1 Ana Pol ya Sailas ye konbauna wan ede pi dumo Derbe pidre, aglke wan ede pi dumo Listra we dimara ebrika. Dumo Listra ebriko, Jisas nagigle ta moglkwa, kagie Timoti we digwa. Ye mam Juda abu ta moglsre, Jisas pre meduglkwa ba ye nem Grik yagl ta moglka. 2 Jisas pre mediglkwa yoba dumo Listra ya Aikoniam meglkwa i, yagl Timoti mabunomo kandre, yagl wakai ta moglmedi kanigwa. 3 Ana Pol ye yagl Timoti i kandre, akie wanamnedi prukwa. Yegl prisre, gagie puduo gagie bogl togwa. I siragl pre Juda yoba dumo magigl kipai meglkwa i, Timoti nem ye Juda yoba moglkre, Grik yagl ta moglmedi pre kan erikwa. Pre kan eriko, Pol prukwa i, ye Juda yoba mabunono pamere yegl ta duglo boglkran, ye ka dinabuka i, Juda yoba ta prikraiglkwa mere yegl paugo, Juda yoba mabunono pamere duglo bogl, gagie puduo gagie bogl togwa.

4 Ana Pol yegl eruko, Pol ya Sailas ye yagl Timoti agre idre, ye wan ede pi taun pere pere pidre, yoba dumo pere pere meglkwa i, ka di tedre, Jisas dedugwa yoba ya yoba tau ye Jerusalem pre mediglkwa yoba suglno meglkwa i, ye okna ere mogl, yoba yugobuno pere pere meglkwa i, ye mabuno siragl mere eraiglkwa pre pepa beglkwa ikra ka siragl mere beglkwa i di tedre, wan meglkwa. 5 Di tedre, Jisas yugobunomo bage bage meglkwa i, ye pre mediglmara si gigle di teigo, ege ege yoba kor Jisas pre mediglsre, ede suna u pai meglkwa.

6 Ana Pol yogo, Sailas ya Timoti yebriko, ye wan pidre, provins ta Esia we dimara i suna pidre, yoba ka mabuno di tenamnedi prikwa ba God Murubuglo mane dugwa pre ye Esia suna pikre, aglke provins ta Galesia we dimara pidre, distrik ta suna i yogwa, Frigia we dimara i pidre, konbauna wan ede eigwa. 7 Dumo i pidre, aglke wan ede pi distrik Misia yomara bina bina wan ede pi provins ta Bitinia we dimara enamnedi eigwa. Ede Bitinia enamnedi eigwa ba Jisas Murubuglomo aglke kor mane di togwa 8 pre ye ede distrik Misia pidre, Misia suna i, taun ta mudi nigl bina yogwa, kagie Troas we dimara plau digwa.

9 Ana Pol ya Sailas ya Timoti ye ede pi Troas eigo, eduer Pol gumuglomugl ta eruko, kanugwa i, provins Masedonia nem ta moglko, kanugwa. Ye kanugwa i, Masedonia nem i adigl mogl, Pol moglmara ka giglede di te, yegl dugwa, Ene ede koglo Masedonia provins udre, ake ple di noro! dugwa. 10 Yegl dugo, Pol kandre, ye gumuglomugl siragl mere eruko, kanugwa i, di norukwa.* Di noruko, no prumga i, God no Jisas kamo i pi Masedonia yoba i di tenaiglmedi no dedugwa pamedi prisre, no tabre ede enamnedi erumga.

11 Ana no prumga, God no Jisas kamo Masedonia yoba di tenamga pre no dedumedi prisre, no dumo Troas kide kodo, sip mina ede pi provins Masedonia enamnedi omga. No sip mina omgo, sip i ake dudi, ede pi dumo kebra ta mudi nigl suna yogwa, kagie Samotres we dimara i ogwa. Ogo, no dumo igle pai, taganamogl adigl, aglke kor sip mina ede pi provins Masedonia suna i, taun ta mudi nigl bina yomara kagie Neapolis we dimara i omga. 12 Sip no i pi igle edugo, no makandigle wan ede pi taun ta Filipai we dimara omga. Taun Filipai i, Rom yoba okna u buro yeigo, Filipai i dumo kade ta Masedonia suna i yogwa. No ede Filipai pidre, ege tau Filipai suna i pai, wan munga.

13 No ede pi dumo Filipai pidre, pai mungo, wakan kade yogwa. Wakan kade yogwa pre no taun suna i kide kodo, togl dra yomara ede meda omga. Ede taun meda pidre, ede pi nigle bina ta omga. I siragl pre no prumga i, dumo igle Juda yoba ka mabuno yugu ta kei yeigwa yeikrukwa pre yoba ye God kamage ere tenaiglkwa i, nigle bina makai sidre, kamage ere tenaiglkwa mere yegl paugwa pre no omga. Omgo, abu tau u nigle bina i makai si meglko, kanumga. No kandre, ye meglmara omgo, akie ame di munga. Ame di mungo, no ye ka tau di tomga. 14 Ana abu makai si meglmara suna i, abu ta moglkwa, ye kagie Lidia we digwa. Abu Lidia i, ye dumo Taiataira mam ta moglkwa. Ye ege ege lap gogl tau ere yu, topo bogl nogwa abu ta moglkwa. Te, ye ama God kagie kade tedre, kamage erukwa abu moglkwa. Ana no abu wagle i ka di tomgo, abu Lidia i pre moglkwa. Pre moglko, Yagl Kade ye Pol ka dugwa i abu i pre medrabedi dem muduo mina kogon eruko, ye pre meduglkwa. 15 Pre meduglko, ye yobama yugu swara paigwa i mudu nigl biglko, ana abu i no di noro, yegl dugwa, Ene na Yagl Kade pre meduglkwa abu ta moglmedi kanibi, ene na kipaimara wibi, panamniwe dugwa. Ka giglede yegl dugwa pre no pi ye kipamara pamga.

16 Ana aglke ta, no kor ede pi nigle bina kamage erimara ikra omga. Omgo, nigl kogon abai ta murubuglo kide ye moglmara suna moglkwa i no kanugwa. Abai i, murubuglo kide ye moglmara suna mogl, siragl tau okuo plau dinabuka i di togo, abai i, ege ege di nogugl edugwa. Abai i kogon yegl eruko, ye suglmo meglkwa yoba mige podo abai kogon erumara i, ege ege yoba ye topo teigo, i neigwa. 17 Ana abai i no kandre, no Pol bogl omnara i sika sugwa. Sika sidre, ka podo di, yegl di moglkwa, Yagl wagle i, ye God Mogl Mitna Kaima Edugwa i niglmo kogonmo yoba moglsre, God ye yoba siragl mere ere inabuka i, ene yoba magigl meglkwa i di teimiwe dugwa. 18 Yegl didre, ege tau mere ama ye no wamnara sika sugwa. Sika sidre, ka yegl keme dugwa pre Pol oglka kide eruko, kan ake te, yegl dugwa, Ene murubuglo kide, abai i moglmara suna motnga i, na Jisas, God Kere Yugwa Yagl i, dra idre, ene di teiga, ene abai moglmara kide kodo, ede meda wo! dugwa. Yegl dugo, murubuglo kide i abai moglmara suna moglkwa i, tabre ede meda ugwa.

19 Ana murubuglo kide ta abai i moglmara kide kodo, ede meda ogo, yoba abai i suglmo meglkwa ikra kanigwa, abai i taragl okuo plau dinabuka di poglko, yoba mige noriko, no i ne ne erumga i, okuo ta i nekramga pamedi kandre, ye pi Pol ya Sailas si ake gi di mogl, gudu i pi taun suna, yoba makai si, maket erimara dumo pidre, i pi jas kade suo gumanomugl edigwa. 20 Edidre, ye jas suo i di te, yegl digwa, Yagl suo i, Juda yoba moglsre, nono tauno mina yoba deno muduno ere kide ersre, 21 Te, ye mabuno kor tau nono Rom yoba idre, duglo boramga mane pamara i, ye yoba di te wan miuriwe digwa. 22 Yegl digo, yoba makai si mogl, prikwa i mudu ere mogl, Pol ya Sailas ere sinamnedi eriko, jas suo i ere mogl, yoba tau Pol ya Sailas kuguglno gaglno gugl ede, kuba sinaiglmedi dedebriko, 23 ye kuguglno gaglno gugl ede, yagl suo i tau ege mere kuba mina ere sigwa. Ere sidre, ye si i pi kane yugu ede, yagl ta kane yugu sugl moglkwa i ye suglno wakai morabedi dedigwa. 24 Dedigo, kane yugu sugl moglkwa yagl i ere mogl, Pol ya Sailas i pi kane yugu suna wom iyo ta yomara edidre, ede paglkane ta idre, kaglno ede waiglmara suna padigl, si gi di, sen mina kane sugwa.

25 Ana kane yugu sugl moglkwa yagl ikra Pol ya Sailas si kane si paduglko, ye pai miurka. Pai mogl ebriko, eduer suna yagl suo ye God kagie kade tenabugledi giglage didre, kamage eribriko, yoba kane paigwa i pre meglkwa. 26 Pre meglko, imem podo kide ta tabre udre, kane yugu ikra ake piga di, kane yugu keimara kobuglo tau mabunomugl bogl padiglkwa i ake piga dugo, kane yugu dua mudu yauruko, ama kane yoba sen mina mudu kane sigwa i, sen mudu pirka sugwa. 27 Yegl eruko, kane yugu sugl moglkwa yagl ikra nagie kogl, adigl, kanugwa i, kane yugu dua mudu yoko yogwa. Ye prukwa i, kane yoba mudu teke ede meda pi, ede eimedi prisre, ye yoba kade wagle yoba gumuglnomugl na si gogl dinaiglmedi yene wi si goragledi ere, ye bainetmo i meda edugwa. 28 Yegl erukwa ba Pol ere mogl, ka podo di, yegl dugwa, Ene enene si goglkro! No kane yoba mudu yoko muniwe di, yegl dugwa. 29 Yegl dugo, kane yugu sugl moglkwa yagl i yoba ta ken gagl yunaiglmedi agle dugwa. Agle dugwa, ken gagl yuigo, ye ken idre, muku di ede pi Pol ya Sailas miurara pidre, kudugl gogl, nagie nuglo didre, ye gumanomugl yage goglko boduglkwa. 30 Yegl ersre, ye Pol ya Sailas agre i meda udre, ye di pre, yegl dugwa, Yagl suo, na siragl mere eribo, God na ere inabe? di, yegl di prukwa.

31 Kane yugu sugl moglkwa yagl i yegl di, kira pogl pruko, Pol ya Sailas ye di te, yegl dibrika, Ene Yagl Kade Jisas pre medigln, God ene ere inabiwe di, yegl dibrika. No dubuglka i, ene ya ene yobanma mudu ta moraiglkwa i, mudu pre medraiglkwa pre dubuluwe dibrika. 32 Yegl didre, ye Yagl Kade kamo tau ama yagl i nem agiglema mudu akie magigl meglkwa i di tebrika. 33 Di tebriko, eduer suna yagl i ye Pol ya Sailas agre i ede nigle pidre, ye sigwa biurara i nigl pai togwa. Nigl pai togo, yagl i nem agiglema bogl mudu tabre kana nigl biglkwa. 34 Yegl eriko, yagl i ye Pol ya Sailas agre i ede pi ye kipamara yugugl pidre, kaya mokna tau gagl togwa. Gagl togwa nebriko, yagl ikra gun podo yogwa. Ye gun podo yogwa i siragl pre ye nem agiglema bogl mudu God pre mediglkwa pre ye gun podo yogwa.

35 Ana kamun tagugo, jas kade suo ikra ye kibr nem tau dede, yagl suo Pol ya Sailas i meda edinaiglmedi dibriko, eigwa. 36 Kibr nem wagle ye i meda edinamnedi eigo, kane yugu sugl moglkwa yagl ikra Pol di te, yegl dugwa, Jas suo ikra kibr nem ene i meda edinaiglmedi dedebriko, wigwa pre ene deno muduno wida dinan, ede meda enabriwe dugwa. 37 Yegl dugwa ba Pol ye u kibr nem melgmara pidre, yegl dugwa, No Rom pabuglka dudugo, no Rom yoba muglka ba jas suo i ye no kotno prikre, mane pamara ersre, ege mere kide yoba gumuglnomugl yoba tau no kuba sinaiglmedi dedebriko, no sidre, i pi kane yugu edigwa pre ye erme ugl mage ere, no di bage ta edekrabriwe dugwa. Yegl pre ye yene udre, no i meda ede edibr, kuno erabuka pre ene pi di teo! di, Pol kibr nem wagle ikra yegl di togwa.

38 Ana Pol ka yegl di, kibr nem wagle ikra togo, kibr nem ye Pol kamo i pi jas kade suo ikra di teigwa. Di teigo, jas kade suo ikra ye Rom yoba miurka pai dumedi prisre, ye aglau erubugledi kudugl gogl, 39 ye yene pi Pol ya Sailas miurara pidre, ye di te, No aglau erubugliwe didre, ye i meda edibrika. I meda edidre, ye di te, yegl dibrika, Ene no dumono i moglkre, ede bage ta enabriwe di, ege mere jas suo yegl dibrika. 40 Dibriko, Pol ya Sailas kane yugu kide kodo ede udre, ede pi abu Lidia ikra kipamara ebrika. Ebriko, Jisas pre mediglkwa yoba dumo Filipai meglkwa i u makai sigo, Pol ya Sailas ye pre mediglkwa i si gigle di tenabugledi ka tau dibrika. Yegl ere kodibriko, ye Timoti bogl dumo Filipai kide kodo, ede eigwa.