1 Ana yoba ye Stiven si geglkwa i, yagl Sol ikra kan moglsre, wakai prukwa.

Ana yoba i Stiven si geglkwa ade swara i mina ye ama ere mogl, Jisas yugobunomo mudu dumo Jerusalem meglkwa i ere kide kaima ere teigo, Jisas pre mediglkwa yoba mudu teke ede pere pere pi distrik Judia ya Samaria pidre, ede dumo kebra bage bage eigwa. Eigwa ba Jisas dedugwa yoba 12-pela i keme ye Jerusalem mogl pai meglkwa. 2 Yegl eriko, ana Stiven si geglkwa ikra, God kuduglmo geglkwa yoba tau meglkwa i, ye Stiven i pi maugl sidre, kai podo ere teigwa. 3 Yegl erikwa ba yagl Sol ye Jisas yugobunomo mudu si dudu kodinagledi kogon yegl ere moglkwa. Ye yoba Jisas yugobunomo mina meglkwa i yugu pere pere kipai meglmara i, ede yugugl pidre, yagl ya abu akie si kane si i pi kane yugu edugwa.

4 Ana Jisas pre mediglkwa yoba teke ede bage bage pi ede dumo aglo mere ta pi meglmara i moglsre, Jisas kamo i, yoba di teigwa. 5 Ana yagl Filip i ama yegl ere, ye ede dumo Samaria we dimara i pidre, God Kere Yugwa yagl kamo i, yoba di togwa. 6 Di togo, yoba mere kide ye Filip ka dugwa i prisre, kimagl diu erukwa i kandre, ye mudu kinano gudu meglkwa. 7 Te, yoba tau mere murubuglo kide ye meglmara suna moglkwa i, Filip ye di meda edugo, murubuglo kide grigle di, ede meda wigwa. Wigo, te yoba tau ogono katno mawa sugwa mo kide erukwa i, Filip ama ere wakai ere togwa. 8 Yegl erukwa pre yoba dumo Samaria meglkwa i, kandre, gun podo yeigwa.

9 Ana yagl ta ama dumo swara i mina moglkwa, kagie Saimon we digwa. Ye yagl kade ta mole didre, kumo giai ere moglkwa. Ere moglko, Samaria yoba ye kumo giai erukwa i kandre, nagino kogl, kinano gudu meglkwa. 10 Yoba mudu, yoba kade ya yoba yoko meglkwa i pra, yagl Saimon i kamo prisre, ama yegl digwa, Yagl Saimon God yobuglomo idre, yagl yobuglo podo paugwa moglmiwe digwa. 11 Siragl pre yagl i ege olto kumo giai ere moglsre, yoba nagino koraiglmedi erukwa pre ye kamo prikwa. 12 Samaria yoba i okna yegl prikwa ba Filip u ka mabuno wakai God yoba kingno mogl, suglno morabuka i pre didre, te Jisas ye God Kere Yugwa Yagl moglme dugo, Samaria yoba tau mere, yagl ya abu akie pre mediglsre, nigl biglkwa. 13 Te, kumo giai yagl Saimon i ama ye Filip ka dugwa i prisre, pre meduglkwa. Pre mediglsre, nigl bugl, ye Filip wanumara ege ege mokomugl sika si wanugo, Filip ama kimagl diu podo erukwa i, yagl i kandre, nagie kogl, kina gudu moglkwa.

14 Ana yoba tau u Jisas dedugwa yoba dumo Jerusalem meglkwa ikra di te, yegl digwa, Samaria yoba tau mere God kamo pre mediglmiwe digo, prikwa. Prisre, ye Pita ya Jon ede pi Samaria enabredi dedigo, ebrika. 15 Ye pi Samaria pidre, Mudu Murubuglo pre mediglkwa yoba i meglmara unabedi kamage eribrika. 16 Okna Samaria yoba ye Jisas kamo pre mediglkwa i, i nogugl edinamnedi nigl biglkwa. Yegl erikwa ba Mudu Murubuglo ye meglmara ta ukrukwa. 17 Ana Pita ya Jon ye kamage ersre, ogono i pi Samaria yoba akibrika igne i Mudu Murubuglo ye meglmara ede suna u moglkwa.

18 Ana Pita ya Jon ogono i pi yoba ikra akibriko, igne swara i mina Mudu Murubuglo ye meglmara suna ugwa. Ugo, yagl Saimon ikra kandre, ye Pita ya Jon di te, yegl dugwa, Na mige moni tau ene tebo, 19 ene yobuglo yegl mere narabredi prie dugwa. Yobuglo yegl naribr, na ogona i pi yoba ta akenaglka i, Mudu Murubuglo ye moglmara unabuka pre diwe dugwa.

20 Ana yagl Saimon i ka yegl dugo, Pita ye di ikne ede te, yegl dugwa, God taragl ta yene prumere yoba togwa i, ene mige moni tedre, inagledi pitno? dugwa. Yegl ta manabuka! Ene yegl eragledi pitnga i, God ene ya ene migenen bogl akie ene ere kide ere tenabiwe dugwa. 21 God gumuglo mina ene den mudun kide yogwa pre ene no God kogonmo erumnara suna moratnga i ta kuno erekrabuka. 22 Ene nomane kide inga pre ene nomanen yake tedre, Yagl Kade kamage ere to! dugwa. Kamage ere ten, ye ene den mudun mina pitnga i, gugl ede tenabo mo i, ene kanatniwe dugwa. 23 Siragl pre na kaniga i, ene yoba toro kide kango, te tadaglme ene si kane sumiwe di, Pita yegl dugwa. 24 Pita yegl dugo, Saimon di ikne ede te, yegl dugwa, Yagl suo, ene na pre Yagl Kade agle di priro! dugwa. Ene agle di pribr, taragl ta na moglmara plau dinabe dibrika i, plau dikrabiwe di, yegl dugwa.

25 Ana Pita ya Jon ye ka giglede di, Yagl Kade kamo i, Samaria yoba di te kodidre, aglke ede ikne Jerusalem enabugledi ede ebrika. Ye konbauna bage wan pidre, Samaria yoba tau dumo kebra bage bage kipai meglmara i ka mabuno wakai di te te, ede ebrika.

26 Ana yagl Filip ikra moglmara, Yagl Kade angelomo ta u ye di te, yegl dugwa, Ene erme adigl ede nigl beye kra po! dugwa. Ene ede pi Jerusalem pidre, konbauna ede pi dumo wau yomara pi, ede dumo Gasa we digwa konbauna omara suna i po dugwa. 27,28 Yegl dugwa pre Filip adigl ede pi konbauna i yomara ogwa. Ogo, kantri Itiopia nem ta God kagie kade tenagledi dumo Jerusalem pidre, karismo mina aglke ede ikne ugo, Filip kanugwa. Yagl i, ye abu ta kagie Kandas we digwa, ye Itiopia yoba bitno moglkwa i yobamo kade ta moglsre, abu i mige bona sumara yagl i sugl moglkwa. Te, yagl i, ye waglkamo pogl edigwa. Ye karis mina ame di mogl, ka kep yagl ta Aisaia we digwa i, ka okna ibo boglkwa i kere moglkwa. 29 Kere moglko, God Murubuglo ye Filip di te, Ene ede pi yagl ta karis mina umara iro ede magigl po! dugwa. 30 Yegl dugo, Filip mukudi ede magigl pidre, prukwa i, yagl i Aisaia ka boglkwa i kere moglko, prukwa. Prisre, ye di pre, yegl dugwa, Agra yo, ene ketnga i, mabunomo ene pre pogl sino mo sikitne? dugwa. 31 Yegl dugo, yagl i ye di ikne ede te, Na ta pre pogl sikriwe dugwa. Yoba ta ka i mabunomo di naran, na pre pogl sinaglka ba ta manan, na pre pogl sikraluwe dugwa. Yegl didre, ye Filip di te, ene ede karis mina un, nono akie ame di morabugle dugwa.

32 Ana Itiopia nem ikra ye Aisaia ka boglko, kerumara i, ka bage ta yegl paugo, kere kanugwa, Yoba sipsip si goramnedi kane kogl i ede eimere yegl, yoba ye God Kogonmo Yagl i si goramnedi si kane si i ede eigwa. Te, yoba sipsip yugo baiglko, sipsip be dikrumere mere yegl, Yagl i ama ka ta dikrukwa. 33 Yoba ye agai gorabedi ersre, kot kibi ere teigwa. Yugobuno ta God Kogonmo Yagl i moglkwa igne akie meglkwa i, ye yoba siragl mere meglme dinamne? Yoba i prikwa, yagl i makandigle moglkrabedi prisre, si geglmiwe di, Aisaia yegl boglkwa.*

34 Ana Itiopia nem i ka yegl kersre, ye Filip di pre, yegl dugwa, God kamo kep yoba boglkwa i, ka kep yoba ye yene pre boglmo mo yoba pere ta pre boglme? dugwa. Ka i, ene di naratnedi priwe dugwa. 35 Yegl dugo, Filip ere mogl, God kamo bage ta kerumara i mabuno siragl mere paugwa i di togwa. Di tedre, God kamo tau ama idre, Jisas kamo yagl i di togwa. 36,37 Ye karis mina konbauna pi miurko, Filip ye yagl i ka di togo, yagl i prisre, ye ere mogl, yegl dugwa, Nigl nubun ta moglkwa iro, kano! dugwa. Na nigl buragledi prika. Na nigl buglbo, kuno erabo? di, yegl kira pogl prukwa.

38 Ana Itiopia nem i ka yegl didre, ye karis guma akugwa yagl i di te, Ake paio! dugo, ake paugwa. Ake paugo, Filip ye yagl i bogl akie ede nigle ebriko, Filip ye yagl i ake nigl atne ede, nigl bugl togwa. 39 Nigl bugl te kodugo, ye nigle i kide kodo, ede meda ubrika. Ede meda ubriko, Yagl Kade Murubuglomo Filip tabre i ede ogwa pre Filip imim daglkwa. Yegl eruko, Itiopia nem ikra ye Filip kankrukwa ba ye gun podo yedre, ede ogwa. 40 Ana Filip ye kanugwa i, God Murubuglo ye yu taun ta Asdot we dimara i edugo, moglka pamedi kandre, ye ede pi taun bage bage magigl yeimara i pidre, ka mabuno wakai i, yoba di te, wan ede pi taun ta Sisaria we dimara ogwa.