1 Ana igne i yoba mere kide kaima aglke kor dagl u Jisas moglmara makai sigwa. Makai si mogl pai meglkwa pre ye kaya mokna nenaiglkwa ta yekruko, Jisas ye duglo beglkwa yagl agle dugo, wigo, ye yegl di togwa, 2 Yoba mere kide wigwa i, na mitno goglka. Nono ege suota munara magigl i, ye kaya moknano dudugwa. 3 Te, tau dumo eglke mogl wigwa pre yoko ede pio dibo, kaima pi konbauna bage gumuglno magran, yage sinaiglkwa mere yegl pamiwe dugwa. 4 Yegl dugo, ye duglo beglkwa yagl di ikne ede, yegl digwa, Nono magigl i, wau yomara, kugl bage munga. Yegl pre bret aglo doko i tomun, yoba ye ne kuno eraiglme? digwa. 5 Yegl digo, Jisas ye di pre, Ene bret siramna yeigwa, yome? dugwa. Yegl dugo, ye No bret 7-pela yomga, yoko yomiwe digwa.

6 Ana Jisas ere mogl, yoba mudu ame dio dugo, ame di meglko, ye bret 7-pela idre, God di wakai yei tedre, ake buko di, ye duglo beglkwa yagl togwa. Togo, ye i pi yoba mudu ame di meglkwa i, teigwa. 7 Ana ye buglo bagle kebra suom ta ama yeigwa pre Jisas buglo bagle i ama idre, God di wakai yei tedre, ye duglo beglkwa yagl tedre, Ene i pi yubu si teo dugwa. 8 Ye yubu si teigo, yoba mudu neigo, dano erukwa. Dano eruko, tau yoko yogwa i, ye i makai sidre, degigl gagl kade 7-pela gre kau sigwa. 9 Ana yoba igle meglko, Jisas bret togwa i, 4,000 mere yegl meglkwa. Ana ye ne kodigo, Jisas ye di pere pere edugo, ye ede eigwa. 10 Ye ede eigo, Jisas ye duglo beglkwa yagl bogl oglade ede baglkugl mina pi mogl, ye ede pi distrik ta Dalmanuta we dimara pi plau digwa.

11 Plau digo, Farisi yoba ye moglmara udre, Jisas aglau eran, kanamnedi yegl digwa, Ene God yobuglomo idre, kimagl ta etn, pre medramniwe digwa. 12 Yegl digo, Jisas dem muduo wagle kide prisre, muru i meda ede, yegl dugwa, Ene yugobuno erme meglkwa i, siragl pre na kimagl diu ta eran, kanamnedi prime? Na ene ka kaima di teiga, na kimagl diu ta eribo, ene ta kankraiglmiwe dugwa. 13 Yegl didre, ye kide kodo, aglke kor ede baglkugl wagle pi, ede nigl koglo ibo ogwa.

14 Ana Jisas ye duglo beglkwa yagl bogl ede nigl koglo ibo eigo, duglo beglkwa yagl bret tau nenaiglkwa i kiure, wigwa paugwa. Te, bret ta nenaiglkwa i, swara keme baglkugl mina yogo, kanigwa. 15 Yegl kanigo, Jisas ye ka giglede di te, yegl dugwa, Farisi yoba ya King Herot yisno i pre ene kan kun erio! dugwa. 16 Yegl dugo, ye duglo beglkwa yagl wagle prikwa i, No bret ikrumga i pre dumedi drano digwa. 17 Ye yegl digo, Jisas pre kan ere, yegl dugwa, Siragl pre ene bret yukrikwa i pre ka drano dime? Na erika i, ene kan pogl sikriko, nomano gigle kaima dumo? 18 Ene gumuglno koglo koglo paugwa ba ene kan pogl sikriko, kinano ama koglo koglo paugwa ba ene ka prikrikwa paugwa. Na okna erika i, ene pre meglmo mo pre moglkrime? 19 Na bret 5-pela ake buko didre, yoba 5,000 teigo, bret yoko yomara i mina ene degigl gagl siramna gre kau sime? dugwa. Dugo, ye di ikne ede, Degigl gagl 12-pela gre kau sumne digwa. 20 Yegl digo, ye aglke kor di te, Ama yoba 4,000 kuno yegl mere ersre, bret 7-pela mina teigo, kawa togwa degigl gagl kade siramna girime? dugo, ye 7-pela gre kau sumne digwa. 21 Yegl digo, Jisas ye di te, Ene na ira moglka i, pre pogl sikrimiwe dugwa.

22 Ana Jisas ye duglo beglkwa yagl bogl ede pi dumo Betsaida we dimara eigo, yoba tau ere mogl, yagl ta gumuglo koglo koglo kin yogwa agre i Jisas moglmara ede, Jisas ye akidre, ere wakai ere tenabedi kamage yei, di prikwa. 23 Di priko, Jisas yagl i ogo ake, agre i ede pi yoba dumo kebra kipai meglmara bina ta pidre, ye eur si yagl i gumuglo wagle edidre, ogo koglo koglo i pi yagl i gumuglo mina akugwa. Akidre, ye yagl i di pre, yegl dugwa, Ene erme taragl ta kano mo kankitne? dugwa. 24 Dugo, yagl i kan ple di kandre, yegl dugwa, Na yoba kaniga ba kan pogl sikrika. Ye ede mere yegl ta adigl pai, u ikne ikne pi wan meglmedi kanie di, yegl dugwa. 25 Yegl dugo, Jisas aglke kor ogo koglo koglo ye gumuglo mina akugo, ye pene di kanagledi erukwa. Eruko, ye gumuglo aglke kor u wakai ogo, ye kan kuno erukwa. 26 Yegl eruko, Jisas yagl i di tedre, yegl dugwa, Ene erme ede ikne dumo magigl i suna pikre, ede yugun kaminen po! dugwa.

27 Ana Jisas ye duglo beglkwa yagl bogl ede pi yugu togl tau taun bina bina Sisaria Filipai we dimara enamnedi eigo, konbo bage ye duglo beglkwa yagl di pre, yegl dugwa, Ene pribi, yoba na ira moglme dime? dugwa. 28 Yegl dugo, ye di ikne ede yegl digwa, Ene Jon nigl bugl togwa yagle ikra, adigl u kor enga, motniwe digwa. Te, tau digwa i, ene Elaija motniwe digwa. Te, tau digwa i, ka kep yoba okna ibo meglkwa i, swarano ta u kor enga, motniwe di, yegl dime digwa. 29 Yegl di kodigo, Jisas yegl dugwa, Ana ene we? Ene na ira moglme di prime? dugwa. Yegl dugo, Pita di ikne ede, yegl dugwa, Ene God Kere Yugwa Yagl motniwe dugwa. 30 Ana Jisas ye ka gigledi di tedre, Na ira moglka i, yoba ta di tekrio dugwa.

31 Ana ege i mina Jisas mabuno bogl ka di nogugl ede tedre, yegl dugwa, Na Yoba Wam moglka i, yubun podo tau inaglka paugwa. Israel yobano kade meglkwa i, ya te tawa teigwa yoba bitno meglkwa i, ya te God lomo beke teigwa yoba i, mudu mokono narsre, na si geglbi, na ege suota mogl, adigl u kor enaglka pamiwe di, yegl dugwa. 32 Ye ka yegl dugwa i, nogugl kaima dugwa. Dugo, Pita prisre, Jisas auro i bina edidre, ka togwa. 33 Ka togo, Jisas aglke kan ikne ye duglo beglkwa yagl tau meglmara i edidre, Pita ka te, yegl dugwa, Satan, na moglmara ede eglke po! dugwa. Ene ka dinga i, yoba nomano pamere i keme dinga ba God nomanemo pamere i ene ta dikitniwe dugwa.

34 Ana Jisas ka yegl di kodidre, ye duglo beglkwa yagl ya yoba mudu agle dugo, wigo, ye yegl di togwa. Yoba ta na duglo boragledi prabuka i, yoba ede prak kake ede eigo, si geglmere mere yegl, ye gorabuka i pre gun yedre, te ye yene nomanemo si goglsre, na duglo borabuka paugwa. 35 I siragl pre yoba ta na pre gorabuka i pra we didre, te, na kana yoba di tenabuka pre gorabuka i pra we dinan, ye kor kaima morabuka. Ba yoba erme keme kor mogl, wakai moragledi pran, ye u kide enabuka.

36 Yoba ta makandigle taragl mudu nem yagl morabuka ba ye yene u kide pidre, wau boran, wakai panabo? 37 Mo, yoba kia mina kor morabuka i pre siragl wakai ta tedre, ikrabiwe dugwa.

38 Ene yugobuno erme meglkwa i, ene u kide pi kodidre, abu ta wie kide kodo yagl ta bogl kunogl nebrere mere yegl meglkwa. Ene meglmara suna i ta na Yoba Wam moglka i, againa goglsre, na kana pre ama agai goran, okuo yobamo i ama agaimo goraglka. Na Nina kagie kade pamere yegl na kagna kade naran, na Nina angeloma bogl akie unamga igne i, na yoba i againo goraglka pre diwe di, Jisas yegl dugwa.