1 Lu'siku' lu'mo, Naomi wamuwi'laga mukamwana wakwe Luti ati', "Mwana wanne, yi'li'ndima nku'koov'ele mugosya ki'gele u'pandi'ke wu'soga. 2 Mwenu'yu' Bowasi, u'yo u'li'v'aga u'li'tu'mama mili'mo haki'mo na v'atu'mami v'akwe, ali' wa igongo liswe lya bi'hi'. Wu'ziku' wa walelo aku'v'a ali'heha shayili ku' lu'mbu'ga lwakwe. 3 Ku'nguno yeni'yo, woge, wiv'ile maguta, na u'zwali'le visoga, haho u'ye ku' lu'mbu'ga. Ali'vi ku'du' wiyoleche ku' muntu' mwenu'yo mpaka aho aku'v'a wamali'la ku'lya na ku'nywa. 4 Aho li'ku'v'a lyafika itungo lya ku'lala, u'halawe aho aku'lala. U'lu' twamuv'i'ti'la tu'lo u'mwiv'ende hado hado, u'kagakumbu'lu'le* magu'lu' gakwe, na u'lale henanho, nawe aku'ku'wi'la lya ku'v'ezya." 5 Luti wasu'v'yaga ati', "Nku'yi'v'ezya yose i'yo wambwi'laga." 6 Haho Luti wayaga ku' lu'mbu'ga, na wav'ezyaga yose ki'ti' i'vyo wawi'lagwa na mukwiye.

7 Yav'aga mwenu'yu' Bowasi aho wamali'laga ku'lya na ku'nywa, watogeziv'agwa mu moyo gwakwe. Hohene wayaga ku'kalala ku' mpelo na ituntu lya shayili. Haho Luti wamwiv'endaga hado hado, wagakumbu'lu'laga magu'lu' gamwa Bowasi na walalaga henanho. 8 Yav'aga mu wu'ziku' wa hagati', Bowasi wapampamuki'laga. Aho ali'galu'ka wawonaga, kasinaga hali' na muki'ma alalile mu magu'lu' gakwe! 9 Haho wawu'zyaga, "U'li' nde ev'e?" Nawe wasu'v'yaga, "Ene ni' Luti, muzya wako. Sansamula mwenda gwako u'nkumbi'le, ku'nguno ev'e hu' u'li' wa igongo lya bi'hi' wa ku'nsaala."

10 Bowasi wayombaga ati', "Mwana wanne, Gu'ku' Mulungu aku'dosye, ku'nguno walagi'laga chelu' ki'hanya ku'ki'la ha mbu'ki', nguno u'kav'alondile v'asu'mbana v'asav'i ninga v'api'na. 11 Gi'si' mwana wanne, ku'du' wogohe. Ku'nguno v'antu' v'ose mu kaya yeni'yi' v'aku'manyile ku'v'a ev'e u'li' muki'ma wa nsembo nsoga. Nku'ku'v'ezezya vyose i'vyo walombaga. 12 Hangi' yi'li' nhana ku'v'a ene ni' wa igongo lyako wa bi'hi', ali'vi ali'ho muntu' mu igongo liswe u'yo wa bi'hi' ku'ki'la ene. 13 Ev'e ikalaga henanha wu'ziku' wenu'wu', na ndiyu' mbe wazumya ku'ku'saala, yi'li' visoga. Ali'vi mbe wiza wakaana mweni'ki'li', nhanayene nu'lahi'la ku' lina lyamwa Gu'ku' Mulungu, nku'ku'komola ki'ti' i'vyo yi'li'koov'iwa ku' wa igongo. Ev'e lalaga henanha mpaka ndiyu'."

14 Hohene Luti walalaga henanho ha magu'lu' gakwe mpaka mu ikingilima, haho wipunaga aho v'antu' v'akaali' ku'lamula ku'wona visoga, ku'nguno Bowasi ndi' wamuwi'laga, "Ku'du' yi'manyi'ke ku'v'a muki'ma wali' wizaga ha lu'mbu'ga." 15 Hangi' wamuwi'laga, "Leta mwenda gwako u'go u'zwalile, wanze." Nawe wav'ezyaga vyeni'vyo. Bowasi wasuki'laga shayili ngelo mukaga* na wamutwi'kaga. Haho muki'ma mwenu'yo wasu'v'aga ku' kaya. 16 Aho wafikaga ku' lu'go, mukwiye wamuwu'zyaga, "Mwana wanne, yakwi'laga vihe kwenu'ko?" Luti wamutentemuli'laga yose i'yo Bowasi wamuv'ezezyaga. 17 Walambaga ku'yomba ati', "Wampaga shayili zyeni'zi ngelo mukaga, na ku'mbwi'la ‘Ku'du' u'su'v'e makono du' ku' mukwiyo.’ "

18 Haho Naomi wamuwi'laga Luti ati', "Mwana wanne, tekana mpaka u'wone i'vyo yi'ku'v'a, ku'nguno Bowasi akalembele walelo mpaka ali'gelani'zye igambo lyeni'li'."