1 God Wam Jisas Krais kamo wakai kaima yogwa i, yegl plau dugwa.

2 Okna kibo God ka kep yobamo Aisaia dra idre, ye Wam ka ta yegl di togwa,

Ene pro! Na yagl ta kana kep ero dibo, ye ene enatnara ede okna enabiwa. Ye ene enatnara ede okna pi yoba konbauna ake kun erimere yegl erabiwa.*

3 Ye dumo wau yomara mogl, ka podo di, yoba yegl di tenabuka, Yagl Kade unabuka pre ene ye konbomo ake kun ersre, ye unabara ake du di edenaiglkwa pamiwe*

di, yegl di togwa.

4 Ana dumere mere Jon nigl bugl togwa yagle ikra udre, dumo wau yomara wan moglkwa. Wan mogl, yoba ye moglmara eigwa i, ake nigl atne ede, ka mabuno di tedre, yoba ta nomano yake tenaiglkwa i, ye i nogugl edinamnedi nigl buraiglme dugwa. Te, ye yegl eribi, God ye tadaglmeno gugl edenabiwe dugwa. 5 Jon ka yegl di moglko, yoba taun Jerusalem we dimara kipai meglkwa i ya distrik Judia suna meglkwa i mere kide ede u Jon moglmara eigwa. Ye moglmara pidre, tadaglmeno di pogl teigo, Jon nigl Jordan moglsre, ye ake nigl atne ede, nigl bugl togwa.

6 Ana Jon we, yoba bugla kamel gagno yugo idre, kugugl gagl bekigwa i, edidre, kau nagie kumagl dogwa. Te, ye kaya mokna nogwa i we, mogodo ya brume are nuglo ne wan moglkwa. 7 Ye yoba nigl bugl tedre, ka yegl di togwa, Yagl ta na moknamugl unabiwa. Yagl i, ye yobuglomo podo padre, na egre atne edugwa. Te, na ama ye nigl kogonmo yoba mere yegl moglsre, ye kagle towo kan i na poko edenaglka kuno erekriwa. 8 Na we, na ene nigl mina nigl bugl teiga ba yagl i, kogon ere pere ta ede, Mudu Murubuglo ene si kau si tenabiwe di, Jon yegl dugwa.

9 Ana igne i, Jisas ye taun ta Nasaret we dimara, distrik Galili suna i yogwa, kide kodo, ede u Jon moglmara ugwa. Ye Jon moglmara ugo, Jon ye Jisas nigl Jordan umara ake nigl atne ede, nigl bugl togwa. 10 Jon ye Jisas nigl bugl te kodugo, Jisas ede meda pi nigle bina moglko, tabre kaima kamun mitna ibo ede u koglo koglo ogo, God Murubuglo u kua yumugl mere yegl pidre, pru di ede atne u Jisas moglmara akugo, Jisas kanugwa. 11 Kanugo, God heven ibo ka ta di atne edidre, yegl dugwa, Ene na Wana motniwa. Na dena mudna ene tedre, ene wakai kaima kaniwe di, yegl dugwa.

12 Ana Jisas nigl bugl kodugo, God Murubuglo ere mogl, Jisas oglade agre i ede pi dumo ta wau yomara, yoba moglkrimara ogwa. 13 Ye Jisas agre i ede wau yomara ogo, Jisas ege 40-pela de agl bugla are meglmara suna wan moglkwa. Wan moglko, Satan ye moglmara u Jisas ta eran kanagledi kina sugo, okuo angelo tau udre, Jisas ake ple digwa.

14 Ana okuo King Herot ere mogl, yagl Jon i si kane sugwa. Si kane sugo, mokomugl i Jisas ere mogl, ede distrik ta Galili we dimara suna i pidre, God kamo wakai i, yoba di te, 15 yegl dugwa, Ege kade ta plau dumiwa. God yoba suglno mogl, kingno morabuka ege i, ede magigl u kodugwa. U kodugwa pre ene nomane kor idre, God kamo wakai i, pre medilo! di, Jisas yoba yegl di togwa.

16 Ana aglke ta Jisas nigl nubun Galili winabo di udre, kanugwa, agigle agigle suo ta degigl gagl nigle ede, buglo bagle ere si, i pi mige borabugledi ere miurko, kanugwa. Ye kagno Saimon ya Andru we digwa. 17 Jisas ye agle didre, Na duglo boglsro! Na duglo biur, na ene buglo bagle ere si, i suna edibrere kuno yegl, yoba ama yegl auro i suna edenabredi obuno di tenagliwe dugwa. 18 Yegl dugo, yagl suo i degigl gaglno tabre kide kodidre, Jisas omara sika si ede ebrika. 19 Ana Jisas kunabe ta ede ido pidre, agigle agigle ta ama miurko, kanugwa. Ye yagl ta Sebedi we digwa i wam suo miurko, kagno Jems ya Jon we digwa. Yagl suo i baglkugl bolamugl moglsre, degigl gaglno i si bogl, ake kun ere miurko, kanugwa. 20 Ana Jisas yagl suo i kandre, oglade agle dugo, ye neno Sebedi ya kogon yagl bogl akie baglkugl mina meglkwa i kide kodo, Jisas duglo bogl ede ebrika.

21 Ana Jisas ye duglo beglkwa yagl i bogl akie ede dumo Kaperneam suna eigwa. Pi suna meglko, wakan kade ege yogwa. Wakan kade yogo, Jisas ede ka mabuno yugu yugugl pi, yoba ka mabuno di togwa. 22 Di togo, yoba prisre, nagino keglkwa. I siragl pre ye ka beke togwa i, God lomo beke teigwa yoba dimere yegl ta dikrukwa. Ta manugwa. Ye yene kagie kade paugwa mere yegl dugwa.

23 God kamo beke togo, yagl ta murubuglo kide moglkwa tabre ede yugugl udre, ka podo didre, 24 Aya, Jisas ene Nasaret nem motnga i, no siragl ere nora une? No ere kide ere nora uno mo? Te, ene ira motnga i, na pre kan erie dugwa. Ene God Kere Yugl Yagl ikra motniwe dugwa. 25 Murubuglo kide i yegl dugo, Jisas ka gigledi yegl di togwa, Ene dran si kegl didre, yagl i moglmara kide kodo ede meda wo dugwa. 26 Dugo, murubuglo kide yagl i ogo gagie ake pru dinabedi ersre, kaglkane idre, ede meda ogwa. 27 Ede ogo, yoba mudu nagino kogl, di ikne ikne ede pre, yegl digwa, Yagl i, ka kor ta yu di norumiwe digwa. Didre, Ye ama yagl kade mere yegl ta moglsre, ka yobuglo bogl dugo, murubuglo kide ama ye kamo duglo beglmiwe digwa. 28 Yegl didre, ede meda wigwa igne, Jisas kamo di wai digo, yoba distrik Galili suna kipaigwa i, mudu prikwa.

29 Ana Jisas yogo, Jems ya Jon yebriko, Saimon ya Andru yebriko, ye ka mabuno yugu kide kodo, tabre ede pi Saimon ya Andru kipabrara ede yugugl eigwa. 30 Eigo, Saimon ebie mam nagie niga podo dugo, yugugl ugl pai moglkwa. Ugl pai moglko, ye duglo beglkwa yagl tabre Jisas di teigo, 31 Jisas pi Saimon imakie ugl pai moglmara ogo ake aduglko, ye kidemo bu yogwa. Bu yogo, abumo i, tabre adigl, kaya mokna nenaiglmedi ere wakai ere gaglkwa.

32 Ana ade ede prak ogwa igne, yoba ere mogl, yoba kide sigwa ya murubuglo kide ye meglmara suna meglkwa i mudu auro yu Jisas moglmara wigo, 33 yoba dumo Kaperneam kipaigwa i, mudu u yugu dramugl kau si meglkwa. 34 Kau si meglko, Jisas yoba kide kane kane sigwa i tau mere ere wakai ere tedre, te yoba murubuglo kide ye meglmara suna meglkwa i, mere kide di meda edidre, erukwa. Di meda edidre, murubuglo kide ye Jisas ira moglkwa i, pre pogl sigwa pre ye ira moglkwa i di nogugl ede dinaiglmedi Jisas mane dugwa.

35 Ana tagna ta i, Jisas eduer kana adigl ede meda pi, dumo wau yomara ta pi kamage ere moglkwa. 36 Kamage ere moglko, Saimon ye yagl kunama bogl Jisas dokigwa. 37 Ye Jisas dokidre, kanigwa igne ye yegl di teigwa, Yoba mere kide ene dokime digwa. 38 Yegl digwa ba Jisas di ikne ede te, yegl dugwa, Na yoba bina dage atne kipaigwa i ama ka mabuno di tenaglka paugwa pre nono ede enamga. Na kogon yegl eraglka pre wiwe dugwa. 39 Yegl dugo, ye distrik Galili suna wan ede bage bage eigo, Juda yoba ka mabuno yuguno yomara i, ka mabuno di tedre, murubuglo kide yoba meglmara suna meglkwa i di meda edidre, erukwa.

40 Ana aglke ta yagl ta kede kaglade sugwa u Jisas moglmara goglko bodugl, Jisas di pre, yegl dugwa, Yagl Kade yo, ene na ta ere wakai ere naragledi pitn, eratnga i kuno erabiwe di, yegl dugwa. 41 Yegl dugo, Jisas yagl i mirie goglsre, ogo duglo si yagl i akidre, ye yegl di togwa, Na ene ere wakai ere tenagledi prika. Ene u kor po! dugwa. 42 Yegl dugo, kede kaglade sugwa ikra oglade bu yogo, ye ogo gagie yoko yogwa. 43 Ogo gagie yoko yogo, Jisas ye tabre dedidre, ka giglede yegl di togwa, 44 Na siragl mere erika i, ene pi yoba swara ta di tekro! Ene pi ogon nagin tawa togwa yagle morabara obuno di tenatniwe di, yegl dugwa. Te, Moses okna yoba kede kaglade sigwa u kor eigwa igne tawa tenaiglme dumere yegl yoba ene u kor enga i, kan pogl sinaiglkwa pre tawa to! di, Jisas yegl dugwa. 45 Jisas yegl dugwa ba yagl ikra pi yoba mere kide kaima di togo, prikwa. Ka i prisre, yoba mere kide ede Jisas moglmara enamnedi erikwa pre Jisas ede taun nogugl unabuka kuno erekrukwa. Kuno erekruko, ye yoba ta kipai moglkrimara wan moglkwa. Wan moglko, yoba dumo bage bage kipaigwa i, mere kide kaima ye moglmara eigwa.