LUKA 8

Muana wu babakashi wu Yayilo bo mua mukashi ukakoha mundala wu Yesu

40 Yesu hakahingeyi dishiyi di dishiha, tshieyi wu batu ukadua muakidila bualu bakadu ba muakundi. 41 Mutu munga dina diandi Yayilo ukadu nkolomu wu sunangonga. Ukadiela ku makasa a Yesu uka musengula ne tuyaka mu subu muami, 42 bualu ukadu bo muana wu babakashi umu ukadu bo bitshietshi bu ku disandi yi bibidi, ukadu watshiaba kufu. Hakadu Yesu wadika tshieya batu ukadu mu mutshimbidila.

43 Ha muabawu hakadu kabidi mua mukashi bo mbabala yi mashi atambuka mitshiyi huaa disandi yi ibidi. Ukadu umana dudula bitu biosu bikadueyi nabi kudi ba ngangabuka,*8:43 kadi mutu kadieshi mu kumana mbabala ikadueyi nayi. 44 Ukashekeshi hahiehi bo Yesu, ukatshimba kunyuma kuandi neku uka koha disemba di mundala ukadueyi muluata, mu tshitayi tshiatshinyi mashi akadu atambuka akakama. 45 Neku Yesu ukokoshi ne: "Ngenyi uhukohe?" Bosu bakadu hahu bakafila, kadi Petelu uka muambila ne: "Muyishi, tshieyi wu batu muku tshimbidila neku, banga bakua tshitshi kuku yi kuaku."

46 Kadi Yesu ukamba ne: "Mutu uhukoha, bualu nafofu ne ngudu minga yatambuka mu mimi." 47 Muamukashi ukamona ne bahulubuka, Ukadu yi kudita, ukadiela ku makasa a Yesu. Ukabanga kumuambila kubushi ku batu bosu bukayi uka mukoha, bo mushindu ukahu mbabala yandi amu hahu. 48 Neku Yesu ukamuambila ne: "Munami wu babakashi, kuataboshi kuebi kua kusungila. Yaka holuaa!"

49 Hakadu Yesu utshiatueyi, mutu umu uku bena mudimu ba nkolomu wu mu sunangonga ukadu ukambila Yayilo ne: "Munebi wu babakashi umanafu, letshiela kutateshi muyishi kanana."

50 Kadi hakofu Yesu, ukambila Yayilo ne: "Kofu bowu bi, wataboshi kanana, neku munebi wu babashi uyakofu malonga."

51 Hakafika Yesu ku subu, kataboshi ne mutu munga ubuela nabu mu subu, anu Petelu, Yone, Yakobu, tatandi bo mamandi wu muena mbabala. 52 Batu bosu bakadu badila, yi kutangula bu muana. Neku Yesu ukamba ne: "Kanudidi bi, bualu muana kena mufu, kadi udi mulala tulu."

53 Batu bosu baka musaka, bualu bakalubuka ne ukadu umanafu. 54 Neku Yesu uka kuata songakashi ku dikatshi ukamuambila bo diyi dikola ne: "Munami, wamana kulu!" 55 Amu hahu ukabika, nyinga wandi ukabanga kueyekana, kunyuma Yesu ukabambila ne muhayi bitu bikudi. 56 Baledi ba muana baka kema bikola; kadi Yesu ukabambila bikola ne kanuambidi mutu bualu buhuesekebu.