1 Ana Pol ye yoba u makai si meglkwa i ka yegl di togwa, Nina agrama wagle, na ka dinaglka i, ene prio! Na taragl kane kane etne digwa i, ene di tenagle dugwa. 2 Yegl dugo, yoba ye kano Aram ka mina dugo, prisre, ka ta dikre, kiede kaima meglkwa. Kiede meglko, Pol ye ka yegl di togwa, 3 Na Juda yagl ta mole dugwa. Na mana provins Silisia, taun Tarsus we dimara suna i, na kugl yogwa ba na moglka, Jerusalem magigl i mogl, yakie dugwa. Na sule diga, yagl Gamaliel i sule di narukwa. Ye nono kowano awano lono mudu ake giglede beke naruko, priwe dugwa. Te, ene erme God kamo mudu duglo boramnedi erimere yegl, na okna God kamo i mudu duglo boragledi eriwe dugwa. 4 Okna na God kogonmo eriedi pre, yoba Jisas kamo prisre, ye konbaunamo duglo beglkwa i yagl ya abu akie si kane sidre, ere kide ere te, tau ama si goglka. 5 Na ka diga i, tawa teigwa yoba bitno moglkwa i ya yagl kade wagle Kaunsil mina meglkwa i, na kaima dume dinaiglkwa. Ye ege swara ta na pepa tau bogl nare, i ede pi Juda yoba dumo Damaskus meglkwa i tedre, Jisas pre mediglkwa yoba ta moraiglkwa i, si kane si i ede u Jerusalem udre, ye ere kide ere tenaglka pre dedigo, eiwe di, Pol yegl dugwa.

6 Pol ka yegl didre, ama yegl dugwa, Na ede Damaskus enagledi eiwe dugwa. Ede pi Damaskus magigl eigo, belo igne mere yegl yogo, abuglage podo kide ta heven ibo yei, si atne, na moglmara edugo, 7 na yage makandigle sidre, prika i, yoba ta ka di nare, yegl dugwa, Sol yo, ene siragl pre na ere kide ere nare motne? dugwa. 8 Yegl dugo, na di ikne ede kira pogl prika, Yagl Kade yo, ene ira motne? di, yegl diga. Yegl digo, ye na di nare, Na Jisas, dumo Nasaret nem, ene ere kide ere nare motnga i, moluwe di, yegl dugwa. 9 No yoba akie omga i, abuglage podo sugwa i ye kanigwa ba Jisas ka di narukwa i, ye pre pogl sikrimiwe dugwa.

10 Ana ye Na Jisas moluwe dugo, na ye di pre, Yagl Kade yo, erme na siragl eragle? di, yegl diga. Yegl digo, ye na di nare, Ene adigl ede Damaskus suna po di, yegl dugwa. Ede Damaskus suna en, yagl ta ye na ene siragl mere eratnedi di padiglka i, ene di tenan, pratniwe dugwa. 11 Yegl dugo, na abuglage podo kide sugo, kaniga ikra pre gumuglna si kin yogo, yagl wagle no akie omga ikra, na ogona ake i pi, Damaskus suna eimiwe di, Pol yegl dugwa.

12 Ana Pol ka yegl didre, ama yegl dugwa, Dumo Damaskus i, yagl ta moglkwa, kagie Ananaias we digwa. Ye God kuduglmo gogl, lomo duglo boragledi ere moglko, Juda yoba dumo Damaskus meglkwa i ye mabunomo kandre, yagl wakai ta moglmedi kanigwa. 13 Ana na i pi Damaskus edigwa moglko, yagl i u na moglmara magigl adigl, Agra Sol yo, ene gumugln kin yogwa i, erme kanatniwe! dugwa. Yegl dugo, na tabre kaima kan mitna ede, ye kanagledi eriko, gumuglna pene dugo, wakai kaniga. 14 Yegl eruko, ye na di nare, yegl dugwa, Nono kowano awano Godno i, ene kere i pere edugwa. Ye ene kere i pere edugwa i, God yoba siragl mere eraiglmedi prukwa i ene di tenan, ene pre kan eratnga pre ene kere i pere edidre, te, ene Jisas ye Yagl Du Kaima Moglkwa i kandre, Jisas ye ka ta ene di tenabuka i, pratnga pre ama ene kere i pere edumiwe dugwa. 15 I siragl pre ene ye kamo yoba mudu di tedre, konbauna bage Jisas siragl mere eruko, kanga ya ka di togo, pitnga i, di nogugl ede tenatniwe dugwa. 16 Yegl di nare, ama yegl dugwa, Erme ene sugl moglkre, tabre adigl, nigl buglo dugwa. Te, ene Yagl Kade Jisas tadaglmenen gugl edenabedi agle din, ye ene tadaglmenen gugl edenabiwe di, Ananaias yegl di narume di, Pol yegl dugwa.

17 Ana Pol ka yegl didre, ama yegl dugwa, Taragl yegl plau di kodugo, okuo, na ede ikne Jerusalem igle udre, aglke ta ede tawa teigwa yugu togl suna pi kamage ere moglka. Kamage ere moglko, gumuglnamugl eruko, kaniga i, 18 Jisas na moglmara ugwa. Udre, ye na ka ta di nare, yegl dugwa, Ene na kana Jerusalem yoba magigl i di tenatnga i, ta prikraiglmiwe dugwa. Yegl pre ene tabre Jerusalem kide kodo, ede po! dugwa. 19 Jisas yegl dugo, na ye di ikne ede te, yegl diga, Yagl Kade yo, na ene kanen Jerusalem magigl i yoba di tebo, ye praiglkwa kuno erabedi prika. I siragl pre okna na yoba siragl mere mogl, kogon siragl mere erika i ye kanigwa pre erme na ene kanen dinaglka i, ye pre kan eraiglkwa. Na okna ka mabuno yugu bage bage kei yeimara pi, yoba ene pre mediglkwa i ere sidre, si kane siga i, ye yene pre kan erikwa. 20 Te, yagl Stiven, ene kanen yoba di togwa pre ye kobuglo si, si geglkwa ikra, na ye wakai erimedi kan moglsre, yoba ye yagl Stiven kobuglo si goramnedi erikwa i, ir gaglno gugl edigo, na sugl kan moluwe di, na ye yegl di teiga. 21 Na yegl digo, Jisas aglke kor na di nare, Ene ede po! dugwa. Ene en, na ene dedibo, ede dumo eglke, yugobuno pere pere meglmara pidre, na kana di tenatnga pre dediwe di, Jisas yegl dumiwe di, Pol yegl dugwa.

22 Ana yoba ye Pol ka dugwa ikra pre meglkwa ba Pol ye ere mogl, Na ede yugobuno pere pere meglmara enatnedi dedumiwe di, yegl dugwa ege i, yoba pre meglkwa ikra mudu deno kubro, ka podo yegl digwa, Yagl i kor morabuka, kuno erekrumiwa. Si golo! di, yegl digwa. 23 Ka podo yegl didre, ye deno podo kubro, ir gaglno gugl, makandigle sidre, makan kugane wobro pia si mitna edigwa. 24 Yoba mudu ikra yegl ere meglko, soldia bitno yagl i ye soldiamo tau di te, yegl dugwa, Ene yagl i agre i, pi nono pamnara yugugl edidre, ye duglnai sio! dugwa. Ye duglnai sibi, ye aglau siragl mere eruko, yoba deno kubro, ka podo digwa i, na di nogugl ede naran, praluwe di, yegl dugwa. 25 Yegl dugo, soldia tau ye agre i ede yugugl pi, ogo kagle kan sidre, duglnai sinamnedi erikwa. Duglnai sinamnedi eriko, Pol ye soldia 100-pela bitno moglkwa ta magigl moglko, kandre, ye kira pogl prukwa, Na Rom paiga dudugwa pre Rom yoba moglka. Yegl pre ene kot ere narekre, na duglnai sinaiglkwa i, lo yegl ta pamo? dugwa.

26 Ana Pol yegl dugo, soldia 100-pela bitno moglkwa yagl ikra ede pi soldia yaglno kade moglmara i ogwa. Pidre, yegl di togwa, Yagl nono si kane si, duglnai sinamnedi erumga i, ye Rom yoba ta moglkwa pre ene siragl eratne? dugwa. 27 Yegl dugo, soldia mudu sugl moglkwa yagl i u Pol moglmara udre, kira pogl pre, yegl dugwa, Ene na di naro. Ene kaima Rom pano? di, yegl dugwa. Dugo, Pol di ikne ede te, Na Rom paiga. Rom yoba ta moluwe dugwa. 28 Pol yegl dugo, soldia bitno yagl i yegl dugwa, Na Rom yoba moragledi mige podo topo siwe dugwa. Dugo, Pol ye di te, Na topo ta tekrie dugwa. Na nina mana Rom padre, na kugl yebrika pre na Rom yoba moluwe di, Pol yegl dugwa. 29 Ana Pol yegl dugwa pre soldia tau ye duglnai sidre, kira pogl pramnedi erikwa i kudugl gogl, tabre ede eglke eglke eigo, soldia mudu bitno yagl i ama Rom yoba ta mane pamara na sen mina si kane siedi prisre, kudugl goglkwa.

30 Ana tagugo i, soldia bitno yagl i ye tawa teigwa yoba bitno meglkwa i ya Kaunsil mudu di makai sidre, Pol ye aglau siragl mere eruko, yoba digwa i, di nogugl edenan pragledi ye Pol i meda edidre, auro i pi yoba i gumanomugl edugwa.