1 Ntɛ mes mmɛ mencepər mɔ, kɔ Kanu kəmbocər Abraham dɔpɔ, kɔ kəwe kɔ: «Abraham!» K’owosɛnɛ ki: «In’ɛwɛ!» 2 Kɔ Kanu kəloku: «Məlɛk oŋ wan kam sona Siyaka, wəkakɔ məmbɔtər mɔ. Məkɔ atɔf ŋa Moriya dəndo, məkɔ məloŋnɛn’em wan kam kəloŋnɛ ka kəcɔf nde tɔrɔ mpɛ indekɔmentər əm mɔ.»

3 Kɔ Abraham ɛyɛfɛ bətbət suy k’ɛŋgbɛk sɔfale sɔn kəbənda, k’ɛlɛkɛnɛ acar ɔn atɛmp mɛrəŋ kɔ wan kɔn Siyaka. Kɔ Abraham ɛŋgbɛs tɔk nyɛ ɛnakɔcɔfɛ Kanu poloŋnɛ mɔ, k’ɛntas nde kəfo kəŋkɔ Kanu kənamentər kɔ mɔ. 4 Tataka ta maas, kɔ Abraham eyekti kəro k’ɛnəŋk kəfo kaŋkɔ pəbɔlɛ. 5 K’oloku atɛmp ɔn: «Nəyi nnɔ kɔ sɔfale. Siyaka k’ina, kəpɛ kɔ sənder nde kəroŋ kəkɔtontnɛnɛ Kanu. Kɔ səlip-ɛ, səndebəp nu nnɔ.»

6 Kɔ Abraham ɛlɛk tɔk nyɛ anakɔcɔfɛ Kanu poloŋnɛ mɔ, k’ɛsarsər yi wan kɔn Siyaka, kɔ nkɔn ɛlɛk nɛnc kɔ faka. Kɔ ŋasol mɛrəŋ maŋan kəkɔ. 7 Kɔ Siyaka ewe kas Abraham k’eyif kɔ: «Papa!» Kɔ wəkakɔ owosɛ: «In’ɛwɛ, wan kem!» Kɔ Siyaka oloku: «Nɛnc dɔ dandɛ kɔ tɔk, mba deke teŋkesiya tɔkɔ aŋkɔloŋnɛ Kanu pacɔf mɔ peyi-ɛ?» 8 Kɔ Abraham oloku: «Wan kem, Kanu ki sərka kəŋkɔsɔtɔ teŋkesiya ntɛ aŋkɔcɔfɛ kɔ poloŋnɛ mɔ.»

Kɔ ŋasol mɛrəŋ maŋan sɔ kəkɔ. 9 Ntɛ ŋambəp kəfo nkɛ Kanu kənamentər kɔ mɔ, kɔ Abraham ɛncəmbər tetek toloŋnɛ Kanu, k’omboc tɔk. K’oŋkot wan kɔn Siyaka, k’edeŋər kɔ tɔk ya kəloŋnɛ kəroŋ. 10 Kɔ Abraham ɛntɛnc kəca k’ɛlɛk faka kəkɔfay wan kɔn amera. 11 Kɔ mɛlɛkɛ ma MARIKI mewe kɔ darenc. Kɔ moloku: «Abraham! Abraham!» K’owosɛ: «In’ɛwɛ!» 12 Kɔ mɛlɛkɛ moloku: «Ta mədeŋər wan kam kəca, ta məyɔ kɔ tes o tes, bawo incərɛ oŋ ndɛkəl a məŋnesɛ Kanu, ntɛ məntɔfatɛn’em wan kam mɔ, wan kam sona.»

13 Kɔ Abraham eyekti fɔr k’ɛnəŋknɛ tadarəŋ aŋkesiya ŋorkun lɛn ya ŋi yɛpətsərnɛ dɛrəntəm. Kɔ Abraham ɔŋkɔ pəlɛk aŋkesiya nŋɛ k’ɛsəkpərɛ ŋi wan kɔn, k’oloŋnɛ ŋi Kanu k’ɔncɔf, k’ɛsak wan kɔn. 14 Kɔ Abraham ɔsɔŋ tofo tatɔkɔ tewe ta «MARIKI ɛŋnəŋk*.» Ti tɔ aŋlokɛ mɔkɔ: «Nde tɔrɔ ta MARIKI kəroŋ, andekɔnəŋk kɔ.»

15 Kɔ mɛlɛkɛ ma MARIKI mɔŋgbɔkərɛ sɔ kəwe Abraham darenc, 16 kɔ moloku: «Toloku ta MARIKI indɛrəm’am ti, ina sərka! ‹Bawo məyɔ tantɛ, məfatɛnɛ f’em wan kam sona Siyaka, 17 indelas əm kəpocɛ pətɔt, indesɔŋɛ afum am ŋala pəmɔ cɔs ca darenc kɔ asənc ŋa kəba kəsək. Yuruya yam * yendetasərnɛ aterɛnɛ aŋan. 18 Afum a doru fəp ŋandesɔtɔ kəpocɛ pətɔt teta yuruya yam, bawo məncəŋkəl dim dem.›» 19 Kɔ Abraham oluksərnɛ nde atɛmp ɔn ŋanckar kɔ mɔ, kɔ ŋayɛfɛ kɔ ŋasol fəp faŋan kəkɔ Berseba, bawo Abraham Berseba ɛnandɛ.

20 Ntɛ mes mamɔkɔ mencepər mɔ, k’ande paloku Abraham ntɛ: Milka oŋkomɛ sɔ wɛnc Nahor awut arkun: 21 Huc wan kɔn wəcɔkɔ-cɔkɔ, Bus wɛnc wərkun, Kemuyel papa ka Aram, 22 Kesed, Haso, Pildas, Yidlaf kɔ Betuhɛl. 23 Kɔ Betuhɛl oŋkom Rebeka. Awut arkun akaŋɛ camət-maas ŋɔ Milka ɛnakomɛ Nahor, wɛnc ka Abraham. 24 Kɔ wəlak’ɔn Rehuma, nkɔn sɔ ɛnakomɛ kɔ awut: Tebah, Kaham, Tahas, kɔ Mahaka.