Dəkəcop 30

1 Ntɛ Rasɛl ɛnəŋk a eyi fɛ kəkomɛ Yakuba mɔ, k’ɔyɔnɛ wɛnc wəran Leya kəraca. Kɔ Rasɛl oloku Yakuba: «Məsɔŋ im awut kɔ pəyi fɛ ti-ɛ, iŋfi!» 2 Kɔ pəntɛlɛ Yakuba nnɔ Rasɛl eyi mɔ, k’oloku: «Incəmɛ dəkəcəmɛ da Kanu, nkɛ kəntɔsɔŋ əm dokombəra mɔ?» 3 Kɔ Rasɛl oloku: «Wəcar kem wəran Bilha ɛwɛ, məfəntərɛ kɔ nkɔn ntɛ tɔŋsɔŋɛ pəsɔtɔ wan mɔ. Nnɔ suwu sem s’endekom wan wəkakɔ, pəsɔŋ’em kəyɔ wan.» 4 Kɔ Rasɛl ɔsɔŋ Yakuba wəcar kɔn wəran Bilha. Kɔ Yakuba ɔŋkɔ kɔ, 5 Kɔ Bilha ɛmbɛkəs, k’oŋkomɛ Yakuba wan wərkun. 6 Kɔ Rasɛl oloku: «Kanu kəmboc’em kiti, kɔ kəne sɔ dim dem, kəmpoc’em wan wərkun.» Ti tɛnasɔŋɛ wan wəkakɔ tewe ta Dan. 7 Kɔ Bilha wəcar ka Rasɛl, ɔŋgbɔkərɛ sɔ kəbɛkəs, k’oŋkomɛ Yakuba wan wərkun tamɛrəŋ. 8 Kɔ Rasɛl oloku: «Kanu kəmar im kəsiməs kɔ wɛnc im wəran Leya, k’intam kɔ.» Kɔ Rasɛl ɔsɔŋ wan wəkakɔ tewe ta Naftali. 9 Ntɛ Leya ɛnəŋk a ɛsak kəkom mɔ, k’ɛlɛk wəcar kɔn Silpa k’ɔsɔŋ kɔ Yakuba pənɛncɛ. 10 Kɔ Silpa wəcar ka Leya oŋkomɛ Yakuba wan wərkun. 11 Kɔ Leya oloku a: «Pəbotu pender!» Kɔ Leya ɔsɔŋ wan wəkakɔ tewe ta Kadu. 12 Silpa wəcar ka Leya ɔŋgbɔkərɛ sɔ kəkomɛ Yakuba wan wərkun tamɛrəŋ. 13 Kɔ Leya oloku: «Mba pəmbɔt im! Ɛy, aran ŋande ŋackul’em oŋ a pəmbɔt əm.» K’ɔsɔŋ wan kakɔ tewe ta Asɛr.

14 Dɔsɔk dɔlɔma katɛla kənayi, kɔ Ruben ɔŋkɔ dalɛ. K’ɔŋkɔ pəsɔtɔ di yeri yokom yɔlɔma*30.14 Yokom nyɛ yɔyɔnɛ acɔl ŋa dokombəra mɔ, k’ɛŋkɛrɛ yi iya kɔn Leya. Kɔ Rasɛl oloku Leya: «Ilɛtsɛn’am, məpoc’em yokom yɔlɔma nyɛ wan kam ɛŋkɛr’am mɔ.» 15 Kɔ Leya oloku Rasɛl: «Pəntəŋnɛ f’am ntɛ məmbaŋər im wos im mɔ, mɛnɛ məsɔtɔ sɔ yeri ya wan kem?» Kɔ Rasɛl oloku Leya: «Awa! Ndaram ende mɔkɔ fəntərɛ, kəway ka yeri ya wan kam.» 16 Dɔfɔy dendebəp, ntɛ Yakuba ɛyɛfɛ dalɛ mɔ, kɔ Leya ɔŋkɔ pəfaynɛ kɔ, k’oloku Yakuba: «Nnɔ nderem mənde mɔkɔ fəntərɛ, bawo kəsɔtɔ kam pibi pɔmɔkɔ, mɛnɛ ntɛ isəkpərɛ pi yeri yɔlɔma ya dalɛ nyɛ wan kem ɛŋkɛrɛna mɔ.» Kɔ Yakuba ŋafəntərɛ pibi papɔkɔ kɔ Leya. 17 Kɔ Kanu kəmbaŋ Leya, k’ɛmbɛkəs. K’oŋkomɛ Yakuba wan wərkun wəka kəcamət. 18 Kɔ Leya oloku: «Kanu kəsɔŋ im kəway kem. Ina nwɛ ilɛk wəcar kem wəran k’isɔŋ kɔ wos im mɔ.» Kɔ Leya ewe wan wəkakɔ Isakar. 19 Kɔ Leya endesɔ pəbɛkəs, k’oŋkomɛ Yakuba sɔ wan wərkun wəka camət-tin. 20 Kɔ Leya oloku: «Kanu ompoc’em! Tantɛ taŋ, wos im endeyi tofo tin k’ina, bawo iŋkomɛ kɔ awut arkun camət-tin.» Kɔ Leya ewe wan wəkakɔ Sabulon. 21 Kɔ Leya ɛmbɛkəs, k’oŋkom wan wəran nwɛ ɛnasɔŋ tewe ta Dina mɔ. 22 Kɔ Kanu kənde kəcɛm-cɛmnɛ Rasɛl, kɔ kəne kətola kɔn, kɔ kəsɔŋ kɔ dokombəra. 23 Kɔ Rasɛl ende pəbɛkəs, k’oŋkom wan wərkun. K’oloku: «Kanu kəliŋ im malap.» 24 Kɔ Rasɛl ewe wan kɔn wəkakɔ Isifu, k’oloku: «MARIKI pəbɛrɛn’em sɔ wan wərkun wəlɔma!»

Yakuba kəsɔtɔ kɔn daka

25 Ntɛ Rasɛl oŋkom Isifu mɔ, kɔ Yakuba oloku Labaŋ: «Məsak im ilukus nnɔ nderem, ikɔ nde atɔf ŋem. 26 Məsɔŋ im aran em k’awut em aŋɛ imbəc’am tetaŋan mɔ, ŋa ŋɔ səndekɔ, bawo məna yati məncərɛ yɛbəc nyɛ imbəc’am mɔ.» 27 Kɔ Labaŋ oloku Yakuba: «Ifaŋ a məboncər im kəway nkɛ indesɔŋ əm mɔ. Canu cem cəsɔŋ’em kəcərɛ a MARIKI ompoc’em pətɔt tetam. 28 Məboncər im kəway kam iŋsɔŋ əm ki.» 29 Kɔ Yakuba oloku Labaŋ: «Məna yati, məncərɛ kɔ tɔkɔ imbəc’am mɔ, kɔ tɔkɔ isɔŋɛ kɔ yɔcɔl yam yeyi mɔ. 30 Bawo yɔcɔl yepic yɔkɔ inabəp’am mɔ, yɛla oŋ ndɛkəl. Kɔ MARIKI ompoc’am kəlɛk dɔsɔk ndɛ imbɛrɛ kəlɔ kam mɔ, haŋ mɔkɔ. Ndɛkəl oŋ ake tɛm tɔ indebəcɛ afum em-ɛ?» 31 Kɔ Labaŋ eyif kɔ: «Ak’indesɔŋ əm-ɛ?» Kɔ Yakuba oloku: «Məfɔdesɔŋ im daka o daka. Kɔ məwosɛ kəyɔ tɔkɔ indelok’əm mɔ, indesɔkɛkəs yɔcɔl yam yɛfɛt yɛfɛt, ibum’am sɔ yi. 32 Mɔkɔ indecepər yɔcɔl yam yɛfɛt yɛfɛt fəp dacɔ, mədekɔcəmbər ŋkesiya yɛtɛmsər kɔ yɛcɛmcɛmər fəp kəsək yɔyɔnɛ yɔpɔŋ, yɔyɔnɛ yɛfɛt, ŋkesiya nyɛ yɔyɔ lom yɛcapsər mɔ, kɔ cir ncɛ cəncɛmcɛmər, ncɛ cəntɛmsər mɔ. Yayɔkɔ yendeyɔnɛ kəway kem. 33 Dolompu dem deŋmentər əm ti alna, kɔ məndekɔmɔmən kəway kem-ɛ. Mpɛ o mpɛ pɔ mənəŋk di alna cir dacɔ ta pɛntɛmsər, ta pɛncɛmcɛmər kɔ ŋkesiya dacɔ ta pɛncapsər alom mɔ, məcərɛ a iŋkiyər əm pi.» 34 Kɔ Labaŋ oloku Yakuba: «Awa! Iwosɛ toloku tam.» 35 Awa, dɔsɔk dadɔkɔ dɔ, Labaŋ ɛncəmbər mbiyofo ya cəgbɛr, yɛcɛmcɛmər, cir cətɛmsər kɔ cəcɛmcɛmər cir ncɛ cənayɔ pəfer mɔ fəp, ŋkesiya yɔkɔ yɛnayɔ alom ŋɛcapsər mɔ. Kɔ Labaŋ ɛlɛk yi fəp, k’ɛmbɛr awut ɔn dəwaca. 36 K’awut ɔn ŋambɔlɛnɛ yɔcɔl yayɔkɔ, kəkɔt ka mata maas kɔ Yakuba dacɔ nwɛ ɛnckɛkəs sɔ yɔcɔl ya Labaŋ mɔ. 37 Kɔ Yakuba ɛlɛk wara wɛcaŋk wa tɔk maas yeciyanɛ, k’ɛnaci wi pol ntɛ tɔŋsɔŋɛ pəfer pa kətɔk powur mɔ. 38 Kɔ Yakuba ɔndɔfət wara wawɔkɔ ɛnanaci mɔ nde yɔcɔl yoncmun mɔ, ntɛ tɔŋsɔŋɛ yɛcnəŋk wara wawɔkɔ mɔ, tɔsɔŋɛ yorkun yɛccɛc yɛran kɔ yender dəkəmun-ɛ. 39 Kɔ yɔcɔl yɛncɛcɛnɛ wara wawɔkɔ kəsək, ti tɛnasɔŋɛ yɔcɔl yockoməs mowut ma cəgbɛr, mɛtɛmsər kɔ mɛcɛmcɛmər. 40 Ntɛ Yakuba ɛŋgbɛy meŋkesiya mɔ, k’ɛncəmbər yi fɔr ya yɔcɔl ya Labaŋ kiriŋ nyɛ yɛnayɔ cəgbɛr kɔ alom ŋɛcapsər mɔ, k’ɔsɔtɔ yɔcɔl nyɛ ɛnacəmbər taciŋa ta owosɛ yɔnɔŋkəlɛnɛ kɔ ya Labaŋ mɔ. 41 Kəcɛc nkɛ o nkɛ yɔcɔl yetifi yorkun yɛcfaŋ kəcɛc yɛran mɔ, Yakuba ɛnclɛk wara wɔn wɛnaci pəcəmbər wi yɔcɔl fɔr kiriŋ dəndo yoncmun mɔ, ntɛ tɔŋsɔŋɛ yɛtam kəcɛcɛnɛ, yɛcnəŋk wara wawɔkɔ mɔ. 42 Kɔ Yakuba ɛnəŋk a, pɔcɔl peleŋki pɛfaŋ kəcɛc-ɛ, ɔdɔf fɛ pi kəra kɔn kənaci. Kɔ tende tɛləpsər oŋ Yakuba kəyɔ yɔcɔl yetifi kɔ Labaŋ ɔyɔ yeleŋki.

Yakuba kəyɛksɛ pəkɔ ndena Labaŋ

43 Kɔ Yakuba ende pəyɔnɛ wəka daka wəpɔŋ. K’ɔyɔ yɔcɔl yɛfɛt yɛfɛt yɛlarəm, acar arkun, acar aran, yɔkɔmɛ kɔ sɔfale.