1 ନାନୁ ପାଉଲ ମିଙ୍ଗିଁ ନା ଇୟା ନିଜେଦି ଅନୁରୋଦ ଏନ୍‌ ଏନ୍‌ ଇନାର୍‍, "ନାନୁ ମି ଲାକୁତୁ ମାରିଇୱାଲେ ନାଣ୍ତ ଦାର୍ମୁ ନି ତିର୍‌, ମାତର ଆକ ସରିଙ୍ଗାଁ ନାଣ୍ତଆଟ୍‍ୱା ।" କ୍ରିସ୍ତଦି ନମ୍ରତା ମାରି କାର୍ମୁ ସିଜି ନାନୁ ମିଙ୍ଗିଁ ଅନୁରୋଦ କିଜି ୱେରିସିନା । 2 ମି ୱାଲେ ବେଟେଗାଟ୍ ଆତିୱାଲେ ନାଙ୍ଗି ଏଣ୍ତେସ୍ ସାସ୍ତି ବ୍ୟବହାର୍‌ କିଦେଙ୍ଗ୍ ଆଏତେ । ଇରିଙ୍ଗ୍‌ ଏମେକାର୍ ଅଡ଼ବିନାର୍ ଯେ, ମାପୁ ଦୁନିଆଦି ପାଣି ଇସାବ୍‍ତାନ୍‍ ବୁଲାନାଟ୍‍, ୱାରି ବିରୁଦ୍‌ତାନ୍ ଆଟ୍‍ୱା ମାଟା ଅନି ନାଣ୍ତ ସାସ୍‌ ନାଙ୍ଗି ମାନାତ୍ । 3 ମାଡ୍‌ ଇୟା ଦୁନିଆଦୁ ବାସାକିଜିନିକା ସତ୍‌, ମାତର୍‌ ଇନି ଦୁନିଆଦି ଉଦେସ୍‍ ଇଡ୍‍ଜି ଜୁଦ୍ଧ କିଏଜିନିକା । 4 ମାତର୍‌ ମାପୁରୁଦି ସାକ୍ତିଦି ସାସାପାତି ବ୍ୟବହାର୍‌ କିଜି ଆଟୁୱା ମୁଣ୍ତେଙ୍ଗ୍‍ୱିଜୁ ନାସ୍ଟୁକିଜିମାନିକା, ମିଚ୍‍ତି ଜୁକ୍ତିଦିମାଟେଙ୍ଗ୍‍ ମାପ୍‌ ନାସ୍ଟୁ କିନାପ୍‍ 5 ମାପୁରୁଦି ବୁଦିଦିଙ୍ଗ୍ ବିରୁଦ୍‌କିନି ୱିଜେରେ ୱିଜୁ ଗାଟିଦିଙ୍ଗ୍‌ ମାପୁ କୁତ୍‍ନାପ୍ ମାରି ଲୋକୁଦି ୱିଜୁ ଚିନ୍ତା ଆଡ୍‍ଗି ଆଜି କ୍ରିସ୍ତଦି ମାଟାମାନାନେ । 6 ମିର୍‌ ପୁରାଦାନ୍‌ କ୍ରିସ୍ତଦି ତରିଟିକାନ୍‍ ମାନାନିକା ୱେନେକା ମି ମାଡ଼ାନ୍ ମାରି ଇନି ମାନାଇକା ତରିତିଙ୍ଗା, ତାନି ୱାଲେ ଦଣ୍ତ୍‍ ସିଦେଙ୍ଗ୍‌ ମାପୁ ତିଆରମାନାପ୍ ।

7 ମି ସାରିବେଡ଼ିତି ଇନିକା ୱିଜୁ ଗଟେଆଜିନାତ୍, ସୁଡ଼ୁଦୁ । ମି ମାଡ଼ାନ୍‍କୁ ଏନ୍‌ କ୍ରିସ୍ତଦି ୱେନେକା ମାନାର୍ ନୋ ? ଜଦି ମାନାର୍, ଆର୍‌ତିଙ୍ଗ୍‌ ୱାନ୍‌ ମାରି ଅର୍‍ସୁ ଚିନ୍ତାକିଜ ସୁଡ଼ିନ୍ । ଇରିଙ୍ଗ୍‌ ୱାନି ୱାଜା ମାଡ୍‌ ବା କ୍ରିସ୍ତଦି ୱେନେକା ବୁଲାନିକାର୍‍ । 8 ମିଙ୍ଗିଁ ନାସ୍ଟୁ କିଦେଙ୍ଗ୍ ସିଲେ, ମାତର୍‌ ତିଆର୍‌ କିଦେଙ୍ଗ୍ ମାପୁରୁ ମାଙ୍ଗିଁ ଏମେ ଅଦିକାର୍‍ ସିତାମାନାନ୍‌, ଆୟାଉଣ୍ତିଙ୍ଗ୍‌ ଜଦି ନାନୁ ନାଣ୍ତ ଗର୍ବ କିତାମାନା, ଆର୍‌ତିଙ୍ଗ୍‌ ସେମାର୍ ଆଏ । 9 ନା ସିଟିଦାନ୍ ମିଙ୍ଗିଁ ତିଲିସି କିନି ଉଣ୍ତିଙ୍ଗ୍ ଚେଷ୍ଟାକିଏ ନା ବଦା ସିଲେତ୍‌ । 10 ଏନ୍‌ ଏନ୍‌ ଇନାର୍, "ପାଉଲଦି ସିଟିୱିଜୁ ନାଣ୍ତଡାଟ୍‍ ନି ଆଟ୍‍ୱା ମାତର ମା ଲାକୁତୁ ମାରିଇୱାଲେ ୱାନି ମେନ୍ଦଲ୍‌ ଦୁର୍ବଳ ତରିତାତ୍‍ ମାରି ୱାନି ବଲୁ ପାଣିସିଲିକା ୱାଜାଆତାତ୍ ।" 11 ଆୟା ଲୋକ୍‌ ବୁଜାନିକା ମାନାତ୍‌ ଜେ, ମାପୁ ଆକରାନ୍ ସିଟିଦୁ ଏମେକା ରାସ୍‌ନାପ୍, ଲାକ୍‍ତୁ ମାନିୱାଲେ ତାନିଙ୍ଗ୍‌ ପାଣିଦୁ କିନା ତର୍‍ନାପ୍ ।

12 ଏଣ୍ତେସ୍‍ବା ନିଜେଦିଙ୍ଗ୍ ପେରିକାନ୍ ଇଜି ଅଡ଼ବିନି ଲୋକାଦି ଦାଡ଼ି ଆନି ଉଣ୍ତିଙ୍ଗ୍‌ ବା ୱାରିୱାଲେ ନିଜେଙ୍ଗ୍‌ ତୁସ୍‍ତେଙ୍ଗ୍‍ ସାହାସ୍ ମାଦି ସିଲେତ୍‌ । ୱାର୍‌ ଏସ ବୁଦିସିଲିକାର୍‌, ଇରିଙ୍ଗ୍‌ ୱାର୍‌ ନିଜେଦିଙ୍ଗ୍‌ ନିଜେ ୱାଲେ ଇସାବ୍‌ କିନାର୍‌, ନିଜେ ଲେକିସ୍‍କିନି ବାଡିଗାଦାନ୍‍ ନିଜେନିଜେ ବିଚାର୍‌ କିଆୟ୍‍ଆନାର୍ । 13 ମାତର ମା ଗର୍ବ ଉଣା । ମାପୁରୁ ମା ଉଣ୍ତିଙ୍ଗ୍‌ ଏମେ ପାଣିବାଡି ଟିକ୍ କିତାମାନାନ୍‌, ତାନି ମାଡ଼ାନ୍‍କୁ ମାପୁ ଗର୍ବ କିଜିନାପ୍ । ଆୟା ପାଣିବାଡିଦି ଲଇ ମିର୍‌ ମିସାତିମାନିଦେର୍‍ । 14 ଆୟାଉଣ୍ତିଙ୍ଗ୍‌ ମାପୁ ଆଗିଡ଼ିରାନ୍ କ୍ରିସ୍ତଦି ସୁସମାଚାର୍‌ ମି ଲାକୁତୁ ଅସି ୱାନିବେଡ଼ାଦୁ ଇନିକା ଏରିଆ ଆତ୍ରେ ପାଣି କିଏପ୍‌ । 15 ମାପୁରୁ ପାଣିକିତିମାନି ମା ପାଣିଜାଗାଦୁ ପାଣିକିନି ଆତ୍ରେ ଆଇୱାରି ପାଣିଦୁ ସୁଜୋଗ ଅସି ଗର୍ବ କିଏପ୍ । ମାତର୍‌ ମାପୁ ଆସା କିଜିନାପ୍ ଜେ, ମିର୍‌ ବିସ୍‍ବାସ୍‍ଦୁ ପିରିଜିମାନି ସାଙ୍ଗେ ସାଙ୍ଗେ ମିଙ୍ଗିଁ ମାଡ଼ାନ୍‍କୁ ମା ପାଣିୱିଜୁ ମାରି ୱେଙ୍ଗ୍‍ନାତ୍ । ମାତର ଇକା ମାପୁରୁ କିତିମାନି ନିୟମ୍‍ ମାଟା ଅମାନ୍ୟ କିମାଟ୍‌ । 16 ଆକାଆତିଙ୍ଗ୍ ଆଇୱାରି ପାଣିଜାଗାଦୁ ଆଜିମାନି ପାଣି ଉଣ୍ତିଙ୍ଗ୍‌ ଗର୍ବ କିଏଜି ମି ଅଡ଼୍‍ବିନି ଆତ୍ରେ ଆଇଦେସ୍‍ତି ୱାରିଙ୍ଗ୍ ବା ମାଡ଼ୁ ସୁସମାଚାର୍‌ତି ପ୍ରଚାର୍‌ କିଦେଙ୍ଗ୍ ଆଟିନିକା ।

17 ବ୍ୟବସ୍ଥାଦୁ ରାସାତାମାନାତ୍‌, "ଏନ୍‌ ଗର୍ବ କିଦେଙ୍ଗ୍ ଇଚାକିନାନ୍, ୱାନ୍‌ ପ୍ରବୁଦି ପାଣି ଉଣ୍ତିଙ୍ଗ୍‌ ଗର୍ବ କିପିନ୍ ।" 18 ମାତର୍‌, ନିଜେଦିଙ୍ଗ୍‍ ପ୍ରସଂସା ମାଣାନ୍‌ ଏନ୍‌ ପରିକାଦୁ ଜିଣାଏନ୍‌, ପ୍ରବୁଦି ତରିନ୍‍ ନେଗିକାନ୍‍, ଆୟାକାନ୍‌ କେବଲ ୱାନି ଗ୍ରହଣଜଗ୍ୟ ।