Dəkəcop 24

Kənɛncɛnɛ ka Siyaka kɔ Rebeka

1 Abraham ɛnasikər, meren mɔn mɛnabɔlɛ kətɛnc, MARIKI ɛnapocɛ kɔ pətɔt fəp. 2 Kɔ Abraham oloku wəcar kɔn nwɛ ɛnanaŋkanɛ kəwon nnɔ ndɔrɔn mɔ, nwɛ onclompsɛ kɔ ca yɔn mɔ: «Mədeŋ kəca kam aləŋk ŋem tantɔf, 3 Indesɔŋ’am kədɛrəm MARIKI, Kanu nkɛ kəyi darenc kɔ dəntɔf mɔ, ta məlɛkɛ wan kem wəran wəKanaŋ, afum akaŋɛ indɛ dacɔ mɔ. 4 Mba məde məkɔ atɔf ŋem nde dəŋkom dem, məlɛkɛ di wan kem Siyaka wəran.» 5 Kɔ wəcar kɔn oloku kɔ: «Tɔlɔma ta wəran ɔŋkɔwosɛ kəcɛps’em darəŋ kəder ka nnɔ-ɛ, tɛm tatɔkɔ iluksɛ wan kam atɔf nŋɛ məyɛfɛ mɔ ba?» 6 Kɔ Abraham oloku: «Məkɛmbərnɛ a məluksɛ wan kem dəndo de! 7 MARIKI, Kanu nkɛ kəyi darenc mɔ, nkɛ kəsɔŋ’em kəsak afum em kɔ dəŋkom dem mɔ, nkɛ kəlok-lokər im a kədɛrm’em kəsɔŋ ka atɔf ŋaŋɛ yuruya yem mɔ, nkɔn sərka endesom mɛlɛkɛ mɛcəm’am fɔr kiriŋ, dəndo məndekɔlɛkɛ wan kem wəran mɔ. 8 Kɔ wəran ɔntɔkɔwosɛ kəcəm’am darəŋ-ɛ, iŋaŋnɛn’am kədɛrəm nkɛ isɔŋ’am kədɛrəm mɔ. Mba ta məluksɛ wan kem dəndo de!» 9 Kɔ wəcar endeŋ kəca mariki mɔn Abraham aləŋk tantɔf, k’ɛndɛrmɛ kɔ teta moloku mamɔkɔ. 10 Kɔ wəcar ɛlɛk yɔkɔmɛ wəco yɔkɔmɛ ya mariki mɔn dacɔ, k’ɔŋkɔ. Tɛnatəŋnɛ pətɔmpər daka da wəbɛ kɔn dɔtɔt fəp. 11 Ntɛ ɛmbɛrɛ Mesopotami nde dare da Nahor mɔ, k’ɛncəp yɔkɔmɛ suwu dare kəsək ta ɔmbɔlɛ kələmp ka domun-ɛ, dec dɔrɔfɔy tɛm tɔkɔ aran ŋaŋwur kəkɔkɛt domun mɔ. 12 K’ontola: «Məna MARIKI, Kanu ka Abraham mariki mem, məmar im kənəŋk ka paka mpɛ intɛn mɔ, ilɛtsɛn’am. Kɔ məyɔ ti-ɛ, məlasɛ mariki mem Abraham layidi dɔkɔ mənasɔŋ kɔ mɔ. 13 In’ɛwɛ incəmɛ nnɔ kələmp kəsək mɔ, k’ayecəra a afum a dare ŋawur kədekɛt domun-ɛ. 14 Pəyɔnɛ a wəyecəra nwɛ indeloku: ‹Ilɛtsɛn’am məti tɔbɔl tam imun,› a wəkayi pəlok’im: ‹Məmun, isɔŋ sɔ yɔkɔmɛ yam yomun,› pəyɔnɛ a wəkakɔ məmpocɛ wəcar kam Siyaka! Tɛm tatɔkɔ indecərɛ a məlasɛ mariki mem Abraham layidi dɔkɔ mənasɔŋ kɔ mɔ.» 15 Ɛnalip fɛ moloku, kɔ Rebeka wan ka Betuhɛl, wan sɔ ka Milka kɔ Nahor wɛnc ka Abraham oŋwur pəgbaŋnɛ tɔbɔl tɔn. 16 Wəyecəra wətɔt teyi ɛnayi, ta ɛntacərɛ wərkun-ɛ, ali wərkun wəkin ɛnacərɛ fɛ kɔ dɛran. K’ontor dəkələmp k’ɛlas tɔbɔl tɔn k’ɛmpɛ. 17 Kɔ wəcar ɛyɛksɛ kəkɔfaynɛ kɔ, k’oloku kɔ: «Məpoc em domun depic da tɔbɔl tam, ilɛtsɛn’am.» 18 Kɔ Rebeka oloku: «Məmun, mariki mem!» K’ɛmbɛlkər kətinɛ kɔ tɔbɔl tɔn, k’ɔsɔŋ kɔ domun, k’omun. 19 Ntɛ elip kəsɔŋ wəcar ka Abraham k’omun mɔ, k’oloku kɔ sɔ: «Indekɛtɛ yɔkɔmɛ yam domun yi sɔ yomun haŋ pətəŋnɛ yi.» 20 K’ɛmbɛlkər kəneŋkəli domun dɛləpəs dəkəsamp, k’ɛyɛksɛ sɔ kəkɔkɛt domun dɔlɔma dəkələmp, k’ɛŋkɛtɛ yɔkɔmɛ fəp domun. 21 Kɔ wəcar ka Abraham eyifnɛ teta wəyecəra nwɛ dɛbəkəc, kɔ pəyɔnɛ a MARIKI eyi kəlompsɛ kɔ pɔkɔt pɔn-ɛ.

22 Ntɛ yɔkɔmɛ yelip kəmun mɔ, kɔ wərkun nwɛ ɛlɛk kurundɛ ka kɛma ka tɛncəmbəl dacɔ,*24.22 Delel da kurundɛ ka kɛma kaŋkɔ dɛnayɔnɛ «grammes» camət-tin. kɔ cəsora ca dəkəca mɛrəŋ ca kɛma ka mɛncəmbəl wəco,*24.22 Delel da kəsora kin dɛnayɔnɛ «grammes» tasar tin kɔ tɔlɔma. kəsora kin o kin k’ɔsɔŋ Rebeka. 23 Kɔ wərkun nwɛ eyif Rebeka: «An’okom əm-ɛ wəyecəra? Məlok’im ti ilɛtsɛn’am. Səntam kəsɔtɔ kəfo dəkəcepərɛnɛ pibi, nde kəlɔ ka papa kam?» 24 Kɔ Rebeka oloku: «Wan ka Betuhɛl iyɔnɛ, nwɛ Milka ɛnakomɛ Nahor mɔ.» 25 K’endeŋər: «Mɛmpəlɛ kɔ yika yɛlarəm yeyi nnɔ ndorosu kɔ tofo tecepərɛnɛ pibi teyi sɔ di.» 26 Kɔ wərkun nwɛ ontontnɛnɛ MARIKI, 27 pəcloku: «Iŋkor-kor’əm məna MARIKI, Kanu ka mariki mem Abraham. Məna nwɛ məntɔsak kəlas layidi ndɛ mənasɔŋ kɔ mɔ, məcyɔnɛ mariki mem mɛfaŋ mɔn fəp mɔ! MARIKI məsol’em kɔ məŋkɛr’em haŋ nnɔ kəlɔ ka awɛnc a mariki mem Abraham.» 28 Kɔ wəyecəra ɛyɛksɛ k’ɔŋkɔ pəlɔmər mes mamɔkɔ fəp kɛrɛ nde ndɔrɔn. 29 Rebeka ɛnayɔ wɛnc wərkun pacwe kɔ Labaŋ. Kɔ wəkakɔ ɛyɛksɛ kəkɔmɔmən wərkun nwɛ, nde dəkələmp. 30 Labaŋ ɛnanəŋkɛ Rebeka kurundɛ kɔ cəsora dəwaca, k’ɛnanenɛ kɔ pəcloku: «Ti tɔ wərkun wəkakɔ olok-lokər əm.» Kɔ wɛnc wərkun wəka Rebeka ender nda wərkun nwɛ, ɛnayi kələmp kəsək kɔ yɔkɔmɛ yɔn mɔ. 31 Kɔ Labaŋ oloku: «Məder məna nwɛ MARIKI ompocɛ mɔ! Ta ake tɔ məndeyinɛ dabaŋka-ɛ? Ifɛŋ dukulɔ k’ilompsɛ yɔkɔmɛ yam tofo.» 32 Kɔ wərkun nwɛ ɛmbɛrɛ dəkəlɔ. Kɔ Labaŋ ontorɛ yɛsarɛ ya yɔkɔmɛ, k’ɔsɔŋ yi yika kɔ mɛmpəlɛ. K’ɔsɔŋ wərkun nwɛ kɔ afum aŋɛ ɛnasolɛ mɔ domun debikɛnɛ wɛcək. 33 Kɔ tɛyɛfɛ dənda k’ancəmbərɛ kɔ yeri. Mba k’oloku: «Ifɔdi kərɛsna paka, mɛnɛ iloku toloku ntɛ inder kəloku mɔ.» Kɔ Labaŋ oloku kɔ: «Məloku!»

34 K’oloku: «Awa. Wəcar ka Abraham iyɔnɛ. 35 Bel-bel bɔ MARIKI ompocɛ mariki mem pətɔt nwɛ ɔyɔnɛ fum wəlel mɔ. Kanu kəmpocɛ kɔ cəna ŋkesiya kɔ cir, gbeti kɔ kɛma, acar arkun kɔ aran, yɔkɔmɛ kɔ sɔfale. 36 Sara wəran ka mariki mem ende pəkomɛ kɔ wan wərkun detembəra dɔn disrɛ. Wan wərkun wəkakɔ, nkɔn mariki mem ɔsɔŋ daka dɔn fəp. 37 Mariki mem Abraham ɔsɔŋ’em kədɛrəm, kəcloku: ‹Məfɔdetɛnɛ wan kem wəran ayecəra a Kanaŋ dacɔ atɔf nŋɛ iyi mɔ, 38 mba məde məkɔ nde iyɛfɛ mɔ, kor kosu disrɛ, mətɛnɛ di wan kem wəran.› 39 K’iloku Mariki mem: ‹Tɔlɔm ta wəran ɔŋkɔwosɛ kəcɛps’em darəŋ kəder nnɔ-ɛ.› 40 K’olok’im: ‹MARIKI nwɛ iŋkɔt fɔr kiriŋ mɔ, endesom mɛlɛkɛ mɔn mɛbaŋ əm pɔkɔt pam. Məlɛkɛ wan kem wəran nde kusuŋka kosu, pəyɔnɛ sɔ wəka kor kosu.› 41 Kɔ Abraham olok’im: ‹Indewur’am kədɛrəm kaŋkɛ imbɛrs’am a mədɛrəm mɔ, kɔ pəyɔnɛ a məŋkɔ nde kor kosu a ta awos’am, kəsɔŋ ka wan wəran-ɛ iŋŋaŋnɛn’am kədɛrəm kaŋkɛ.› 42 Ntɛ imbəpna mɔkɔ nde dəkələmp mɔ, k’iloku: ‹MARIKI, Kanu ka mariki mem Abraham, kɔ məŋwosɛ kəlompəs em pɔkɔt-ɛ, 43 in’ɔfɔ nwɛ iyi kələmp ka domun kəsək mɔ.› Wəyecəra nwɛ endewur kədekɛt domun mɔ, nwɛ indeloku: ‹Məpoc em domun depic da tɔbɔl tam imun,› 44 a wəkayi pəlok’im: ‹Məbaŋ məmun məna sərka, indesɔkɛtɛ yɔkɔmɛ yam!› Wəyecəra wəkakɔ pəyɔnɛ nwɛ MARIKI ɛncəmbərɛ wan ka mariki mem Abraham mɔ! 45 Ilipna fɛ ti kəlokunɛ dɛbəkəc, kɔ Rebeka oŋwur pəgbaŋnɛ tɔbɔl dəkəbanca. K’ontor dəkələmp k’ɛŋkɛt domun. K’iloku kɔ: ‹Ilɛtsɛn’am məpoc’em imun.› 46 K’ɛmbɛlkər kətin’em tɔbɔl tɔn tɔkɔ ɛŋgbaŋnɛna mɔ, k’olok’im: ‹Məmun, indepocɛ sɔ yɔkɔmɛ yam yomun.› K’imun, k’ompocɛ sɔ yɔkɔmɛ yem kɔ yomun. 47 K’iyif kɔ: ‹An’okom əm-ɛ wəyecəra?› K’olok’im: ‹Wan ka Betuhɛl iyɔnɛ, wansɔ ka Nahor kɔ Milka.› K’imbɛr kɔ kurundɛ dololəm kɔ cəsora dəwaca. 48 K’intontnɛnɛ MARIKI, k’iyek-yekəs kɔ, Kanu ka mariki mem Abraham, nkɛ kəsol’em kədelɛk wan ka wɛnc idesɔŋ kɔ Siyaka wan ka nkɔn Abraham mɔ. 49 Ndɛkəl oŋ kɔ pəyɔnɛ a məwosɛ kəlasɛ mariki mem Abraham pəsoku disrɛ, layidi ndɛ mənasɔŋ kɔ mɔ, məsɔŋ’em ti kəcərɛ, kɔ pəyɔnɛ fɛ ti-ɛ, ikɔ kəca kəmeriya, kɔ pəyi fɛ ti-ɛ, kətɔt.»

50 Labaŋ kɔ Betuhɛl ŋaloku: «Tes tantɛ nda MARIKI tɛyɛfɛ, səfɔtam kəloku ti tɔlɔm o tɔlɔm. 51 Rebeka ɔfɔ wəkawɛ fɔr yam kiriŋ, məlɛk kɔ nəkɔ. Pəkɔ pəyɔnɛ wəran ka wan ka mariki mam pəmɔ tɔkɔ MARIKI oloku ti mɔ.»

52 Ntɛ wəcar ka Abraham ene moloku mamɔkɔ mɔ, k’ontontnɛnɛ MARIKI dəntɔf. 53 Kɔ wəcar k’Abraham owurɛ yosumpər-sumpər ya gbeti, ya kɛma, kɔ yamos k’ɔsɔŋ yi Rebeka, k’ompocɛ sɔ Labaŋ wɛnc wərkun wəka Rebeka kɔ kɛrɛ kəŋan pəlarəm. 54 Ntɛ mes mamɔkɔ melip mɔ, wərkun nwɛ k’asol ɔn, kɔ ŋandi yeri kɔ ŋamun, kɔ ŋancepərɛnɛ pibi. Dec dendesɔk, ntɛ ŋayɛfɛ mɔ, kɔ wəcar nwɛ oloku: «Nəsak im iluksərnɛ nda mariki mem.» 55 Kɔ Labaŋ ŋaloku kɔ kɛrɛ: «Wan wəran pəyi nnɔ kərɛsna mata wəco kɔ səna. Kɔ tencepər-ɛ, məntam kəkɔ.» 56 Kɔ wərkun nwɛ oloku ŋa: «Ta nəsɔŋ’em kəwon ka nnɔ, bawo MARIKI olompəs em pɔkɔt. Nəsak im ilukus ndena mariki mem.» 57 Kɔ Labaŋ ŋaloku kɔ kɛrɛ: «Səwe wan wəran, səyif kɔ tɔkɔ ɛfaŋ mɔ.» 58 Kɔ ŋawe Rebeka kɔ ŋayif kɔ: «Məfaŋ kəkɔ kɔ wərkun nwɛ ba?» Kɔ Rebeka owosɛ: «Ɛy.»

59 Labaŋ kɔ kɛrɛ ŋasak Rebeka kɔ wəran nwɛ ɛnabaŋ kɔ mɔ, wəcar ka Abraham kɔ asol ɔn kɔ ŋaŋkɔ. 60 Kɔ ŋantolanɛ Rebeka kɔ ŋaloku kɔ:

«Məna wəkirɛ kosu, məyɔnɛ wəka afum alarəm!

Məyɔnɛ fum nwɛ yuruya yɔn yendetam aterɛnɛ aŋan mɔ!»

61 Kɔ Rebeka ɛyɛfɛ kɔ acar ɔn ayecəra k’ɛmpɛsɛ yɔkɔmɛ kəroŋ, k’ɛncəmɛ wərkun nwɛ darəŋ. Kɔ wəcar ka Abraham ɛlɛk Rebeka kɔ ŋaŋkɔ.

62 Tɛtəŋnɛ Siyaka pəlukus kəyɛfɛ ka kələmp ka Lahay-Roy, pəndɛ nde atɔf ŋa Nɛkɛf. 63 Dɔfɔy dɔlɔma kɔ Siyaka ɔŋkɔ dəŋkɔtəs dəkulum, endeyekti fɔr k’ɛnəŋk yɔkɔmɛ yecder. 64 Rebeka endeyekti sɔ fɔr k’ɛnəŋk Siyaka, k’ontor yɔkɔmɛ kəroŋ. 65 K’eyif wəcar ka Abraham: «Wərkun wəre ɔfɔ wəkawɛ nnɔ dəkulum nwɛ ender kəfaynɛ su mɔ?» Kɔ wəcar oloku kɔ: «Mariki mem mɔ.» K’ɛlɛk kəloto kɔn k’ɛŋgbalərnɛ. 66 Kɔ wəcar ka Abraham ɔlɔmər Siyaka mes mɔkɔ ɛnacepərɛnɛ mɔ fəp. 67 Kɔ Siyaka eŋkekərɛ Rebeka abal ŋa kɛrɛ Sara disrɛ. K’ɛlɛk Rebeka k’ɔyɔnɛ wəran kɔn, k’ɔmbɔtər kɔ. Ti t’ɛnasɔŋɛ Siyaka pəwak kəpəl-pələs defi da kɛrɛ.