1 ୱେନ୍‍କା ବାଦଡ଼ଦୁ ଉଣ୍ତ୍ରି ପେରି ନି କାବାଆନି ସିନା ତୋରିତାତ୍‍ । ଅରେତ୍ ଆଇମା ୱେଡ଼ାଦି ଜାୟ୍‌ ଆରାତାମାରାତ୍ । ତାନି ପାଦାମ୍‍ ଆଡ୍‍ଗି ଲେଜୁ ମାରି ତାଲାଦୁ ବାରଗୋଟା ସୁକେଙ୍ଗ୍‌ ମାନି ଉଣ୍ତ୍ରି ମୁକୁଟ୍ ମାରାତ୍ । 2 ୱାଦ୍‌ ଗାର୍ବୁଦୁ ମାର୍‌ର୍ହାତ୍‍ ମାରି ଜନମ୍‍ କିନି ୱିସାମ୍‍ତାନ୍‍ କସ୍ଟ ପୟଜି ମାର୍ହାତ୍‍ ।

3 ବାଦଡ଼ତୁ ମାରି ଉନ୍‌ଡ୍ରି କାବାଆନି ସିନା ତୋରିତାତ୍ । ନେତେର୍‌ ରଙ୍ଗ୍‍ତି ସାରାସ୍ ୱାଜା ଉନ୍‌ଡ୍ରି ପେରି ଜାତୁ, ତାନିଙ୍ଗ୍‌ ସାତ୍‌ଗୋଟା ତାଲେକ୍, ଦାସ୍‍ଗୋଟା କମୁକୁ ମାରି ୱିଜୁ ତାଲେକାଙ୍ଗ୍‌ ଉନ୍‌ଡ୍ରି ଲାକା ମୁକୁଟ୍ ମାରାତ୍‌ । 4 ଆୟାକାତ୍‌ ତାନି ତକାଦାନ୍‍ ବାଦଡ଼ତାନ୍‌ ମୁନ୍‌ଡ୍ରିବାଗ୍‌ତାନ୍‌ ଉନ୍‌ଡ୍ରିବାଗ୍‌ ସୁକେଙ୍ଗ୍ ରେଲ୍‌ଜିତାସି ଦୁନିଆ ମୁସୁକୁ ପୋକ୍‍ତାତ୍ । କଡ଼ ଜନମ୍‌ ଆତି ଦାପେ ଦାପେ ୱାନିଙ୍ଗ୍‌ ତିନି ଉଦେସ୍‌ତାନ୍‌ ସାରାସ୍ ଆୟା ଆଇମା ଲାକ୍‌ତୁ ୱାତାଦୋ ନିରାତ୍ । 5 ଟିକ୍ ଆୟା ୱେଡ଼ାଦୁ ଆଇମା ଅରେନ୍‍ କଡ଼ପିଲାଦିଙ୍ଗ୍ ଜନମ୍‌ କିତାତ୍ । ମାତର୍‌ ଲୁୱା ଦଣ୍ତ୍‌ ସାକାଦାନ୍ ୱିଜୁ ଜାତିମୁସୁକୁ ସାସନ୍ କିନି ଉଣ୍ତିଙ୍ଗ୍ ଟିକ୍ ବେଡ଼ାଦୁ ଆୟା କଡ଼ ପେରାୟ୍‌ଆଜି ମାପୁରୁ ସିଂହାସନ୍ ଲାକୁତୁ ଅଆୟ୍‍ ଆତାନ୍‍ । 6 ମାରି ଆୟା ଆଇମା ମରୁଜାଗାଦୁ ଉର୍‌କୁତାତ୍‌ । ଆବେନୁ , ଦିନ୍‌ ସାନ୍ଦି ୱାଦ୍‌ ମାନି ଜାଗା ମାପୁରୁ ତିଆର୍ କିତାସିତାମାର୍ହାନ୍‌ ।

7 ✝ତାନିୱେନ୍‍କା ମୁସ୍‌କୁପୁର୍‌ଦୁ ଜୁଦ୍‍ ଆରାମ୍‌ ଆତାତ୍ । ମୀଖାୟେଲ୍ ମାରି ତାମେ ଦୁତ୍‌କୁ ଆୟା ପେରି ସାରାସ୍‍ ମାରି ତାନି ସେବାକିନିୱାରି ୱାଲେ ଜୁଦ୍‍ କିତାତ୍ । 8 ଜୁଦଦୁ ସାରାସ୍ ମାରି ତାନି ଦୁତ୍‌କୁ ଆରାତାର୍ ମାରି ୱାର୍‌ ମାରି ମୁସ୍‌କୁପୁର୍‌ଦୁ ଜାଗା ପୋଇଏତାର୍ । 9 ✝ଆୟା ସାରାସ୍ ଆଜିନାତ୍, ୱିଜୁ ଦୁନିଆଦିଙ୍ଗ୍‍ ବାଣ୍ତିସ୍‍ କିତିମାନି ସାକ୍ତି ପୁର୍ବେଦି ସାରାସ୍, ସୟତାନ୍; ତାନି ଦୁତ୍‍କା ୱାଲେ ମୁସ୍‌କୁପୁର୍‌ଦାନ୍ ପୋକାୟ୍‌ଆଜି ଦୁନିଆଦି ମୁସୁକୁ ୱାଜି ଆର୍‌ତାତ୍ ।

10 ତାନିୱେନ୍‍କା ନାନୁ ମୁସ୍‌କୁପୁର୍‌ତୁ ପେରି ଆଉଲିଆଜିନିକା ଉଣ୍ତ୍ରି ମାଟା ୱେର୍‌ଆ, "ଇଲେଇ ମାପୁରୁଦି ରକିୟା ଇତାତ୍‌ । ୱାନି ରାଜା ସାକ୍ତି ମାରି ୱାନି ମସିହଦି ଅଦିକାର୍ ତରତାମାନାନ୍ ଏମେ ମିଚ୍‌ୱେର୍‌ନିକାନ୍‌ ୱେଡ଼େ ନାଡ଼ା ମାପୁରୁଦି ଆଗିଡ଼ି ନିଲିଜି, ମା ମାପୁରୁଦି ତଡ଼ାନ୍‌କା ନି ତାଙ୍ଗିଁକା ବିରୁଦ୍‌ତାନ୍ ମିଚ୍ ଦାବି କିଜିମାର୍ହାତ୍‍, ୱାନ୍‌ ନେରୁ ମୁସ୍‌କୁପୁର୍‌ଦାନ୍ ପୋକାଇଆତାନ୍ । 11 ମେଷସାବକଦି ନେତେର୍‌ତି ସାକ୍ତିଦାନ୍ ମାରି ୱାର୍‌ ସାକ୍ୟ ୱେରିସିମାନି ସତ୍ ବିସୟ୍‌ ଉଣ୍ତିଙ୍ଗ୍‌ ଜିବନ୍‌ସିଦେଙ୍ଗ୍ ତିଆର୍‍ ଆତିମାନିଙ୍ଗ୍‌ ମା ତଡ଼ାନ୍‌କୁ ନି ତାଙ୍ଗିଁକି ଜିଣାତାମାନାର୍ । 12 ଆର୍‌ତିଙ୍ଗ୍‌ ମୁସ୍‌କୁପୁର୍‌ ନି ଦୁନିଆଦୁମାନି ୱିଜେରେ ୱେଡ଼ିକା କିଦୁ । ମାତର୍‌ ଆୟ୍‌ ! ଦୁନିଆଦି ବୁମି ନି ସାମ୍‌ଦୁରୁ ୱିଜୁ ! ମି ଦଣ୍ଡ୍‌ ଏସା ବୟ୍‌ଙ୍କାର୍ ! ଇଲେ ସୟତାନ୍ ମି ଲାକୁତୁ ମାରି ୱାଦ୍‌ ବେସି ରିସାଆତାମାନାତ୍, ମାତର୍‌ ୱାଦ୍‌ ନେସ୍‍ନାତ୍, ତାନି ୱେଡ଼ା ଇଗା ୱାତାତ୍‌ନି ।"

13 ଦୁନିଆଦୁ ପୋକ୍‌ନିକା ସୁଡ଼ୁଜି ସୟତାନ୍ କଡ଼ଦି ଜନମ୍‌ସିତି ଆୟା ଆଇମାଦିଙ୍ଗ୍‍ ପେରିତାତ୍ । 14 ସାରାସ୍‌ଦି ଆକ୍ରମଣଦାନ୍ ରକିୟା ପୋଇନି ଉଣ୍ତିଙ୍ଗ୍ ଆଇମାଦିଙ୍ଗ୍‍ ରୁଣ୍ତି ପେରି ଡେଗା ପୋଟିଦି ରେକେଙ୍ଗ୍‍ ସିଆୟ୍‌ଆତାତ୍‌ । ତାନି ସାକାଦାନ୍ ୱାଦ୍‌ ମରୁଜାଗାଦୁ ନିଜେଦି ତେବାନି ବାଡିଦୁ ଇମିଜିସଲ୍‍ସି, ଆବେନୁ ମୁନ୍‌ଡ୍ରି ବାର୍ସେକ୍ ଆଦା ସାନ୍ଦି ସାନ୍ତିଜାଗାଦୁ ତେବାଦେଙ୍ଗ୍‌ ଇଚାକିତାତ୍ । 15 ତାନିୱେନ୍‍କା ଆଇମାଦିଙ୍ଗ୍‍ ଏରୁତୁ ଦେଲ୍‌ପିସ୍‌ ଅତେଙ୍ଗ୍‌ ଇଜି ସାରାସ୍ ନିଜେଦି ୱେୟୁଦାନ୍ ତାନି ୱେନ୍‌କା ୱେନ୍‍କା ଉଣ୍ତ୍ରି ପିରୁଏରୁ ସପ୍‍ତାତ୍ । 16 ମାତର୍‌ ଆଇମାଦିଙ୍ଗ୍‍ ରକ୍ଷାକିନି ଉଣ୍ତିଙ୍ଗ୍‌ ଦୁନିଆ ନିଜେଦି ୱେୟୁ ରେସି ସୟତାନ୍‍ତି ୱେୟୁଦାନ୍ ସୋସିମାନି ୱିଜୁ ଏରୁଦିଙ୍ଗ୍‌ ଉଟାନ୍ । 17 ଆବେଟ୍‌କୁ ସୟତାନ୍ ଆଇମାଦି ମୁସୁକୁ ନାଣ୍ତରିସା ଆଜି, ତାନି କୁଟୁମ୍‌ ଏମେ ତେବାତି ଲୋକୁ ମାପୁରୁଦି ମାଟା ମାନାନାର୍ ମାରି ଜିସୁଦି ବିସୟତାନ୍‍ ସାକି ସିନାର୍‍, ୱାରି ୱାଲେ ଜୁଦ୍‍ କିଦେଙ୍ଗ୍ ସତାତ୍ । 18 ମାରି ସୟତାନ ସାମୁଦୁର୍‍ଦି ପାଡ଼ି ସଲ୍‍ସି ନିରାନ୍ ।