1 U'yu' Naomi wav'age na mudu'gu' wa mugosi, wa igongo lyamwa Elimeleki, lina lyakwe witanagwe Bowasi, muntu' mukumalu'ku na mundev'a. 2 Lu'siku' lu'mo, Luti, Mumowabu, wamuwi'laga mukwiye Naomi ati', "Nu'lomba nje mu migu'nda nkasalale viliwa vya shayili, ha nnuma ya mwi'mbu'zi u'yo aku'nzumi'zya." Nawe Naomi wasu'v'yaga, "Endita mwana wanne, yaga."

3 Haho Luti wayaga mu migu'nda ku'kasalala ha nnuma ya v'i'mbu'zi viliwa i'vyo v'ali'lekela. Kasinaga wav'age ali' mu mugu'nda gwamwa Bowasi, u'yo wa igongo lyamwa Elimeleki.

4 Ha itungo lyeni'lo Bowasi wizaga ku' mugu'nda gwakwe ku'fuma ku' lu'go lwakwe ku' Betelehemu. Wav'agisyaga v'i'mbu'zi ati', "Gu'ku' Mulungu av'e na inywe." Nav'o v'asu'v'yaga, "Gu'ku' Mulungu aku'dosye." 5 Hangi' Bowasi wamuwu'zyaga mwi'mi'li'zi wa v'i'mbu'zi v'akwe, "Ali' u'yo mwaniki' wamwa nde?" 6 Mwi'mi'li'zi wasu'v'yaga ati', "Mwaniki' mwenu'yo ali' Mumowabu, u'yo wizile haki'mo na Naomi ku'fuma ku' nsi' ya Mowabu. 7 Wizaga walomba ku'muleke asalale nsalazyo ya viliwa ha nnuma na v'i'mbu'zi. Nawe wadi'laga ali'tu'mama ku'fuma ndiyu', sumbwa wali' wayaga ku'kasuuha ku' mutaka ku' itungo ido."Bowasi na mwi'mi'li'zi wa v'i'mbu'zi v'akwe v'ali'musu'nsu'mu'li'la Luti

8 Nawe Bowasi wayaga ku'kamuwi'la Luti, "Degeleka mwana wanne, ku'du' u'ye ku'kasalala mu mugu'nda gu'ngi', sumbwa mu mugu'nda gwenu'gu' du'. Ilondage na v'enav'a v'atu'mami v'anne v'a ki'ki'ma. 9 Minso gako galinge mu mugu'nda u'go v'ali'wi'mbu'la v'asu'mbana, nanho u'v'alonde. Nav'akaani'zyaga v'enav'a ku'du' v'aku'tusye. Hangi' u'lu' wakolwa nota, u'v'e u'li'ya du' ku'kanywa ha mizoga zya minzi' ago v'adahile v'asu'mbana v'enav'a."

10 Ku'nguno yeni'yo, Luti wamusungami'laga na ku'muku'v'i'i'la Bowasi na ku'yomba ati', "Nav'a na wu'soga ki' ku' wako ninga ku'nfwi'la ki'sa ene mugeni?" 11 Nawe Bowasi wasu'v'yaga ati', "Nigilwe yose i'yo wamuv'ezezizye mukwiyo, ku'fuma ku'gulala kwa mugosi wako. Manyile i'vyo wav'alekile v'av'yazi v'ako, na ku'yi'leka nsi' i'yo wav'yali'lwa, na wizile kwikala na v'antu' av'o u'kav'amanyile ku'fuma mbu'ki'. 12 Gu'ku' Mulungu aku'su'v'i'zye ku' gose ago wav'ezizye. U'dosiwe ku' twingi na Gu'ku' Mulungu, Mulungu wa Izilaeli, u'yo wapeelelile mu manana gakwe." 13 Haho Luti wayombaga, "Gu'ku' wanne, ev'e wambezezyaga wu'soga wu'hanya muno. Wayomba nanne ku' wu'soga wa moyo, na wampaga ihu'li'kyo lya moyo ninga i'vi ene nkav'ile ki'ti' yu'mo mugati' na v'atu'mami v'ako v'a ki'ki'ma."

14 Ha itungo lya ku'lya, Bowasi wamuwi'laga Luti ati', "Kaliwu' hano, izu'u' u'lye niswe, u'mege mugate na u'kozye mu ki'neneko." Nawe Luti wikalaga haki'mo na v'i'mbu'zi, nav'o v'amupaga mbutoo zya wu'komelwe. Walyaga na wiku'taga mpaka walekelaga. 15 Aho wawu'kaga hangi' ku'ya ku'kasalala viliwa, Bowasi wav'alagi'li'zyaga v'atu'mami v'akwe, "Muleki asolele ninga bi'hi' na matuntu ga masapali u'mo gali', ku'du' mumuhame. 16 Hangi', mukweseli ngala ku'fuma mu masapali mulagazye ki'gele asolele, ku'du' mumugizye."

17 Haho Luti wasolelaga viliwa mu mugu'nda mpaka mpi'ndi', na wavigu'magu'laga viliwa vyeni'vyo na kokazya ki'ti' idebe li'mo na wu'sago. 18 Wasombaga viliwa vyeni'vyo na wayaga mpaka ku' kaya ku' lu'go lwamwa nnina wu'kwi, na ku'mulagi'la i'vyo wasolelaga. Hangi' Luti wafumyaga ki'liwa i'cho walekelaga aho wali' wiku'ta, na wamupaga. 19 Hohene mukwiye wamuwu'zyaga, "Ali', wasalalaga ku'he walelo? Watu'mami'laga ku'he? Adosiwe muntu' u'yo waku'lawaga." Haho Luti wasu'v'yaga ku'mwa nnina wu'kwi ati', "Natu'mamaga ku' mugu'nda gwa muntu' yu'mo lina lyakwe Bowasi." 20 Nawe Naomi wamuwi'laga mukamwana wakwe ati', "Mwenu'yu' adosiwe na Gu'ku' Mulungu, u'yo akalekile ku'lagi'la chelu' chakwe, ku' v'apanga, ninga ku' av'o v'amalile ku'gulala." Hangi' wamuwi'laga, "Muntu' mwenu'yo ali' mudu'gu' wiswe wa bi'hi', yu'mo mugati' na v'adu'gu' av'o yi'li'v'adima ku'ku'saala iswe."

21 Hangi' Luti Mumowabu wayombaga ati', "Ninga vyeni'vyo wali' wambwi'laga ati', ‘Wikale haki'mo na v'atu'mami v'anne, mpaka aho v'alakamale kwi'mbu'la viliwa vyanne vyose.’ "

22 Haho Naomi wasu'v'yaga, "Mwana wanne, yi'li' visoga wilonde haki'mo na v'atu'mami v'akwe v'a ki'ki'ma, ki'gele v'antu' v'aleke ku'ku'sukyansukya mu mugu'nda gwa muntu' yu'ngi'." 23 Ku'nguno yeni'yo Luti wilondaga na v'atu'mami v'amwa Bowasi, na wasolelaga viliwa vya shayili na ngano ha itungo lyose lya lyi'mbu'la. Mugati' na nsiku' zyose zyeni'zyo Luti wav'age ikalile na nnina wu'kwi.