1 Ana namba 1 mun igne, Israel yoba mudu ede pi dumo wau yogwa ta kagie Sen we dimara pi plau didre, dumo kebra Kades we dimara sel yugu kipai meglkwa. Ye dumo i kipai meglko, Moses ya Aron abaro Miriam goglko, ye maugl sigwa.

2 Ana Israel yoba sel yugu kipai meglmara i, nigl nenaiglkwa ta moglkrukwa. Nigl ta moglkruko, Israel yoba makai sidre, Moses ya Aron ka tenamnedi pi ye miurara eigwa. 3 Ye Moses ya Aron miurara pidre, ye ka te, yegl digwa, No agro tau Yawe gumuglo wagle geglkwa igne i no akie guna, wakai paugo. 4 Ene siragl pre no Yawe yobama munga i agre i ede u dumo wau yomara ubre? No aglno buglano bogl akie goraiglmedi agre i ede ubro? 5 Siragl eruko, ene no dumo Isip kide kodinaiglmedi agre i ede meda u dumo kide magigl i edibre? Dumo magigl i, kugl mogo nenamga ta paikruko, ede mogo keglkwa ta paikruko, ede wain ama paikrukwa. Te, nigl we, no nigl nenamga ta moglkrumiwe di, yegl digwa.

6 Ana Israel yoba ka yegl digo, Moses ya Aron ye meglmara kide kodidre, ede pi Yawe sel yugumo dua wagle pidre, dano kra pai, gumano drano makan mina padiurka. Padiurko, Yawe abuglagemo podo sugo, kanibrika. 7 Kanibriko, Yawe ye Moses yegl di togwa, 8 Ene Aron muglbomo in, ene Aron bogl Israel yoba mudu di makai sinabriwa. Ene ye di makai sibr, ye kan meglbi, ene kobuglo podo eglke iro paugwa i ka di ten, nigl kobuglo i mina ede meda unabuka. Ene yegl etn, nigl ede meda unan, Israel yoba ye aglno buglano bogl mudu nenaiglmiwe di, yegl dugwa.

9 Ana Yawe yegl dugwa pre Moses ere mogl, ye dumere Yawe sel yugu moglmara pi, Aron muglbomo ikra yugo, 10 Aron bogl Israel yoba kobuglo ikra pamara unaiglmedi di makai sibrika. Di makai sibriko, Moses ere mogl, Israel yoba yegl di togwa, Ene prio! Ene ka sedigwa yoba meglkwa. No kobuglo i mina nigl unabedi ere edibugl, unan, ene nenaiglmo? di, Moses yegl dugwa. 11 Moses yegl didre, ye muglbo ake mitna ede, kobuglo mina ege suo sugwa. Sugo, nigl podo kuglo si ede meda ugo, Israel yoba ye aglno buglano bogl nigl neigwa. 12 Ye nigl neigwa ba Yawe ere mogl, Moses ya Aron yegl di togwa, Ene we, ene na ka kaima dumedi prikre, na kana sedibrika. Ene kana sedibrika i, Israel yoba na yagl kade ka kaimane moglka i kanaiglkwa mere yegl ta erekribrika. Yegl pre ene suo akie Israel yoba agre i ede pi na dumo ta ene tenagle diga i, edekrabriwe di, yegl dugwa. 13 Ana Israel yoba dumo igle Yawe ka teigo, Yawe ye yagl kade ka kaimane moglkwa i, Israel yoba kanaiglmedi erukwa pre nigl kobuglo mina ede meda ugwa i, Meriba* nigl we digwa.

22 Ana okuo Israel yoba mudu dumo Kades kide kodidre, ede pi muglo meglbi Hor we dimara eigwa. 23 Muglo meglbi Hor dumo podo Idom we dimara bina yogwa. Ye ede pi dumo i meglko, Yawe ere mogl, Moses ya Aron yegl di togwa, 24 Aron erme gorabuka. Ene suo akie Meriba nigl ikra moglsre, na kana sedibrika pre na dumo ta Israel yoba teiga i, Aron suna ta pikrabuka. 25 Yegl pre Moses, ene Aron idre, ye wam Eleasar idre, agre i ede pi muglo meglbi Hor we dimara ibo edidre, 26 Aron kuguglmo gaglmo gugl edidre, ye wam Eleasar ede tenatniwa. Ede ten, Aron muglo ibo mogl, gorabiwe di, yegl dugwa. 27 Yawe yegl dugo, Moses ye dumere erukwa. Israel yoba mudu kan meglko, Moses yogo, Aron wam bogl yebriko, ye ede muglo ibo eigwa. 28 Ye ede muglo ibo eigo, Moses Aron kuguglmo gaglmo gugl edidre, Aron wam Eleasar ede togo, Aron goglkwa. Aron goglko, Moses ya Eleasar ede atne ubrika. 29 Ye ede atne ubriko, Israel yoba mudu kan meglkwa i, Aron goglmedi kandre, ege 30-pela de ye kai ere teigwa.