1 Hohene Bowasi wayaga ku'kikala ku' wingi'li'lo wa kaya, u'ko v'antu' v'ali'v'aga v'ali'wikuminga. Yav'aga u'yo mudu'gu' wamwa Elimeleki wa bi'hi' wa ku'komola, u'yo Bowasi ndi' wamukania, wav'i'taga henanho. Bowasi wamuwi'laga, "Wize wikale hano, mudu'gu' wanne." Nawe wegelaga na wikalaga henanho. 2 Haho Bowasi wav'itanaga v'antu' iku'mi mugati' na v'anamala v'a kaya, wav'alombaga na v'ene v'ikale henanho. Nav'o v'ikalaga. 3 Hangi' Bowasi wamuwi'laga mudu'gu'ye ati', "Naomi, u'yo wasu'v'ile ku'fuma ku' nsi' ya Mowabu, ali'gu'zya mugu'nda u'go yav'age nsawo ya mudu'gu' wiswe, Elimeleki. 4 Ene nawonaga yi'li' visoga nku'wi'le u'gu'le ha mbele ya minso ga v'antu' av'a, na ha mbele ya v'anamala v'a v'antu' v'anne. U'lu' u'gu'komola ninga u'kali' ku'gu'komola u'yombe, ku'nguno ku'du'hu' muntu' yu'ngi' wa ku'gu'komola ha lwandi' lwenu'lu' sumbwa ev'e, u'lu' waleka ev'e sanga ene." Nawe wasu'v'yaga, "Ene nku'gu'komola."

5 Haho Bowasi wamuwi'laga ati', "Lu'siku' u'lagu'gu'le mugu'nda gwenu'gu' ku'fuma ku'mwa Naomi, yi'laku'dime u'musole na u'yu' Luti, Mumowabu, mufwi'lwa, ki'gele kwendelezya lina lya muyagi haki'mo na nsawo zyakwe." 6 Hohene mwenu'yo mudu'gu' wa bi'hi' aho wigwa vyeni'vyo wayombaga, "Ene nkakowola ku'gu'komola, ku'nguno yi'li'wigela nku'v'ipya isaalo lyanne. Lwandi' lwanne lu'v'age lwandi' lwako, komolaga ev'e mweni'ki'li'. Ene nkakowola."

7 Yav'age nsiku' zyeni'zyo mu nsi' ya Izilaeli, u'lu' v'antu' v'ali'koov'a ku'komola ninga ku'kaav'ana ki'ntu', yav'age ki'ti'lwe ku' muntu' ku'vula ki'latu' chakwe na ku'mupa mwiye. V'av'ezyage vyeni'vyo ku'lagi'la ku'v'a igambo lyagelani'ziwa. 8 Hohene muntu' mwenu'yo wamuwi'laga Bowasi ati', "Li'pi'la ev'e mugu'nda." Haho wazulaga ki'latu' chakwe na wamupaga.Bowasi ali'musaala Luti ha mbele ya v'anamala

9 Nawe Bowasi wav'atangazi'zyaga v'anamala na v'antu' av'o v'av'age henanho, "Walelo yeni'yi' inywe muli' v'asangi'lwa v'anne. Mwawonaga i'vi nagu'laga ku'fuma ku'mwa Naomi vyose i'vyo vyav'age vyamwa Elimeleki, Kilioni na Maloni. 10 Hangi' Luti, Mumowabu, u'yo wav'age muki' wamwa Maloni, namusaalaga av'e muki' wanne, ki'gele kwendelezya lina lya muyagi ku'v'i'ti'la isaalo lyakwe, na ku'du' li'tagi'ke mugati' na wu'du'gu' wakwe, ninga ha wingi'li'lo wa kaya yeni'yi'. Walelo yeni'yi' inywe muli' v'asangi'lwa v'anne."

11 Nav'o v'anamala na v'antu' v'ose av'o v'av'age v'ali' henanho v'asu'v'yaga ati', "Endita, iswe ku'li' v'asangi'lwa v'ako. Gu'ku' Mulungu amuv'ezye muki'ma mwenu'yu' u'yo ali'wingi'la mu lu'go lwako av'e ki'ti' Lahele na Leya, v'enav'o v'av'i'li' hu' av'o v'ayi'zyenga kaya yamwa Izilaeli. Nanho u'pandi'ke tu'soga mu Efulati, u'v'e na lu'kumo mu kaya ya Betelehemu. 12 Kaya yako yikole na kaya yamwa Pelezi, u'yo Tamali wamuv'yali'la Yuda, ku'v'i'ti'la ku' v'av'yalwa av'o alaku'pe Gu'ku' Mulungu ku' muki'ma mwenu'yu'."

13 Hohene Bowasi wamusolaga Luti, nawe wav'aga muki' wakwe. Aho walalaga nawe, Gu'ku' Mulungu wamuyali'laga Luti ku'v'a na mwitungo, nawe wav'yalaga mwana wa ki'gosya.

14 Nav'o v'aki'ma v'a mu kaya yeni'yo v'amuwi'laga Naomi, "Akumu'kiwe Gu'ku' Mulungu u'yo waku'paga walelo muntu' wa bi'hi' wa ku'ku'komola. Mwana mwenu'yu' lina lyakwe li'kumu'ke mu Izilaeli. 15 Nawe aku'ku'su'v'i'zya wu'zuwu'ku wako, na ku'ku'su'nga mu nsiku' zya wu'kiku'lu' wako, ku'nguno wav'yalagwa na mukamwana wako u'yo aku'togilwe. Luti aku'gelani'lile ku'ki'la v'ana mupungati' v'a ki'gosya." 16 Haho Naomi wamusolaga mwana mwenu'yo wamutu'u'laga ha ki'kuv'a chakwe, na wav'aga musu'ngi wakwe.

17 V'aki'ma v'azenganwa v'akwe v'ayombaga, "Mwana wav'yalagwa hamwa Naomi." V'amwitanaga lina lyakwe Obedi*. Mwenu'yu' hu' ise wamwa Yese, u'yo ise wamwa Dav'idi.

18 Wenu'wu' hu' wu'v'yalwa wamwa Pelezi:

Pelezi wamuv'yalaga Heziloni,

19 Heziloni wamuv'yalaga Lamu,

Lamu wamuv'yalaga Aminadabu,

20 Aminadabu wamuv'yalaga Nashoni,

Nashoni wamuv'yalaga Salomoni,

21 Salomoni wamuv'yalaga Bowasi,

Bowasi wamuv'yalaga Obedi,

22 Obedi wamuv'yalaga Yese,

na Yese wamuv'yalaga Dav'idi.