Marcos 2

3 Talana nan mig-ubat-ubat, awun upat ya eseg na dyumateng na migtingga sa pulid pada dala͡en adti kan Jisus. 4 Manang asuntu sa kadég na utaw, walaꞌ silan pakapalapit adti kan Jisus. Yanagaw piggawangan nilan ya atep dun ni tas ni Jisus, aw pigtonton nilan adti dalem ya pigpakulangan sa pulid.*2:4 Ya madég na manga balay dun ni banwa yan alag batu. Ya balay yeiy duwangkansad, aw apit adti luwaꞌ ya agdan. Kalatagan ya atep na balay, aw walaꞌ ya bubungan. 5 Kyinitaꞌ ni Jisus ya kadakulaꞌ na pagpangintu-u nilan, yanagaw piglongan nan ya pulid, "Kay Lew, ya manga salaꞌ mu adti Tyumanem, piglanas da." 6 Na, awun uman manga magpalna-uway sa Uldin na nyingkud dun. Pagdengeg nilan sa piglong ni Jisus, mig-anenganeng silan, 7 "Anangaꞌ maglong sa maynan ya utaw yeiy? Migpa-unawa sakanan sa Tyumanem! Ya Tyumanem saba oloꞌ ya makalanas sa manga salaꞌ!" 8 Manang maksay ni Jisus kya-ede-an ya pig-anenganeng nilan, yanagaw piglongan nan silan, "Anangaꞌ kamu mag-anenganeng sa maynan? 9 Ayin kaꞌ ya molas paglongun adti eseg na pulid, ‘Ya manga salaꞌ mu nyalanas da,’ aw kun paglongun sakanan, ‘Pagbangun kaw. Dala͡a ya pigtingga͡an nilan kanmu aw panaw da kaw’? 10 Manang matinawun ku adti kamayu na aku na Iseꞌ na Utaw awun katundanan ku asini tas na lupaꞌ maglanas sa manga salaꞌ na manga utaw." 11 Tigkas yan, miglong si Jisus adti eseg na pulid, "Pagbangun kaw. Dala͡a ya pigtingga͡an nilan kanmu aw uliꞌ da kaw!" 12 Aw dun ni asdangan na manga utaw, migbangun ya eseg aw maksay nan pigdala ya pigtingga͡an kanan aw nyanaw da sakanan. Aw to-o nya-enneng-enneng ya manga utaw, aw pigdeyen nilan ya Tyumanem, aw law nilan, "Walaꞌ pa tadun kita-a ya kasiling na maynini!"