Dəkəcop 11

Kəlɔ kəŋeci ka Babɛl

1 Tɛm tatɔkɔ doru fəp kusu kin k’anccɔp, pacloku, moloku min mayi. 2 K’afum ŋande ŋakɔ kəca nkɛ dec dɛmpɛ mɔ, kɔ ŋanəŋk mɔrɔ atɔf ŋa Siŋhar, kɔ ŋandɛ mi dacɔ. 3 Kɔ ŋalokɛnɛ: «Pasut birik, pacɔf bi!» Kɔ birik bɔcɔf babɔkɔ bɔyɔnɛ ŋa masar, kɔ kɔrtal kəyɔnɛ ŋa dos. 4 Kɔ ŋaloku sɔ: «Paŋkɔn, pacəmbər dare kɔ kəlɔ nkɛ domp da ki dendekɔ haŋ dɔsɔ kɔm mɔ. Ntɛ tɔŋsɔŋɛ pasɔtɔ tewe mɔ, tɔsɔŋɛ su sɔ kətɔsamsər doru.»

5 Kɔ MARIKI ontor kədemɔmən dare kɔ kəlɔ nkɛ afum ŋanccəmbər mɔ. 6 Kɔ MARIKI oloku, «Nəmɔmən afum aŋɛ! Fəp faŋan kusu kin kɔ ŋancɔp. Nəmɔmən sɔ ntɛ ŋancop kəyɔ mɔ. Tɔlɔm o tɔlɔm teyi fɛ ntɛ tɔŋmɔnɛ ŋa kəyɔ ka tɛfaŋ taŋan mɔ. 7 Paŋkɔn, pator, panɔŋkəl-nɔŋkəl kusu kəŋan ntɛ tɔŋsɔŋɛ ta ŋanenɛnɛ sɔ mɔ.» 8 Kɔ MARIKI ɛsamsər ŋa doru, kɔ ŋasak kəcəmbər dare. 9 Ti t’awenɛ di Babɛl, bawo difɔ MARIKI ɛnanɔŋkəl cusu, k’ɛsaməsər afum doru.

Tecepərɛnɛ ta Sem kɔ awut ɔn, kəbəp ka Abram

10 Tecepərɛnɛ ta Sem tɛntɛ: Sem ɛnasɔtɔ meren 100, a pədekom Arpaksad, teren ta mɛrəŋ ntɛ domun dɛnasak antɔf mɔ. 11 Kəkom ka Arpaksad, kɔ Sem eyi sɔ doru meren 500, mmɛ ɛnakom sɔ awut arkun k’awut aran alɔma mɔ.

12 Arpaksad ɛnasɔtɔ meren 35, a pədekom Sɛlah. 13 Kəkom ka Sɛlah, Arpaksad ɛnasɔtɔ sɔ meren 403, mmɛ ɛnakom sɔ awut arkun k’awut aran alɔma mɔ.

14 Sɛlah ɛnasɔtɔ meren 30, a pədekom Hebɛr. 15 Kəkom ka Hebɛr, Sɛlah ɛnasɔtɔ sɔ meren 403, mmɛ ɛnakom sɔ awut arkun k’awut aran alɔma mɔ.

16 Kɔ Hebɛr ɔsɔtɔ meren 34, a pədekom Pɛlɛk. 17 Kəkom ka Pɛlɛk, Hebɛr ɛnasɔtɔ sɔ meren 430, mmɛ ɛnakom sɔ awut arkun k’awut aran alɔma mɔ.

18 Pɛlɛk ɛnasɔtɔ meren 30, a pədekom Rehu. 19 Kəkom ka Rehu, Pɛlɛk ɛnasɔtɔ sɔ meren 209, mmɛ ɛnakom sɔ awut arkun k’awut aran alɔma mɔ.

20 Rehu ɛnasɔtɔ meren 32, a pədekom Seruk. 21 Kəkom ka Seruk, Rehu ɛnasɔtɔ sɔ meren 207, mmɛ ɛnakom sɔ awut arkun k’awut aran alɔma mɔ.

22 Seruk ɛnasɔtɔ meren 30, a pədekom Nahor. 23 Kəkom ka Nahor, Seruk ɛnasɔtɔ sɔ meren 200, mmɛ ɛnakom sɔ awut arkun k’awut aran alɔma mɔ.

24 Nahor ɛnasɔtɔ meren 29 a pədekom Terah. 25 Kəkom ka Terah, Nahor ɛnasɔtɔ sɔ meren 119, mmɛ ɛnakom sɔ awut arkun k’awut aran alɔma mɔ.

26 Terah ɛnasɔtɔ meren 70, a pədekom Abram, Nahor kɔ Haraŋ.

Tecepərɛnɛ ta Terah kɔ Abram

27 Tecepərɛnɛ ta Terah tɛntɛ: Terah okom Abram, Nahor kɔ Haraŋ nwɛ ɛnakom Lɔt mɔ. 28 Haraŋ, fɔr ya kas kiriŋ y’ɛnafi, atɔf nŋɛ anakom kɔ mɔ, nde dare da Ur nde atɔf ŋa Kaldi. 29 Abram kɔ Nahor ŋanɛncɛ. Wəran ka Abram ancwe Saray kɔ wəran ka Nahor, Milka. Milka, wan ka Haraŋ ɛnayi, ŋapaŋnɛ kas kin kɔ Yiska. 30 Saray ɛnakom fɛ, ɛnasɔtɔ fɛ wan.

31 Kɔ Terah ɛlɛk wan kɔn Abram, kɔ wansɔ kɔn Lɔt, wan ka Haraŋ, k’ɛlɛkɛnɛ sɔ Saray wəran ka Abram, kɔ ŋasol fəp faŋan kəwur ka nde dare da Ur nde atɔf ŋa Kaldi kəkɔ ka atɔf ŋa Kanaŋ. Kɔ ŋambəp atɔf ŋa Haraŋ kɔ ŋandɛ di. 32 Terah ɛnawon doru meren 205, a k’endefi dəndo atɔf ŋa Haraŋ.