1 Dialumingu habutshi, babakashi bakayi ku ngita bakatshuala manyi a mukuhu ulengela akaduebu bayongeyi. 2 Bakasangana dibu dibungulukishi ku mushikuambelu wu ngita, 3 Neku bakabuela muamu; kadi kabasangana mubidi wu Shashendi Yesu. 4 Hakaduebu balela lukanyi bu bualuabu, neku babalumi babidi bakadu bamana hahiehi nabu, baluata mindala ikubuka yabadieka. 5 Bowu buka bakuata, neku bakasa hala hashi, babalumi bakabokoshi ne: "Bukayi nuatshieba mutu udi bo moyi mukakatshi mu batu bafue? 6 ✝Yeyi kena haha, neku wabika ku bashandi. Fulukayi malu akanuambileyi hakadueyi utshidi mu Ngalela. 7 ‘Bidi bilengela bua bafila Muana wu Mutu mu makatshi a batu babodu, bamushiha kulu ku mutshi mukalanganyi, neku hanadika mitshila isatu uyabika ku bashandi.’ "

8 Neku bakafuluka meyi akabambila Yesu. 9 Haka hinganganebu ku ngita, bakambila bayidi disandi yi umu maluawu osu, bo batu bosu bakadu bashala. 10 Bakadu Maliyi wu ku Magadala, bo Yowana bo Maliyi mamandi wu Yakobu. Babakashi banga bakadu nabu, bakambila baposutolu maluawu bundi buawu. 11 Kadi bapositolu kabataboshi meyi akabambila babakashi bualu akadu buene muediema kudiebu. 12 Neku Petelu ukabika hashi, uka kala lubilu huaa yi ku ngita. Uka shondomena muamu, ukamona mindala yi line kayayi; kunyumaku uka hingangana kuandi wabila ku kema bu malu akeseka.*

13 Neku mu mutshila umuawu, bayidi babidi bakadu bayayi mu bula bu Emawusa, tshitayi tshikadu hakakatshi ha bula buabu bo dingandu di Yelushalema tshikadu tshi kilometa disandi yi umu. 14 Bakadu batueyi ha malu osu akadikangana. 15 Hakaduebu batueyi yi kokoshangana, Yesu kayandi ukashekeshi hahiehi nabu, ukayi nabu; 16 neku bakadu bamuamona kadi mesu abu ka amushingulula. 17 Yesu uka bokoshi ne: "Nuatueyi bingenyi munuyayi babungama nakue?"

Bakamana baka bungama kabidi. 18 Mungabu dina diandi Kelewopa, ukamokoshi ne: "Wewu udi munyambangu udi mushekami ha kayebi mu Yelushalema, kushilubuka malu adikangana mitshileye?"

19 Yesu ukabokoshi ne: "Malu kaye?"

Baka mukudumuna ne: "Malu akesekela Yesu muena Nasaleta," mutuawu: "Ukadu mupolofeta ukola mu meyi bo mu biesedi kubushi ku Tshiambi bo ku batu bosu. 20 Moona mukesa bayishi balema bo ba sushi betu. Baka mulembola bukumushihebu, bakamushiha ku mutshi mukalanganyi. 21 Tuetu bietu tukadu batekemena ne yeyi kayasulula Isalela, neku maluawu katshi eseka kumana dika mutshila isatu. 22 Bualu bunga kabidi, babakashi banga ba mukakatshi muetu batukemeshi bikola. Bakadu bayi ku ngita habutshi, 23 Kadi kabasangana mubidiandi. Bahuduatuambila ne bayakulu babamonyekela, babambila ne udi bo moyi. 24 Bamudietu banga bahuyi mu ngita, basangana anu muka tuambila babakashi; kadi yeyi kaba mumona bi."

25 Neku Yesu uka bambila ne: "Nudi batu batashi bo buanyi, bukayi nuakodi bu kuataboshi malu osu akanuambila bapolofete! 26 Kabiadu bilengela Kilisitu umona mutanda bu kubueleyi mu butshuami buandie?" 27 Neku uka basokolodiela biosu bikafundebu bu bualu buandi kubangishi ku mikanda yi Mose huaa yi ku mikanda yosu yi bapolofete.

28 Hakashekeshebu hahiehi bo bula bukaduebu bayayi, Yesu ukatshieba kudika bu kuyi. 29 Kadi baka musengola, baka muambila bikola ne: "Shala netu haha, bualu butuku butaduadu, diba ditabuedi munyinyi utahuahu." Neku ukabuela mu subu ukashakama nabu. 30 Hakashakameyi nabu bu kudi, ukangata diampa, ukalomba Tshiambi; uka dikala bitshinyi, neku uka baha. 31 Kubangishi ha tshitayi mesu akamona, baka mulubuka, ukashimina kubushi kuabu. 32 Bakokoshangana ne: "Bukayi nyinga yetu kayisheyi yatema munda hasheyeyi utuambiambila maluawu mu shila, hasheyeyi utuafofueshi malu a mu mifundu yi tshishile?"

33 Bakabika hashi, bakahingangana mu Yelushalema, bakasangana bayidi disandi yi umu bahona kaba kamu bo bayidi banga hahu 34 Neku baka bambila ne: "Bulelela Shashendi wabika!" Wamonyekela Simona.

35 Bayidi babidi baka bakumila mutshika wu malu bundi buawu aka besekela mu shila bo mushindu uka mulubukebu ha tshitshietshi tshika kaleyi diampa.

36 Hakadu bayidi babidi batshiatueyi naku, Yesu kayandi ukamana mukakatshi muabu, uka bambila ne: "Wakalayi holuaa."**

37 Bowu buka bakuata, bakatshina; bakela lukanyi ne tuamona mushandi. 38 Kadi yeyi ukabokoshi ne: "Nuatshina kaye? Makonka abika munda muenu bukaye? 39 Monayi mu makatshi bo ku makasa ami, yi mimi; namonayi, nuakoha kabidi, bualu mushandi kena bo minyanyi bo mikola bi nunamona nabi."

40 Hakatueyeyi naku, ukabebeshi makatshi bo makasa andi.* 41 Hakaduebu kabataboshela bualu bu diyangi diabu, hakaduebu ba tshiakema, yeyi uka bokoshi ne: "Nudi bo tshitu tshikudi hahue?" 42 Bakamuebeshi tshitshinyi tshi nyishi tshikanga, 43 Ukatshiangata uka tshidi ku mesu kuabu.

44 Neku uka bambila ne: "Hanakadu natshidi nenu monayi meyi anaka nuambiambila. Bukaduebu nabu bu kumana malu bundi buawu akadu mafunda bu bualu buami, mu biadi bi Mosa, yi bapolofeta bo mu misambu."

45 Neku uka babuludila mu buanyi bua bashingulula mukanda wu Tshiambi, 46 neku uka bambila ne: "Bakafunda ne bikadu bilengela ne Kilisitu umona mutanda bo ubika ku bashandi hanadika mitshila asatu, 47 Malonga kabidi bu kuambilebu mangandu bundi buawu bualu bu kukudimuna ku nyinga bo kubashimishila bubodu buabu mu dina diandi kubangila ku Yelushalema. 48 Nuenu nudi batu balubuka malu aa. 49 ✝Monayi, naya nutumina mulayi wu Tetami; neku nuenu kanutambuki mu Yelushalema huaa yi hana nuluatshishebu ngudu yi kulu."

50 ✝Hakayi nabu Yesu mu bula hahiehi bo Betaniya; ukabishi makatshi kulu uka babeneshi. 51 Hakadueyi ubabeneshi neku, ukatambuka hakaduebu, baka mombolola kulu mu diwulu.* 52 Neku bobu baka mutshuamikebu, bakahingangana mu Yelushalema bo diyangi dilema, 53 Neku bayidi bakadu mu Subu wu Tshiambi bitshietshi biosu babila kutshuamika Tshiambi.