4 Ana okuo Israel yoba muglo Hor we dimara i kide kodidre, ye dumo Idom bina winabo dinamnedi pre konbauna ta ede mudi nigl Retsi moglmara ogwa yomara i wagle ede eigwa. Ede eigwa ba ye konbauna pi moglsre, tabre pi kodinamnedi pre oglka erukwa. 5 Oglka erukwa pre ye God ya Moses suo akie ka te, yegl digwa, Siragl eruko, ene suo ere mogl, no dumo Isip kide kodinaiglmedi agre i ede meda u, dumo wau yomara magigl i no goraiglmedi edibre? Kaya mokna magigl i paikruko, nigl ama ta moglkrukwa. Te, God bret kide ta norukwa ikra we, no nomga, kide kaima prumniwe di, yegl digwa.

6 Ana Israel yoba ka yegl digo, Yawe ere mogl, toki kide Israel yoba meglmara suna enaiglmedi dedugo, ye pi, Israel yoba kaiglko, Israel yoba tau mere geglkwa. 7 Israel yoba tau mere geglko, yoba kor meglkwa i ede u Moses moglmara udre, ye yegl di teigwa, No we, no Yawe ka tedre, ene ka tedre, erumga i, tadaglme erumga. Ene erme Yawe agle di pitn, ye toki kide i no munara kide kodinaiglmedi erabiwe di, yegl digwa. Yegl digo, Moses Israel yoba pre Yawe agle di prukwa. 8 Moses ye agle di pruko, Yawe ere mogl, Moses di te, yegl dugwa, Ene toki kide ta bekidre, ede olto wagle padigl, ede i bodugl padratniwa. Bodugl padigln, yoba toki ye giugl kaiglkwa i, u toki kide ene bekenatnga i kanibi, ye goglkre, kor moraiglmiwe di, yegl dugwa. 9 Ana Yawe yegl dugo, Moses ye dumere taragl bras we digwa i tau idre, toki kide ta bekidre, ede olto wagle padiglsre, ede i ake mina ede, bodugl paduglkwa. Ye bodugl paduglko, toki okuo ta yoba ta giugl kaiglkwa i, yoba i ede pi Moses toki kide bekugwa i kandre, goglkre, kor meglkwa.Israel yoba toki giugl kaiglkwa i, u Moses toki kide bekugwa i kandre, goglkre, kor meglkwa