1 ମାଙ୍ଗିଁ ଏମେ କିଣାନ୍‌ ଦେସ୍‌ ସିନା ଇଜି ମାପୁରୁ ଇର୍ହାମାର୍ହାନ୍‍, ଆକା ମାଡୁ ପୋଇଦେଙ୍ଗ୍ ଆଟ୍‍ନିକା ଇଜି ମାପୁରୁ ପାର୍‍ମାଣ୍‍ କିତାମାନାନ୍ । ଆୟା ପାର୍‍ମାଣ୍‍ତି ରମ୍‍ନିମାଣାନ୍‍ ଏନ୍‌ ଏଣ୍ତେସ୍ ତେବାମାକିନ୍‍, ଆୟା ଉଣ୍ତିଙ୍ଗ୍‌ ଜାଗାର୍‌ତା ତେବାଦୁ । 2 ଇରିଙ୍ଗ୍‌ ୱାରିୱାଜା ମାପ୍‌ ବା ସୁସମାଚାର୍‌ ୱେରିମାନିକା । ୱାର୍‌ ଆକା ୱେନ୍‌ଜି ବା ବିସ୍‍ବାସ୍‍ଦୁ ମାନାଏତାର୍ । ଆଦେଙ୍ଗ୍‍ଁ ୱାରି ଉଣ୍ତିଙ୍ଗ୍‌ ଆକା ନେଗିକା ଆଏତାତ୍ । 3 ମାତର୍‌ ମା ଲୋଇରାନ୍‌ ଏମେକାର୍ ବିସ୍‌ବାସ୍‌ କିନାର୍, ୱାର୍‌ ନେ ମାପୁରୁଦି ପାର୍‍ମାଣ୍‍ତି ରମ୍‍ନିକା ପୋଇନାର୍, ଇରିଙ୍ଗ୍‌ ମାପୁରୁ ଇର୍ହାମାନାନ୍‌,

ନାନୁ ରିସାଆଜି ପାର୍‍ମାଣ୍‍ କିତା :

ୱାର୍‌ ନା ରମ୍‍ନିମାନୁ ସନ୍‌ଡ୍ରେଙ୍ଗ୍‌ ଆଟ୍‌ଏର୍‍ ।

ମାରିବା ଇୟା ରମ୍‌ନିକା ଦୁନିଆଦି ତିଆର୍‌ ଆନି ବେଡ଼ାଦାନ୍‍ ତିଆର୍‌ଆତା ମାନାତ୍‌ । 4 ଦାର୍ମୁସାସ୍ତ୍ରଦି ଏମେ ଉନ୍‌ଡ୍ରି ବାଡିଦୁ "ସାତ୍‌ ଦିନ୍" ବିସୟତାନ୍ ଇୟାୱାଜା ରାସାତାମାନାତ୍‌, "ମାପୁରୁ ୱାନି ୱିଜୁ ପାଣି ପୁରାକିଜି ସାତ୍‍ ଦିନ୍‍ତୁ ରମିତାନ୍ ।" 5 ମାରି ଇୟା ବିସୟ୍‌ତାନ୍‌ ଆଇମାନୁ ରାସାତାମାନାତ୍‌, ମାପୁରୁ ଇର୍ହାନ୍‌, "ୱାର୍‌ ନା ରମ୍‍ନିମାନୁ ଏସାଙ୍ଗ୍‌ ବା ସନ୍‌ଡ୍ରେଙ୍ଗ୍‌ ଆଟ୍‍ଏର୍‍ ।" 6 ଏମେକାର୍ ଆଗ୍‍ଡ଼ିନେ ସୁସମାଚାର୍‌ ୱେର୍‌ଆମାର୍ହାର୍, ନିଜେଦି ଅବିସ୍‍ବାସ୍ ଉଣ୍ତିଙ୍ଗ୍‌ ଆୟା ରମ୍‍ନିକା ପୟ୍‌ଦେଙ୍ଗ୍‌ ଆଟ୍‌ଏତା ମାର୍ହାର୍‌ । ଇଲେଇ, ଆଇକାର୍‌ ଆୟା ରମ୍‍ନିକା ପୟ୍‌ଦେଙ୍ଗ୍‌ ସୁଜୋଗ୍‌ ପୋଇତାମାନାର୍‌; 7 ଇରିଙ୍ଗ୍‌ ୱାରି ଉଣ୍ତିଙ୍ଗ୍‌ ମାପୁରୁ ଆଇ ଉନ୍‌ଡ୍ରି ଦିନ୍ ତିଆର୍‌ କିତାମାନାନ୍ ମାରି ଆକା ଆଜିନାତ୍, "ନେରୁ ।" ନେଗି ବେଡ଼ାଦୁ ନାଣ୍ତ ବାର୍ସେକ୍ ୱେନ୍‌କା ମାପୁରୁ ରାଜା ଦାଉଦଦି ମାଡ଼ାନ୍ ଇୟା ବିସୟ୍‌ ରାସାତିମାନି ସାସ୍ତ୍ର ବାକ୍ୟଦୁ ୱେର୍‌ତା ମାର୍ହାନ୍‌ :

"ନେରୁ ଜଦି ମିର୍‌ ମାପୁରୁଦି ବାକ୍ୟ ୱେନିଦେର୍‌,

ଆର୍‌ତିଙ୍ଗ୍‌ ଜିବନ୍‌ ଆଟୁୱା କିମାଟ୍ ।"

8 ଜଦି ଯିହୋସୁୟ ଲୋକାଙ୍ଗ୍‌ ମାପୁରୁଦି ପାର୍‍ମାଣ୍‍ତି ରମ୍‍ନିକା ସିଦେଙ୍ଗ୍‌ ଆଟ୍‍ତାନ୍‍ମାନ୍ଦି, ଆର୍‌ତିଙ୍ଗ୍‌ ମାପୁରୁ ୱେନ୍‌କା ଆଇ ମାରିଉନ୍‌ଡ୍ରି ରମ୍‌ନିଦିନ୍ ମାଟା ରାସ୍‌ଏତାନ୍‍ମାନ୍ଦି । 9 ମାରି ଇକା ସତ୍‍ ଜେ, ସାତ୍‍ଦିନ୍‍ତୁ ମାପୁରୁ ରମ୍‍ନି ୱାଜା, ୱାନି ଲୋକା ଉଣ୍ତିଙ୍ଗ୍‌ ଉଣ୍ତ୍ରି ରମ୍‍ନି ୱେଡ଼ା ଇଡାୟ୍‍ଆତାମାନାତ୍‍ । 10 ମାପୁରୁ ଏଣ୍ତେସ୍ ନିଜେଦି ପାଣିଦାନ୍‌ ରମିତାନ୍, ଏନ୍‌ ମାପୁରୁଦି ପାର୍‍ମାଣ୍‍ତି ରମ୍‍ନିମାନୁ ଡ଼ୁଗିତା ମାନାନାନ୍‍, ୱାନ୍‌ ବା ନିଜେଦି ପାଣିଦି ୱାନ୍‍ନ୍ଦିମାଣୁକୁ ରମ୍‍ନାନ୍ । 11 ମା ଲୋଇରାନ୍‌ ଏନ୍‌ ଏଣ୍ତେସ୍ ନିଜେଦି ଅବିସ୍‍ବାସ୍ ଉଣ୍ତିଙ୍ଗ୍‌ ଆୟା ଲୋକା ୱାଜା ଇୟା ରମ୍‍ନିମାଣାନ୍‍ ତେବାଏନ୍‍, ଇୟାଉଣ୍ତିଙ୍ଗ୍‌ ଆଟ୍‌ନି ସାନ୍ଦି ସେସ୍ଟା କିନାଟ୍‍ ।

12 ମାପୁରୁଦି ବାକ୍ୟ ଜିବନ୍‌ ମାରି ସାକ୍ତିମାନିକା । ଆକା ରିୟାଙ୍ଗାଁଦି ଦାରା କାଣ୍ତା ବାଦ୍‍ଲୁ ନାଣ୍ତ ଦାରା; ଆମାମାନୁ ଆତ୍ମା ନି ଜିବନ୍‌ ମାରି ସିରେଙ୍ଗ୍‍ଁ ନି ପେଡେନ୍‌ରସ୍‌ ଲୋଇ, ମାରି ଲୋକା ଜିବନ୍‍ତି ଆସା ମାରି ଚିନ୍ତାଦି ବିଚାର୍ କିନିକା । 13 ମାପୁରୁଦି ମାଡ଼ାନ୍ ଇନି ବିସୟ୍‌ ମାର୍‍ଗେଏତ୍‍; ୱିଜୁ ତିଆର୍‍ଆତିମାନୁ ୱିଜୁ ବିସୟ୍‌ ୱାନି ୱିଜୁସୁଡ଼ୁଜିନି କାଣୁକୁ ଆଗ୍‌ଡ଼ି କେର୍‍ପାୟ୍‍ ଆଏତ୍‍ ମାରି ରେଆତାମାନାତ୍‍ । ଆୟା ମାପୁରୁଦି ଆଗ୍‍ଡ଼ି ମାଙ୍ଗିଁ ଇସାବ୍‌ ସିଦେଙ୍ଗ୍‌ ପୋଡ଼ାନାତ୍ ।

14 ଆଦେଙ୍ଗ୍‍ଁ ମାଡୁ ଏମେ ଦାର୍ମୁବିସ୍‍ବାସ୍‍ତିଙ୍ଗ୍‍ ମାନାଜିନିକା, ଆକା ଆଟ୍‍ୱାଦାନ୍‍ ଆସ୍‌ସି ଇଡ୍‍ଦେଙ୍ଗ୍‌ ଆନାତ୍‌; ଇରିଙ୍ଗ୍‍ଁ ମା ୱିଜେରିଙ୍ଗ୍‌ ପେରିଯାଜକ, ମାପୁରୁଦି ମାରିନ୍‌ ଜିସୁ, ମାପୁରୁଦି ଲାକ୍‍ତୁ ସର୍ହାମାନାନ୍‍ । 15 ଏନ୍‌ ମା ଦୋସ୍‌ ଦୁର୍ବଲ୍ ଚିନ୍ତା କିଦେଙ୍ଗ୍ ଆଟ୍‍ଏର୍‍, ଆୟାୱାଜା ପେରିଯାଜକ ୱାନ୍‌ ଆଏନ୍‍ । ମାତର୍‌ ମା ପେରିଜାଜକ, ମା ୱାଜା ୱିଜୁଦି ପରିକାଦୁ ଆର୍‌ତାମାର୍ହାନ୍‍, ମାତର୍‌ ୱାନ୍‌ ପାପ୍‌କିଏଣ୍‌ଗା ତେବାତାନ୍‍; 16 ଆଦେଙ୍ଗ୍‍ଁ ମାପ୍‌ ସାସ୍‌ତାନ୍‌ ମାପୁରୁଦି ଦୟା ରାଜାଗାଦି ଲାକ୍‌ତୁ ସନ୍‍ଡ୍ରେଙ୍ଗ୍ ଆଟ୍‌ନାପ୍‌ । ଆବେନ୍‌ ମା ଟିକ୍‌ ବେଡ଼ାଦୁ ମା ନେଗି ଉଣ୍ତିଙ୍ଗ୍‌ ଦୟା ନି ଦୟା ପୟ୍‌ନାପ୍‌ ।