1 ମିର୍‌ ଆମାୱିଜୁ ବିସୟ୍‌ ରାସ୍‌ତିମାନିଦେର୍‌, ଇଲେଇ ନାନ୍‌ ଆୟାୱିଜୁଦି ଉତର୍‌ ୱେର୍‌ନା । ପେଡ଼ି ଆଇକା ନେଗେତ୍‌ । 2 ମାତର୍‌ ଦାରିପାଣିଦି କିନି ଆସାଦି ଉଣ୍ତିଙ୍ଗ୍‌ ୱିଜେରେ ମେମାର୍‌ଙ୍ଗୁଁ ନିଜେଦି ଆଡ଼୍‍ସିକ୍‍ ମାନିକା, ମାରି ୱିଜୁଲୋକ୍‌ ଆଇମେକା ନିଜେଦି କନ୍‌ଲିର୍‌ ମାନିକା ଦରକାର୍‌ । 3 କନ୍‌ଲି, ଆଡ଼୍‌ସି ଉଣ୍ତିଙ୍ଗ୍‌ ନିଜେଦି ମେନ୍ଧଲ୍‍ ପୁରା କିନିକା ମାରି ଆଡ଼୍‌ସି କନ୍‌ଲି ଉଣ୍ତିଙ୍ଗ୍‌ ନିଜେଦି ମେନ୍ଦଲ୍‌ତି ପୁରା କିନିକା ମାନାତ୍‍ । ମାରି ରିଏର୍‌ ରିଏରି ଦର୍‌କାର୍‌ ପୁରା କିନି ନିୟମ୍‌ । 4 ନିଜେଦି ମେନ୍ଦଲ୍‌ତି ମୁସ୍‌କୁ ଆଡ଼୍‌ସିଦି ଅଦିକାର୍‌ ସିଲେତ୍‌, ମାତର୍‌ କନ୍‌ଲିନ୍ଦି ଅଦିକାର୍‌ ମାନାତ୍‌; ଆୟାୱାଜା ବା କନ୍‌ଲିଦି ନିଜେଦି ମେନ୍ଦଲ୍‌ତି ମୁସ୍‌କୁ ଅଦିକାର୍‌ ସିଲେତ୍‌, ମାତର୍‌ ଆଡ଼୍‌ସିନ୍ଦି ଅଦିକାର୍‌ ମାନାତ୍‌ । 5 ନିଜେନିଜେଦିଙ୍ଗ୍‌ ୱାର୍‌ ଆକ ତେବାମାକିର୍‌ । ମାତର୍‌ ରିଏର୍‌ ମତାମ୍‌ ଆଜି ପାର୍‌ତାନାଦୁ ସମୟ୍‌ସିନି ଉଣ୍ତିଙ୍ଗ୍‌ ଏସ ସମୟ୍‌ ୱେର୍‌ଏ ତେବାଦେଙ୍ଗ୍‌ ଆଟ୍‍ନାର୍‍ । ମାରି, ମି ଜିବନ୍‌ତୁମିସାନି ଉଣା ଉଣ୍ତିଙ୍ଗ୍‌ ସୟ୍‌ତାନ୍‌ ଏଣ୍ତେସ୍‌ ୱାରିଙ୍ଗ୍ ପରିକା କିଏତ୍‌, ଆୟାଉଣ୍ତିଙ୍ଗ୍‌ ୱାର୍‌ ମାରିଡ଼େସି ଉନ୍‌ଡ୍ରେମାନୁ ଆପିର୍‌ ।

6 ମାତର୍‌ ନାନ୍‌ ଆଦେସ୍‌ ସିତି ୱାଜା ୱେର୍‌ଏଣ୍‌ଗା ବୁଜାକିତିୱାଜା ୱେର୍‌ସିନା । 7 ମାରି, ମିର୍‌ ୱିଜୁ ଲୋକୁ ନା ୱାଜା ଆପିର୍‌ ଇଜି ଇକା ନା ଇଚ୍ଛା । ମାତର୍‌ ଏନ୍‌ ଇୟାୱାଜାଦିକା, ମାରି ଏନ୍‌ ଆୟାୱାଜାଦିକା, ୱିଜୁଲୋକୁ ମାପୁରୁଦିମାଣାନ୍‌ ଦାନ୍‍ ପୟ୍‌ତାମାନାର୍‌ ।

8 ମାତର୍‌ ନାନ୍‌ ପେଡ଼ିଆଇୱାରିଙ୍ଗ୍‌ ନି ରାଣ୍ତିଆଇମେକାଙ୍ଗ୍‌ ଇଜିନା, ୱାର୍‌ ନା ୱାଜା ଅରେନ୍‌ନେ ତେବାତିଙ୍ଗ୍‌ ନେଗେନ୍‌ ଆତାତ୍‌ମାନ୍ଦି । 9 ମାତର୍‌ ଜଦି ୱାର୍‌ ମୋନ୍‌ତିଙ୍ଗ୍‌ ତିର୍‌ କିଦେଙ୍ଗ୍‌ ଆଟ୍‌ଇତିଙ୍ଗ୍‌, ଆର୍‌ତିଙ୍ଗ୍‌ ପେଡ଼ି ଆପିର୍‌ । ଇରିଙ୍ଗ୍‌ ଆସା ଆଜି କାରାପ୍‌ ଆନି ବାଦ୍‌ଲୁ ପେଡ଼ି ଆନିକା ନେଗେତ୍‌ ।

10 ✝ମାତର୍‌ ପେଡ଼ିଆତିୱାରିଙ୍ଗ୍‌ ନାନ୍‌ ଆଦେସ୍‌ ସିଜିନା, ନାନ୍‌ ସିଲେ, ମାତର୍‌ ପ୍ରବୁ ଆଦେସ୍‌ ସିନାନ୍‌, ଆଡ଼୍‌ସି ନିଜେଦି କନ୍‌ଲିମାଣୁକୁ ୱେର୍‌ଏ ଆମାକିତ୍‌; 11 ଜଦି ୱାଦ୍ ୱେର୍‌ଏ ଆନାତ୍‌, ଆର୍‌ତିଙ୍ଗ୍‌ ୱାଦ୍ ମାରି ପେଡ଼ି ଆମାକିତ୍‌, ମାରି ନିଜେଦି କନ୍‌ଲି ୱାଲେ ମାରିଡ଼େସି ମିସାପିର୍‌, ମାରି କନ୍‌ଲି ନିଜେଦି ଆଡ଼୍‌ସିଙ୍ଗ୍‌ ଡ଼ିସ୍‌ମାକିନ୍‌ ।

12 ମାତର୍‌ ଆଇ ୱିଜେରିଙ୍ଗ୍‌ ନାନ୍‌ ୱେର୍‌ନା, ପ୍ରବୁ ଇନ୍‌ଏନ୍‌, ଜଦି ଏ ତଡ଼ାନ୍‌ତି ଅବିସ୍‌ବାସ୍‌ତି ଆଡ଼୍‌ସି ମାନାତ୍‌, ମାରି ୱାଦ୍ ୱାନି କନ୍‌ଲି ୱାଲେ ତେବାଦେଙ୍ଗ୍‌ ବଦା କିନାତ୍‌, ଆର୍‌ତିଙ୍ଗ୍‌ ୱାନ୍‌ ତାନିଙ୍ଗ୍‌ ଡ଼ିସ୍‌ମାକିନ୍‌ । 13 ମାରି, ଆମା ଆଡ଼୍‌ସିଦି ଅବିସ୍‍ବାସ୍‍ କନ୍‌ଲି ମାନାନ୍‌, ମାରି ୱାନ୍‌ ତାନି ଆଡ଼୍‌ସି ୱାଲେ ତେବାଦେଙ୍ଗ୍‌ ଇଚ୍ଛା କିନାନ୍‌, ୱାଦ୍ ନିଜେଦି କନ୍‌ଲିଙ୍ଗ୍‌ ଡ଼ିସ୍‌ମାକିତ୍‌ । 14 ଇରିଙ୍ଗ୍‌ ଅବିସ୍‍ବାସ୍‍ କନ୍‌ଲି ଆଡ଼୍‌ସି ଉଣ୍ତିଙ୍ଗ୍‌ ନେଗେନ୍‌ କିଆତାମାନାନ୍‌, ମାରି ଅବିସ୍‌ବାସ୍‌ତି ଆଡ଼୍‌ସି କନ୍‌ଲି ଉଣ୍ତିଙ୍ଗ୍‌ ନେଗେନ୍‌ କିଆତାମାନାତ୍‌; ପ୍ରବୁ ଜିସୁ କ୍ରିସ୍ତଙ୍ଗ୍‌ ମାନାଦେଙ୍ଗ୍‌ ଆଟ୍‍ନାର୍‍ । ଆକା ଆଏତିଙ୍ଗ୍‍ ୱାରି କଡ଼ର୍‌ ପାପ୍‌ ଆନାର୍‌, ମାତର୍‌ ସତ୍‌ତାନ୍‌ ୱାର୍‌ ମାପୁରୁଦି ମାଣ୍‌କୁ ମାନେଆତାମାନାର୍‌ । 15 ଆକାଏଣ୍ତେସ୍‌ଆପିତ୍‌, ଜଦି ଅରେନ୍‍ ଅବିସ୍‍ବାସ୍‍ସି, ୱାନି କ୍ରିସ୍ତ ବିସ୍‌ବାସ୍‌ତି କନ୍‌ଲି ମାରି ଆଡ଼ିସିମାଣୁକୁ ୱେର୍‌ଏ ତେବାଦେଙ୍ଗ୍‌ ବଦା କିନାନ୍‌, ଆର୍‌ତିଙ୍ଗ୍‌ ୱାନ୍‌ ଆକା କିପିନ୍‌; ଇୟା ପାଣିଦୁ କ୍ରିସ୍ତବିସ୍‌ବାସ୍‌ସି କନ୍‌ଲି ମାରି ଆଡ଼୍‌ସି ଆମା ନିୟମ୍‌ତାନ୍‌ ମିସାଏର୍‌ । ଇରିଙ୍ଗ୍‌ ମାପୁରୁ ମିଙ୍ଗିଁ ସାନ୍ତିଦାନ୍‌ ଜିନିମାଡ଼ିନି ଉଣ୍ତିଙ୍ଗ୍‌ କୁକ୍‌ତାମାନାନ୍‌ । 16 କ୍ରିସ୍ତ ବିସ୍‌ବାସ୍‌ତି ଆଡ଼୍‌ସି, ନିନୁ ନିଜେଦି କନ୍‌ଲିଙ୍ଗ୍‌ ରକିୟା କିଦେଙ୍ଗ୍‌ ଆଟ୍‌ନି ଇଜି ଇନିକା ସତ୍‌ତାନ୍‌ ନେସ୍‌ତିମାନି ? ବିସ୍‌ବାସ୍‌ତି କନ୍‌ଲି, ନିନୁ ନିଜେଦି ଆଡ଼୍‌ସିଙ୍ଗ୍‌ କ୍ରିସ୍ତବିସ୍‌ବାସ୍‌ତିକା କିଦେଙ୍ଗ୍‌ ଆଟ୍‌ନି ଇଜି ଇନିକା ପୁରା ୱେର୍‍ତେଙ୍ଗ୍‍ ଆଟ୍‌ନି ?

17 କେବଲ ପ୍ରବୁ ଆମାୱାନିଙ୍ଗ୍‌ ଏଣ୍ତେସ୍‌ ନାନି ଦୟା ସିତାମାନାନ୍‌, ମାପୁରୁ ୱିଜେରିଙ୍ଗ୍‌ ଆମା ଅବସ୍ଥାଦାନ୍‌ କୁକ୍‌ତାମାନାନ୍‌, ୱାନ୍‌ ଆୟାୱାଜା ଜିପିନ୍‌ । ନାନ୍‌ ୱିଜୁ ମଣ୍ତଲିଆଙ୍ଗାଁ ଇୟାୱାଜାଦି ଆଦେସ୍‌ ସିନା । 18 ଏନ୍‌ କି ସୁନ୍ନତ୍‌ ଅବସ୍ଥାଦାନ୍‌ ମାପୁରୁ କୁକ୍‌ତାମାନାନ୍‌, ୱାନ୍‌ ଅସୁନ୍ନତି ୱାଜା ତରାଦେଙ୍ଗ୍‌ ସେସ୍ଟା କିମାକିନ୍‌ । ଏନ୍‌ କି ଅସୁନ୍ନତ ଅବସ୍ଥାଦାନ୍‌ ମାପୁରୁ କୁକ୍‌ତାମାନାନ୍‌, ୱାନ୍‌ ସୁନ୍ନତ୍‌ ଆମାକିନ୍‌ । 19 ସୁନ୍ନତ ଇନିକା ସିଲେ, ମାରି ଅସୁନ୍ନତ ଇନିକା ପେରି ବିସୟ୍‌ ସିଲେ, ମାତର୍‌ ମାପୁରୁଦି ଆଦେସ୍‌କୁ ମାନାନିକା ପେରି ବିସୟ୍‌ । 20 ମାପୁରୁଦି ମାଟା ମାନାତିୱାଲେ ଏନ୍‌ ଏଣ୍ତେସ୍‌ ନାନି ଅବସ୍ଥାଦାନ୍‌ ମାର୍‌ର୍ହାନ୍‌, ୱାନ୍‌ ଆୟା ଅବସ୍ଥାଦାନ୍‌ ମାନିନ୍‌ । 21 ମାପୁରୁ କୁକ୍‌ତିୱାଲେ ନିନୁ ଇନିକା ଗତିମୁରୁଲି ମାର୍‌ଇ ? ଆୟାଉଣ୍ତିଙ୍ଗ୍‌ ସିନ୍ତା କିମା, ମାତର୍‌ ଏସ୍‌କାଙ୍ଗ୍‌ ମୁକୁଡ଼ାଦେଙ୍ଗ୍‌ ଆଟ୍‌ନି, ଆର୍‌ତିଙ୍ଗ୍‌ ଆୟା ସୁଜୋଗ୍‌ ନେଗେନ୍‌ତାନ୍‌ ମାନାଦୁ । 22 ଇରିଙ୍ଗ୍‌ ପ୍ରବୁଦିମାଣୁକୁ କୁକ୍‌କାୟ୍‌ ଆତିମାନି କଟିସାକର୍‌, ୱାନ୍‌ ପ୍ରବୁଦି ମୁକୁଡ଼ାତି ଲୋକ୍‌; ଆୟାୱାଜା ଏନ୍‌ ମୁକୁଡ଼ା ଆଜି କୁକ୍‌କାୟ୍‌ଆତାମାନାନ୍‌, ୱାନ୍‌ କ୍ରିସ୍ତଦି କଟିସାକର୍‌ । 23 ମାପୁରୁ ମିଙ୍ଗିଁ ନାଣ୍ତ ଦାରା ସିଜି କଟାମାନାନ୍‌, ଲୋକା ସାକର୍‌ ଆମାଟ୍‌ । 24 ଏ ତଡ଼ାନ୍‌କୁ ନି ତାଙ୍ଗିଁକି, ମାପୁରୁ ମିଙ୍ଗିଁ କୁକ୍‌ତିୱାଲେ ଆମା ଅବସ୍ଥାଦାନ୍‌ ମାର୍‌ଇଦେର୍‌, ଆୟାୱାଜା ମାପୁରୁଦି ୱାଲେ ଅର୍‌ସେ ଜିନିକା ମାନାତ୍‌ ।

25 ମିର୍‌ ପେଡ଼ିଆଇୱାରି ବିସୟ୍‌ତାନ୍‌ ନେସ୍‌ତେଙ୍ଗ୍‌ ଅଡ଼୍‍ବିଜିନିଦେର୍‍ । ଇୟା ବିସୟ୍‌ତାନ୍‌ ନାନ୍‌ ପ୍ରବୁଦିମାଣୁକୁ ଇନି ମାଟା ପୟ୍‌ଏ । ମାତର୍‌ ପ୍ରବୁଦି ସାକାଦାନ୍‌ ଅରେନ୍‍ ବିସ୍‌ବାସ୍‌ତି ଜଗ୍‌ ଲୋକ୍‌ ୱାଜା ନା ମୋନ୍‌ତି ବଦା ୱେର୍‌ସିନାତ୍‌ । 26 ନାନ୍‌ ଏତ୍‌କିନା ଜେ, ଲୋକୁ ଏଣ୍ତେସ୍‌ ମାନାର୍‌, ଇଲେଇତି ବାଦାଦି ଉଣ୍ତିଙ୍ଗ୍‌ ଆୟାୱାଜା ତେବାନିକା ନେଗେତ୍‌ । 27 ନିନୁ ଇନିକା ଆଡ଼୍‌ସି ୱାଲେ ତେବାତିମାନି ? ଆର୍‌ତିଙ୍ଗ୍‌ ଇୟା ଗାଟିଦାନ୍‌ କୁଦାଦେଙ୍ଗ୍‌ ସେସ୍ଟା କିମା । ନିନୁ ଇନିକା ଆଡ଼୍‌ସିମାଣୁକୁ ମୁକୁଡ଼ାତିମାନି ? ଆର୍‌ତିଙ୍ଗ୍‌ ଆଡ଼୍‌ସିଙ୍ଗ୍‌ ପୟ୍‌ଦେଙ୍ଗ୍‌ ସେସ୍ଟା କିମା । 28 ଜଦି ମିର୍‌ ପେଡ଼ି ଆତିମାନିଦେର୍‌, ଆର୍‌ତିଙ୍ଗ୍‌ ପାପ୍‌ କିଇଦେର୍‌; ମାରି ଜଦି ପେଡ଼ିଆଇ ଆଇଲି ପେଡ଼ି ଆତିଙ୍ଗ୍‌, ଆର୍‌ତିଙ୍ଗ୍‌ ୱାଦ୍ ପାପ୍‌ କିଏତ୍‌ । ମାତର୍‌ ପେଡ଼ିଆତି ଲୋକ୍‍ତିଙ୍ଗ୍‌ ଦୁନିଆଦି ବେସି ଦୁଃକ୍‌ କାସ୍ଟୁ ସାସ୍‌ କିଦେଙ୍ଗ୍‌ ପଡ଼ାନାତ୍‌ । ମାରି ମିର୍‌ ଏଣ୍ତେସ୍‌ ଆବେଟ୍‌କୁ ରକ୍‌ୟା ପୟ୍‌ନିଦେର୍‌, ଇକା ନା ବଦା ।

29 ମାତର୍‌ ଏ ତଡ଼ାନ୍‌କୁ, ନାନ୍‌ ଇୟା ମାଟା ୱେର୍‍ତେଙ୍ଗ୍‍ ବଦା କିଜିନା, ଦିନ୍‌ ଲାକ୍‌ତୁ ୱାତାତ୍‌ନି, ଆଦେଙ୍ଗ୍‌ ଆମାୱାରିଙ୍ଗ୍‌ ଆଡ଼୍‍ସିକ୍‍ ମାନେ, ୱାର୍‌ ଆଡ଼୍‍ସିକ୍‍ ସିଲି ୱାଜା ଆପିର୍‌ । 30 ମାରି, ଆମାକାର୍‌ ଆଡ଼୍‌ବାନାର୍‌, ୱାର୍‌ ଆଡ଼୍‌ବାଇ ଲୋକା ୱାଜା ଆପିର୍‌, ମାରି, ଆମାକାର୍‌ ୱେଡ଼ିକା କିନାର୍‌, ୱାର୍‌ ୱେଡ଼ିକାକିଇ ଲୋକା ୱାଜା ଆପିର୍‌; ଆମାକାର୍‌ କଣାର୍‌, ୱାର୍‌ ନିଜେଦି ସିଲି ଲୋକା ୱାଜା ଆପିର୍‌ । 31 ମାରି, ଆମାକାର୍‌ ଜଗତ୍‌ତି ବିସୟ୍‌ତାନ୍‌ ୱେଡ଼ିକା ପୟ୍‌ନାର୍‌, ୱାର୍‌ ୱେଡ଼ିକା ପୟ୍‌ଇ ଲୋକା ୱାଜା ଆପିର୍‌ । ଇରିଙ୍ଗ୍‌ ଇୟା ଦୁନିଆଦି ୱେଡ଼ିକା ନାଣ୍ତଦିନ୍‌ ତେବାଏତ୍‌ ।

32 ମାତର୍‌ ମିର୍‌ ଏଣ୍ତେସ୍‌ ସିନ୍ତା ଆମାଟ୍‌, ଇକା ନା ବଦା । ଏନ୍‌ ପେଡ଼ିଆଏନ୍, ୱାନ୍‌ ଏଣ୍ତେସ୍‌ ପ୍ରବୁଦି ୱେଡ଼ିକାଦିକାନ୍‌ ଆନାନ୍‌, ଇୟାଉଣ୍ତିଙ୍ଗ୍‌ ପ୍ରବୁଦି ବିସୟ୍‌ ଅସି ସିନ୍ତା ଆନାନ୍‌ । 33 ମାତର୍‌ ଏନ୍‌ ପେଡ଼ିଆତିକାନ୍‌, ୱାନ୍‌ ଏଣ୍ତେସ୍‌ ନିଜେଦି ଆଡ଼୍‌ସିଙ୍ଗ୍‌ ୱେଡ଼ିକାଦିକାନ୍‌ ଆନାନ୍‌, ଆୟାଉଣ୍ତିଙ୍ଗ୍‌ ୱାନ୍‌ ଇଲୁଦି ବିସୟ୍‌ ଅସି ସିନ୍ତା ଆନାନ୍‌ । 34 ମାରି ୱାନି ମୋନ୍‌ ଇନିଙ୍ଗାଁ ଆନିଙ୍ଗାଁ ଆନାତ୍‌ । ପେଡ଼ିଆଇ ଆଇ ମାନି ରିପାଆଇଲି, ପ୍ରବୁଦି ପାଣିଦୁ ମୋନ୍‌ଦିୟାନ୍‌ ସିନେ, ଇରିଙ୍ଗ୍‌ ମେନ୍ଦଲ୍‌ ମାରି ଆତ୍ମାଦାନ୍‌ ୱାଦ୍ ନିଜେଦିଙ୍ଗ୍‌ ମାପୁରୁଦି ମାନୁ ସିଦେଙ୍ଗ୍‌ ବଦା କିନାତ୍‌; ମାତର୍‌ ଏଦ୍‌ ପେଡ଼ିଆତାମାନାତ୍‌, ୱାଦ୍ ଏଣ୍ତେସ୍‌ ନିଜେଦି କନ୍‌ଲିଙ୍ଗ୍‌ ୱେଡ଼ିକା କିନି ତାନି ବଦା, ଆୟାଉଣ୍ତିଙ୍ଗ୍‌ ଦୁନିଆଦି ବିସୟ୍‌ ଅସି ସିନ୍ତା ଆନାତ୍‌ । 35 ଇୟା ମାଟା ନାନ୍‌ ମି ନିଜେଦି ନେଗି ଉଣ୍ତିଙ୍ଗ୍‌ ୱେର୍‌ସିନା, ମିଙ୍ଗିଁ ଉରିଦୁ ଆର୍‌ପେତେଙ୍ଗ୍‌ ଇନ୍‌ଏ, ମାତର୍‌ ମିର୍‌ ଏଣ୍ତେସ୍‌ ନେଗି ବ୍ୟବ୍‌ହାର୍‌ କିଜି ଉନ୍‌ଡ୍ରେ ମୋନ୍‌ତାନ୍‌ ପ୍ରବୁଦି ସେବାଦୁ ସର୍‌ପେ କିଦୁ, ଇୟାଉଣ୍ତିଙ୍ଗ୍‌ ୱେର୍‌ସିନା ।

36 ପେଡ଼ି ଆଦେଙ୍ଗ୍‌ ଲସ୍‌ତି ୱେନ୍‌କା, ମେମାର୍‌ଏନ୍‌ ଜଦି ଅଡ଼୍‌ବିନାନ୍‌ ଜେ ୱାନି ଲସ୍‌ତିମାନି ଆଇଲି ଉଣ୍ତିଙ୍ଗ୍‌ ୱାନ୍‌ ନେଗେନ୍‌ ବ୍ୟବ୍‌ହାର୍‌ କିଦେଙ୍ଗ୍‌ ଆଟ୍‌ଏଜିନାନ୍‌, ଜଦି ୱାନି ଲାଲାୟ୍‌ ନାଣ୍ତ ଆନାତ୍‌ ମାରି ୱାନି ଉଣ୍ତିଙ୍ଗ୍‌ ପେଡ଼ି ଆନିକା ନେଗେତ୍‌, ଆର୍‌ତିଙ୍ଗ୍‌ ୱାନି ବଦା ଇସାବ୍‌ତାନ୍‌ ୱାର୍‌ ପେଡ଼ି ଆପିର୍‌ । ଇବେନୁ ଇନି ପାପ୍‌ ସିଲେତ୍‌ । 37 ମାତର୍‌ ଆମା ଲୋକ୍‌ ଜାସାପେଲା ଆଜି ତାନି ଗାଡ଼୍‌ସିଙ୍ଗ୍‌ ପେଡ଼ି ଆଦେଙ୍ଗ୍‌ କେଏଣ୍‌ଗା ଡାଟ୍‌ ଆନାନ୍‌ ମାରି ନିଜେଦି ମନ୍‌ ଆସା ପୁରା ତେବା କିଦେଙ୍ଗ୍‌ ଆଟ୍‌ତାମାନାନ୍‌ ମାରି ଗାଡ଼୍‌ସିଙ୍ଗ୍‌ ଆୟାୱାଜା ରିପାଆଇଲିଦି ଅବସ୍ଥାଦାନ୍‌ ଇଡ୍‌ଦେଙ୍ଗ୍‌ ବଦା କିତାୱିସ୍‌ତାମାନାନ୍‌, ଆର୍‌ତିଙ୍ଗ୍‌ ୱାନ୍‌ ଟିକ୍‌ କିତାମାନାନ୍‌ । 38 ଆଦେଙ୍ଗ୍‌ ଏନ୍‌ ତାନି ଆଇମାଦିଙ୍ଗ୍‍ ପେଡ଼ି କିନାନ୍‌, ୱାନ୍‌ ନେଗେନ୍‌ କିନାନ୍‌, ମାରି ଏନ୍‌ ପେଡ଼ି କିଏନ୍‌, ୱାନ୍‌ ମାରି ନାଣ୍ତ ନେଗେନ୍‌ କିନାନ୍‌ ।

39 କନ୍‌ଲି ଜିବନ୍‌ମାନି ସାନ୍ଦି ଆଡ଼୍‌ସି ମିସାନା ମାନାତା; ମାତର୍‌ କନ୍‌ଲି ସାତି ୱେନ୍‌କା ତାନି ବଦାଦାନ୍‌ ମାରିଡ଼େସିପେଡ଼ି ଆଦେଙ୍ଗ୍‌ ଆଟ୍‍ନାତ୍‍; ମାତର୍‌ ଆମାୱାନିଙ୍ଗ୍‌ ପେଡ଼ି ଆନାତ୍‌, ୱାନ୍‌ କ୍ରିସ୍ତ ବିସ୍‍ବାସି ଆନି ମାନିକାମାନାତ୍‌ । 40 ମାତର୍‌ ୱାଦ୍ ଆମା ପେଡ଼ି ଆଏଣ୍ତା ମାନାତ୍‌, ଆୟା ଅବସ୍ଥାଦାନ୍‌ ତେବାତିଙ୍ଗ୍‌ ନାଣ୍ତ ସୁକ୍‌ ଆନାତ୍‌, ଇକା ନା ବଦା, ମାରି ଇକାବା ମାପୁରୁଦି ପବିତ୍ରଆତ୍ମାଦି ବଦା ଇଜି ନାନ୍ ଅଡ଼୍‌ବିଜିନା ।