ ଅନ୍‌ତଡ଼୍‌ ଏକ ଶହ ଦଶ ମାନେୟି। 13 ମେଣ୍ଡେ, ଅଦୋନୀକାମରତେ ପିଲାନାଗାଙ୍କ୍‌ ସୁଦୁନଡ଼୍‌ ନୁ ଅଡ଼୍‌ ପେଦେର୍‌ ଇ, ଇଲିଫେଲଟ୍‌, ଯିୟୀୟେଲ୍‌ ନୁ ଶମୟିୟ; ଅଡ଼୍‌ ତଡ଼୍‌ ଷାଠିଏ ଜାନ୍‌ ମାନେୟି। 14 ମେଣ୍ଡେ, ବିଗ୍‌ବୟରତେ ପିଲାନାଗାଙ୍କ୍‌ ଊଥୟ ନୁ ସକ୍କୁର ନୁ ଅଡ଼୍‌ତଡ଼୍‌ ସତୁରି ଜାନ୍‌ ମାନେୟି।

15 ମେଣ୍ଡେ, ନା ଇଡ଼୍‌କ୍‌ ଅହବାଗାମିନି ଇଲ୍‌କେତ୍‌ ଗାରେ ଅଣ୍ଡୟତାଗ୍‌ ମାଡ଼୍‌ତାନ୍‌; ମେଣ୍ଡେ, ଆଗେ ମାମେ ସାମ୍‌ଡ଼େ ମାଡ଼ି ମୁଣ୍ଡ୍‌ଦିନା ମାତ୍‌ତମ୍‌; ଇଗେ ନାନ୍‌ ନାରୁଡ଼୍‌କିଙ୍କ୍‌ ନୁ ଯାଜକକିଡ଼୍‌କ୍‌ ଲେକେତ୍‌ ଉଡ଼ି ଲେବିନ୍‌ ପିଲାନାଗାଙ୍କ୍‌ ବେନଙ୍କ୍‌ ପାହେମ୍‌ ଆଇୟମ୍‌। 16 ଆସୁଙ୍କ୍‌ ନା ଇଲିୟେଜର୍‌, ଅରିୟେଲ, ଶମୟିୟ, ଇଲ୍‌ନାଥନ୍‌, ଯାରିବ, ଇଲ୍‌ନାଥନ୍‌, ନାତନ, ଜିକରୀୟ, ନୁ ମଶୁଲ୍ଲମ୍‌, ଇ ବାଡ଼ିୟେ ନାରୁଡ଼୍‌; କଞ୍ଜ୍‌ ଯୋୟାରିବ୍‌ ନୁ ଇଲ୍‌ନାଥନ୍‌ ମେସ୍‌ତେରିଡ଼ିକ୍‌ କାର୍ଙ୍ଗାନଙ୍କ୍‌ ନାରୁଡ଼କ୍‌ ରତ୍‌ତାନ୍‌। 17 ତାନ୍‌ପେର୍କେ ନାନେ ଅଡ଼କ୍‌ କାସିଫିଆ ପେଦେର୍‌ତେ ପଡ଼୍‌ୟିତ୍‌ ବାଡ଼ିୟେ ନାରୁଣ୍ଡ୍‌ ଇଦ୍ଦୋ ଗାରେ ରତାନ୍‌; ମେଣ୍ଡେ, ମାନ୍‌ ପରମେଶ୍ୱରଦେ ଲତ୍‌ତେ ମାଇଦିଙ୍କ୍‌ ମା ଗାରେ ପ୍ରଚାର୍‌ମାଡ଼ାନଡ଼୍‌ ତାଡ଼ାଟ୍‌ ଇଞ୍ଜ କାସିଫିଆ ପଡ଼୍‌ୟିତେ ଇଦ୍ଦୋତିଙ୍କ୍‌ ନୁ ଅନ୍‌ ଦାଦାଲଡ଼୍‌କ୍‌ ସେବାକାରିଡ଼୍‌କ୍‌ କେତାନ୍‌ ମାଇଦିଙ୍କ୍‌ ନାନେ ଅଡ଼୍‌ ଆଦେଶ୍‌ ମାଡ଼୍‌ତାନ୍‌। 18 ଆସୁଙ୍କ୍‌ ମାନ୍‌ ପର ମାନ୍‌ ପରମେଶ୍ୱରତେ ମଙ୍ଗଲମୟ କାଇଦେ ସାହାଯ୍ୟାତେ ପ୍ରମାଣ ଅଡ଼୍‌ ଇସ୍ରାଏଲତେ ନାତି, ଲେବିନ୍‌ ମାର୍‌କ୍‌ ମହଲିତେ ପିଲାନାଗାଙ୍କ୍‌ ଅର୍ତୁଣ୍ଡ୍‌ ପ୍ରବିଣ ନାରୁଡ଼୍‌କ୍‌; ମେଣ୍ଡେ, ଶେରେବୀୟ ନୁ ଅନ୍‌ ମାର୍‌କ୍‌ ନୁ ଦାଦାଲଡ଼୍‌ତଡ଼୍‌ ଅଟର ଜାନ୍‌ତିଙ୍କ୍‌; 19 ମେଣ୍ଡେ, ହଶବିୟ ନୁ ଅନ୍‌ ତଡ଼୍‌ ମରାରି-ପିଲାନାଗାଙ୍କ୍‌ ଯିଶାୟାହ, ଅନ୍‌ ଦାଦାଲଡ଼୍‌ ନୁ ଅଡ଼୍‌ ମାର୍କ୍‌କିଡ଼୍‌ତଡ଼୍‌ କୋଡ଼ିଏ ଜାନ୍‌ତିଙ୍କ୍‌ ରତ୍‌ତମ୍‌; 20 ମେଣ୍ଡେ, ଦାଉଦ ନୁ ଅଦିପତିଡ଼୍‌ ବେନ୍‌ ସେବାକାରିଡ଼୍‌ ଲେବିୟଡ଼୍‌ ସେବାପାଡ଼୍‌ୟି ଇସ୍‌ ମାତ୍‌ତଡ଼୍‌, ଅଡ଼ାକଞ୍ଜ୍‌ ଦୁଇ ଶହ କୋଡ଼ିଏ ଜାନ୍‌ ସେବାକାରିଡ଼୍‌କ୍‌ ତାତ୍‌ତଡ଼୍‌; ଇ ସାରେତଡ଼୍‌ ପେଦେ ଲେକାଆତ୍‌ତେ।

21 ଇଦିନାଗ୍‌କଞ୍ଜ୍‌ ମା ମାଇଦିଙ୍କ୍‌ ନୁ ମା ପେକଡ଼୍‌ ପିକି ନୁ ସାରେ ସମ୍ଫତ୍ତିତ୍‌ ମାଇଦିଙ୍କ୍‌ ଅଣ୍ଡୟ ଲେକେତ୍‌ ଆର୍ ପ୍ରାର୍ତନା ମାଡ଼ିକାଡ଼୍‌ ଆମାସ୍‌ତେ ମାନ୍‌ ପରମେଶ୍ୱରତେ ନିମେ ନିଜରତିଙ୍କ୍‌ ନମ୍ର ମାଡ଼ାନ୍‌ ମାଇଦିଙ୍କ୍‌ ମାମ୍‌ ଅହବା ଇଲ୍‌କେତ୍‌ ଗାରେ ଉପବାସତେ କେତ୍‌ତମ୍‌। 22 ବାତେଙ୍କ୍‌ଇତ୍କେ ଆର୍‌ଦାଗ୍‌ ଶତ୍ରୁ ବିରୁଦ୍ଦତେ ମାନ୍‌ ସାହାଯ୍ୟ ମାଡ଼୍‌ନାକେ ରାଜାଙ୍କ୍‌ ଅଣ୍ଡୟ ମାନ୍ଦେ ସୈନ୍ୟ ନୁ ଗୁରାକିନେ ମିରାନଡ଼୍‌ ତାଲ୍‌କାନଙ୍କ୍‌ ମାକିଙ୍କ୍‌ ସିଗ୍‌ ୱେସ୍‌ତେ; "ବାତେଙ୍କ୍‌ ଇତ୍କେ ବେନଡ଼୍‌ ମାନ୍‌ ପରମେଶ୍ୱରଦିଙ୍କ୍‌ ମେଃକିତଡ଼୍‌, ଅଣ୍ଡ ସାରେତଡ଼୍‌ଦେ ମଙ୍ଗଲତେ ମାଇଦିଙ୍କ୍‌ ଅଡ଼୍‌ ପର ଅନ୍‌ କାଇଦେ ସହାୟତା ମିନ୍ଦେ; ମାତର୍‌ ବେନଡ଼୍‌ ଅକିଂଙ୍କ୍‌ ୱିଡ଼୍‌ସିତଡ଼୍‌, ଅଡ଼୍‌ ସାରେତଡ଼୍ ପାକା ଅନ୍‌ ପରାକ୍ରମ ନୁ କପାମ୍‌ ମିନ୍ଦେ।" ଇ ଗଟ୍‌ ମାନ୍‌ ରାଜାଙ୍କ୍‌ କେସ୍‌ ମାତ୍‌ତମ୍‌। 23 ଇଦିଙ୍କ୍‌ ମାମେ ଉପବାସ ମାଡ଼୍‌ତମ୍‌ ନୁ ଆଦିନ୍‌ ମାଇଦିଙ୍କ୍‌ ମାନ୍‌ ପରମେଶ୍ୱରଦେ ପାକେ ଅନୁରଦ୍‌ ମାଡ଼୍‌ତମ୍‌; ଆସୁଙ୍କ୍‌ ଅଣ୍ଡ୍‌ ମା ପର ୱେଡ଼୍‌କ୍‌ତଣ୍ଡ୍‌।

24 ଆସୁଙ୍କ୍‌ ନାନ୍‌ ଯାଜକିଡ଼୍ ବାର ଜାନ୍‌ ବାଡ଼ିୟ୍‌ ନାରୁଡ଼୍‌କ୍‌, ବା, ଶେରେବୀୟ, ହଶବିୟ ନୁ ଅଡ଼୍‌ତଡ଼୍‌ ଦଶ ଜାନ୍‌ ଦାଦାଲଡ଼୍‌କ୍‌ ଏଞ୍ଚ୍‌ତାନ୍‌; 25 ମେଣ୍ଡେ, ରାଜାଲ୍‌ ନୁ ଅନ୍‌ ମନ୍ତ୍ରିଡ଼୍‌ ନୁ ଅନ୍‌ ଅଦିପତିଡ଼୍‌ ନୁ ପରତ୍‌ ଇସ୍ରାଏଲତେ ନାରୁଡ଼୍‌ ସାରେତଡ଼୍‌ ମା ପରମେଶ୍ୱରଦେ ଲତ୍‌ତେ ମାଇଦିଙ୍କ୍‌ ବେନ୍‌ ରୁପା ନୁ ସୁନା ନୁ ଗିନେସାରେ ପୁରସ୍କାର୍‌ ଇନା ଇସ୍‌ ମାତ୍‌ତଡ଼୍‌, ଆଦ୍‌ ଅଡ଼କ୍‌ କଲ୍‌ସି ଇତ୍‌ତାନ୍‌; 26 ନାନ୍‌ ଅଡ଼୍‌ କାଇଦେ ଚଅ ଶହ ପଚାଶ କେଜି ରୁପା ନୁ ଶହେ କେଜି ରୂପାତେ ଗିନେ; ମେଣ୍ଡେ ଶହେ କେଜି ସୁନା; 27 ଏକ ହଜାର୍ ଡ୍ରାକ୍‌ମା*8:27 ଗ୍ରୀସ୍‌ ଦେଶ୍‌ତେ ଡାବ୍‌, ବାଇଶ୍‌ ହଜାର୍‌ ଓଜନ୍‌ ମାତ୍‌ତେ ଗ୍ରୀସ୍‌ଦେଶ୍‌ତେ ଡ଼ାବ୍‌ ଦାମ୍‌ କୋଡ଼ିଏ ସୁନାତାୱୁ ଗିନେ, ମେଣ୍ଡେ ସୁନା ଇନା ନାର୍ଗେଦାମ୍‌, ସାୟେ ୱେସ୍‌ ପିତ୍ତଲ୍‌ତେ ରେଣ୍ଡ୍‌ ଗିନେ କଲ୍‌ସି ଇତ୍‌ତାନ୍‌। 28 ମେଣ୍ଡେ, ନାନ୍‌ ଅଡ଼କ୍‌ କେତ୍‌ତାନ୍‌, " ମିଡ଼୍‌ ସଦାପ୍ରବୁନୁ ଉଦ୍ଦେଶ୍ୟତେ ପବିତ୍ର ନୁ ଗିନେସାରେତ୍‌କନ୍‌ ପବିତ୍ର; ମେଣ୍ଡେ, ଇ ରୁପା ନୁ ସୁନା ମିଇ ବାବାଲଡ଼୍‌ ପରମେଶ୍ୱର ସଦାପ୍ରବୁନ୍‌ ଉଦ୍ଦେଶ୍ୟତେ ନିଜର୍‌ ଇଚ୍ଛାତେ ଇତ୍‌ତେ ଦାନ। 29 ସଦାପ୍ରବୁନ୍‌ ଯିରୁଶାଲମ୍‌ତେ ଲତ୍‌ତେ ବାକ୍‌ଡ଼େତାଗ୍‌ ବାଡ଼ିୟଡ଼୍‌ ଯାଜକିଡ଼୍‌ ନୁ ଲେବିୟଡ଼୍‌ ନୁ ଇସ୍ରାଏଲିୟ ବାବାଲଡ଼୍‌ ପିଲୁଡ଼୍‌ପତିଡ଼୍‌ ମୁନେ ଇୱୁସାରେ ଅଜନ୍‌ ଇୱେ ଜାକ୍‌ ମିଡ଼୍‌ ସତର୍କ ମାନୁଟ୍‌ ନୁ ଇୱୁସାରେ ରକ୍ଷା ମାଡ଼ାଟ୍‌।" 30 ଆଗାକନ୍‌ ଯାଜକିଡ଼୍‌ ନୁ ଲେବିୟଡ଼୍‌ ମାନ୍‌ ପରମେଶ୍ୱରଦେ ଯିରୁଶାଲମତେ ଲତ୍‌ତାଗ୍‌ ତାତ୍‌ତାନ୍‌ ମାଇଦିଙ୍କ୍‌ ଆଦ୍‌ ଅଜନ୍‌ତେ ରୁପା ନୁ ସୁନା ନୁ ଗିନେ ସାରେ ନେଃତ୍‌ତଡ଼୍‌।

31 ତାନ୍‌ପେର୍କେ ମାମ୍‌ ଯିରୁଶାଲମତା ଆଦାନ୍‌ ମାଇଦିଙ୍କ୍‌ ପ୍ରଥମ ନେଲ୍‌ଞ୍ଜ୍‌ ବାରଦିନ୍‌ ଅହବା ଇଲ୍‌କେତ୍‌ ଗାରେତ୍‌କନ୍‌ ଆତ୍‌ତମ୍‌; ମାନ୍‌ ପରମେଶ୍ୱରଦେ କାଇ ମାନ୍‌ ସାହାଯ୍ୟ ଆତ୍‌ତେ, ମେଣ୍ଡେ ଆର୍‌ଦାଗକଞ୍ଚ୍‌ ଅଣ୍ଡ ଶତ୍ରୁ ନୁ ମାଲ୍‌ଗାଡ଼୍‌କ୍‌ କୁଦାନ୍‌ ନାରୁନ୍‌ କାଇଦେ ମାନାଙ୍କ୍‌ ଉଦ୍ଦାର୍ ମାଡ଼୍‌ତଣ୍ଡ୍‌। 32 ଆଗେ ମାମ୍‌ ଯିରୁଶାଲମତାଗ୍‌ ମାଞ୍ଜ୍‌ ଆଗେ ମୁଣ୍ଡ୍‌ ଦିନା ରମ୍‌ତମ୍‌। 33 ଆସୁଙ୍କ୍‌ ନାଲୁଦିନା ଆ ରୁପା ନୁ ସୁନା ନୁ ଗିନେ ସାରେ ମାନ୍‌ ପରମେଶ୍ୱରଦେ ଲତ୍‌ତେ ଅଜନ୍‌ ତାସ୍‌ ଊରୀୟ ଯାଜକତେ ମାର୍କ୍‌ ମରେମୋତ୍‌ କାଇଦେ ଇତ୍‌ତଡ଼୍‌; ଆଦିନ୍‌ ତଡ଼୍‌ ପୀନହସ୍‌ତେ ମାର୍କ୍‌ ଇଲୀୟାସର ମାତ୍‌ତଣ୍ଡ୍‌; ମେଣ୍ଡେ, ଅଡ଼୍‌ତଡ଼୍‌ ଯେଶୂୟତେ ମାର୍‌କ୍‌ ଯୋଷାବଦ୍‌ ନୁ ବିନ୍ନୁୟିରତେ ମାର୍‌କ୍‌ ନୋୟଦିୟ, ଇଡ଼୍‌ ଲେବିୟଡ଼୍‌ ମାତ୍‌ତଡ଼୍‌; 34 ସାରେ ସାମାନ୍‌ତେ ଗଣିତ ନୁ ପରିମିତ୍‌ ଆସ୍‌ ଇସ୍‌ଆତ୍‌ତେ ନୁ ଆ ସମୟତେ ଆସାରେତ୍‌ ବଜ୍‌ ଲେକାଆତ୍‌ତେ।

35 ବାବିଲ୍‌କଞ୍ଜ୍‌ ଏଞ୍ଚିଆସ୍‌ ୱାତ୍‌ତେ ବନ୍ଦିତ୍ୱତେ ପିଲାକିନ୍‌ ସାରେ ଇସ୍ରାଏଲତେ ମାଇଦିଙ୍କ୍‌ ଇସ୍ରାଏଲତେ ପରମେଶ୍ୱରଦେ ଉଦ୍ଦେଶ୍ୟତେ ହୋମ ପାପତେ ବଲି ଇନା ବାରଟାନ୍‌ କନ୍ଦା, ଚୟାନବେ ମେଣ୍ଢା, ସତସ୍ତରି ମେକାପିଲା,ପାପତେ ବଳି ମାଇଦିଙ୍କ୍‌ ବାରଟାନ୍‌ ପିଲା ପୁଜ୍‌ତଡ଼୍‌; ଇୱୁସାରେ ସଦାପ୍ରବୁନ୍‌ ଉଦ୍ଦେଶ୍ୟତେ ହୋମତେ ବଳି ମାତ୍‌ତା। 36 ଇଦିନାକନ୍‌ ଅଡ଼୍‌ ଇଲ୍‌କେତ୍‌ ଆପାକେ ରାଜ୍ୟତିଙ୍କ୍‌ ଶାସନ ମାଡ଼ାନଡ଼୍‌ ନୁ ଦେଶ୍‌କେପାନଡ଼୍‌ ରାଜାନ୍‌ ଚିଟି ଇତ୍‌ତଡ଼୍‌; ଆଗାକଞ୍ଚ୍‌ ଅଡ଼୍‌ ନାରୁଡ଼୍‌ ନୁ ପରମେଶ୍ୱରଦେ ଲତ୍‌ତେ ପାଡ଼୍‌ୟିଦେ ସାହାଯ୍ୟ ମାଡ଼୍‌ତଡ଼୍‌।