Marcos 7

Yagl ta kina gi dugo, ama ka di kun erekrukwa ta Jisas ere wakai ere togwa

31 Ana Jisas dumo kebra ta Tair yomara magigl moglkwa ikra kide kodo, ye ede pi taun Saidon pidre, aglke kor ede pi nigl nubun Galili we dimara i pidre, i kide kodo, aglke kor ede pi distrik ta 10-pela Taun we dimara i ogwa. 32 Ogo, yoba ere mogl, yagl ta kina gi dugo, ka di kun erekrukwa ta auro yu Jisas moglmara edidre, Jisas ye ogo i pi yagl i akidre, ere wakai ere tenabedi kamage yeigwa. 33 Kamage yeigo, Jisas yagl i agre idre, yoba mere kide meglmara i kide kodo, ede bina ta pi mogl, ye ogo mogo suo i pi yagl i kina kun mina koglo koglo edidre, eur si ogo mogo mina padigl, i pi yagl i drabie mina si baugwa. 34 Drabie mina si badre, ye kan heven ibo ede, muru i meda edidre, yagl i di te, Efata! dugwa. Ye ka Efata dugwa i, Yauro edo! mere yegl dugwa. 35 Yegl dugo, yagl i kina gi dugo, ka di kun erekrukwa ikra, erme ka pre, ka kuno di, erukwa. 36 Yegl eruko, Jisas yoba mudu magigl meglkwa i di te, Yoba ta di tekrio! dugwa. Yegl dugwa ba ye yoba di te wan meglkwa. Jisas ye yoba ege mere Di tekrio! dugwa, ba ye dugwa i prikre, ye yoba di te keme erikwa. 37 I siragl pre ye Jisas erukwa i kandre, nagino podo kogl, yegl digwa, Jisas ye taragl mudu wakai keme erume digwa. Ye yoba kinano gi digwa i, ka praiglmedi ersre, yoba ka dikrikwa i, ka dinaiglmedi erumiwe di, yegl digwa.