1 ✝Ha tshitshietshiatshi, tshieya batu ukadu hahiehi bo Yesu, bakadu badiatanga ha makasa, bualu batu bakadu tshioku tshioku. Yesu ukabanga kuambila bayidi bandi ne: "Wakala bo buanyi ku luefena lu Bafalesa bualu ludi lubombu. 2 ✝Tshitu tshiosu tshidi tshisokomeshi baya tshisokolola, tshitu tshiosu tshidi bu mukaanda baya tshilubuka. 3 Kabukayi, malu osu anuatueyi mu muediema, batu baya ofu munyinyi; bo malu osu anukambilangana mu ditshu nashi mu subu, baya atueyi hakubuka kulu ku lutanda lua subu.

4 "Nanuambiambila, nuenu badi bamudiami ne: ka nofu bowu bu batu bashiha mubidi, bualu kunyumaku kabena bo tshitu tshinga tshiyakuesebu. 5 Kundiayi nuabebeshi unudi mu kutshina: "Tshinayi Tshiambi, udi bo ngudu ikushiha bo kuela mutu mu ngena kunyuma ku kukunushihebu. Eee nanuambiambila unudi bo tshikutshina.

6 "Kabashi kodoshi shambahodu itanu ku fualanga miaminyi ibidie? Neku kakuena shambahodu umu udiebu muku filamina kubushi ku Tshiambi 7 Neku, nashi nyonyi iku mitshu yenu idi mibala. Neku kanofu bowu; nganga wenu udi mudiki nganga wu shambahodu mindi!"

8 "Nanuambiambila mutu yosu unatataboshi kubushi ku batu bosu, Muana wu Mutu uyamuataboshi biandi kubushi ku bayakulu ba Tshiambi. 9 Neku mutu yosu unabiabi kubushi ku batu, Muana wu Mutu uyamubi biandi kubushi ku bayakulu ba Tshiambi.

10 ✝"Mutu yosu unatuka Muana wu Mutu, bayamofuela muengu; kadi mutu yosu una tuka Nyinga ulengela, kabanamofuela muengu kokoko.

11 ✝"Hanaduebu nenu mu Sunangonga kubushi ku balombondi nashi ba nkolomu, bu kunulumbulushi, kanutshinyi, kanuedi lukanyi ne tuyatueyi kaye, anyi ne tuyalumbulula bitshie. 12 Bualu Nyinga Ulengela uya nuyishi malu anuya tueyi ha tshitshietshiatshi."

13 Mutu ukadu mukakatshi mu tshieyi wu batu ukambila Yesu ne: "Muyishi, wambila munetu wu ba babalumi wanabanyena biami bitu bikatushila teta." 14 Yesu uka mukudumuna ne: "Mudiami, nganyi uhuteka haha bu kunukadiela mitangu bo ku nuabanyina bitue?" 15 Kunyuma Yesu ukambila batu bosu ne: "Dimukayi! Walayi bo buanyi, kanuteki lukanyi luenu anu ku fualanga, bualu moyi wu mutu kawena ku bitu bidieyi nabi."

16 Neku Yesu ukabelela mukunda ne: "Mutu mudiyi ukadu yi tshibidi tshikakuamishi bitu bindi. 17 Ukelela lukanyi bo kudiokoshi ne: ‘Nayakuesa bitshie, tshiena bo muaba ukuteka budiyi buami bosu! 18 Ukakumbashi kabidi ne: Nayakuesa neku.’ Nayadudula tshisambi tshiami, Naya tshisulula tshilema bo makundi manga bo banshi, ‘neku nayateka bitu biami bo budiyi buami biosu. 19 Neku, nayadiambila kayami ne: mutshima wami, udi bo budiyi bundi, buyakuesa mitshiyi mindi; tshita, diaka, nuaka bo yangila biebi.’ 20 Kadi Tshiambi ukamuambila ne: ‘Wewu udi mutu muyela! Anu butukuebu, ufuafu, neku budiyi buateka bundi buabu, uya bushiyi kudi ngenye?’ " 21 Neku Yesu ukakumbashi ne: "Bibi kabiasesekela mutu yosu watshieba budiyi buandi yeyi kayandi, neku kena mudiyi mu bualu bu Tshiambi."

22 Kunyuma Yesu ukambila bayidi bandi ne: "Kabukayi nanuambiambila ne: kanudikishi kuela lukanyi bu moyi wenu ne tuyadi kaye, nashi lu mindala ne tuyaluata kaye. 23 Bualu moyi udi mutamba bi kudi nganga, bo mubidi udi mutamba mindala. 24 Monayi nyinyi, kayishikuna bitu nashi kayishi buka kabidi, kayena bo tshitanga bo tshisambi bu kulama; kadi Tshiambi uyadishi. Nganga wenu udi mudiki wu nyinyi! 25 Ngenyi wu mukakatshi muenu, udi mu kufudishi tshitshietshi tshi moyi *wandi ku lukanyi lualeleyi? 26 Binuakala kanushilubuka mu kuesa bualu buabunyi, nualela lukanyi lu malu alema hakaye? 27 ✝Monayi muatoloka bilongu bi mitu, kabishi kuata mudimu, kabishi tala mindala. Neku, nanuambiambila ne, nashi Solomu, mu bu nkolomu buandi bulema, ka bamuluatshishi mindala ilengela bu bilonguebi. 28 Biakala Tshiambi waluatshishi masala a mitu, adiku lelewu, fuma baya ela mu diku, bitshi munahangueyi kunuluatshishi nuenu! Batu ba ditabushi diadinyi.

29 "Neku, kanu dikishi kudiela lukanyi lu bitu binuyadi bo binuyanu. 30 Bualu, anu batu batashi lubuka Tshiambi batshieba bituebi biosu. Kadi nuenu, Tatenu walubuka ne nudi bo dishinga di bitu biosuebi. 31 Neku manatshiebayi bushashendi bu Tshiambi, kunyuma, bayanuha bituebi biosu.

32 "Kanutshinyi nuenu tusumbu tuatunyi! Bualu Tatenu wamona ne bidi malonga bu kunuha bushashendi bubu. 33 Wodoshayi bitu bienu biosu, neku nuhaka bahela fualanga. Nudiesela misaka itashi bo matundu. Tekayi budiyi bienu mu diwulu neku ka bunakoneka, mutashi befi mu kushekeshi bo bishi bidi mu kubiona. 34 Bualu, lukanyi luebi luayakuakala anu kudi bitu biebi.

35 ✝"Wakalayi badiyongeyi baluata mindala mikanda mikaba yi kuesa nayi mudimu, miendu yenu yakala mitemeshi. 36 ✝Wakalayi kabidi bu bena mudimu bakundi nkolomu wabu, uduadu ku diyangi di bulandi; buku mosolodiela tshibi hanadueyi bu kukokola. 37 Diyangi diya kuakala kudi bahika banakuakala batshieshi mu kudu ku nkolomu wabu! Nanuambiambila diyi di kokuakoku ne: uyakanda mukaba wandi, uyateka bena mudimu ku mesa, uyadu bu kubatekela bitu bi kudi. 38 Mbe nkolomu uhingangana mukakatshi mu butuku nashi wadu habutshi, mbe ubasangana batshieshi diyakuakala diyangi diabu! 39 ✝Kadi ofuayi malonga munambamba, bu muena subu wakala walubuka tshitshietshi tshinadu muefi, kadu kuatabushi umuletshiela ne ubuela mu subu bu kueba bi. 40 Nuenu bienu, nuakala hahiehi, bualu Muana wu Mutu uyadu ha tshitshietshi tshinutashi lubuka."

41 Neku Petelu ukokoshi Yesu ne: "Shashendi, mukundewu watuelela tuetu kayetu mbe wa welela batu bosue?"

42 Shashendi uka bakudumuna ne: "Ngenyi udi muhika wu buanyi bo muyele? Yi yewu, unatekebu kubushi ku banga kudi Shashendi bu kubatshioboka bo kubaha bi kudi hanadieshi tshitshietshi. 43 Diyangi diyakuakala kudi muhika uneku, mbe mu kuhingangana ku nkolomu umusangana wakuata mudimu uka mushileyi. 44 Nanuambiambila diyi di kokuakoku mutu uneku, nkolomu uya mubandishi, uya muteka ku mutshu ku budiyi buandi bosu. 45 Neku mbe muhika udiambila kayandi ne: nkolomu kanadu hitshiowu, mbe ubangishi kukuma bahika banga ba babalumi bo ba babakashi, mbe wadi bo wanu malufu ukuatshibu. 46 Neku nkolomu uyadu ha tshitshietshi tshitashi muhika mu mukundi, bo mulubuki kabidi; muhika uneku, baya muahata, baya mukuma*uyaheta difutu di bena buhidi.

47 "Muhika walubuka muananga nkolomuandi, neku utashi hahiehi bu kuesa muambambeyi, baya mukuma bushidi bundi. 48 Kadi utashi lubuka muananga nkolomuandi, neku wasesa malu amuafikishi bu kumukumebu, baya mukuma bushidi buabunyi. Ukahebu bindi, baya mulomba bindi; ukahebu bidiki, baya mulomba binga hanandi.

49 "Nahudu bu kutemeshi mudilu ha buloba, neku nananga kumona muatemewu! 50 ✝Nadi bo dibatisa diya batisebu nadi, nadi bo dibungama dikola hua yi hanadieshedi! 51 Nualela lukanyi ne nahudu bune batu bakala holu ha buloba mbe? Bii, nanuambiambila, nahudu bu kuabulula batu. 52 Anu hitshiowu, subu udi bo batu batanu, baya kuabuluka, babidi baya kuela basatu mpata neku basatu biabu bayakuela babidi mpata. 53 ✝Teta uyakuela muana wu ba babalumi mpata bo muana uyakuela biandi tetandi mpata, mama uyakuela munandi wu ba babakashi mpata neku muana wu ba babakashi biandi uyakuela mamandi mpata, mamandi wu muamulumi kanakofuangana bo mukashi wu munandi yi mukashi wu muana kanakofuangana bo mamandi wu mbayandi."

54 Yesu ukambila kabidi tshieyi wu batu ukadu hahu ne: "Mbe numona ditutu diabika ku esete, nuambamba manyangu ne: fula uyaloka neku waloka. 55 Neku hanuafofu luhehela lukola luabika ku sude, nuambamba ne: lelewu munyinyi uyatambuka ukola neku watambuka ukola. 56 Nuenu bena mushimushi! Nualubuka mu kushingulula hala wu buloba bo wu diwulu; bitshi kanushilubuka mu kushingulula malu a mu tshitshietshi tshitshie?

57 "Bukayi kanushi shingulula nuenu kayenu bualu budi bulengela kuese? 58 Hanuyayi bo unudi nandi matandu mu shila kubushi ku sushi, ofuangana nandi hanutshidi mu shila, bune kakufikishi kudi sushi, neku sushi kakufikishi kudi nkolomu wu ba pulushi, neku pulushi kakubueshi mu buloku. 59 Nakuambiambila ne: kunatambuka muamu huaa yi hanafuta fualanga yosu nashi ka fualanga kamu kakana shala."