Atos 3

Yagl ta kagle mawa sugwa i, ede u kor ogwa

1 Ana aglke ta poko dugo, ade kia 3 klok yogwa. 3 klok yogo, Pita ya Jon ede pi tawa teigwa yugu yomara togl suna enabugledi ebrika. Poko dugwa 3 klok i, Israel yoba tawa teigwa yugu yomara togl suna pi kamage ere teigwa ege yogwa. 2 Ana ye ede pi tawa teigwa yugu enabugledi ebrika ege i, yoba tau ama ere mogl, yagl ta kagle mawa sugwa ede padigl, boglo ere i pi tawa teigwa yugu yomara togl dra, yoba ede suna eimara i bina edigwa. Togl dra yoba ede suna eimara i, kagie Togl Dra Wakai we digwa. Yagl i ye mam kugl yogwa ege i, kagle mawa sugwa. Yegl erukwa pre yoba ege ege ye mige yana dinabedi boglo ere i pi tawa teigwa yugu yomara yoba ede togl suna pi, pi erimara i edigo, ye mige ta naraiglmedi ogo kugl, yana di moglkwa.

3 Ana yagl kagle mawa sugwa ikra togl dra yomara yoba ede suna unaiglmara ikra moglsre, kanugwa i, Pita ya Jon ede u togl suna unabugledi eribriko, kanugwa. Kandre, ye mige ta narabredi yana dugwa. 4 Ye mige narabredi yana dugo, Pita ya Jon ye toro kanibrika. Ye toro kanibriko, Pita ka yegl di, yagl kagle mawa sugwa i di togwa, No kano! dugwa. 5 Yegl dugo, yagl kagle mawa sugwa ikra ye mige mo ki ta nara pre dibredi prisre, kan mina ede, ye kanugwa. 6 Kan mina ede, ye kanugo, Pita ye di te, yegl dugwa, Na mige gol mo silva ta panan, ene ake ple dinaglka ta paikrukwa ba na ake moglmere tebo, inatnga. Na Jisas God Kere Yugwa yagl, dumo Nasaret nem moglkwa i, ye dra idre, ene yegl di teiga, Ene adigl, konbauna ede po! dugwa.. 7 Pita ka yegl didre, ye yagl ikra ogo wo kra ake aduglko, yagl i tabre kaima kagle u wakai ogwa.

8 Yagl kagle mawa sugwa i kagle u wakai ogo, ye tabre puglo di adiglsre, konbauna ede ogwa. Konbauna ede ogo, ye Pita ya Jon bogl akie ede pi tawa teigwa yugu yomara togl suna eigwa. Ye togl suna i, ede eigo, yagl ikra ye konbauna pidre, puglo di, God kagie kade te, ede ogwa. 9 Ana yagl i yegl eruko, yoba mudu togl suna meglkwa i, yagl i konbauna pi God kagie kade te, ede ogo, kanigwa. 10 Yoba mudu yagl i kandre, kinano gudu, yegl di prikwa, Yagl i okna Togl Dra Wakai we dimara iro ege ege bina ame di moglsre, yoba mige naraiglmedi yana di moglko, kamgra we di prikwa. Yoba mudu yegl prisre, ye yagl i kagle erme u wakai ogo, kandre, wai kugl, nagino podo kide keglkwa.