ପେରି ଦାରିପାଣି
1 ତାନିୱେନ୍କା ସାତ୍ଗୋଟା ଡୁବାଇଆସ୍ତିମାନି ସାତ୍ଗୋଟା ଦୁତ୍କା ଲୋଇରାନ୍ ଅରେନ୍ ନା ଲାକୁତୁ ୱାଜି ଇର୍ହାନ୍, "ଇବେନୁ ରାଆ ! ନାଣ୍ତ ଗାଡେଆଙ୍ଗ୍ଁ ଲାକୁତୁ ତିଆର୍ ଆତିମାନି ଦାରିପାଣି ୱାଜା ଆୟା ପେରିଗାଡ଼୍ ଏସ ଦଣ୍ତ୍ ପୋଇନାତ୍, ଆକା ତୋର୍ନା । 2 ଆମାୱାନି ୱାଲେ ଦୁନିଆଦି ରାଜାର୍ ଆୟା ଦାରିପାଣିଦି କିତାମାନାର୍ ମାରି ପୃଥିବିଦି ଲୋକ୍ ୱିଜେରେ ୱାନି ଦାରିପାଣିୱାଜା କାଡ଼ୁ ଉଣୁଜି ସୋସତା ମାନାର୍ ।"
3 ୧୭:୩ ପ୍ରକାଶିତ ୧୩:୧. ନାସ୍ତିୱାଲେ ପବିତ୍ରଆତ୍ମା ନାମାନୁ ବାସାତାତ୍ ମାରି ଆୟା ଦୁତ୍ ନାଙ୍ଗିଁ ଉଣ୍ତ୍ରି ବାଲିଜାଗାଦୁ ଅତାତ୍ । ଆବେନୁ ନାନୁ ସୁଡ଼ୁତା, ଅରେତ୍ ଆଇମା ଲୋକୁ ଉଣ୍ତ୍ରି ଲାଲ୍ ରଙ୍ଗ୍ତି ଜାତୁ ମୁସୁକୁ ବାସ୍ତାମାନାତ୍ । ଜାତୁଦି ୱିଜୁମେଦଲ୍ତୁ ମାପୁରୁଦି ନିନ୍ଦାସିନି ଦର୍କୁ ରାସାତେମାନେ ମାରି ତାନିଙ୍ଗ୍ ସାତ୍ଗୋଟା ତାଲେକ୍ ମାରି ଦାସ୍ଗୋଟା କମୁକୁ ମାନେ । 4 ଅରେତ୍ ଆଇମା ସେର୍ଗାନାନିକା ମାରି ପୁରା ଲାଲ୍ ରଙ୍ଗ୍ତି ୱାତି ପିଡ଼ିଗିତାମାର୍ହାତ୍ ମାରି ବାଙ୍ଗାଁରାମ୍ତି ସରେଙ୍ଗ୍, ନାଣ୍ତଦାରାଦି ମଣିମାଣିକ ମାରି ୱେଡିଦାନ୍ ଆରାତାମାର୍ହାତ୍ । ୱାନି ନାସ୍ଟୁକିନି ପଲ୍ ୱାଜା ଦାରିପାଣି ନି ତାଗ୍ଇ ବିସୟୱିଜୁ ଉଣ୍ତ୍ରି ବାଙ୍ଗାରାମ୍ତି ଡୁବାଇ ୱାନ୍ ଆସ୍ତାମାର୍ହାନ୍ ।