1 ✝ଇୟାୱାଜା ଏ ଆଇମେକ୍‍ ! ମିରୁ ମି କନ୍‌ଲିରିଙ୍ଗ୍‌ ମାନାଦୁ । ଆର୍‌ତିଙ୍ଗ୍‌, ଜଦି ମାପୁରୁଦି ବାକ୍ୟଦୁ ବିସ୍‌ବାସ୍‌ କିଏଜି ମାନାନ୍‌, ଆର୍‌ତିଙ୍ଗ୍‌ ମି ବୁଲାସାଲାନି ମାଣୁକୁ ଆୟା ବାକ୍ୟ ଉଣ୍ତିଙ୍ଗ୍‌ ୱାନି ବିସ୍‌ବାସ୍‌ ପିର୍‌ନାତ୍‌ । ମିର୍‌ ପଦ୍‌କେ ବା ଇନିକା ଇନ୍‌ଡ୍ରେଙ୍ଗ୍‌ ଦର୍‌କାର୍‌ ସିଲେତ୍‌ । 2 ଇରିଙ୍ଗ୍‌ ମି ନେଗି ବୁଲାସାଲାନିକା ମାରି ଦାର୍ମୁ ଜିବନ୍‌ ୱାର୍‌ ସୁଡ଼ୁନାର୍ । 3 ✝କୁକୁଟି ତିଆର୍‌ଆନିକା, ନିଜେ ରଜ୍‍ନିକା, ନେଗି ୱାତିଗନ୍ଦା ଆରାନିକା, ବାଙ୍ଗାଁରାମ୍‍ ଆରାନିକା ୱିଜୁ ଆତ୍ରେ ତିଆର୍‌ମିଆର୍‌ ଆଜି ନିଜେଦି ସବା ତର୍‌ନିକା ମିରୁ କିଇକାମାନାତ୍‌ । 4 ସତ୍‌ତି ସୁନ୍ଦର୍‌ ଆଜିନାତ୍‌, ମି ଜିବନ୍‌ତି ଦାର୍ମୁ ମାରି ସାନ୍ତି ମାର୍‌ଗିତିମାନିକା ସୁନ୍ଦର୍‌ ମାପୁରୁଦି କାଣେକେଆଙ୍ଗାଁ ୱିଜୁଦିମାଣୁକୁ ନାଣ୍ତ୍‌ନେଗିକା । 5 ପୁର୍ବେକାଡ଼ାଦୁ ଆମା ଦାର୍ମୁଦି ଆଇମେକ୍‍ ମାପୁରୁଦିମାନୁ ଆସା ଇଟ୍‌ତେମାରେଏ, ୱାକୁ ନିଜେଦି କନ୍‍ଲିରିଙ୍ଗ୍‍ଁ ମାନାନିମାଣାନ୍‍ ନିଜେଦିଙ୍ଗ୍‍ଁ ନେଗେନ୍‌ ତିଆର୍‌ ଆଜି ମାର୍‌ଏ । 6 ସାରା ଆୟାୱାଜା ଅରେତ୍‌ ଆଇମା ମାର୍ହାତ୍‌ । ୱାଦ୍‌ ଅବ୍ରାହାମ୍‌ଦି ମାଟା ମାନାଜି ୱାନିଙ୍ଗ୍‌ ପ୍ରବୁ ଇଜି ମାନାଜିମାରାତ୍‌ । ମିରୁ ଇଲେଇ ତାନି ଗାଡ଼୍‌ସିକ୍‌ । ଜଦି ମାନାତିଙ୍ଗ୍‌, ଆର୍‌ତିଙ୍ଗ୍‌, ଇନି ବିସୟ୍‌ ମିଙ୍ଗିଁ ମାରି ତିଲିସ୍‌ କିଦେଙ୍ଗ୍‌ ଆଟ୍‌ଏତ୍‌ ।

7 ✝ଏ କନ୍‌ଲିର୍‌, ଆୟାୱାଜା ମି ଆଡ଼ିକାଙ୍ଗ୍‌ ସାକିସିଲି ତଡ଼୍‍ ଇଜି ନେସ୍‌ସି ୱାନିକା ଉଣ୍ତିଙ୍ଗ୍‌ ସାସ୍‌ ଆସ୍‌ସି ତେବାଦୁ । ୱାନିକାଙ୍ଗ୍‌ ମାନାଦୁ । ୱାକ୍‌ ବା ମି ୱାଲେ ମାପୁରୁମାନୁ ଜିବନ୍‌ନୋନି ଦୟାଦାନ୍‌ ପଇନେ । ମିରୁ ୱାନିକା ଉଣ୍ତିଙ୍ଗ୍‌ ନେଗେନ୍‌ତାନ୍‌ ସୁଡ଼ୁତିଙ୍ଗ୍‌, ମି ପାର୍‍ତନା ଏଣ୍ତେସ୍‌ ବାଦା ଆଏତ୍‌ ।

8 ସାରାସାରିୱେନ୍‌କା, ମିର୍‌ ୱିଜେରେ ଉନ୍‍ଡ୍ରେମୋନ୍‌ ଆଦୁ, ନିଜେନିଜେଦି ସୁକ୍‌ଦୁଃକ୍‌ତୁ ଅର୍‌ସେ ତେବାନିକା, ତଡ଼ାନ୍‌ତିଙ୍ଗ୍‌ ଜିବନ୍‌ନୋନିକା, ସିତ୍‌ଡ଼ି ଜିବନ୍‌ ମାରି ସାନ୍ତି ଆଦୁ; 9 ନିସ୍ଟୁର୍‌ ବାଦ୍‌ଲୁ ନିସ୍ଟୁର୍‌ କିମାଟ୍‌, ଆନାଦୁରିଆ ବାଦ୍‌ଲୁ ଆନାଦୁରିଆ ଇଡ୍‌ମାଟ୍‌; ତାନି ବାଦ୍‌ଲୁ ଆସିର୍ବାଦ୍‌ କିଦୁ, ଇରିଙ୍ଗ୍‌ ଇୟାଉଣ୍ତିଙ୍ଗ୍‌ ମାପୁରୁ ମିଙ୍ଗିଁ କୁକ୍‌ତାମାର୍ହାନ୍‌ ମାରି ଇକା କିନି ମାଣୁକୁ ମିରୁ ଆସିର୍ବାଦ୍‌ ପୟ୍‌ନିଦେର୍‌ । 10 ସାସ୍ତ୍ରଦୁ ରାସ୍‌ତାମାନାତ୍‌,

"ଜଦି ଏନ୍‌ ଜିବନ୍‌ତୁ ସୁକ୍‌ବୋଗ୍‌ କିଦେଙ୍ଗ୍‌

ମାରି ସୁକ୍‌ତି ଦିନ୍‌ ସୁଡ଼ୁଦେଙ୍ଗ୍‌ ବଦା କିନାନ୍‌,

ୱାନ୍‌ ତାଗ୍‌ଇ ମାଟେଙ୍ଗ୍‌ ଇନ୍‌ମାକିନ୍‌

ମାରି ବାଣ୍ତିସ୍‍ ମାଟେଙ୍ଗ୍‍ ୱେର୍‍ତେଙ୍ଗ୍‍ ଆଲ୍‌ଜମାନିନ୍‌ ।

11 ୱାନ୍‌ ତାଗ୍‌ଇପାଣିଦାନ୍‌ ଆକ ମାନ୍‌ଞ୍ଜି ସତ୍‍ପାଣି କିପିନ୍‌;

ମାରି ଜିବନ୍‌ତି ୱାଲେ ସାନ୍ତି ପାଣି ପଇନି ।

12 ଇରିଙ୍ଗ୍‌ ଦାର୍ମୁଦିଲୋକା ଉଣ୍ତିଙ୍ଗ୍‌ ପ୍ରବୁଦି ସାକା ମାନାତ୍‌

ମାରି ୱାରି ପାର୍‍ତନା ୱେନାନ୍‌;

ମାତର୍‌ ୱାନ୍‌ ତାଗ୍‌ଇୱାରିଙ୍ଗ୍‌ ବିରୁଦ୍‌ କିନାନ୍‌ ।"

13 ମାରି ମିର୍‌ ଜଦି ସତ୍‍ପାଣି କିଦେଙ୍ଗ୍‌ ମୋନ୍‌ ସିନିଦେର୍‌, ଆର୍‌ତିଙ୍ଗ୍‌ ଏନ୍‌ ମିଙ୍ଗିଁ ନିସ୍ଟୁର୍‌ କିନାନ୍‌ ? 14 ✝ଦାର୍ମୁଦି ଉଣ୍ତିଙ୍ଗ୍‌ ମିରୁ ଦୁଃକ୍‌କାସ୍ଟୁ ପୟ୍‌ତିଙ୍ଗ୍‌ ବା ମିର୍‌ ସତ୍‌ତାନ୍‌ ସୁକ୍‌ମାନିଦେର୍‌ । ଏଙ୍ଗ୍‌ବା ତିଲାମାଟ୍‌; ଆର୍‍ଏ ସିନ୍ତା କିମାଟ୍‌ । 15 ମାତର୍‌ ଜିବନ୍‌ତାନ୍‌ କ୍ରିସ୍ତଙ୍ଗ୍‌ ମାନାଜି, ୱାନିଙ୍ଗ୍‌ ପ୍ରବୁ ଇଜି ମାନାଦୁ । ଜଦି ଏନ୍‌ ମିମାନୁ ମାନି ଆସାଦି ମାଟା ବିସୟ୍‌ତାନ୍‌ ୱେନ୍‌ବାନାନ୍‌, ୱାନିଙ୍ଗ୍‌ ମାଟା ସିଦେଙ୍ଗ୍‌ ୱିଜୁଦିନ୍ ଜାଗାର୍‌ତା ମାନ୍‍ଡ୍ରୁ । 16 ମାତର୍‌ ସାନ୍ତିଦାନ୍‌ ମାରି ତିଏଲ୍‌ତାନ୍‌ ନେଗି ବୁଦିଦାନ୍‌ ମାଟା ୱେର୍‌ତୁ । ମି ବୁଦିଦିଙ୍ଗ୍‌ ନେଗେନ୍‍ ଇଡ୍‌ଦୁ । ଆର୍‌ତିଙ୍ଗ୍‌, ମିରୁ କ୍ରିସ୍ତଦି ୱେନ୍‌କାସନିୱାଜା ପାଣି କିଜିମାନିୱାଲେ, ଆମାକାର୍‌ ମି ବାଣ୍ତିସ୍‍ ମାଟା ୱେର୍‌ନାର୍‌, ଆବେନୁ ୱାର୍‌ ସେମାର୍‌ ଆନାର୍‌ । 17 ମାତର୍‌ ତାଗ୍‍ଇପାଣିଦି ଉଣ୍ତିଙ୍ଗ୍‌ ଦୁଃକ୍‌ ପୟ୍‍ନି ବାଦ୍‌ଲୁ ମାରି ଜଦି ମାପୁରୁଦି ବଦା ଆନାତ୍‌, ଆର୍‌ତିଙ୍ଗ୍‌ ସତ୍‌ପାଣି କିଜି ଦୁଃକ୍‌ ପୟ୍‍ନିକା ନେଗେତ୍‌ । 18 ମିଙ୍ଗିଁ ମାପୁରୁଦି ଲାକ୍‌ତୁ ତାନି ଉଣ୍ତିଙ୍ଗ୍‌ କ୍ରିସ୍ତ ନିଜେ ଦାର୍ମୁଦିକାନ୍‌ ଆଜି ଅଦାର୍ମୁ ଲୋକୁ ପାପ୍‌ ଉଣ୍ତିଙ୍ଗ୍‌ ନିଜେଦି ଜିବନ୍‌ ସିତାନ୍‌ । ଇୟା ପାଣି ୱାନ୍‌ ପୁରାଅର୍‌ସେ ୱିଜୁଦିନ୍‌ତି ଉଣ୍ତିଙ୍ଗ୍‌ ପୁରା କିତାମାନାନ୍‌ । ୱାନ୍‌ ମେନ୍ଦଲ୍‌ତାନ୍‌ ସାତାନ୍‌, ମାତର୍‌ ଆତ୍ମାଦାନ୍‌ ଜିବନ୍‌ ଆତାନ୍‌; 19 ଆବେନୁ ବା ୱାନ୍ ଜଇଲ୍‌ତୁମାନି ଆତ୍ମେଆଙ୍ଗାଁ ଲାକ୍‌ତୁ ସଲ୍‌ସି ପ୍ରଚାର୍‌ କିତାନ୍ । 20 ପୁର୍ବେକାଡ଼ାଦୁ ନୋହଦି ବେଡ଼ାଦୁ ଏରୁଜାହାଜ୍‌ ତିଆର୍‍ କିନିୱାଲେ, ନାସ୍ତିୱାଲେ ମାପୁରୁ ସାସ୍‌ ଆସ୍‌ସି କାପ୍‌କିଜି ମାର୍ହାନ୍‌, ନାସ୍ତିୱାଲେ ଆମା ଲୋକୁ ମାପୁରୁଦି ମାଟା ଆସ୍‌ଏର୍‌ ମାର୍ହାର୍‌ । ଆୟା ଜାହାଜ୍‌ଦୁ ଡ଼ୁଗିତାରୋ ଆମା ଉଣା ଲୋକ୍‌ ୱିଜେର୍‌ମିସାଜି ଆଟ୍‌ ଲୋକ୍‌ ମାର୍ହାର୍‌, ମାତର୍‌ ଗାଲିପିରୁଦାନ୍‌ ରକିୟା ପୟ୍‌ତାର୍‌ । 21 ଆବେଣି ସିନାୱାଜା ଡୁବନ୍‌ ଅତାର୍‍ ଇୟା ଡୁବନ୍‌ ମି ମେନ୍ଦଲ୍‌ତି ରୋପି ସୋଲ୍‌ସିପ୍‌ କିଏତ୍‌, ମାତର୍‌ ମାପୁରୁଦି ଲାକ୍‌ତୁ ନେଗି ବୁଦି ପୟ୍‌ନି ଉଣ୍ତିଙ୍ଗ୍‌ ପାର୍‌ତାନା କିତାନ୍‍, ଜିସୁ କ୍ରିସ୍ତଦି ମାରିଡ଼େସିଜିବନ୍‌ଆଜିନିଙ୍ଗ୍‌ନି ମାଣୁକୁ ଇଲେଇ ମିଙ୍ଗିଁ ରକିୟା କିଜିନାତ୍‌; 22 ଆୟା କ୍ରିସ୍ତ ଇଲେଇ ମୁସ୍‌କୁପୁର୍‌ତୁ ମାପୁରୁଦି ଉଣେରି ତରିନ୍‌ ବାସ୍‌ତା ମାନାନ୍‌, ମୁସ୍‌କୁପୁର୍‌ତି ଦୁତ୍‌କୁ ମାରି ୱିଜେରେ ଅଦିକାର୍‌ପୟ୍‌ତିକାର୍‌ ମାରି ସାକ୍ତିମାନିୱାରି ମୁସ୍‌କୁ ସାସନ୍‌ କିଜିନାନ୍‌ ।