1 ପୁର୍ବେଦାନ୍ ମାପୁରୁ ଆଇ ବେଡ଼ାଦୁ ମାରି ଆଇ ଆଇ ଉପାୟତାନ୍ ବାବବାଦିରି ମାଡ଼ାନ୍ ମା ଡକ୍ରାଦାଦାରିଙ୍ଗ୍‍ କାବୁର୍ ସିତାମାର୍ହାନ୍, 2 ମାତର୍‌ ଇୟା ୱିଜିନ୍‌ ଦୁନିଆଦୁ ୱାନ୍‌ ନିଜେଦି ମାରିନ୍‌ତି ମାଡ଼ାନ୍ ମା ୱାଲେ ୱାରିଗିତାମାନାନ୍ । ଆୟା ମାରିନ୍‍ତି ମାଡ଼ାନ୍ ନେ ମାପୁରୁ ସାରାଦୁନିଆଦିଙ୍ଗ୍‌ ତିଆର୍‌କିତାନ୍‌ ମାରି ସାରାସାରିୱେନ୍‌କା ୱିଜୁ ବିସୟ୍‌ତି ଅଦିକାରି ଆନି ଉଣ୍ତିଙ୍ଗ୍ ୱାନ୍‌ ୱାନିଙ୍ଗ୍‌ ବାସେକିତାନ୍ । 3 ୱାନିମାନୁ ମାପୁରୁଦି ମହିମା ଜାୟ୍‌ କିବିସ୍‍କିତାମାନାନ୍‍ ମାରି ପୁରା ମାପୁରୁଦି ନିଜେଦି ରୁପ୍‍ୱାଜା । ମାରି ୱାନ୍‌ ନିଜେଦି ସାକ୍ତି ବାକ୍ୟ ଦାନ୍ ୱିଜୁଦେସ୍‍ତିଙ୍ଗ୍ ସାଲା କିତାମାନାନ୍ । ୱାନ୍‌ ଲୋକା ଜାତି ଉଣ୍ତିଙ୍ଗ୍‌ ପାପ୍‌ କେମା କିଜି ମୁସ୍‌କୁପୁର୍‌ ମହାମହିମା ମାପୁରୁଦି ଉଣିକିୟୁ ତରିନ୍‌ ବାସ୍‍ତାମାନାନ୍ ।

4 ୱାନ୍‌ ମୁସ୍‌କୁପୁର୍‌ତି ଦୁତ୍‍କା ବାଦ୍‍ଲୁ ଏଣ୍ତେସ୍ ପେରିକାନ୍‌, ୱାନି ଦରୁ ବା ଆୟାୱାଜା ତାମେକା ଦରୁ ବାଦ୍‍ଲୁ ନାଣ୍ତ ପେରିକା । 5 ଇରିଙ୍ଗ୍‌ ଏସାଙ୍ଗ୍‍ବା ମାପୁରୁ ଏମେ ଦୁତ୍‍କାଙ୍ଗ୍‍ଁ ଇନ୍‌ଏନ୍‌ :

"ନିନୁ ନା ମାରିନ୍‌,

ନେର୍‍ରାନ୍ ନାନୁ ମି ବୁବା ଆତାମାନା ।"

ମାପୁରୁ ବା ଇର୍ହାନ୍‌,

"ନାନୁ ୱାନି ବୁବା,

ମାରି ୱାନ୍‌ ନା ମାରିନ୍‌।"

6 ମାତର୍‌ ମାପୁରୁ ୱାନି ଆଗ୍‌ଡ଼ିରି ମାରିନ୍‌ତିଙ୍ଗ୍‌ ଇୟା ଜଗତ୍‌ତୁ ପୋକ୍‍ତି ୱାଲେ ଇକା ଇର୍ହାମାର୍ହାନ୍ :

"ମାପୁରୁଦି ଦୁତ୍‍କୁ ୱିଜୁ ୱାନି ପୁଜା କିନେ ।"

7 ମାତର୍‌ ମୁସ୍‌କୁପୁର୍‌ତି ଦୁତ୍‍କା ବିସୟ୍‌ତାନ୍ ମାପୁରୁ ଇୟା ମାଟା ଇର୍ହାମାନାନ୍‌;

"ମାପୁରୁ ନିଜେଦି ଦୁତ୍‍କାଙ୍ଗ୍‌ ଗାଲି ୱାଜା

ମାରି ନିଜେଦି ସେବାକିନିୱାରିଙ୍ଗ୍‌ ସିସୁଡ଼ିବୁ ୱାଜା କିନାନ୍ ।"

8 ୱାନି ମାରିନ୍‌ତି ବିସୟ୍‌ତାନ୍ ୱାନ୍‌ ଇର୍ହାମାର୍ହାନ୍ :

"ଏ ମାପୁରୁ, ନି ରାଜି ୱିଜୁଦିନ୍‌ ମାନିତ୍ !

ନିନୁ ନ୍ୟାୟଦଣ୍ତତାନ୍‌ ନି ଲୋକାଙ୍ଗ୍‌ ସାସନ୍ କିଜିନି ।

9 ନିନୁ ନେଗିତାନିଙ୍ଗ୍‌ ଜିବନ୍‌ନୋନି ମାରି ତାଗ୍‌ଇ ତାନିଙ୍ଗ୍‌ କାଡ଼୍‍ନି ।

ଆୟାଉଣ୍ତିଙ୍ଗ୍‌ ମି ମାପୁରୁ ନିଙ୍ଗିଁ ବାସେ କିତାମାନାନ୍

ମାରି ନି ସାଙ୍ଗର୍‌ ବାଦ୍‍ଲୁ ନିଙ୍ଗିଁ ଅଦିକ୍‍ନାଣ୍ତ ମାନାଜି ୱେଡ଼ିକାଦି ନିୟୁଦାନ୍‌ ଉସୁତାମାନାନ୍‌ ।"

10 ୱାନ୍‌ ମାରି ବା ଇର୍ହାମାନାନ୍‌ :

"ଏ ପ୍ରବୁ, ନିନୁ ଆଗ୍‍ଡ଼ିନେ ଦୁନିଆ ତିଆର୍ କିତି,

ମାରି ନିଜେଦି କିୟୁଦାନ୍‌ ବାଦଡ଼୍‍ ତିଆର୍ କିତି ।

11 ଆୟାୱିଜୁ ଅର୍‍ଲେନ୍‍ ମାରାଗ୍‌ନାତ୍‌ । ମାତର୍‌ ନିନୁ ୱିଜୁଦିନ୍ ମାନି;

ୱାର୍‌ ପାଡ଼ିଇ ଆଙ୍ଗିଁ ୱାଜା ନାସ୍ଟୁ ଆନାର୍ ।

12 ଆଙ୍ଗିଁପାସିୟା ରସ୍‍ତି ୱାଜା ନିନୁ ଆୟାୱିଜୁ ରସ୍‍ନି ଇଡ୍‌ନି

ମାରି ଆଙ୍ଗିଁ ବାଦେଲେକିନି ୱାଜା ବାଦ୍‍ଲେ କିନି ।

ମାତର ନିଜେ ନିନୁ ବାଦ୍‍ଲେଆଇ

ମାରି ନିନୁ ୱିଜୁଦିନ୍‌ ତେବାନି ।"

13 ମାପୁରୁ ୱାନି ଏମେ ଦୁତ୍‍କାଙ୍ଗ ଏସାଙ୍ଗ୍ ଇନ୍‌ଏନ୍‌,

"ନାନୁ ନି ସାତ୍ରୁରିଙ୍ଗ୍‌ ନି କାଲ୍‌କା ଆଡ୍‍ଗି କିଏତି ସାନ୍ଦି

ନିନୁ ନା ଉଣେରି କିୟୁ ତରିନ୍‌

ବାସ୍‍ସୋମାନ୍‍ଆ ।"

14 ଆର୍‌ତିଙ୍ଗ୍‌ ମୁସ୍‌କୁପୁର୍‌ତି ଦୁତ୍‍କୁ ଏର୍‌ ? ୱାର୍‌ ଆଜିନାର୍ ମାପୁରୁଦି ସେବାକିନିକାର୍‍, ରକିୟା ପୋଇତିମାନି ଲୋକୁଦି ସାକା ଉଣ୍ତିଙ୍ଗ୍‌ ମାପୁରୁଦି ମାଡ଼ାନ୍ ପକାତି ଆତ୍‍ମେଙ୍ଗ୍‍ ।