1 Ana ege ta Jisas ka mabuno yugu ta ama yugugl ogo, yagl ta ogo koglo mawa sugwa ama yugugl moglkwa. 2 Ana Farasi yoba ye wakai ere kan moglsre, Jisas wakan kade ege i, yagl i ta ere wakai ere tenan, ene mawagl pamara etniwedi didre, kot ere tenamnedi kan meglkwa. 3 Kan meglko, Jisas yagl ta ogo mawa sugwa i di tedre, Ene ede yoba gumanomugl wo dugwa. 4 Ede u ogo, Jisas Farisi yoba ikra yegl di prukwa, Wakan kade ege i, God lomo duglo boglsre, nono siragl eramne? Mabuno wakai eramno mo mabuno kide eramne? Te, wakan kade ege nono yoba ere inamno mo yoba si goramne? di, yegl dugwa. Yegl dugwa ba Farisi yoba i ye ka di ikne edekriko, 5 Jisas kan winabo didre, kanugwa i, ye ka prikramnedi nomano gigle dugwa pre Jisas dem kubruko, dem muduo ama yubun dogwa. Yubun dogo, ye yagl ogo mawa sugwa i di te, Ene ogon duglo suo! dugwa. Dugo, yagl i ogo duglo sugo, ye ogo u wakai ogwa. 6 Yegl eruko, kandre, Farisi yoba oglade ede meda pi Herot yobama i bogl makai sidre, Jisas siragl mere ere kide ere tenaiglmere i pre ka di keglkwa.

7 Ana Jisas ye duglo beglkwa yagl bogl dumo i kide kodidre, ede pi nigl nubun Galili bina eigwa. Eigo, Galili yoba mere kide ye eimara mokonomugl sika si ede eigwa. 8 Yoba distrik Judia kipai meglkwa ya te, dumo Jerusalem ya dumo makan Idumea ya nigl koglo Jordan kipai meglkwa ya te, dumo Tair ya Saidon yebrara magigl kipai meglkwa i, ye mere kide Jisas siragl taragl erukwa i yoba digo, prisre, ye moglmara eigwa. 9 Yoba mere kide ye moglmara u moko guma eraiglkwa paugwa pre Jisas ye duglo beglkwa yagl di te, Baglkugl ta yu magigl wio dugwa. 10 I siragl pre ye yoba mere kaima kideno ere wakai ere togwa pre yoba mudu kide sigwa i, Jisas akenamnedi ake nu sigwa. 11 Te, yoba murubuglo kide ye meglmara suna meglkwa i ama Jisas kanigwa igne i ye ege ege yage kobragai padre, ka podo di, Ene God Wam motniwe digwa. 12 Yegl digwa ba Jisas ye yoba ira moglkwa i, yoba di te dinaiglmedi murubuglo kide ka giglede di tedre, mane di togwa.

13 Ana Jisas ere mogl, ede muglo ibo pidre, ye yoba ta ye moglmara unaiglmedi prukwa i, agle dugo, wigwa. 14 Wigo, ye yagl 12-pela kere idre, yoba i, Jisas kere iga yoba meglmiwe dugwa. Yagl 12-pela kere yugwa i, ye bogl akie moraiglkwa pre ya te, Jisas ye dedenan, ye ede pi yoba ka mabuno di tedre, 15 murubuglo kide yoba meglmara suna moraiglkwa i, Jisas ye yobuglo tenan, ye di meda edenaiglkwa pre kere yugwa. 16 Ye yagl 12-pela kere yugwa i, swara ta Saimon moglkwa. Te, Jisas ye kagie kor ta yei tedre, Pita we dugwa. 17 Te, yagl Sebedi wam suo kere yugwa, kagno Jems ya Jon we digwa. Jisas ere mogl, Jems ya Jon suo akie kagno ta Boanerges we dugwa. Kagno Boanerges i, mabuno yegl, kamun gur dugwa yagl mere yegl miurka. 18 Te, Jisas yagl tau ama kere yugwa, kagno Andru ya Filip ya Bartolomyu ya Matyu ya Tomas ya Jems we digwa. Jems i, ye yagl ta kagie Alfius we digwa i wam moglkwa. Te, ye ama Tadius ya Saimon kere yugwa. Saimon i, ye Selot* yoba ta moglkwa. 19 Te, ye ama Judas Iskariot kere yugwa. Yagl Judas i, okuo ye Jisas i pi kudamo ikne ogono mina yogwa.

20 Ana Jisas ede ikne kipamara ogo, yoba mere kide aglke kor ye moglmara u makai sigwa. Yoba mere kide makai si meglkwa pre Jisas ye duglo beglkwa yagl bogl kaya mokna nenaiglkwa kuno ta erekrukwa. 21 Yegl eruko, yoba tau Jisas kogon podo kide yegl erume digo, Jisas nem agiglema prisre, Jisas du erukwa pamiwe didre, ye pi agre i ede unamnedi Jisas moglmara eigwa.

22 Ana God lomo beke teigwa yagl tau Jerusalem mogl udre, yegl digwa, Jisas we, murubuglo kide di meda ede wan moglkwa i, Belsebul,* murubuglo kide bitno moglkwa ikra, ye moglmara suna moglsre, yobuglo togo, Jisas di meda edumiwe di, yegl digwa. 23 Yegl digo, Jisas yoba i ye moglmara Magigl wio! dugo, wigwa. Wigo, ye ka padum tau di, yegl dugwa, Satan yene ere mogl, yene di meda edenan, kuno erabo? dugwa. 24 Te, yoba ta dumo swara moraiglkwa i, yene si buno di ede suo pidre, kuda beglbi, ye u kide enaiglkwa. 25 Mo, yoba bormai swara meglkwa i, yene ikne ikne kuda beglbi, ye ama u kide enaiglkwa. 26 Kuno yegl mere, Satan yugobunomo mina yene kuda beglbi, ye yugobunomo dudinan, ye yobuglomo ama dudunabuka pamiwe dugwa.

27 Jisas ka ta ama yegl dugwa, Yagl Kide yobuglomo podo paugwa i, yugumo sugl moran, yoba ta ye taraglmo inagledi eran, ta kuno erekrabuka. Ba yoba ta ye taraglmo inagledi pran, ye komono kana ogo kagle kan si padiglsre, okuo ye taraglmo mudu ta yugugl yenabuka i, inabiwe dugwa.

28 Yegl pre na ene ka kaima di teiga, yoba tadaglme siragl mere ta eraiglkwa ya God ka kide di tenaiglkwa i, God ye gugl ede tenabuka 29 ba yoba ta Mudu Murubuglo di kide yei tenan, God ye tadaglmemo i, gugl ede tekrabuka. Aimadi kamin pai morabiwe di, yegl dugwa. 30 Yoba tau ye murubuglo kide ta ye moglmara suna moglme digwa pre Jisas yegl dugwa.

31 Ana Jisas ka yegl di kodugo, Jisas mam ya agiglema u meda adigl mogl, Jisas unan, ka di tenamnedi ka di yugugl edigwa. 32 Di edigo, yoba mere kide Jisas moglmara ame di mogl winabo digwa i, ye yegl di teigwa, Ene pro, ene man ya agitn abatnma meda mogl, ene ka di tenamnedi sugl kan meglmiwe digwa. 33 Yegl digo, Jisas di ikne ede yegl di togwa, Na mana ya agrama ira meglmedi prime? dugwa. 34 Didre, ye yoba ye moglmara ame di mogl, winabo digwa i mudu kandre, yegl dugwa, Kanio. Yoba i na mana ya agrama meglkwa. 35 I siragl pre yoba ira ta God kamo prisre, duglo boraiglkwa i keme na agrama moglsre, abarama moglsre, manama moglsre, erimiwe di, Jisas yegl dugwa.